1 Iesu ro 12 kowasoro urubia iato gidabuai atu moro to taie nou ro pupuwo korosa nato gimia, neio ro isioidiro ri pupuwo korosa tanaro. Idaibo temeteme urubia neio ro meana kiwaititi aboto, ina ibose erere ubauba urio neio ro imabodoidiro ri urubia aboudo. 2 Taie neio Iesu ro iato gitiodorai urubia imowauti ri Godi ro kiwaboi tanaro beda sosoro owamo, ibose temeteme urubia meana iwaititi ri. 3 Neio Iesu ro iato gimowauti, ‘Nio namadimo-ou-ri namabu tato ba-dou-mo. Nedi namabu ro nio ro iwou ate, kiradiouti gonopu, bukio, dokou, mani ibose kiroidiro namabu. 4 Nio namadimo-ou-ri beda moto rido kiramairiai ra, iedi moto ro iato se gi-orowomidiro-ri womu tato edi sabowa ro nio ro na-emeserai-dumo. 5 Nio ata sabowa urubia ro kiramairiai tato iedi sabowa ro aise gi-emeserai-ri, sairo panese se gi-imahudumai-ri neio umoro koi sapuwo to ibo morobise ie nimo Godi aboudo ubauba wisa anamadimi-iwia-ri.’

6 Nedi kowasoro urubia ro imese gaimai-rimo, sabowa gabogabo goroho-rimo urubia iato gimowauti-rimo mea owera Iesu sapuwo to. Neio ro ibose temeteme urubia meana ta-giwaititi-rimo.

7 Herodi Gariri duriomoro eputa dubu e, nou ro na-irowidirotiti Iesu ro edi tanaro ro na-isioidirotiti nu a-iradorutititi kimaragoidiro mutu. Amia urubia ro ibo iarotiti-mo, ‘Iesu nu Ioane ie obo to kiwarumiauti dubu ina bobo rido ta-geribua-die.’ 8 Ina arua ro ibo iarotiti-mo, ‘Iesu nu Eraia ie nou ro gorowameai-die nimo aboto.’ Ibose arua urubia ro ibo, ‘Iesu nu Godi ipusu owera dubu e keba ia tau ato na-irowomidirotiti neio ata ro gorowameai-die.’

9 Kaupoti Herodi ro ibo, ‘Ioane mo owera to ta-garia-rimo ina nedi owera ro mo ro beda dubu sapuwo to nirowidiro?’ Herodi auna ia ubi ro owamotiti Iesu sosoro kowea.

10 Iesu kowasoro urubia na-gorowame-rimo erere sabowa rido, neio ro edi tanaro gisioidiro-rimo, Iesu aboto iato giwauti-rimo. Ina neio ioudo Iesu ro ata sabowa to aise gioupiriai, sabowa masiro Betesaida neito gou-rimo. Iesu ubi ie neio atu se aradabuai ri nakara moro ato. 11 Kaupoti urubia umoro ta-goi-rimo Iesu kowasoro urubia mutu beda moro to gou-rimo, ina Iesu neio ro saro rido aise gobodoro-rimo. Taie Iesu ro neio na-giwia nou ro kamade mutu aise giramairiai ina nou ro iato gimowauti Godi ro kiwaboi tanaro sapuwo to. Etio ro gou-rimo temeteme mutu Iesu ro meana aise giwaititi.

12 Saiki ta-goriodidiro adimo ro gereredea-ro, Iesu aboto 12 kowasoro urubia nato gou-rimo, neio ro ibo, ‘Nedi moro ro urubia mutu moro pua, nedi urubia ro ba-ditiodorai, neio aupi sabowa to morowame-mo, iato ba-mirobu ohona simara mani to ba-meremamade-mo.’

13 Ina Iesu ro nato gutura 12 kowasoro urubia aboto, ‘Ina nibi ia ro modobo ie nedi urubia ro ohona to kiwarebai.’

Kowasoro urubia ro ibo, ‘Neibi abato 5 dokou koura, nakere koura teibo mutu neibi ro iamo-ibi taie nou se ie. Ina oro beda sosoro imaragoidiro nedi urubia sirio ro neio sapuwo to, ohona nimo ro imamade-ri ra?’ 14 Dubu kawakawa kioputi ato imese 5,000.

Iesu ro iato gimowapotai nou kowasoro urubia, ‘Urubia ibo ba-diwomititi-mo ata soirio 50, ata soirio 50.’ 15 Iesu owera gabo modobo kowasoro urubia ro urubia iato giwomititi-rimo. 16 Taie Iesu ro 5 dokou koura nakere koura teibo mutu iato gimidai, toboro to na-gawota eso owera iato garo ohona sapuwo to. Taie Iesu ro dokou nakere mutu na-gisebuti kowasoro urubia aboto iato giaiwo, urubia soirio gabogabo neio ro imoworoho ri. 17 Urubia sirio edi ohona ro na-giho-rimo neio imese modobo ta-goi-rimo, ata erihe pua. Neio aboudo edi ohona sapuwo ro na-geremeserai-rimo kowasoro urubia ro 12 gatere nou giodiawado-rimo.

18 Ata tau Iesu nakara moro to na-gou Abera Godi aboto araratoro ri, kowasoro urubia nou aboto nato gou-rimo. Neio nou ro nato gimodowa, ‘Mo urubia ro etu to nasoro-dumo?’

19 Ina kowasoro urubia ro ibo, ‘Arua ro ibo aro-dumo oro Ioane ie obo to edi dubu ro iwarumiautiti oro nou e. Ina arua ro ibo aro-dumo oro Eraia ie, ina arua ro ibo aro-dumo oro Godi ipusu owera dubu e keba se edi urubia ro na-gorowomidiro, oro neio ata ro gorowameai-die.’

20 Iesu ro neio ina iato gimodowa, ‘Kaupoti ina nio ia beda sosoro imaragoidiro-dumo, mo nio ro etu to nasoro-dumo?’

Ina Pita ro ibo gemowameai, ‘Oro Godi ro kohodowa dubu nou se ie.’

21 Taie Iesu ro neio koko owera iato gimia, ‘Nio ro urubia imowapotaidiro ate!’

22 Iesu ro nou kowasoro urubia ibo gimowauti, ‘Imese Urubia Kiauri Dubu mo nou se ie. Mo saiki ata Iu duriomoro kiauri awawo urubia ro, Godi ra urubia ra turituri awawo urubia mutu, ibose Mose sabi kitamudiro urubia, mo neio ro ubauba mino to anamadimo-oworohuti-ri. Mo neio ro anamadime-ebeiouti-ri, ibose mo neio ro anamadimo-opia-ri, ina netewa didi saiki nama-orobai-ri mo Godi ro pamo rido anamadi-owameai-ri.’ 23 Iesu ro sirio urubia aboto iato gutura, ‘Etio ra ubi na-iamo mo kobodoro aboto neio simara durupi nakara se eremaragoidiro-ri pua, neio ro simara ubi tanaro isioidiro-ri pua. Ibose neio ro modobo ie saiki gabogabo ato Godi ubi tanaro se kisioidiro, ina pamo kowea nou sapuwo to, io modobo ia ie, ina mo saro rido kowasoro. 24 Mabu etio ra simara durupi sapuwo to na-eremaragoidiro-dumo, neio edi keremiro ro saiki ata amadimi-iaseperai-ri. Etio ra keremiro namadimi-iasepere-ri mo sapuwo to, neio ro orio keremiro amadimi-iauri-ri.

25 Nio etio ra sirio namabu na-iworohuti-dumo ina nio pamo nato namadimi-iauri-ri, nio era ato ama-irowomidiro-ri modobo ra nio aboudo? E e modobo ia pua.

26 Ibose mo etio ro nemowabe-dumo ina mo owera na-waratiouti-dumo, wisana neio mo ro ubi tato anama-iwia-ri. Mo nou se ie Imese Urubia Kiauri Dubu to na-napoi-ro ina mo korowameai tau ato nedi urubia ro mo ro ubi tato anama-iwia-ri. Mo edi tau ato namadi-orowameai-ri Godi tarena sowake urio sirio mutu mo abera edi woroworo ro nou ato anamadi-orowameai-ri. 27 Nio morobise owera nimowapotai, nio abora etio ro orowotoi nato, nio arua ido to amadimo-orowaburo-ri, saiki ata Godi edi kiwaboi tanaro ro nio ro amadimo-owea-ri.’

28 8 saiki koroporeai aupiaupi Iesu ro nedi owera ro kimowauti na-goporeai, taie nou ro Pita, Ioane, daro Iemisi neibi se gidabuai-ibi imese gidiai-birimo podo ohu to Iesu Godi mutu eremowauti rie. 29 Iesu kararatoro owera na-garo nou sosoro woidomari ata sosoro giwotoi, ibose nou edi obotama giroidiro benenio ia se gerememiouti-rimo. 30 Taie nou sosoro gabo ato netewa teibo dubu teibo Mose ra Eraia ra 31 nato gorowapotai-rido, nou mutu geremotoi-birimo, neibi durupi imese benenio ia se gerememiouti-birimo. Iesu beda sosoro ama-aimai-ri Ierusarema rido Godi ubi tanaro oporeai ri, neitiro nedi owera ro neito geremowagomea-rido Iesu mutu. 32 Isana Pita, boinana dubu teibo mutu neibi ata umoro tato ie edi tanaro ro na-gororosioidiro-rimo neibi norou ia ro giwagumaidiro-ibi. Kaupoti neibi norou aboudo na-gireribua-birimo neibi ro Iesu nato gowea-birimo netewa teibo dubu teibo mutu na-geremotoi-birimo, neibi edi durupi ro atu se ta-garatidiai-birimo imese woroworo ia se giwotoi-birimo. 33 Mose ra Eraia ra ro Iesu emeserai rie taie Pita ro ibo Iesu aboto, ‘Eputa dubu, modobo ie neibi atu se nato komidiro, neibi ro netewa didi mapagea peteibi anamabimi-imotomai-ibiri, ata oro do ie, ata Mose do ie, ata Eraia do ie.’ (Kaupoti Pita umoro pua nou ro beda owera garo.)

34 Pita ro nedi owera ro karo, toboro kere duwoduwo gororuwo-ro neibi nou ro aise giatimai-ibi. Toboro kere ro edi tau ato giahidimai-ibi kowasoro na peteibi neibi tere ro aise girobai-ibi. 35 Ina toboro kere maumo rido owera ioudo gutura-ro, ‘Nou mo ia mere ie, mo ro nou nohodowa. Modobo ie nibi ro nou owera se kirowidiro.’

36 Taie iedi owera ro neibi ro odio kirowai ro na-girorowai-birimo neibi ro nato Iesu se gowea-birimo na-gotoi. Ina iedi tau ro nato Pita, Ioane, daro Iemisi neibi ro edi tanaro ro na-gowea-birimo ata dubu ata neibi ro emowauti pua.

37 Ata saiki Pita Ioane Iemisi neibi mutu Iesu podo ohu rido na-giroruo-ibiro, neibi ro auna topira gebari nato gowea-birimo, neio imese ta-garadabuti-rimo Iesu gemotoi-rimo. 38 Taie ata dubu topira maumo rido owera mutu ioudo gerehidiro-ro. Nou ro ibo, ‘Kitamudiro dubu, nirimagare mo mere ma-dowea-ro! Mo kaupoti ia mere nou se ie 39 ubauba urio ro oworohutiti, nou ro kemahodowado pua, sirio tau aise eteamotiti, iamo mutu goto ato imese kerebesiouti ie. Ibose goto ato keteamoidiro ato tu ra sairo ra koko poroporo kiwaititi ie matagoro rido matatabu se kararadi ie. Mo mere sirio tau nou ro ubauba ibo owaitititi. 40 Oro edi kowasoro urubia ro mo ro egea se niwaibia neio ro edi ubauba urio ro nou aboudo owagare ri, kaupoti neio ata ro kosioidiro modobo pua.’

41 Iesu ro ibo, ‘Nio abora na-orowomidiro kerewaekerewae se ou-dumo, nio kimibiria tato ie! Mo dese a-neremiri ra nio mutu koroho? Mo beda mutu saiki niporeai nio mutu?’

Taie Iesu ro ibo iedi dubu ro nou aboto, ‘Oro mere neito ma-dowou-ro.’

42 Iedi mere ro abera ro na-gowou-ro Iesu aboto ubauba urio ro iato aise geteamoidiro imese giwiti. Kaupoti Iesu ro edi ubauba urio ro nou ro masawe to gemowapotai iedi mere ro nou ro emeserai ri, taie edi mere ro meana aise goi. Edi mere ro Iesu ro na-gorobai, imese gowameai-ro simara abera aboto. 43 Urubia ro na-gowea-rimo Godi edi auna ia pupuwo korosa ro neio auna ia kimaragoidiro ro giopia.

Iesu ro imese tanaro na-isioidirotiti urubia sirio isana neito geremowagomea-rimo. Iesu neio ro kamade ri aise gemowabu-rimo. Iedi tau ro nato, Iesu ro ibo kowasoro urubia aboto, 44 ‘Nio ro woki imati ate abora mo ro edi owera to nama-imowauti-ri, modobo pua nio ro gare to se kirowidiro. Mabu Imese Urubia Kiauri Dubu nasa urubia aboto amadima-apoi-ri.’

45 Kaupoti kowasoro urubia ro Iesu edi owera to garo maumo mea se ememidai pua. Iedi maumo kimaragoidiro ro neio aboudo Godi ro a-gowopirua, ina noudo ie neio umoro koi tato. Kowasoro urubia ro na-girorowai-rimo nedi owera ro neio tere ro giwati nou kemodowa aboto.

46 Iesu edi kowasoro urubia ro auna owera to geremowauti-rimo ibo, ‘Neibi ata auna to etu ro ama-omidiro-ri?’ 47 Kaupoti Iesu umoro ta-goi neio kimaragoidiro beda sosoro giamo. Ina noudo ie Iesu ro mere kainai aise gorobai-ro, nou mutu imese gotobowa-rido atu moro ato neio sosoro gabo ato. 48 Taie Iesu ro nedi owera ro nato gimowapotai, ‘Etio ro kemaidodorai idaibo sosoro mere kainai mabu nu mo do ie, idaibo sosoro mo neio ro kemaidodorai ie. Mo etio ro kemaidodorai ra ibo pua mo nakara se kemaidodorai, mo iedi dubu ro na-nemeiriai-ro nedi duriomoro ro neito nou ro ibose kemaidodorai ie. Etio ra na-orowomidiro nio abato idaibo kimaragoidiro mutu, “Mo dorogora se dubu e,” io Godi sosoro gabo ato awawo to neio ro ama-orowomidiro-ri.’

49 Ioane ro ibo, ‘Auna dubu, nimo ro ata dubu ta-nowea-mo oro edi pupuwo korosa ro ubauba urio urubia aboudo neito imabodoidiro. Ina nedi dubu ro nimo ro egea se nodiobuti-dumo idaibo tanaro kisioidiro aboto, mabu nu nimo mutu iradabutiti pua.’

50 Iesu ro nou ibo gemowameai, ‘Idaibo sosoro urubia nio ro iadohodai mamo. Etio ra ubauba kisioidiro tato nio aboto neio ia ro amadimi-iwatuti-ri nio aboto.’

51 Tuturu to owamo-ri pua ata tau tou-die Iesu Godi ro Adiri sabowa to ama-owameai-ri. Ina noudo ie Iesu nou kimaragoidiro patu modobo pua kiwesegerai, nou ro na-gutura nedi owera ro ibo Ierusarema sabowa to ou ri, taie nou aise gaimai. 52 Iesu ro sowake urubia ata Samaria sabowa to keba se gitiodorai tanaro patu imododiai ri nou sapuwo to. 53 Kaupoti iedi sabowa ro urubia iato na-gorowomidiro nu kamade mutu neio ro aramairiai pua. Neio ro nou ioudo a-gebeiouti-rimo, mabu nou Ierusarema sabowa to ou rie.

54 Ioane ra Iemisi ra neitiro Iesu kowasoro dubu teibo ie neitiro ro na-gowea-rido Iesu na-gebeiouti-rimo, neitiro ro ibo, ‘Abera Naramu, oro ubi ra neitiro ro Godi kemowapotai Adiri sabowa rido era emeiriai ri nedi urubia ro ipisiamuti ri?’

55 Kaupoti Iesu masawe mutu aise gororoupiriai, neitiro aboto nou ro iato gimaro-ma. 56 Taie Iesu kowasoro urubia mutu ata sabowa to imese gaimai-birimo.

57 Iesu nou kowasoro dubu peteibi mutu edi kou ro na-gou-birimo Samaria duriomoro rido Ierusarema sabowa to, ipi ato ata dubu neibi ro iato gowea-birimo. Taie edi dubu ro nou ro ibo Iesu aboto, ‘Mo ubi ie oro kowasoro, oro beda moro to kou ra mo saro rido ibose to kou e.’

58 Taie edi dubu ro Iesu ro ibo gemowameai, ‘Tumu soka neio kirobuti moro mutu e, ibose pawa neio toto mutu e toto neio kirobuti moro ie, kaupoti Imese Urubia Kiauri Dubu korobuti moro tato ie.’

59 Ina ibose Iesu ro ata dubu aboto iato gutura ibo, ‘Mo dowasoro-ro!’

Ina edi dubu ro Iesu nou ro ibo gemowameai, ‘Tauo keba se mo simara sabowa to morowameai-ro, womu tato mo abera negere pamo kowea. Nou pamo durupi bobo to kedea, taie oro saro rido nato nama-owasoro-ri.’

60 Kaupoti iedi dubu ro Iesu ro ibo gemowapotai, ‘Oro urubia urio pamo mutu na-orowomidiro, oro abera pamo durupi neio ro ba-memoba-mo. Isana oro dou Godi edi kiwaboi tanaro ro nou sapuwo to urubia neito ba-dimowautiti.’

61 Ina iato ata dubu ro gutura Iesu aboto, ‘Abera Naramu mo ubi ie oro kobodoro. Tauo keba se mo anama-orowameai-ri iana owera nama-utura-ri simara urubia aboto, ina nato namadi-ou-ri oro owasoro ri.’

62 Iesu ro edi dubu ro ibo gemowameai, ‘Etio ro kitamuai ra siware na kiwotouti neio modobo pua egea moro to kirarowo, neio modobo ie idomari siware na to se kiwotoi. Neio egea moro to kirarowo ato, siware na neio ro mea mino to iwati-ri pua. Idaibo urubia neio aboudo modobo pua Godi edi kiwaboi tanaro ro nou sapuwo to woko kisioidiro.’