1 Ne mili, niyo꞉ niasi Isolael kaluka꞉isale a꞉no꞉ ko꞉lo꞉ sa꞉ma꞉nigo꞉l. Gode eyo꞉ iyo꞉ asuwa꞉taki gasilima꞉kiyo꞉, niyo꞉ mada alan asula꞉sa꞉ga꞉, Godemo꞉ dulugu so꞉lo꞉l. 2 Niyo꞉ ililo꞉ man dimida꞉i ha꞉na꞉lab a꞉no꞉ fanda ba꞉da꞉sa꞉ga꞉ so꞉lo꞉l. Iyo꞉ Gode kudu ha꞉na꞉no꞉ mada asulo꞉ ko꞉sega, Gode kudu ha꞉nan man hendeleyo꞉ iyo꞉ babale dowaki, hala kudu ha꞉na꞉lab. 3 Kaluka꞉isale nio꞉ Godeya꞉ siwa꞉l amilo꞉ digalo꞉ doma꞉no꞉ man a꞉no꞉ iyo꞉ babale dowo꞉ ko꞉lo꞉, iyo꞉ digalo꞉ doma꞉no꞉ a꞉la꞉ta꞉ga꞉ tog inido꞉leyo꞉ kelelia꞉ sia꞉len. Ko꞉sega tog Godeya꞉lo꞉ dimido꞉ a꞉no꞉ iliyo꞉ mo꞉beaki gola ba꞉da꞉len. 4 Ele Godeya꞉lo꞉ dimi a꞉no꞉ nanogo꞉ dowo꞉ ko꞉lo꞉, nanog a꞉no꞉ Ya꞉su Keliso eyo꞉ tambo ilili alitaki tininila꞉. A꞉la꞉fo꞉ko꞉lo꞉ kaluka꞉isale e amilo꞉ tilidabu a꞉no꞉ Gode eyo꞉ iyo꞉ digalo꞉ kaluka꞉isale a꞉la꞉sa꞉la꞉sen ko꞉lo꞉lab.

5 Wkp 18.5Ele kudu ha꞉nakilo꞉ digalo꞉ doma꞉no꞉ man a꞉no꞉ Mo꞉sa꞉s e widakiyo꞉ a꞉la꞉sa꞉sa꞉lo꞉, “Kalu abeyo꞉ ele a꞉no꞉ tambo dinafalo꞉ kudu ha꞉na꞉lab a꞉no꞉, mela꞉no꞉wo꞉ dia꞉ib.” 6 Lo 30.12-14Ko꞉sega tog nowo꞉ da꞉lab. Tog a꞉la꞉do꞉ sa꞉lab a꞉no꞉ tilidabuwa kagayalikiyo꞉, Godeya꞉ siwa꞉l amio꞉ digalo꞉le doma꞉ib. Kalu abeyo꞉ tog a꞉namilo꞉ kudu ha꞉na꞉lab a꞉no꞉ to sa꞉lab we ko꞉lo꞉ kudu ha꞉na꞉lab. “Go꞉no꞉n a꞉ma꞉la꞉yo꞉ to we o꞉ngo꞉wo꞉ dabu ba꞉da꞉so꞉bo. ‘Ya꞉su Keliso e ko꞉lo꞉ henfelo꞉ wenamio꞉ tililia꞉ mena꞉kiyo꞉, Hebene halonamio꞉ kalu abe ha꞉na꞉nigaba꞉le?’ 7 A꞉la꞉ta꞉ga꞉ Ya꞉su Keliso e tililia꞉ mena꞉kiyo꞉, ‘dane ane hen amio꞉ abe ti ha꞉na꞉nigaba꞉le’ a꞉la꞉bo꞉lo꞉ dabu ba꞉da꞉so꞉bo.” 8 Ko꞉sega kalu abeyo꞉ Ya꞉su amilo꞉ tilidabu a꞉ma꞉yo꞉ a꞉la꞉sa꞉ma꞉ib, “Godeya꞉ towo꞉ gelo꞉ amio꞉ fa꞉la꞉dota꞉ga꞉ aniba da꞉lab. To a꞉no꞉ gi asulo꞉ usa dowaki, a꞉la꞉ta꞉ga꞉ gi mego꞉f amio꞉lo꞉ da꞉lab.” To a꞉na tilida꞉ba꞉no꞉ dowo꞉ ko꞉lo꞉labiki, niliyo꞉ to a꞉no꞉ wida꞉sen. 9 Giyo꞉ Ya꞉su sowo꞉ a꞉no꞉ Gode eyo꞉ a꞉ma꞉la꞉ dasi alifa꞉ a꞉la꞉bo꞉ hendele tili asulaki, “Ya꞉su e Alanka꞉” a꞉la꞉liki kalab amio꞉ fanda sa꞉lalega, Gode eyo꞉ ge a꞉ma꞉la꞉ gasilia꞉ib. 10 Mo꞉wo꞉ gi asulo꞉ amio꞉ tilida꞉dalikiyo꞉, Gode eyo꞉ ge digalo꞉ kalu a꞉la꞉sa꞉lab. A꞉la꞉ta꞉ga꞉ mego꞉fa꞉yo꞉ tilidabu gilo꞉wo꞉ fanda sa꞉lalikiyo꞉, Gode eyo꞉ ge gasiliab. 11 Ais 28.16Godeya꞉ bugo꞉ amio꞉ a꞉la꞉sa꞉sa꞉lo꞉, “Kaluka꞉isale abeyo꞉ e amilo꞉ tilida꞉dab a꞉no꞉ mada mo꞉sendelo alifa꞉ib.”

12 Ilig 15.9A꞉la꞉fo꞉ko꞉lo꞉ Yu kaluka꞉isale o꞉lia꞉ Yu kaluka꞉isalema o꞉lia꞉yo꞉ mada imilo꞉ ko꞉lo꞉lab. Kalu Alano꞉ imilig e ko꞉lo꞉, kaluka꞉isale tambowa꞉ Alano꞉ e ko꞉lo꞉lab. Kalu Alan eyo꞉ kaluka꞉isale abeyo꞉ emo꞉lo꞉ asuwa꞉foma꞉kilo꞉ ho꞉idabdo꞉ i o꞉mo꞉wo꞉ nafale mesa꞉no꞉wo꞉ dimia꞉sen. 13 Joel 2.32Godeya꞉ bugo꞉ amio꞉ a꞉la꞉sa꞉sa꞉lo꞉, “Kaluka꞉isale abeyo꞉ Alanbo꞉lo꞉ asuwa꞉foma꞉kilo꞉ ho꞉idab a꞉no꞉ tambo, eyo꞉ asuwa꞉taki a꞉ma꞉la꞉ gasilia꞉ib.”

14 Ko꞉sega kaluka꞉isale Alan amilo꞉ mo꞉tili da꞉dalega, i asuwa꞉foma꞉kiyo꞉ e mada mo꞉ho꞉lema꞉ib. A꞉la꞉ta꞉ga꞉ kaluka꞉isaleyo꞉ to elo꞉wo꞉ mo꞉da꞉dalega, iyo꞉ mada mo꞉tili da꞉ba꞉ib. A꞉la꞉ta꞉ga꞉ kalu noma꞉yo꞉ imo꞉wo꞉ mo꞉widalega, iyo꞉ mada mo꞉da꞉ba꞉ib. 15 Ais 52.7A꞉la꞉ta꞉ga꞉ Gode eyo꞉ tolo꞉ widan kaluwo꞉ mo꞉iliga꞉talega, iyo꞉ to nafa walama꞉no꞉wo꞉ mo꞉ha꞉na꞉ib. Godeya꞉ bugo꞉ amio꞉ a꞉la꞉sa꞉sa꞉lo꞉ da꞉lab, “Kaluka꞉isaleyo꞉ to nafalo꞉ dia꞉yab i a꞉no꞉ ba꞉da꞉ga꞉yo꞉, iligaki sagala꞉sen.”

16 Ais 53.1Ko꞉sega kaluka꞉isale nolo꞉ to nafa a꞉no꞉ mo꞉tilidabu. Aisaya eyo꞉ a꞉la꞉sa꞉sa꞉lo꞉, “Alan, to nilo꞉ wido꞉ a꞉no꞉ abe tili dabuwa꞉le?” 17 A꞉la꞉go꞉ko꞉lo꞉ Ya꞉su Keliso amilo꞉ tilida꞉ba꞉no꞉ a꞉no꞉, to da꞉dab a꞉na iliki fa꞉la꞉dowa꞉lab. A꞉la꞉ta꞉ga꞉ to da꞉ba꞉no꞉ a꞉no꞉, Ya꞉suwa꞉ to ko꞉lo꞉ widab a꞉na iliki fa꞉la꞉dowa꞉lab.

18 Song 19.4Ko꞉sega, Isolael kaluka꞉isale iyo꞉ to nafa a꞉no꞉ mo꞉dabuwa꞉le? A iyo꞉ dabu. Godeya꞉ bugo꞉ amio꞉ a꞉la꞉sa꞉sa꞉lo꞉,