1 Iesu ro neio owera aise gimowautiwado, nou ro ibo, ‘Godi ro kiwaboi tanaro idaibo sosoro ama-owamo-ri, 10 awawo busere sosoro ie, neio orio marete dubu kemasebidiro aboto erempa erere se giwou-rimo iedi soriomu ro nou aboto. 2 5 busere muro tato busere ie, arua 5 busere neio muro busere ie. 3 Iedi 5 muro tato busere ro erempa erere se ta-gimidai-rimo sekere. Kaupoti neio ro didi keresini imidai pua aise gimeserai-rimo. 4 Arua 5 muro busere ie, neio ro didi keresini erere se ta-gimidai-rimo orio marete dubu kemasebidiro sapuwo to. 5 Kaupoti iedi dubu ro egea se gemasebidiro-rimo, hio to orowateai pua. Iedi kemasebidiro ro na-gemasebidiro-rimo, neio imese sirio se norou ro aise girobai, taie imese gututi-rimo.

6 Neio isana norou girobu duwo turi ato ata dubu nato giaia-ro, “Neito ma-dirarowea-rimo! Urubia dubu notou-die! Moto rido hio to memosuwoduti-ro!”

7 Taie iedi 10 busere ro iedi iamo ro norou maumo rido na-girorowai-rimo, neio aise girerubua-rimo. Taie erempa woiki hio to iato giwiourio-rimo. 8 Iedi 5 muro tato busere ro neio erempa keresini tato ri aise gorodouti-rimo. Taie neio ro ibo borubi busere aboto, “Nimo erempa keresini tato ri ta-worodouti-mo. Modobo ra nio ro kimaratuti?”

9 Neio ro ibo, “Marasio ia ie! Nio imaratuti-ri pua. Nimo simara modobo ato niwou-dioumo. Nio kimaratuti ato, nimo nio mutu atu se keresini tato anamadimo-oi-ri. Sitowa to se dou-mo ioudo ba-dimade-rimo.”

10 Neio isana sitowa to gorowaberai-rimo keresini imade ri, edi dubu ro nato godoro-ro. Taie iedi 5 muro busere ro nou ro aise gidabuai-bi imese giwodoro-ibi iedi marete soriomu ro nou aboto. Taie iato etou ra magere sowake dubu ro aise gopai.

11 Tuturu to eremasebidiro pua, iedi muro tato busere ro neio ro gorowameai-rimo. Neio ro ibo, “Auna dubu! Auna dubu! Nimo magere dimodobura-ro!”

12 Kaupoti neio nou ro ibo gimowameai-ro, “Tauo nio mo ro morobise owera mimowapotai-ro, mo umoro pua nio!” ’

13 Iesu owera neito gopai, ‘Sirio tau aise gi-iraroweauti-ri, mabu Imese Urubia Kiauri Dubu korowameai saiki nio umoro pua.’

14 ‘Ina Godi ro kiwaboi tanaro nou idaibo sosoro ie, urubia dubu muso moro to na-gou. Nedi dubu ro ido gasiriai, tauo keba se nou ro sowake dubu peteibi girumai-ibi, nou namabu kemeauri sapuwo to owera iato gimowauti-bi. Taie nou ro neibi mani erere se iato gimio-ibi. 15 Nou ro keba dubu aboto 5 mani baiko giaiwai, ina ata dubu aboto netewa teibo mani baiko teibo giaiwai-ma. Ina ata dubu aboto kaupoti mani baiko gaiwai. Mabu neibi edi tanaro ro nou auna umoro ie, ina noudo ie neibi simara modobo ato kimio-ibi. Taie nou iato imese gasiriai muso moro to.

16 Keba dubu ro edi 5 mani baiko ro gimidai, nou ro besinisi woko nouto gosioidiro. Taie ata 5 mani baiko nou ro iato giwia, atu se na-gidabuai, 10 mani baiko ro gororosioidiro-rimo. 17 Ina ata dubu ro atu sosoro tanaro ibose to gosioidiro. Nou ro edi netewa teibo mani baiko teibo ro na-gimidai-ma, besinisi woko nouto gosioidiro. Ina ata mani baiko teibo nou ro iato giwia-ma. 18 Ina saro dubu ro edi na gomidai kaupoti mani baiko, nou ro goto bobo gemoba iato gedea.

19 Neibi edi eputa dubu ro tuturu tau to imese ta-gorohowado. Saro to iato gorowameai-ro. Nou ro sowake dubu peteibi nato girumai-ibi nou aboto ou ri, taie neibi nou ro iato gimodoruti-ibi neibi ro nou mani beda mino to gemoworohuti-bimo. 20 Ina noudo ie iedi dubu ro gimidai 5 mani baiko, nou ro ibo, “Auna dubu, oro simara 5 mani baiko nou e, ina ma-dowea-ro oro didi 5 mani baiko ta-nemesioidiro, nou e.”

21 Eputa dubu ro ibo, “Oro morobise ie, mea tuputupu sowake dubu e, oro ro mea woko gosioidiro. Oro ro sipu tato namabu modobo ato nemoworohutiti, ina sirio namabu anama-iapoi-ri oro ro emoworohuti ri. Mo mutu modoro-rido soriomu ohona iho ri, neitiro kamade atu se iato anamadi-iworohuti-ri.”

22 Ina iato tuturu to pua iedi dubu ro gimidai-ma netewa teibo mani baiko teibo, nou ro gou-ro. Nou ro ibo, “Auna dubu, oro simara mani baiko teibo nou e, ina ma-dowea-ro, oro didi mani baiko teibo ta-nemesioidiro-ma, nou e.”

23 Iedi dubu ro eputa dubu ro na-gowea, nou ro ibo, “Oro ibose morobise mea tuputupu sowake dubu e, oro ro mea woko gosioidiro. Oro ro sipu tato namabu modobo ato nemoworohutiti, ina sirio namabu anama-iapoi-ri oro ro emoworohuti ri. Mo mutu modoro-rido soriomu ohona iho ri, neitiro kamade atu se iato anamadi-iworohuti-ri.”

24 Ina iato kaupoti mani baiko edi dubu ro gomidai nou ro gou-ro. Nou ro ibo, “Auna dubu mo tere ie, mabu oro koko dubu e. Ata dubu ro kiedea ie edi namabu ro, oro ro nou kimade ie. Arua urubia ro kiwati woko, ina wisa oro ro kimade ie. 25 Mo tere ie, oro ro edi kaupoti mani baiko ro nomia-ro, mo ro goto bobo nemoba iato owamotiti. Ina nou e noti nemowameai-die.”

26 Eputa dubu ro ibo, “Oro imese ubauba ia ie, pupuwo tato dubu e! Oro ro mo aboto idaibo owera na-waro-die, ibo mo koko dubu e. Ata dubu ro kiedea ie iedi namabu ro mo ro kimade ie. Arua urubia ro kiwati woko, ina wisa mo ro kimade ie. 27 Mani iopu oro ro banega to ba-gedea, didi mani kainai kosioidiro sapuwo to, oro ro nedi woko ro nou ba-gosioidiro. Mo oro ro nato ba-nemowameai-ro didi mani mutu.”

28 Taie eputa dubu ro arua sowake urubia iato gimowapotai ibo, “Iedi dubu ro mani dowasiri-rimo. 10 mani baiko edi dubu ro na-irobidiro nou domia-mo. 29 Mabu mo ro beda awawo kimio ra mea se etio ro iworohuti-dumo, idaibo urubia ohu rido mo ro neio anama-imotomo-ri. Ibose neio abato namabu aise amadima-aratuamuti-ri. Mo ro urubia beda kainakaina kimio ra ubauba se etio ro iworohuti-dumo, neio aboudo mo ro anama-iwagarewado-ri. 30 Ina iedi pupuwo tato dubu ro mo mani goto ato na-gemoba, duwoduwo moro, temeteme idobi girigiri edi moro ato iwarotiti, neito deherai-mo.” ’

31 ‘Imese Urubia Kiauri Dubu nou mea sosoro mutu amadi-orowameai-ri, simara sowake urio sirio mutu. Nou edi komidiro nakomu ro imese meana ia ie. Nou ohu ia to nato amadi-omidiro-ri. 32 Imese beda mutu urubia sirio ra nou sosoro gabo ato amadimi-idabuti-ri. Taie neio nou ro nato ama-ihoduti-ri. Sipisipi kiauri dubu ro beda sosoro kihoduti ra sipisipi ata sapuwo ato kiwotobowa, nanigosi ata sapuwo ato, Imese Urubia Kiauri Dubu ro imese urubia sirio idaibo mino to ama-ihoduti-ri. 33 Sipisipi nou ro tumodi sapuwo ato ama-iwotobowa-ri, nanigosi nou ro pere sapuwo ato ama-iwotobowa-ri.

34 Tumodi sapuwo ato edi urubia ro ama-orowotoi-ri, neio eputa dubu ro ibo ama-imowapotai-ri. “Mo abera ro korosa nio giwai! Godi edi kiwaboi tanaro maumo ro neito imese ba-dodoro-rimo, abora nio ro amadimi-irahidimai-ri. Nedi sopu duriomoro gebari ro edi tau ato gosioidiro, Godi ro kiwaboi tanaro nio sapuwo nato gemododiai. 35 Nio ro nou ri amadimi-irahidimai-ri mabu mo sogoi ro na-nowatiti, ohona nio ro nomio-mo. Obo sogoi ro na-nowatiti, obo nio ro nemoworohotiti-mo. Mo apira dubu to na-nararasorotiti, moto to nio ro nowodoutiti-mo. 36 Mo kiroidiro namabu tato na-nimidirotiti, obotama nio ro nomiotiti-mo. Mo temeteme ro na-nowatititi, nio ro nowarebidirotiti-mo. Mo dibura ato na-nirohotiti, nio ro naraturiotiti-mo. Nio ro Godi edi kiwaboi tanaro ro nou ri amadimi-irahidimai-ri.”

37 Taie iedi meamea tuputupu urubia ro eputa dubu neio ro ibo amadime-emowameai-ri, “Abera Naramu, oro sogoi ro beda tau ato gowati, ina nimo ro na-nowarebai-rimo? Oro obo sogoi ro na-owatiti, ina nimo ro na-nemoworohotiti-mo? 38 Oro apira dubu sosoro na-goroho, nimo ro bato nowodoutiti-mo? Oro kiroidiro namabu tato na-imidirotiti, nimo ro obotama beda tau ato nomiotiti-mo? 39 Oro temeteme ro na-owatititi, nimo ro beda tau ato nowarebaititi-mo? Oro dibura ato na-irohotiti, nimo ro beda tau ato naraturiotiti-mo?”

40 Eputa dubu ro neio ibo ama-imowameai-ri, “Nio mo ro morobise owera mimowapotai-ro! Beda kiwarebai tanaro ra nio ro na-gisioidiro-rimo mo edi dorogora urubia ro neio aboto, nio ro mo aboto gisioidiro-rimo.”

41 Taie eputa dubu edi pere sapuwo urubia aboto ama-erewesegerai-ri. “Nio nedi urubia ro Godi ro keba se ta-giapoi ubauba wisa imade ri, mo aboudo neido daragare-mo! Womu tato womu tato edi era ro iriwaretiti Satani nou sowake urio mutu Godi ro edi era ro gimesioidiro, neito daratowo-mo. 42 Mabu mo sogoi ro na-nowatiti, ohona nio ro omiotiti pua. Obo sogoi ro na-nowatititi, nio ro emoworohotiti pua. 43 Mo apira na-nirohotiti nio sabowa to, mo nio ro karamairi pua. Mo obotama tato na-nimidirotiti, nio ro obotama komio pua. Mo temeteme ro na-nowatiti, nio ro owarebidirotiti pua. Mo dibura ato na-nirohotiti, nio ro karaturio pua.”

44 Neio ro eputa dubu ibo amadime-emowameai-ri, “Oro sogoi ro na-owatiti, nimo ro beda tau ato niaurititi-mo? Oro obo sogoi ro na-owatititi, nimo sabowa to apira na-irohotiti-ro, namabu tato na-imidirotiti, temeteme ro na-owatititi, dibura ato na-irohotiti, ina oro beda tau ato ra nimo ro kowarebidiro tato?”

45 Neio eputa dubu ro ibo ama-imowameai-ri, “Nio mo ro morobise owera mimowapotai-ro! Beda kiwarebai tanaro ra nio ro kisioidiro tato mo edi dorogora urubia aboto, nio ro mo aboto isioidiro pua.”

46 Taie iedi urubia ro aise amadimo-ou-ri womu tato womu tato ubauba wisa imade ri. Kaupoti meamea tuputupu urubia womu tato womu tato keremiro to neio ro ama-irowomidiro-ri.’