1 Abera Naramu owera mo aboto ibo gutura-ro, ‘Mo edi sowake urio ro mo urubia Sadisi sabowa ato nou ro na-emeaurititi, owera nou aboto ibo ba-demeiriai mo urubia sapuwo to. Owera ibo ie, Godi edi Tarena Urio 7 tanaro mutu mo abato tomidiro, ina 7 gorodi erempa kiaremo nakomu, erempa mutu, mo abato ibose tiamo. Owera mo aboudo ibo ie. Mo auna umoro ie nio ro etou tanaro isioidirotiti-dumo. Urubia ro ibo imaragoidirotiti-dumo nio kimibiria teremiro-dumo, kaupoti nio pamo ro irobu. 2 Diriribua-mo! Nio abato edi kimibiria kainakaina ro na-iamo, dimowoiriai-mo, aupise korodouti ido to neio araseperai-widumo. Mabu nio mo ro na-niauri mo ro edi tanaro ro na-niasouti, nio ro Godi sosoro gabo ato mea se iporeawado pua. 3 Ina noudo ie ba-dimaragoidiro-mo keba se nio ro beda kitamudiro gomidai-rimo, ina beda owera girowidiro-rimo, edi kitamudiro ro durupi to aise disioidiro-mo, ina ubauba aboudo aise derewesegerai-mo. Nio kerewesegerai tato, mo piro dubu sosoro anamadi-ereredea-ri, ina nio umoro oi-ri pua mo beda tau ato anamadi-orowameai-ri.

4 Kaupoti Sadisi sabowa ato arua urubia nio abato torowomidiro, neio obotama marea tato iroidiro-dumo, idaibo kerewae kerewae tanaro neio ro isioidirotiti pua. Neio keakea obotama mutu mo abato ama-iateidiro-ri. 5 Nio etio ra koko se na-iwotoi-dumo, ubauba tanaro na-iwameduti-dumo, nedi urubia ro neio keakea obotama amadimi-irori-ri. Ata buka towamo, womu tato womu tato keremiro etio ro amadimi-imidai-ri, neio masiro iato tiamo. Nedi keremiro buka ro neido etio ra koko se na-iwotoi-dumo, neio masiro mo ro beda kiwagareawado pua. Mo ia ro Abera Godi nou sowake urio mutu neio sosoro gabo ato, nedi urubia ro anama-iasoro-ri mo morobise kowasoro urubia to. 6 Nio etio ra modobo ato kirowidiro Tarena Urio beda owera aro-die mo urubia aboto, nou owera gare se ba-demedea-mo.’

7 Abera Naramu owera mo aboto ibo gutura-ro, ‘Mo edi sowake urio ro mo urubia Piredepia sabowa ato nou ro na-emeaurititi, owera nou aboto ibo ba-demeiriai mo urubia sapuwo to. Owera ibo ie, Mo tarena ia ie, ibose mo ro morobise owera niarotiti. Eputa dubu Deibidi abato edi ki ro kebase na-owamotiti, iedi atu ki ro abora mo abato owamotiti. Owera mo aboudo ibo ie. Nou ro beda magere kodobura ra, ata ro gabo tato ie kopai, ibose nou ro na-wopai, ata ro gabo tato ie kodobura. 8 Mo auna umoro ie nio ro etou tanaro isioidirotiti-dumo. Owera neito ma-dirowidiro-rimo, abora magere aise aidiro-die nio mo ro ta-nimodobura. Iedi magere ro ata ro kopai gabo tato ie. Mo umoro ie nio kimibiria pupuwopupuwo se iamo pua. Kaupoti mo edi kitamudiro ro mea se ibodorotiti-dumo, ina mo nio ro aratioutiti pua. 9 Neito ma-dirowidiro-rimo, arua urubia ibo iaro-dumo, “Nimo Iu urubia ie”, kaupoti neio karasaubuti urubia ie, Iu urubia pua, neio Satani urubia ie. Mo ro arua tanaro neio aboto anama-isioidiro-ri, ina noudo ie neio nio aboto amadimo-ou-ri, nio sairo mabu ato amadimi-iroboreauti-ri. Taie neio nato amadima-aro-ri ibo “Nio Iesu ro auna nirimagare timatiti-die.”

10 Nio mo ro keba se na-nimowapotai koko se orowotoi ri mo owera nio ro aise gibodoro-rimo. Ina noudo ie nedi auna ubauba tau ro na-wou-die nedi duriomoro gebari ro neito urubia iwaibirio ri, nio mo urubia ie, anama-iwairiai-ri. 11 Mo aupise ie anamadi-orowameai-ri. Nio ro keba se edi kimibiria ro na-gomidai-rimo, nou se ba-dorobidiro-mo koko se, modobo pua nio edi mea wisa ro nou sapuwo to ata ro kiwasiri.

12 Nio etio ra koko se na-iwotoi-dumo, ubauba tanaro na-iwameduti-dumo, nedi urubia ro neio mo ro Tarena Moto turi posi sosoro anama-iwotoburio-ri Godi abato. Neio iato ibose to ama-irowotoititi-ri, ioudo beda keremeseruti pua. Ina neio abato owera mo ro anama-iatiti-ri. Abera Godi nu edi masiro ro, ibose nu edi sabowa ro namadi-ororuwo-ri nou aboudo, masiro Orio Ierusarema, neio abato anama-iatiti-ri. Ibose mo orio masiro neio abato anama-iatiti-ri. 13 Nio etio ra modobo ato kirowidiro Tarena Urio beda owera aro-die mo urubia aboto, nou owera gare se ba-demedea-mo.’

14 Abera Naramu owera mo aboto ibo gutura-ro, ‘Mo edi sowake urio ro mo urubia Raodesia sabowa ato nou ro na-emeaurititi, owera nou aboto ibo ba-demeiriai mo urubia sapuwo to. Owera ibo ie, edi masiro ro mo neito nararasorotiti “Nou Se ie”. Ina ibose Godi mo ro mea se morobise to nowautiti. Ibose imese namabu sirio Godi ro mo tu to gisioidiro, owera mo aboudo ibo ie.

15 Mo auna umoro ie nio ro etou tanaro isioidirotiti-dumo. Nio kimibiria egea mere se gebobo ta-goi-dumo. Nio aragare pua mo aboudo, ina ata sapuwo rido kiauri ato nio kimibiria korosa ia pua, egea mere se pupuwo tato ro irobowado, mo nio ro morobise to owasorotiti pua. Korosa kiworohuti modobo ia ie. Nio korosa ubi tato koi ato, gebobo ba-doi-mo. Korosa mere imese modobo ia pua! 16 Nio turi ato orowotoi, korosa ia pua, ibose gebobo ia pua ina noudo ie nio mo ro kibeiomai aboto ie idaibo nio imorowa rie. 17 Nio ibo na-iaro-dumo, “Nimo namabu sirio ie, modobo ato nirowomidirotiti, namabu nimo ro iosoratiti pua.” Kaupoti nio eremasibai pua ibo nio abato mibo sirio ia se tiamotiti. Nio imese nitonito ia se irowomidirotiti, arua urubia ro natonato imati-dumo. Nio modobo ato irowomidirotiti pua, nio namabu tato urubia ie. Ibose nio mea se irarowo pua, idomari pogo urubia ie. Nio mo sosoro gabo ato porose se sosoro irowomidirotiti. Kaupoti nio nakara se eremasibowado pua ibo nio idaibo sosoro mibo sirio mutu irowomidirotiti. 18 Ina nio mo ro muro owera nimia, agoago nadi masiro gorodi nou auna ia korosa era to kitai ato, nou auna wisa namabu to aise kararapoi ie. Morobise kimibiria idaibo sosoro ie, mo aboudo nou ba-dimade-mo, morobise namabu sirio urubia to ararasoro ri. Ibose nio mo aboudo keakea obotama ba-dimade-mo, nio iroidiro na ie. Nedi keakea obotama ro durupi neito namadimo-orowasio-ri, nio mo sosoro gabo ato siripo ro ina iwati ri pua. Ibose idomari meresini mo aboudo ba-dimade-mo, idomari mea se kirarowo sapuwo to. 19 Mo edi urubia ro nirimagare na-nimatiti neio mo ro kimutuputiawado ie, neio ro ubauba beda tau ato iwaseidiro-dumo, neio mo ro ubauba wisa kemowame ie ubauba kimesere sapuwo to. Ina noudo ie nio abato auna ubi ro ba-miamo mo ubi tanaro nou kisioidiro aboto, ina ubauba aboudo derewesegerai-rimo.

20 Owera neito ma-dirowidiro-rimo, abora mo magere damo ato notoi ina nio aboto owera to ti-norowapotaidirotiti nio ro magere emodobura ri. Mo owera kodu etu ro kemororowai ra ina magere kemodobura ato, mo nou aboto kodoro ie, ina mo nou mutu ohona atu se kiho ie. 21 Nio etio ra koko se na-iwotoi-dumo, ubauba tanaro na-iwameduti-dumo, mo ro neio anama-imapoi-ri mo mutu orowomidiro-ri, mo edi komidiro nakomu ro nato. Mo koko se beda sosoro nirimowotoi ina mo abera gomo ato nomidiro, nio idaibo sosoro to ama-irowomidiro-ri mo abato edi komidiro nakomu ro nato. 22 Nio etio ra modobo ato kirowidiro Tarena Urio beda owera aro-die mo urubia aboto, nou owera gare se ba-demedea-mo.’