1 Ata tau ato Iesu ina auna dubu patu ro iato gemosopa-rimo, iedi urubia ro ata ohona tato gou-rimo. Taie Iesu ro iato gutura nou kowasoro urubia aboto, 2 ‘Mo auna ia nirimagare ro nowati nedi urubia ro neio beda sosoro aradabuti-dioumo mo aboto ina neio neibi mutu ta-irowomidirotiti netewa didi saiki to. Neio ata ohona tato orowomidiro mo ro ti-niauri 3 neio sogoi ro iwati ina neio mo ro kiho tato kimeriai ato simara sabowa to orowame ri, neio ata modobo pua ipi gabo ato karaburai. Neio amia moro muso rido goroho-dioumo.’

4 Ina nou kowasoro urubia ro ibo gemowameai-rimo, ‘Nimo urubia tato moro ato norowomidiro, neio iwarebai na ohona boido namadimi-iwai-ri?’

5 Taie Iesu ro iato gimodowa-ibi ibo, ‘Nibi abato dokou koura beda mutu ro iamo?’

‘7 ro iamo,’ neibi ro ibo.

6 Taie nou ro iedi urubia ro iato gimowapotai goto ato orowomititi ri. Nou ro na-gimidai iedi dokou koura ro iato gisebuti taie eso owera iato garo Godi aboto. Taie nou ro iedi dokou kisebuti ro imese giaiwai kowasoro urubia aboto, neio ro urubia iato gimoworoho-rimo. 7 Ina atu sosoro tanaro ibose to gisioidiro sipu tato nakere kainakaina na-gisebuti eso owera iato garo Godi aboto, taie iato giaiwai nou kowasoro urubia aboto neio ro urubia iato imese gimoworoho-rimo. 8 Taie imese sirio urubia na-giho-rimo imese modobo ti-goi-rimo ti-giamidimai.

Mapapati urubia ro na-gimeserai-rimo nou kowasoro urubia ro iato gidabuti-rimo neio ro 7 awawo gatere nou giodiowado-rimo.

9 Edi topira gebari ro kioputi ato neio imese 4,000 urubia ie. Taie nou ro iato gimowapotai ibo, ‘Modobo ie nio korowameai simara sabowa to.’

10 Iesu kowasoro urubia mutu pe to kiora obo paruo sapuwo rido imese giabu-birimo Daramanuta duriomoro to.

11 Amia Parasi urubia iato gou-rimo Iesu aboto neio ro nou owera to iato gorobai-rimo ina neio ubi ie nou owaibia ri. Neio ubi ie umoro oi ri ibo nou Godi kohodowa dubu ra o nou pua ra. Neio ro nou iato gemodowa-rimo ibo Godi pupuwo to ata korosa tanaro nou ro osioidiro ri. 12 Taie Iesu ro na-gimorowai neio nou masawe to iato gutura, ‘Ei! Abora nedi urubia ro na-orowomidiro mabu boira nio ro kosora ata korosa tanaro mo ro kosioidiro aboto? Nio mo ro a-nimowapotai ata korosa tanaro ata mo ro osioidiro-ri pua nedi tau ro nato nio ro kiauri aboto.’

13 Taie Iesu ro edi urubia ro aise gibedidiro-ro nou imese godori pe to korora kahiomai imese gabu obo paruo ata sapuwo to. Taie.

14 Iesu kowasoro urubia mutu na-gou pe to neio ro kaupoti dokou koura gomidai-rimo, neio ro dokou auna se kimidai aboto woki gimati-rimo. 15 Taie, Iesu ro umoro owera nato gimia, ‘Umoro umoro se nio keremowotoi mutu Parasi urubia Herodi mutu neio edi isiti parawa ro nio ro kowasomai modobo pua.’

16 Taie kowasoro urubia nato gatamuai-rimo keremowagomea maumo na-gosora-rimo. Neio ro ibo, ‘O nimo dokou tato nou-diomo neito nou mabu ato utura-die nou.’

17 Neio beda sosoro geremowagomea-rimo Iesu ro neio kimaragoidiro ta-gimowea taie nato gimodowa, ‘Nio etou mabu ato eremowagomea-dumo ibo “Nimo dokou iwou pua neito”? Nio mo ro na-niauri idomari mea se irarowea pua nio kimaragoidiro tato ie. 18 Nio idomari mutu e kaupoti irarowo pua kiopai orowomidiro. Nio gare teibo mutu e kaupoti nio gare koropai orowomidiro. Mo ro beda tanaro nisioidiro keba se nio ro woki a-gimati-dumo ra, a? 19 Nimo keba se dokou tato na-norowomidiro ina nimo ro auna ia topira ti-nowea-rimo, 5 dokou mo ro na-nimesebuti ina neio ro ti-giho-rimo, mapapati edi na gimeserai-rimo beda mutu gatere giodiowado-rimo nio ro?’

Neio ro ibo, ‘12.’

20 ‘Ibose ata topira mo ro 7 dokou na-nimesebuti neio ro na-giho-rimo mapapati edi na gemeserai-rimo beda mutu gatere giodiowado-rimo nio ro?’

Neio ro ibo, ‘7.’

21 Taie Iesu ro ina iato gutura neio aboto, ‘Tanaro maumo nio ro umoro oi pua ra, a?’

22 Iesu kowasoro urubia mutu na-gou-rimo Betesaida sabowa to arua urubia ro nato gowou-rimo ata pogo dubu nou aboto. Taie neio ro nato gediawado-rimo iedi dubu ro nou sapuwo to idomari teibo meana emowai ri. 23 Iesu ro iedi dubu ro aise gatopea-ro neitiro imese gou-rido urubia tato moro to. Iedi dubu ro idomari teibo na-gemamorotai taie tu teibo na-giwateai-ma taie nato gemodowa, ‘Oro modobo ato a-irarowea-ra?’

24 Taie nou ro ibo, ‘Io modobo ato nirarowea, urubia mo ro ti-niauri kaupoti neio ota sosoro iagegemowado-dumo.’

25 Taie ina mea se iato gemowasomai, edi tau ro nato edi dubu ro mea se aise girarowea.

26 Iesu ro edi dubu ro moto to na-gotiodorai iato ibo gemowapotai, ‘Oro sabowa to oroho ate urubia imowapotaidiro ate nedi tanaro ro na-nosioidiro, moto ato se ba-domidiro!’

27 Iesu nou kowasoro urubia mutu imese gidiai-rimo ata auna sabowa tararasoro Siseria-Piripai to arua sabowa ibose ta-giamo nou gomo ato neito gidiai-rimo. Ipi ato Iesu ro nato giratoro neio ibo, ‘Urubia ro mo etu to nasoro-dumo?’

28 Taie neio ro wisa ibo gemowameai-rimo, ‘Arua urubia ro irowautiti-dumo ibo oro Ioane ie obo to edi dubu ro giwarumiauti, ina arua urubia ro asoro-dumo oro Eraia ie, ina ibose arua urubia ro irowautiti-dumo oro ata Godi ipusu owera dubu e nou ro gorowameai-die.’

29 Ina Iesu aise gerewesegerai neio aboto, ‘Ina nio ia ro mo etu to nasoro-dumo?’

Pita ro ibo, ‘Oro Godi ro kohodowa dubu e.’

30 ‘Nio ro mo sapuwo to orowauti ate ibo mo Godi kohodowa dubu e.’

31 Pita ro na-geibimai ibo Iesu nou Godi ro kohodowa dubu nou se ie, taie Iesu ro iato gatamuai nou kowasoro urubia kitamudiro aboto ibo, ‘Mo nou se ie Imese Urubia Kiauri Dubu. Imese Urubia Kiauri Dubu to na-gapoi nou ro temeteme sirio ama-iwia-ri. Nou duriomoro eputa urubia ro, Mose sabi kitamudiro urubia ro, turituri urubia neio awawo urubia ro nou masawe neio ro amadimo-owea-ri, temeteme amadimo-omia-ri iato amadimo-opia-ri. Imese Urubia Kiauri Dubu to na-gapoi nou pamo ama-owea-ri, iato saiki teibo namado-oroporeai-ri ata saiki ato nou keremiro nato ama-owea-ri.’

32 Iesu ro neio paea mata se gimowapotai beda tanaro ro amadimo-ororosioidiro-ri nou sapuwo to. Pita ro na-girowai edi owera ro nou ro Iesu nakara moro to aise gadabuai nou owera a-gemowabeouti ibo, ‘Oro idaibo owera etou ri aro? Ororosioidiro-ri pua iedi tanaro ro!’

33 Ina Iesu iato gerewesegerai nou kowasoro urubia aboto, Pita ibose nou ro iato gemadohodai, ‘Satani oro mo aboudo daragare! Oro edi kimaragoidiro ro duriomoro kimaragoidiro ie, Godi kimaragoidiro pua.’

34 Taie Iesu ro urubia iato giramairiai, nou kowasoro urubia mutu atu se nou aboto osiomai ri. Nou ro ibo gimowapotai, ‘Ata dubu nou ubi mo ubi tanaro kisioidiro aboto nou nakara se simara durupi eremaragoidiro-ri pua, nou simara ubi tanaro isioidiro-ri pua, modobo ie Godi ubi tanaro kemesioidiro, ina karaburai nou sapuwo to, io modobo ia ie. 35 Oro keremiro simara ubi tanaro ato nama-owaboi-ri io oro ro ama-aseperai-ri. Kaupoti oro durupi mo sapuwo to kaseperai ato daro mea owera kimowauti sapuwo to oro keremiro imese tau koworohuti ie pamo tato ie. 36 Oro imese namabu sirio na-irobidiro ina oro pamo nama-owea-ri era ato ama-omidirotiti-ri modobo ra oro aboudo? Io modobo pua. 37 Urubia dubu keremiro mani to kowameai modobo pua, ata gabo tato ie. 38 Abora nedi tau ro nato urubia na-orowomidiro neio imese sirio se ubauba ia ie mea tanaro isioidiro pua, morobise tanaro isioidiro pua Godi aboto. Mo etio ro nemowabe-dumo ibose mo owera etio ro aratiou-dumo wisa na neio mo ro ubi tato anama-iwia-ri. Mo nou se ie Imese Urubia Kiauri Dubu to Na-napoi-ro mo korowameai tau ato edi urubia ro neio sapuwo to mo ubi tato anama-oi-ri. Mo namadi-orowameai-ri Godi sowake urio sirio neio mutu mo abera edi woroworo ro nou ato anamadi-orowameai-ri.’