1 Man wema꞉yo꞉ hendele mo꞉asuwa꞉fa꞉ib ko꞉sega, niyo꞉ no꞉no꞉n wiyo꞉ a꞉wabuluma꞉nigo꞉l. Alana꞉ to ko꞉lo꞉ wo꞉no꞉lelo꞉ delen a꞉no꞉ kalaba wido꞉ o꞉lia꞉, ofolo꞉ ba꞉dan man a꞉no꞉lia꞉yo꞉ niyo꞉ sa꞉ma꞉nigo꞉l. 2 Ne asulo꞉, donayo꞉ do꞉ a꞉la꞉ta꞉ga꞉ fa꞉la꞉da꞉ino꞉ ta꞉ta꞉ga꞉ mio꞉ a꞉namio꞉, Keliso kalu nowo꞉* Fo꞉l eyo꞉ ene wiyo꞉ mo꞉duluba꞉no꞉ asulakiyo꞉, kelego꞉ e amilo꞉ fa꞉la꞉dowo꞉ a꞉no꞉, kalu noma꞉lo꞉ dimido꞉wo꞉ au bale sio꞉. Gode eyo꞉ kalu a꞉no꞉ dia꞉sa꞉ga꞉, Hebene hen asol, Godelo꞉ a꞉lab a꞉na dia꞉gane. E do꞉mo꞉ o꞉lia꞉ anelalikiyo꞉lo꞉, o꞉ e do꞉mo꞉wo꞉ ta꞉ta꞉ga꞉ anelalikiyo꞉lo꞉, ne mo꞉asulab, ko꞉sega Gode e asulo꞉ ko꞉lo꞉lab. 3-4 Kalu a꞉no꞉ Gode eyo꞉ ene sagalema꞉no꞉ hen a꞉na tililia꞉gane, niyo꞉ a꞉la꞉asulab. E do꞉mo꞉le a꞉laba꞉le, o꞉ do꞉mo꞉wo꞉ ta꞉fo꞉wa꞉le, ne mo꞉asulo꞉ ko꞉sega Gode e asulo꞉ ko꞉lo꞉lab. E a꞉na ha꞉na꞉sa꞉ga꞉yo꞉, to elo꞉ dabu a꞉no꞉ walama꞉no꞉wo꞉ aundo꞉ma dowo꞉ elena ba꞉ba꞉. A꞉la꞉ta꞉ga꞉ to a꞉no꞉ mo꞉sama꞉kiyo꞉, eleyo꞉ difa꞉. 5 Niyo꞉ kalu we o꞉ngo꞉ma꞉ wiyo꞉ o꞉li wabuluma꞉no꞉, ko꞉sega no꞉no꞉n wiyo꞉ mo꞉wabudaki, ne amilo꞉ halaido꞉lo꞉ma dowab a꞉no꞉leko꞉ wabuluma꞉no꞉. 6 Hendele no꞉no꞉n wiyo꞉ wabuluma꞉no꞉ dowo꞉ kibo꞉bowo꞉, to a꞉no꞉ halabo꞉ mo꞉so꞉mo꞉lo. Mo꞉wo꞉ ha꞉, niyo꞉ to hendeleyo꞉ ko꞉lo꞉ so꞉mo꞉lo. Ko꞉sega kalu noma꞉yo꞉ wi alano꞉ nemo꞉ dimiabena꞉kiyo꞉, niyo꞉ no꞉no꞉n wiyo꞉ mo꞉wabuluma꞉no꞉. Iliyo꞉ man nilo꞉ dimidabo꞉ ba꞉daki a꞉la꞉ta꞉ga꞉ to man nilo꞉ widabo꞉ da꞉dakiyo꞉, man a꞉no꞉ aloba꞉daki ne a꞉nami asuluma꞉ib. 7  Job 2.6Gode eyo꞉ kelego꞉ nemo꞉lo꞉ kalab amilo꞉ wido꞉ a꞉no꞉, nafale dowaki, kelego꞉ nowo꞉ a꞉ma꞉ tininila꞉ ko꞉lo꞉lab. Ko꞉sega no꞉no꞉no꞉ ne nafale a꞉la꞉asulaki, nolo꞉ ni tinio꞉ a꞉la꞉ asulabena꞉kiyo꞉, Gode eyo꞉ kelego꞉ nowo꞉, ni do꞉mo꞉ amilo꞉ do꞉mo gulu alifa꞉ o꞉ngo꞉ ko꞉lo꞉, ne amio꞉ fa꞉la꞉doma꞉ki ta꞉fo꞉. Kelego꞉ a꞉no꞉, Sa꞉da꞉na꞉ya꞉ iliga꞉felo꞉ kalu o꞉ngo꞉ dowaki, ne mogagila꞉ma꞉ki mio꞉. 8 Niyo꞉ ho꞉len otalen a꞉namio꞉, kelego꞉ a꞉no꞉ dila꞉ma꞉kiyo꞉, Alanbo꞉wo꞉ halaido꞉ dulugu sio꞉. 9  Fili 4.11-13Ko꞉sega eyo꞉ nemo꞉wo꞉ a꞉la꞉sio꞉, “Halaido꞉ nilo꞉ma꞉yo꞉ kaluka꞉isale halaido꞉lo꞉ma dowab a꞉no꞉ mada ilili alita꞉sen. A꞉la꞉fo꞉ko꞉lo꞉ nili ha꞉fo꞉ disa꞉lan man a꞉no꞉ gi ami ege alima꞉ib. Kaluka꞉isaleyo꞉ halaido꞉lo꞉ma dowab amio꞉, halaido꞉ nilo꞉wo꞉ mada alan dowaki, ha꞉fo꞉ disa꞉lan man nilo꞉ma꞉yo꞉ gio꞉ o꞉li ilili alifa꞉no꞉.” Alan eyo꞉ a꞉la꞉sio꞉. A꞉la꞉fo꞉ko꞉lo꞉ Kelisowa꞉ ene halaido꞉wo꞉ ne amio꞉ doma꞉kiyo꞉, ne halaido꞉lo꞉ma dowab a꞉no꞉ sagalaki kalaba sa꞉ma꞉no꞉. 10 A꞉la꞉go꞉ko꞉lo꞉ Kelisowa꞉ ene wiyo꞉ duluguma꞉kiyo꞉, ne halaido꞉lo꞉ma dowab amio꞉lo꞉, kalu noma꞉yo꞉ ne wa꞉la꞉ sa꞉ndab amio꞉lo꞉, hida꞉yo꞉ ko꞉li ko꞉lilo꞉ a꞉no꞉ nelo꞉wa fa꞉la꞉dowab amio꞉lo꞉, kalu noma꞉yo꞉ ne mogagilab amio꞉lo꞉, ne sagala꞉sen. Mo꞉wo꞉ no꞉no꞉n ne halaido꞉lo꞉ma dowab amio꞉, ho꞉len a꞉namio꞉ ne hendele halaido꞉wo꞉ a꞉na dowa꞉sen.

11  2Kol 11.5To nilo꞉ so꞉lo꞉l we, ne no꞉nolo꞉ kalu o꞉ngo꞉ dofo꞉liki so꞉lo꞉l. Giliyo꞉ nemo꞉lo꞉ dimido꞉ a꞉ma꞉ ilikiyo꞉ niyo꞉ a꞉na so꞉lo꞉l. Giliyo꞉ man nafa nilo꞉wo꞉ o꞉li sahadaloma꞉no꞉ dowo꞉ ko꞉sega, giliyo꞉ a꞉la꞉bo꞉ mo꞉dimidaliki, to a꞉no꞉ no꞉no꞉n sahadalowo꞉. Giliyo꞉ kalu nolo꞉, iliga꞉felo꞉ kalu alandeyo꞉ o꞉m a꞉la꞉asulab. Hendele ne wilo꞉ma kalu, ko꞉sega nanog ililo꞉ dimido꞉ a꞉ma꞉yo꞉ nilo꞉ dimida꞉sen a꞉no꞉ mo꞉tinio꞉ ko꞉lo꞉lab. 12  Lom 15.19Ne gi o꞉lia꞉ elen amio꞉, hida꞉yo꞉wo꞉ diaki halaido꞉ kagatakiyo꞉, ele ba꞉ba꞉no꞉ kelego꞉wo꞉lo꞉, nanog halaido꞉wo꞉lo꞉, molo ha꞉na꞉no꞉ ko꞉li ko꞉lilo꞉ a꞉no꞉lo꞉ gimo꞉wo꞉ wida꞉len. Gio꞉ ne iliga꞉felo꞉ kalu hendelo꞉b a꞉la꞉bo꞉ba꞉kiyo꞉, niyo꞉ man a꞉no꞉ ko꞉lo꞉ wida꞉len. 13  2Kol 11.9Giliyo꞉, “Fo꞉l eyo꞉ sa꞉s nolbo꞉wo꞉ mada nafale asuwa꞉tab ko꞉sega nimo꞉wo꞉ hebda꞉su asuwa꞉tab,” a꞉la꞉asulab. Hendele nilo꞉ sa꞉s nol amilo꞉ dimida꞉sen a꞉no꞉, niyo꞉ gimo꞉wo꞉lo꞉ man imilig a꞉no꞉ko꞉ dimido꞉. Ko꞉sega kelego꞉ imilise nowo꞉ gilo꞉ amio꞉ niyo꞉ mo꞉dimido꞉. Niyo꞉ ma꞉no꞉lo꞉ doba꞉da꞉lo꞉ ne ko꞉lo꞉ bo꞉fo꞉mela꞉no꞉wo꞉ gimo꞉wo꞉ moleyo꞉ mo꞉ha꞉iyo꞉. A꞉no꞉ ne hala go꞉wa꞉le? A꞉la꞉go꞉lalega giliyo꞉ nilo꞉ hala dimido꞉ a꞉no꞉ ga꞉lila꞉bi.

14 O꞉go꞉ ne gilo꞉ amio꞉ asol mia꞉nigo꞉l ko꞉lo꞉, ho꞉len a꞉namio꞉lo꞉ niyo꞉ gimo꞉wo꞉ moleyo꞉ mo꞉ha꞉nima꞉no꞉. Mo꞉wo꞉ niyo꞉ gili kelego꞉ dia꞉no꞉wo꞉ mo꞉asulo꞉. Ne gi asuwa꞉fa꞉no꞉ asulab. Gio꞉ asulab, so꞉wa iliyo꞉ iya ano o꞉lia꞉yo꞉ mo꞉tilidoma꞉ib ko꞉sega, iya ano o꞉lia꞉ma꞉yo꞉ so꞉wayo꞉ ko꞉lo꞉ tilidowa꞉sen. 15 Hendele, no꞉no꞉n kelego꞉ da꞉lab a꞉no꞉ tambo a꞉la꞉ta꞉ga꞉, no꞉no꞉n mela꞉no꞉wo꞉lo꞉, gio꞉ ko꞉lo꞉ asuwa꞉takiyo꞉, ne sagala꞉liki wala꞉ma꞉no꞉. A꞉la꞉go꞉ko꞉lo꞉, niyo꞉ gimo꞉wo꞉ ha꞉fo꞉wo꞉ mada alan disa꞉lo꞉l. Ko꞉sega giliyo꞉ nemo꞉wo꞉ ha꞉fo꞉wo꞉ mo꞉hagale disa꞉ma꞉iba꞉le? 16 Ne ko꞉lo꞉ bo꞉fo꞉mela꞉no꞉wo꞉ kelego꞉ gililo꞉wo꞉ mo꞉dia꞉sen. Giliyo꞉ a꞉la꞉bo꞉ asulo꞉. Ko꞉sega kalu nolba꞉yo꞉ man nilo꞉ a꞉no꞉ ko꞉lo꞉ sa꞉lakiyo꞉ a꞉la꞉sa꞉ma꞉ib, “Eyo꞉ enena꞉ma꞉la꞉ asuwa꞉foma꞉kiyo꞉, nimo꞉wo꞉ do꞉lo꞉le sa꞉laki, dehege sa꞉lab.” 17 Iliyo꞉ a꞉la꞉sio꞉ ko꞉sega, niyo꞉ kalu nolo꞉ gilo꞉wa iliga꞉fo꞉ a꞉namio꞉, kalu i a꞉ma꞉yo꞉ ni wiya a꞉la꞉ta꞉ga꞉yo꞉, gio꞉ mogagila꞉yo꞉? 18  2Kol 8.6,16-18Taituso꞉ gilo꞉wa mena꞉kiyo꞉, niyo꞉ emo꞉wo꞉ halaido꞉ sio꞉ a꞉la꞉ta꞉ga꞉ niyo꞉ nao nowo꞉ e o꞉lia꞉ iliga꞉fo꞉. Ko꞉sega Taitus eyo꞉ gio꞉ dikida꞉sa꞉ga꞉yo꞉ kelego꞉ gililo꞉wo꞉ dilo꞉bowo꞉? A꞉la꞉baka꞉! Na꞉no꞉ asulo꞉ imilise dowa꞉sen. A꞉la꞉ta꞉ga꞉ na꞉no꞉ man imilise o꞉leo꞉ngo꞉ ka kudu ha꞉na꞉sen.

19 Giliyo꞉ a꞉la꞉asulab, “Fo꞉l eyo꞉ nili siwa꞉l amio꞉ digalo꞉ doma꞉nikiyo꞉, emo꞉lo꞉ diga꞉di sa꞉lab a꞉na ilikiyo꞉, eyo꞉ towo꞉ a꞉ma꞉la꞉ nodo sa꞉la꞉lab.” Gio꞉ a꞉la꞉bo꞉ asula꞉so꞉bo. Nio꞉ Kelisowa꞉ ene nanog dian kalu dowo꞉ ko꞉lo꞉, nanog nililo꞉ dimida꞉sen a꞉no꞉ Gode eyo꞉ ba꞉da꞉sen. Ni mili, nililo꞉ dimida꞉sen a꞉no꞉ tambo, gio꞉ ko꞉lo꞉ halale alifoma꞉ki dimida꞉sen. 20 Nelo꞉ kele asulabo꞉ we. Ne gilo꞉ kona ya꞉ga꞉yo꞉, gio꞉ kalu nilo꞉ asulab o꞉leo꞉ngo꞉wo꞉ mada mo꞉elena ba꞉ba꞉no꞉. A꞉la꞉ta꞉ga꞉ giliyo꞉ ne ba꞉dakiyo꞉, kalu gililo꞉ ba꞉ba꞉no꞉ asulo꞉ o꞉leo꞉ngo꞉wo꞉ mo꞉ba꞉ba꞉ib. Ne ya꞉sa꞉ga꞉yo꞉ man we o꞉ngo꞉wo꞉ gi usamio꞉ dowo꞉ elena ba꞉ba꞉nigo꞉ba꞉le? Towa꞉lo꞉ kegan mano꞉lo꞉, etean mano꞉lo꞉, gadian mano꞉lo꞉, kalu nowo꞉mbo꞉lo꞉ mo꞉bean mano꞉lo꞉, madali yo꞉ido꞉ to sa꞉lan mano꞉lo꞉, sada꞉dan mano꞉lo꞉, kailan mano꞉lo꞉, a꞉la꞉ta꞉ga꞉ yo꞉le dowan man a꞉no꞉ ko꞉lo꞉ tambo ba꞉ba꞉nigo꞉ba꞉le? 21  2Kol 13.2Nelo꞉ tagilabo꞉ we. Ne wa꞉ka gilo꞉wa ya꞉ga꞉yo꞉, kaluka꞉isale modo꞉ tamin amilo꞉ man mogago꞉ dimida꞉len a꞉no꞉, iyo꞉ asulo꞉ mo꞉nodolaki, o꞉dimida꞉lena ba꞉ba꞉no꞉. Iliyo꞉ heyo꞉ man ko꞉li ko꞉lilo꞉ a꞉no꞉lo꞉, uwo꞉ dian man a꞉no꞉lo꞉, a꞉la꞉ta꞉ga꞉ digalilan man a꞉no꞉lo꞉ o꞉dimida꞉lab ko꞉lo꞉, Gode eyo꞉ mogago꞉ gililo꞉ dimida꞉lab a꞉no꞉ nemo꞉ widalikiyo꞉, ne sendeloma꞉no꞉.