1 Iesu ro urubia owera kimowauti na-goporeai, Gariri duriomoro aise gemeserai, imese godori-ro Iudia duriomoro to. Iudia duriomoro ato Iodeni gowo ata sapuwo iedi duriomoro ro Iesu ito gou. 2 Nou ito na-gou, auna ia urubia sirio ro saro rido aise gobodoro-rimo. Nou ro iato temeteme urubia sirio meana aise giwaititi.

3 Taie iedi tau ro nato Parasi urubia kemodowa owera mutu Iesu aboto nato gou-rimo. Neio ubi ie Iesu owaibia ri. Neio ro ibo, ‘Ata dubu ro simara orobo dorogora mabu ato na-wararubia sabi ra?’

4 Iesu ro neio ibo gimowameai, ‘Tarena Buka ato nio ro owera kioputi pua ra? A? Mabu owera nato ibo tiamo, Godi ro nedi duriomoro gebari ro na-gosioidiro, nou ro gisioidiro urubia, upi dubu. 5 Godi ro ibo, Ina nou ri ie nimo ro nou nemodohodai-dumo, mere orobo na-edea, nou simara mamu ra abera ra nou ri kimeserai-ma ie, imese karadabuai ie ina neitiro kaupoti to imese kararapoi ie. 6 Orobo ra uramu ra neitiro erere se omidiro-ri pua, neitiro abora kaupoti to imese kararapoi ie. Godi ro na-gidabuai-ma, ata ro kihodowa-ma modobo ia pua, sabi ie!’

7 Parasi urubia ro ibo, ‘Oro ro edi owera to nimowauti-die morobise ra? Ina mabu boira Mose sabi ato owera na-iamo ibo, Orobo uramu ro na-wararubia, uramu ro kebase kararubia peba titi se kemesioidiro ie, orobo nou komia ie, taie nou ro iedi orobo ro imese nato kararubia ie.’

8 Taie Iesu ro Parasi urubia ibo gimowapotai, ‘Nio Mose ro nedi sabi ro nou ri gimia, mabu nio imese auna akau urubia ie. Kaupoti nedi duriomoro gebari ro Godi ro edi tau ato gosioidiro, upi kiraribo tanaro owamo pua. 9 Nio mo ro morobise owera mimowapotai-ro, urubia orobo ubauba tanaro kosioidiro tato moro ato ata dubu mutu, ina iedi tau ro nato uramu ro na-wararubia, ina orio orobo nato na-edea, iedi dubu ro Godi sosoro gabo ato piro tanaro kosioidiro ie.’

10 Kowasoro urubia ro ibo, ‘Urubia idaibo mino to nama-orowomidiro-ri, marasio kararemo, korowomidiro kawa korowomidiro modobo ie.’

11 Iesu ro neio nedi owera ro neito gimowameai, ‘Nio mo ro edi owera to nimowauti, urubia sirio ro modobo pua komidai aboto. Kaupoti Godi ro sipu tato urubia se modobo ama-iwai-ri nedi owera ro komidai aboto. 12 Arua dubu neio mamio ro na-giwahaudiro-rimo neio muopu tato giwahaudiro-rimo. Ina ibose arua dubu muopu arua urubia ro ta-gimeiho-rimo. Ina arua urubia neio upi kiaremo tato nou ri irowomidirotiti, mabu neio ro Godi edi kiwaboi maumo ro nato nou ubi tanaro kemesioidiro aboto. Etio ra modobo se nedi owera ro kimade aboto, neio ro ba-mimade-mo.’

13 Merebusere kainakaina Iesu aboto giworoho-rimo, tu itomo ri neio eputa ato, ina Godi aboto araratoro ri. Neio kowasoro urubia ro na-giwia-rimo, binio to aise gimadowerai-rimo.

14 Kaupoti Iesu ro ibo, ‘Merebusere kainakaina mo aboto mou-rimo, modobo pua nio ro na-idiobuti-dumo. Mabu Godi ro kiwaboi tanaro idaibo merebusere kainakaina neio aboudo kodouti gabo modobo ato aidiro-die.’

15 Taie nou tu neio eputa ato iato gitomo, Godi iato gararatoro neio sapuwo to, taie iedi moro ro nou ro aise gemeserai, imese gou ata moro to.

16 Ina suana sirio dubu kemodowa owera mutu Iesu aboto nato gou-ro. Nou ro ibo, ‘Kitamudiro dubu, ina mo ro beda mea tanaro nama-osioidiro-ri, womu tato womu tato keremiro kowea aboto?’

17 Iesu ro edi dubu ro ibo gemowameai, ‘Mabu boira meana sapuwo to mo oro ro idaibo na-nemodowa-die? Nedi duriomoro ro nato Godi nou se ie meana ia ie. Oro ubi na-owamo womu tato keremiro kowea aboto, sabi sirio ba-dibodoro.’

18 Iedi dubu ro Iesu ibo gemodowa, ‘Ina mo ro beda sabi ibodoro ri ra?’

Nou Iesu ro ibo gemowameai, Urubia iopiauti mamo! Arua dubu o mamio mutu oroho mamo! Arua urubia nakomu piro to imade mamo! Koto tau ato arua urubia owera kakate moro to imoworohuti mamo! 19 Mamu ra abera ra mea mino to gi-iauri-mari! Oro nirimagare nakara se beda sosoro na-eremati, arua urubia nirimagare ibo gi-imati-ri.

20 Ina iedi dubu ro Iesu owera ibo gemowameai, ‘Nedi sabi sirio ro mo ro ti-nibodorotiti. Ina mo aboudo beda hodo ro irarebidiro-die?’

21 Iesu ro nou ibo gemowameai, ‘Oro ubi Godi sosoro gabo ato imese meana koi aboto, oro edi namabu sirio ro mani to ba-mowamade-mo. Taie iedi mani ro neito namabu tato urubia ba-diwarebai. Oro ro edi mani ro neito urubia nama-iwarebai-ri, oro mea wisa Godi ro Adiri sabowa ato ama-emedea-ri. Taie mo oro ro nato ba-dowasoro-ro.’

22 Iedi owera ro nou ro na-girorowai, nou kamade tato huru to aise gororoupiriai. Mabu nedi dubu ro namabu sirio dubu e.

23 Taie Iesu ro kowasoro urubia aboto nato gutura, ‘Nio mo ro morobise owera mimowapotai-ro! Suana sirio dubu ro Godi edi kiwaboi maumo ro neito kodoro aboto auna koko ie. 24 Ina nio mo ro ata owera mimowapotai-ro. Io idaibo sosoro ie, kemoro kodoro ra nira kainai goro rido keresia ata sapuwo to? Modobo pua io! Ina idaibo sosoro ie, suana sirio dubu ro kodoro koko ia ie Godi edi kiwaboi maumo ro neito.’

25 Kowasoro urubia ro nedi owera ro na-girorowai-rimo, neio kimaragoidiro ro giopia. Neio ro ibo, ‘Ina Godi ro beda urubia amadi-iapopo-ri?’

26 Iesu idomari teibo neio ato se giwotobowa, neio nou ro ibo gimowapotai, ‘Nedi tanaro ro urubia ro kisioidiro ata gabo tato ie. Kaupoti urubia ro kisioidiro tato tanaro Godi aboudo ata koko tato ie, nou ro modobo ie kisioidiro.’

27 Taie Iesu owera Pita ro ibo gemowameai, ‘Imese beda mutu nakomu sirio ra na-niworohutiti-mo, nimo ro ta-nimeserai-rimo. Oro nimo ro saro rido ti-nowasoro-dumo. Ina nimo Godi ro beda wisa nama-imio-ri?’

28 Iesu ro neio ibo gimowameai, ‘Nio mo ro morobise owera mimowapotai-ro! Nio etio ra mo na-nowasoro-dumo, koto kiauri urubia to nio ro amadima-ararasoro-ri. Isiraere urubia edi 12 gu ro nio ro amadimi-iauri-ri. Iedi tau ro nato Godi ro nedi duriomoro gebari ro mea se nama-emododiai-ri, Imese Urubia Kiauri Dubu mo nouse ie benenio ia komidiro nakomu ato mo ro anama-omidiro-ri. 29 Etio ra simara moto, naminiramio, mamio abeamio, merebusere, duriomoro, namadidime-emesere-ri mo sapuwo to, iedi urubia ro Godi ro ohu rido 100 tau to ama-imotomo-ri. Ibose neio ro womu tato keremiro aise amadimi-iauri-ri. 30 Abora urubia sirio awawo masiro mutu na-orowomidiro, saiki ata neio imese sopu ato ama-irowomidiro-ri. Ina ibose, abora etio ra sopu ato na-orowomidiro, saiki ata nedi urubia ro awawo masiro neio ro amadimi-irobidiro-ri.’