Lud
Asuluma꞉no꞉ towo꞉ we
Isolael ta꞉i mio꞉ malolo꞉ a꞉no꞉ Lud bugo꞉ abol wema꞉yo꞉ ba asufa꞉ o꞉ngo꞉ dowaki, heb a꞉la꞉ a꞉no꞉ a꞉na kudu alifa꞉. Heb agel, Mo꞉mo꞉do꞉ a꞉na a꞉la꞉ta꞉ga꞉ aneyo꞉ Hetman bugo꞉ a꞉na edo꞉. Heb a꞉namio꞉ Godeya꞉lo꞉ Ablahama꞉ e ma꞉mui ko꞉lo꞉ Isolael amisa꞉n fa꞉la꞉doma꞉kilo꞉ dimido꞉ a꞉no꞉ ko꞉lo꞉ sa꞉sa꞉lo꞉. A꞉la꞉ta꞉ga꞉ Gode eyo꞉ Isolael kaluka꞉isale o꞉lia꞉ dinali saefa꞉ to a꞉no꞉ ko꞉lo꞉ sa꞉sa꞉lo꞉. Heb andeb, Samuel elo꞉ elen a꞉na a꞉la꞉ta꞉ga꞉ mio꞉wo꞉ Isolael misa꞉ kalu alan ko꞉li ko꞉lilo꞉ elen a꞉nami edo꞉. Malolo꞉ heb a꞉namio꞉ Isolael misa꞉ kaluwo꞉ a꞉na a꞉la꞉ta꞉ga꞉, Gode elo꞉ Da꞉ibid e Isolaela꞉ misa꞉ kalu alan fa꞉la꞉doma꞉kilo꞉ dinali saefa꞉ a꞉no꞉ ko꞉lo꞉ malolo꞉. Lud bugo꞉ a꞉no꞉ mo꞉mo꞉da malolab amio꞉ heb agel a꞉na da꞉lab. A꞉la꞉ta꞉ga꞉ bugo꞉ a꞉no꞉ edakiyo꞉, Da꞉ibida꞉ e so꞉lo꞉ amilo꞉ misa꞉ kalu fa꞉la꞉doma꞉ib a꞉no꞉ ko꞉lo꞉ agelo꞉.
Lud e Moab ga ko꞉lo꞉, Isolael kaluwa꞉ di. Ko꞉sega ino꞉ sowabikiyo꞉, eyo꞉ ena꞉sumo꞉ nofolo꞉ widakiyo꞉, e tili dofo꞉liki, Na꞉omiya꞉ Godeyo꞉ tilida꞉da꞉sa꞉ga꞉ gulugulula꞉len. A꞉la꞉ta꞉ga꞉yo꞉ Lud e kalu ho꞉gi noma꞉yo꞉ dima꞉kiyo꞉, Na꞉omi eyo꞉ asuwa꞉takiyo꞉, ene e so꞉lo꞉ us a꞉naka kedo꞉. A꞉la꞉do꞉ go꞉ a꞉namio꞉, e Da꞉ibida꞉ inuwo꞉ a꞉no꞉ fa꞉la꞉dowo꞉.
Henfelo꞉ wenamilo꞉ Godeya꞉lo꞉ dimidama꞉no꞉ asulab a꞉no꞉ waga fa꞉la꞉do alifa꞉iba꞉le a꞉la꞉do꞉ asulo꞉ a꞉no꞉ bugo꞉ wema꞉yo꞉ kalaba fa꞉la꞉do alifa꞉. Godeya꞉ ene ha꞉fo꞉ disa꞉lan man a꞉no꞉ bugo꞉ wema꞉yo꞉ kalaba wido꞉.
Hetman bugo꞉ a꞉namio꞉, kaluka꞉isaleyo꞉ Godeyo꞉ ta꞉ta꞉ga꞉ ha꞉nalikiyo꞉, hida꞉yo꞉ galilia꞉sen a꞉no꞉ ko꞉lo꞉ sa꞉sa꞉lo꞉. Ko꞉sega Lud bugo꞉ a꞉namio꞉, ha꞉la꞉ ga ko꞉lo꞉ nodola꞉sa꞉ga꞉lo꞉ Isolaela꞉ Godemo꞉ tilida꞉dakilo꞉ kudu ane o꞉mo꞉wo꞉ kelego꞉ nafale fa꞉la꞉do alifa꞉ a꞉la꞉ sa꞉sa꞉lo꞉.
1
A꞉lema꞉la꞉ga꞉ so꞉lo꞉wo꞉ Moab ane
1-2 Kamolo꞉ di kaluwa꞉lo꞉ bo꞉fo꞉len ho꞉len a꞉namio꞉ Isolael kaluka꞉isaleyo꞉ maiyo꞉wo꞉ alan dowo꞉. Kalu nowo꞉ a꞉na elen, ene wiyo꞉ A꞉lema꞉la꞉g. Ingaya꞉ wiyo꞉ Na꞉omi. Inso꞉ a꞉la꞉ma꞉ wiyo꞉ Malon, nowo꞉ Kilion. E so꞉lo꞉ a꞉ma꞉ mo꞉mio꞉wo꞉ A꞉fla꞉ta. Iyo꞉ Yuda hen, Ba꞉diliha꞉m amisa꞉n a꞉na sen amio꞉, maiyo꞉wo꞉ alan dowabiki, Ba꞉diliha꞉m a꞉no꞉ ta꞉ta꞉sa꞉ga꞉, Moab hen a꞉na ha꞉na꞉ni ane. 3 Moab a꞉na sen ami, A꞉lema꞉la꞉go꞉ a꞉na sowo꞉. A꞉lema꞉la꞉g e a꞉na sowabikiyo꞉, Na꞉omiyo꞉ a꞉la꞉ta꞉ga꞉ inso꞉ a꞉la꞉ko꞉ a꞉naka sen.
4 A꞉na silikiyo꞉, inso꞉ a꞉la꞉ma꞉yo꞉ Moab ka꞉isale ko꞉lo꞉ di. Ga wiyo꞉ nowo꞉ Oba, nowo꞉ Lud. 5 Gayo꞉ dia꞉sa꞉ga꞉ sena, Malon dia꞉ Kilion dia꞉yo꞉ a꞉na sowo꞉. Iyo꞉ a꞉namilo꞉ seno꞉ donayo꞉ do꞉la꞉fo꞉ ko꞉lo꞉ gulula꞉. Inso꞉ a꞉la꞉ a꞉no꞉ sowabikiyo꞉, Na꞉omiyo꞉ e fo꞉fo꞉dolo alifa꞉, mo꞉wo꞉ ene in o꞉lia꞉ so꞉wa o꞉lia꞉yo꞉ aundo꞉ma.
Na꞉omiyo꞉ Ludo꞉ Ba꞉diliha꞉m tililia꞉mio꞉
6 Na꞉omiyo꞉ a꞉la꞉ta꞉ga꞉ ena꞉su a꞉la꞉yo꞉ a꞉na sen ami, Na꞉omi e to nowo꞉ a꞉la꞉dabu. Ene hen a꞉namio꞉, Yawe eyo꞉ ma꞉no꞉ ma꞉no꞉wo꞉ alan dimiaka꞉, a꞉la꞉sio꞉ a꞉no꞉ da꞉da꞉sa꞉ga꞉, iyo꞉ a꞉ma꞉la꞉ Na꞉omiya꞉ hena ha꞉na꞉no꞉ asulo꞉.
7 Iyo꞉ ayo꞉ ta꞉ta꞉ga꞉ ha꞉na꞉ga꞉yo꞉, tog alan Yuda hen amilo꞉ ha꞉na꞉sen a꞉na o꞉kagataka, 8 ena꞉su a꞉la꞉mo꞉wo꞉ a꞉la꞉sio꞉, “Gaino꞉ ge kalu sowo꞉ a꞉la꞉mo꞉wo꞉lo꞉, nemo꞉wo꞉lo꞉ man nafa dimido꞉ ko꞉lo꞉, Yawe eyo꞉ ga꞉gdo꞉ ha꞉nab amio꞉ asuwa꞉taki, nafale mesea꞉ki ta꞉fa꞉ib. 9 Ga꞉go꞉ kalu ho꞉giyo꞉ dimia꞉sa꞉ga꞉ nafa mesea꞉kiyo꞉, Yawe emo꞉wo꞉ niyo꞉ dulugu sa꞉la꞉mela꞉no꞉. O꞉go꞉ ne no꞉no꞉n hena ho꞉no꞉l ko꞉lo꞉, ga꞉go꞉lo꞉ wenaka ta꞉bi,” a꞉la꞉sio꞉. A꞉la꞉sa꞉labiki a꞉la꞉yo꞉ Na꞉omiya ta꞉li dofo꞉liki alan ya꞉fodo꞉. 10 Ya꞉la꞉likiyo꞉ a꞉la꞉ma꞉yo꞉ a꞉la꞉sio꞉, “Na꞉no꞉ nani ayamio꞉ mo꞉ha꞉na꞉no꞉. Na꞉no꞉ gi so꞉lo꞉lo꞉ sab a꞉na, ua ha꞉na꞉no꞉” a꞉la꞉sio꞉.
11-13 Ko꞉sega Na꞉omiya꞉ ena꞉su a꞉la꞉mo꞉ sa꞉laki, “Ga꞉go꞉, nelo꞉ a꞉kudu ya꞉so꞉bo! Mo꞉wo꞉ ne anaso꞉ ko꞉m. Ga꞉gdo꞉ dia꞉no꞉ kalu so꞉wa nowo꞉, ne aundo꞉ma. Ne kaluwo꞉ a꞉ha꞉na꞉ga꞉, kalu so꞉wa a꞉la꞉ nowo꞉ a꞉na a꞉sa꞉la꞉lia꞉no꞉ kibo꞉bowo꞉, ga꞉go꞉ o꞉yasila꞉ga꞉yo꞉, a꞉na sili alifa꞉no꞉malo꞉ka꞉. Ga꞉go꞉ mada gaina꞉ aya ha꞉na꞉sia꞉bi! Yawe eyo꞉ ne gola ba꞉ba꞉ ko꞉m, ko꞉lo꞉ nilo꞉ halelia꞉sa꞉ga꞉lo꞉ hida꞉yo꞉ dio꞉l we, ga꞉g amio꞉lo꞉ golab.” Na꞉omi eyo꞉ a꞉la꞉sio꞉.
14 A꞉la꞉do꞉ sa꞉lab a꞉no꞉ a꞉la꞉ma꞉yo꞉ da꞉da꞉sa꞉ga꞉, wa꞉ka ya꞉fodo꞉. A꞉la꞉ta꞉ga꞉ Obayo꞉ mimila꞉sa꞉ga꞉ ha꞉nabiki, Ludo꞉ Na꞉omi eya ta꞉li dofo꞉len. 15 Na꞉omiya꞉ Lud emo꞉ sa꞉laki, “Obayo꞉ e hen enedo꞉wa, gode enedo꞉wa, a꞉ma꞉la꞉ ha꞉nabo꞉lo꞉ka꞉! Gelo꞉ a꞉ma꞉la꞉ doma꞉ni hamana!” a꞉la꞉sio꞉.
16 Ko꞉sega Lud eyo꞉ Na꞉omimo꞉ sa꞉laki, “Giyo꞉ ne ta꞉fo꞉ hamana a꞉la꞉bo꞉, nemo꞉wo꞉ sa꞉la꞉so꞉bo! Nelo꞉, gelo꞉ ha꞉naba mia꞉no꞉” a꞉la꞉sio꞉. “Hen o꞉ba mida꞉iya꞉le, gelo꞉ ha꞉nab a꞉na, nelo꞉ a꞉na mia꞉no꞉. Gode gilo꞉wo꞉, Gode nino꞉ doma꞉ib. Ge Isolael ga ko꞉lo꞉, nelo꞉ Isolael ga doma꞉ib. 17 Gelo꞉ sowa꞉sa꞉ga꞉lo꞉ daidab hen a꞉na nelo꞉ a꞉na dalima꞉ib. Niyo꞉ gemo꞉wo꞉ towo꞉ dinali so꞉lo꞉l. Na꞉n sowakiya, na꞉no꞉ a꞉na aloba꞉ma꞉ib. Ko꞉sega na꞉no꞉ mo꞉ nowa a꞉la꞉ta꞉ga꞉ aloba꞉dalega, Yawe eyo꞉ nemo꞉wo꞉ a꞉ma꞉la꞉ wa꞉dema꞉ib.” 18 Luda꞉lo꞉ dinali sa꞉lab a꞉no꞉ da꞉da꞉sa꞉ga꞉, Na꞉omi eyo꞉ wa꞉kabiyo꞉ towo꞉ mo꞉kudu sio꞉.
19 A꞉la꞉fo꞉ko꞉lo꞉ a꞉la꞉yo꞉ ha꞉na꞉ni ane. A꞉la꞉yo꞉ ha꞉na꞉sa꞉ga꞉, Ba꞉diliha꞉m hen a꞉na fa꞉la꞉dowo꞉. A꞉na fa꞉la꞉dowabiki, Ba꞉diliha꞉m amisa꞉n kaluka꞉isale a꞉ma꞉yo꞉ iliga꞉sa꞉ga꞉, amisa꞉n ka꞉isale i a꞉ma꞉yo꞉ a꞉la꞉sio꞉, “Ga we Na꞉omiya꞉le?” 20 A꞉la꞉sa꞉labiki, Na꞉omiya꞉ imo꞉ a꞉ma꞉la꞉ sa꞉laki, “Giliyo꞉, ne Na꞉omi a꞉la꞉bo꞉ sa꞉la꞉so꞉bo! Ne ‘Mala,’ a꞉la꞉sama.* Hibulu towo꞉ “Mala” a꞉la꞉do꞉ sa꞉lab a꞉ma꞉ ha꞉go꞉ halo꞉ o꞉m. Mo꞉wo꞉ Halaido꞉lo꞉ A꞉lab Gode eyo꞉ hida꞉yo꞉ alano꞉ nemo꞉ dimi ko꞉lo꞉ ne haleli ko꞉lo꞉ yo꞉l.” 21 “Ne tamin amio꞉ Isolael a꞉la꞉ta꞉ga꞉lo꞉ Moab hen a꞉na ha꞉nakiyo꞉, ne ego꞉ ane ko꞉sega, o꞉go꞉ ne a꞉ma꞉la꞉ Isolael wena a꞉fa꞉la꞉doma꞉ni yakiyo꞉, ne fo꞉fo꞉dolo꞉ yo꞉l” a꞉la꞉sio꞉. “Yawe eyo꞉ ne gola ba꞉daki, nemo꞉wo꞉ hida꞉yo꞉ dimi. A꞉la꞉fo꞉ko꞉lo꞉, giliyo꞉ ne ‘Na꞉omi’ a꞉la꞉bo꞉ sa꞉la꞉so꞉bo.”† Hibulu towo꞉ “Na꞉omi” a꞉ma꞉ ha꞉go꞉ we, sagalan.
22 A꞉la꞉do꞉ fa꞉la꞉dowo꞉ a꞉namio꞉, Na꞉omi e Moab a꞉la꞉ta꞉ga꞉ Ba꞉diliha꞉m amisa꞉na a꞉ma꞉la꞉ mio꞉. A꞉la꞉ta꞉ga꞉ Moab ga ena꞉su Lud elo꞉ e kudu mio꞉ ko꞉lo꞉ fa꞉la꞉dowo꞉. A꞉la꞉lo꞉ fa꞉la꞉dowo꞉ ho꞉len a꞉namio꞉, da꞉si balilo꞉ tuma꞉no꞉ elen.