7
Godeya꞉ kaluka꞉isaleyo꞉ eno꞉ a꞉la꞉liki da꞉feyo꞉
1 Jer 49.36,Dan 7.2A꞉ma꞉ fa꞉s amio꞉, ma꞉mula꞉ kalu fa꞉la꞉da꞉in nowo꞉, kuan fa꞉la꞉da꞉in henfelo꞉ amilo꞉ a꞉na kagafo꞉lena ba꞉ba꞉. Iliyo꞉ fufayo꞉ fa꞉la꞉da꞉in henfelo꞉ wilo꞉ mia꞉no꞉ a꞉no꞉ ta꞉li dofo꞉labiki, henfelo꞉ amio꞉lo꞉, so꞉lu ho꞉n amio꞉lo꞉, i amio꞉lo꞉ fufayo꞉ folakiyo꞉ ba꞉labena꞉ki, fufayo꞉ ta꞉li. 2 Henfelo꞉ o꞉lia꞉ so꞉lu ho꞉n o꞉lia꞉yo꞉ mogagila꞉ma꞉kiyo꞉, ma꞉mula꞉ kalu fa꞉la꞉da꞉in i o꞉mo꞉wo꞉ halaido꞉wo꞉ dimi. A꞉la꞉ta꞉ga꞉ Gode mela꞉no꞉lo꞉ a꞉lab eyo꞉ kaluka꞉isaleyo꞉ eno꞉le a꞉la꞉da꞉fema꞉no꞉ ko꞉lo꞉, ma꞉mul kalu nowo꞉ ofdo꞉ yan doba꞉da꞉ fa꞉la꞉dota꞉ga꞉ yakiyo꞉, ele ba꞉ba꞉no꞉ kelego꞉ dia꞉fa꞉no꞉ a꞉no꞉ dia꞉yabiki ba꞉ba꞉. Eyo꞉ ma꞉mula꞉ kalu fa꞉la꞉da꞉in o꞉mo꞉wo꞉ halale ho꞉le sa꞉laki a꞉la꞉sio꞉, 3 Ese 9.4,6,Kala 9.4“Niliyo꞉ Godeya꞉ eno꞉lo꞉b a꞉la꞉likilo꞉ ele ba꞉ba꞉no꞉ sa꞉sa꞉lo꞉ a꞉no꞉, ene nanog dian kalu ili wo꞉lokan amio꞉ semo꞉ sa꞉sa꞉li alifa꞉ amio꞉, henfelo꞉wo꞉lo꞉, so꞉lu ho꞉no꞉lo꞉, iyo꞉lo꞉ o꞉se mogagila꞉so꞉bo.” 4 Kala 14.1,3A꞉la꞉fo꞉ko꞉lo꞉ Godeya꞉ eno꞉ a꞉la꞉likilo꞉ da꞉feyo꞉ agelo꞉wo꞉ nelo꞉ dabu ko꞉lo꞉, Isolael so꞉lo꞉ ko꞉li ko꞉lilo꞉ amilo꞉ kaluka꞉isale a꞉no꞉ ko꞉lo꞉ agelo꞉wo꞉ 144,000 dowo꞉.
5 Yudaya꞉ e so꞉lo꞉ amio꞉ 12,000 kaluka꞉isale a꞉no꞉ eno꞉le a꞉la꞉liki da꞉feyo꞉.
Lubena꞉ e so꞉lo꞉ amio꞉lo꞉ 12,000,
Gada꞉ e so꞉lo꞉ amio꞉lo꞉ 12,000,
6 Asela꞉ e so꞉lo꞉ amio꞉lo꞉ 12,000,
Nabtaliya꞉ e so꞉lo꞉ amio꞉lo꞉ 12,000,
Manasaya꞉ e so꞉lo꞉ amio꞉lo꞉ 12,000,
7 Simeona꞉ e so꞉lo꞉ amio꞉lo꞉ 12,000,
Libaiya꞉ e so꞉lo꞉ amio꞉lo꞉ 12,000,
Isakaya꞉ e so꞉lo꞉ amio꞉lo꞉ 12,000,
8 Sebuluna꞉ e so꞉lo꞉ amio꞉lo꞉ 12,000,
Yosa꞉ba꞉ e so꞉lo꞉ amio꞉lo꞉ 12,000,
Ba꞉nsamena꞉ e so꞉lo꞉ amio꞉lo꞉ 12,000.
Kaluka꞉isale mada modo꞉wo꞉ Gode Alano꞉ dulugu sio꞉
9 A꞉ma꞉ fa꞉s amio꞉, kaluka꞉isaleyo꞉ agelema꞉no꞉ babale dowo꞉ a꞉no꞉ ko꞉lo꞉ ba꞉ba꞉. Kaluka꞉isale kegeo꞉ a꞉no꞉, hen ko꞉li ko꞉lilo꞉ tambo amio꞉lo꞉, so꞉lo꞉ tambo ko꞉li ko꞉lilo꞉ mio꞉ amio꞉lo꞉, kaluka꞉isale ko꞉li ko꞉lilo꞉ tambo amio꞉lo꞉, to ko꞉li ko꞉lilo꞉lo꞉ sa꞉lano꞉ tambo amio꞉lo꞉ kegea꞉sa꞉ga꞉, misa꞉ kalulo꞉ mesa꞉no꞉ fofodo꞉ o꞉lia꞉ sibi inso꞉ o꞉lia꞉ma꞉ milifa kagayabi ba꞉ba꞉. Kaluka꞉isale i a꞉no꞉ helebeso꞉go꞉ sambo ho꞉lo꞉wa꞉ tigili sa꞉ga꞉lela꞉sa꞉ga꞉, faselayo꞉ ta꞉li dosdofo꞉liki wagelo꞉. 10 Kala 5.6-7Iliyo꞉ halale ho꞉le sa꞉lakiyo꞉,
“Nili Gode misa꞉ kaluwa꞉lo꞉ fofodo꞉ amilo꞉ sab o꞉lia꞉,
ene Sibi Inso꞉ o꞉lia꞉ma꞉yo꞉
nio꞉ hida꞉yo꞉ sab amilo꞉ gasiliyo꞉ o꞉m.”
11 Ma꞉mula꞉ kalu iyo꞉ misa꞉ kalulo꞉ mesa꞉no꞉ fofodo꞉ a꞉no꞉ hegea꞉fo꞉liki, ko꞉go꞉do꞉ kaluwo꞉lo꞉, mela꞉no꞉lo꞉ a꞉lab fa꞉la꞉da꞉in a꞉no꞉lo꞉ usa ta꞉taki, iyo꞉ tambo a꞉na elena ba꞉ba꞉. I a꞉no꞉ tambo misa꞉ kalulo꞉ mesa꞉no꞉ fofodo꞉lo꞉ doba꞉da꞉ gulalu asita꞉ga꞉, misa꞉yo꞉ hena kudufo꞉liki, Godeyo꞉ wabulu sa꞉lakiyo꞉ a꞉la꞉sio꞉.
12 Kala 5.12“Hendele o꞉m.
Wiso꞉ mada o꞉m.
Gi halaido꞉wo꞉ alan a꞉lab.
Ge asulo꞉lo꞉ di.
Ami ge halale kagaya꞉sen.
Ge malilo꞉ nafale ko꞉lo꞉,
gi wiyo꞉ duludaki,
wabulu sa꞉la꞉mela꞉no꞉.
Nili Gode, ge ko꞉ngo꞉ mela꞉no꞉ dofo꞉lab.
Hendeleyo꞉ o꞉m!”
13 A꞉la꞉ta꞉ga꞉, ko꞉go꞉do꞉ kalu noma꞉yo꞉ nemo꞉wo꞉ a꞉la꞉dabu ba꞉ba꞉, “Helebeso꞉g sambo ho꞉lo꞉wa꞉lo꞉ sa꞉ga꞉lela꞉sa꞉ga꞉lo꞉ kagafo꞉lab i a꞉no꞉ o꞉ba? I a꞉no꞉ o꞉ba a꞉la꞉ta꞉ga꞉ mio꞉wo꞉?” 14 Dan 12.1,Madi 24.21Niyo꞉ a꞉ma꞉la꞉ sa꞉lakiyo꞉, “Kalu alan, go꞉no꞉n ge asulo꞉.” A꞉la꞉so꞉lo꞉likiyo꞉ ko꞉go꞉do꞉ kalu a꞉ma꞉yo꞉ nemo꞉wo꞉ a꞉la꞉sio꞉. “Kaluka꞉isale i we hida꞉yo꞉ ko꞉li ko꞉lilo꞉lo꞉ fa꞉la꞉dowab ho꞉len a꞉namio꞉, hogo꞉ ba꞉da꞉la꞉ga꞉lo꞉ tilidabuwo꞉ mo꞉ta꞉fo꞉ganeyo꞉ i o꞉m. Ini helebeso꞉g sambo tigili sa꞉ga꞉lela꞉ a꞉no꞉ Sibi Inso꞉wa꞉ ho꞉bo꞉wa heyo꞉ ko꞉lo꞉, so꞉g inido꞉ a꞉no꞉ ho꞉lo꞉ fa꞉la꞉dowo꞉.
15 “A꞉la꞉go꞉ko꞉lo꞉ i wema꞉yo꞉ Godelo꞉ mesa꞉no꞉ fofodo꞉ milifa kagafo꞉likiyo꞉,
ho꞉lenowo꞉lo꞉, nuluwo꞉lo꞉ Godeya꞉ malilo꞉ a a꞉na iliki ene nanog diakiyo꞉, Godeya꞉ wiyo꞉ dulugu sa꞉la꞉lab.
A꞉la꞉ta꞉ga꞉ misa꞉ kalulo꞉ mesa꞉no꞉ fofodo꞉ a꞉namilo꞉ sab a꞉ma꞉yo꞉ iyo꞉ dinafa tilidowaki, bo꞉fo꞉mela꞉ib.
16 Ais 49.10Tif amio꞉ iyo꞉ ma꞉n maiyo꞉wo꞉ wa꞉kabiyo꞉ mo꞉doma꞉ib.
Iyo꞉ ho꞉n ma꞉no꞉ maiyo꞉wo꞉lo꞉ mo꞉doma꞉ib.
A꞉la꞉ta꞉ga꞉ of halaido꞉ ta꞉ndab a꞉ma꞉yo꞉ iyo꞉ mo꞉so꞉fa꞉ib, a꞉la꞉ta꞉ga꞉
kelego꞉ ofo꞉ noma꞉yo꞉ iliyo꞉ mo꞉mogaima꞉ib.
17 Song 23.2,Ais 25.8, Kala 21.4Mo꞉wo꞉ Sibi inso꞉ i fofodo꞉ wa꞉l amilo꞉ sab a꞉ma꞉yo꞉, iyo꞉ dinafa tili dowaki,
kaluwa꞉lo꞉ sibi ko꞉lo꞉ bo꞉fo꞉lowan auma꞉ib.
Iyo꞉ mela꞉no꞉lo꞉ dimia꞉sen ho꞉n si a꞉no꞉ maiya꞉ki,
eyo꞉ a꞉na tililia꞉ ha꞉na꞉ib.
A꞉la꞉ta꞉ga꞉ Gode eyo꞉ ililo꞉ hida꞉yo꞉ dia꞉len a꞉no꞉ dilaliki, ili si ho꞉n ya꞉leno꞉ elema꞉ib.”