1 Parasi urubia, Mose sabi kitamudiro urubia mutu, Ierusarema sabowa rido nato giodori-ro Iesu aboto. Neio ro Iesu nato gemodowa-rimo 2 nasaio tanaro kibodoro sapuwo to. ‘Mabu boira oro kowasoro urubia ro nasaio tanaro kibodoidiro tato? Neio ohona kiho tau ato tu kebase iwiouti-ri pua, ohona kiho kawa kiho ie. Tauo kebase tu kiwiouti ie ohona ido to kiwasomai ie.’

3 Iesu ro neio ibo gimowameai, ‘Nio umoro a-iamo ra ibo nio ro nasaio tanaro kisioidiro ato, nio ro Godi edi sabi ro nou isebo-dumo? 4 Mabu Godi ro ata morobise sabi nou gowapotai-ro, Oro simara mamu ra abera ra mea mino ito aise gi-iauri-mari. Ina ata nou e, Simara mamu ra abera ra aboto beda dubu ro aro ubauba owera, iedi dubu ro modobo ie urubia ro kopia. 5 Kaupoti mamio abeamio kiwarebai sapuwo to, ata sosoro owera to nio ro nouto itamudiro-dumo ibo modobo ie simara mamu ra abera ra aboto ibo kutura, “Ata nakomu mo abato towamo nitiro kiwarebai-ma sapuwo to, kaupoti Godi mo ro ta-nemapoi.” 6 Kaupoti nio edi kitamudiro owera ro idaibo sosoro na-itamudiro-dumo, urubia nio ro ibo itamudiro-dumo, “Modobo ie simara mamu ra abera ra kiwarebai-ma tato.” Ina noudo ie Godi edi owera ro nio ro imese ubauba owaititi-dumo. Mabu nio ro nasaio tanaro auna ia se ibodoro-dumo. 7 Nio imese auna karatigi urubia ie! Godi ipusu owera dubu Aisaia buka ato, nio morobise to nou ro giwapotai-ro ibo, 8 Godi ro ibo nedi urubia ro mo kemowabu owera to iarotiti-dumo, kaupoti neio giropu musomuso ia se iamo-die. 9 Neio ro ibose mo na-nemowabutiti-dumo, neio irowaguwoidirotiti-dumo. Arua urubia aboto etou sabi itamudirotiti-dumo, mo ro iaremuti pua, urubia ro nakara se giaremuti-rimo.’

10 Taie iato urubia sirio Iesu ro nato girumai-ro nou aboto aradabuti ri. Nou ro ibo, ‘Owera neito ma-dirowidiro-rimo, nedi owera ro maumo mea se ba-domidai-mo. 11 Urubia dubu ro matagoro to beda ohona kibiria ra, niro turi edi ohona ro nou ro ubauba owai-ri pua. Kaupoti nou ipusu rido beda owera ro isuwoduti-dumo nou ubauba nou ro kowai ie.’

12 Taie kowasoro urubia Iesu aboto nato gosiomai-rimo. Neio ro ibo, ‘Nimo oro ro edi owera to nimowauti Parasi urubia ro ta-irowidiro-mo. Oro umoro a-woi ra ibo neio oro aboto serawo ta-woi-mo?’

13 Neio Iesu ro ibo gimowameai, ‘Imese beda mutu ota ra mo abera ro kobowai tato, iedi ota ro sipi mutu ama-iahito-ri. 14 Parasi urubia aboudo aise daragarewado-rimo, neio pogo kiwaboi urubia ie. Ata pogo dubu ro boinana pogo dubu na-owaguwo, neitiro bobo to atu se ibose to kiretei-ma ie.’

15 Pita ro ibo, ‘Nedi totomu ro nimo aboto mea se ma-demabuti-ro.’

16 Iesu ro neio ibo gimowapotai, ‘Nio ibose maumo kimaragoidiro imese timotimo ia se iamotiti. 17 Nio umoro ra matagoro to beda ohona kibiria ra, niro turi ato erediai-ri pua, durupi rido ina aise kosuruwo ie. 18 Kaupoti matagoro rido beda owera ro kosuruwo ra, giropu maumo rido kosuruwo ie. Ina nedi tanaro sirio ro urubia dubu ubauba neio ro kowaititi ie. 19 Mabu erere ubauba tanaro sirio ro urubia dubu niro turi rido karatamuai ie. Idaibo ubauba kimaragoidiro, urubia kiopiauti, duboi mamio o uramio mutu koroho, upo koroho, piro tanaro kisioidiro, koto abato bagea owera keremasaubuti, ubauba owera karo arua urubia sapuwo to. 20 Nedi tanaro sirio ro urubia dubu aboudo na-isuwodutiti-dioumo, nou ubauba neito orowaititi. Tu kiwiouti tato ohona nato na-iho, urubia dubu niro turi ubauba nouto owaititi-ri pua.’

21 Taie Iesu ro edi duriomoro ro na-gemeserai, nou ata duriomoro to imese garagare, Taia ra Sidoni ra iato giamo-ma. 22 Ata Keineni orobo iato imidirotiti. Iesu nou ro na-gowea nou ioudo giaia-ro, ‘Abera Naramu, oro Godi ro kohodowa dubu e, mo natonato demati-ro! Mo besere dese emiri pua, ubauba urio ro ubauba kowaititi.’

23 Kaupoti edi orobo ro Iesu ro idomari to se giauri, ata owera ata emowameai pua. Taie kowasoro urubia Iesu aboto nato gorowarario-rimo. Neio ro nou nato gemediawado-rimo iedi orobo ro emowapotai ri simara sabowa to korowameai aboto. ‘Neibi nou ro auna iamo mutu nibodoro-ibidie, demowapotai nou neido maragare.’

24 Iesu ro ibo, ‘Isiraere urubia sipisipi sosoro ta-gararaseperai-rimo. Mo neio aboto se nemeiriai-ro.’

25 Kaupoti iedi orobo ro kauhio teibo to Iesu sosoro gabo ato aise girimusubua. Nou ro ibo, ‘Abera Naramu, mo dowarebai-ro!’

26 Iesu ro nou ibo gemowameai, ‘Modobo pua moto merebusere edi ohona ro, daimodaimo ro kiho.’

27 Iesu nou ro ibo gemowameai, ‘Naramu Abera, mo umoro ie mo daimodaimo orobo ie, kaupoti merebusere mapapati daimodaimo merebusere ro kiho modobo ie.’

28 Iesu ro iedi orobo ro ibo gemowameai, ‘Urubia orobo, oro edi kimibiria ro mo abato imese auna ia ie. Oro edi ubi tanaro ro morobise to amadimo-ororosioidiro-ri.’ Taie iedi atu tau ro nato nou besere meana aise goi.

29 Iesu ro Taia ra Sidoni ra sabowa teibo na-gimeserai-ma, nou aise gohau-ro Gariri obo paruo bara to. Nou podo ohu mea moro to na-gioro, iato aise gomi. 30 Taie sirio urubia nou aboto aise gou-rimo. Neio ro Iesu aboto sairo ubauba urubia nato giwou-rimo, idomari pogo urubia, tu ra sairo ra karawiauti urubia, owera karo tato urubia, ibose erere temeteme urubia Iesu aboto aise giworoho-rimo. Iedi temeteme urubia ro Iesu ro meana aise giwaititi. 31 Iedi urubia ro giworoho-rimo, neio ro na-giauri-rimo owera karo tato urubia owera mea se na-garo-rimo, tu ra sairo ra karawiauti urubia meana na-goititi-rimo, sairo ubauba urubia simara sairo to mea se na-goroho-rimo, ibose idomari pogo urubia namabu mea se na-giauri-rimo, Godi Isiraere urubia ro na-emowabutiti-dumo, iedi tau ro nato neio ro iato gemowabu-rimo.

32 Iesu ro kowasoro urubia nato girumai nou aboto ou ri. Nou ro ibo, ‘Mo auna nirimagare ie nedi urubia ro neio aboto. Neio mo abato netewa didi saiki peteibi to ta-gorowomidiro. Neio abora idaibo sogoi ro iwati, ina mo ubi tato ie neio kiho tato kitiodorai. Modobo pua neio ipi ato durupi pupuwo tato ro kirobowado.’

33 Taie kowasoro urubia ro Iesu owera ibo gemowameai-birimo, ‘Nedi moro ro goto se duriomoro ie, ata ohona tato moro ie. Idaibo dubu patu gebari neibi ro ohona boido anamabimi-imowai-ri?’

34 Kaupoti neibi Iesu ro owera ata mino to gimowameai-ibi, ‘Ina nibi abato dokou koura beda mutu ra?’

Neibi ro ibo, ‘Neibi abato 7 dokou koura tiamo-ibi sipu tato nakere koura mutu.’

35 Taie Iesu ro urubia sirio iato gimowapotai goto ato orowomititi ri. 36 Nou ro 7 dokou koura na-gimidai-ro sipu tato nakere koura mutu, Godi aboto eso owera iato garo. Iedi dokou ra nakere ra na-gisebuti, kowasoro urubia aboto iato giaiwo, urubia neibi ro gimoworoho-birimo. 37 Neio ro edi ohona ro na-giho-rimo imese ta-giamidimai. Neio ro edi ohona mapapati ro na-gimesere-rimo kowasoro urubia ro 7 gatere nou giodiawado-rimo. 38 Iedi dubu patu ro gorobu ohona kiho moro ato, imese sirio ia ie. Dubu kawakawa na-gioputi-rimo imese 4,000 dubu e, mamio merebusere mutu ioputi pua. 39 Taie Iesu ro urubia iato gimeirio simara sabowa to. Kimerio saro gabo ato nou pe se gorobai, Magadana moro to imese gabu-ro, obo paruo ata sapuwo ato gowamo.