1 KOLINITA
MeKolinita ꞌidi leta ꞌaigeda Paulo ꞌileleya
Paulo ꞌina sakowasi nugenugetana Kolinita ꞌoina tomota baibaiwadi Yesu sihemiseya, ta ꞌiꞌebesinediya, ꞌoinega mumuga galana silatuwa meKolinita ꞌidi hekalesiya ꞌalona. Muliyetega Paulo tetelidi ꞌihesagoheya, ta ꞌidi leta bewa ꞌileleya ma ꞌabehega ꞌiꞌabihe dumwaludi. Cidi galaowedi bewa: Siwatahidi hali boda ma hali boda ꞌoidiya, ma ꞌaigeda loheya ganawala galana ꞌipaihoweya, ta siyatayatala siboidimo, toloinaina matana, tauna geya Yesu ꞌana tohemisa, ma tupwana loheloheya ꞌidi yaubada nugenugetaidi ꞌadiwa siꞌaiꞌaidi, ma wete Yesu ꞌana tohepwailao geya siꞌitayahi bwaibwainidi, ta ꞌidi Badaina ꞌina Cai Tabu geya siheꞌasisiyane.
Paulo wete ꞌilihasiya Yaluyaluwa Tabuna ꞌina heguyai tohekalesiyao ꞌoidiya, taudi ꞌoidiyega sigwaegwae hali ꞌenanega, ma tupwana wete ginaula sipaihowediya Yaluyaluwa Tabuna ꞌina waiwaiyega. Leta ꞌana ꞌebelolagu ꞌoina Paulo ꞌilihasiya toholohila ta helau weyahidi.
1
Loyauwedo
1-2 Taugu Paulo, Yehoba ꞌihesinuwegauwa ꞌabehega Yesu Keliso tetelina ꞌana tohepwaila. Cimi leta bewa tasidai Sositeni ꞌilemegauwa ma yaleleyawa ꞌomi meKolinita tohekalesiyao ꞌoimiya. Weyahina ꞌomi Yesu Keliso ꞌiꞌabihe ꞌehaugomiya, ta ꞌina boda hesihesinuwadi ꞌoidiya waluhuma ma wamiyamiya, taudi wete Yesu Keliso saninega mahetemiyao waꞌahwaꞌahwanoi, taudi tupwa mabwaiyana ꞌoidiyega mahetedao ꞌida Bada ꞌaigeda tuwa, tauna Keliso. 3 Cida Badaina Yesu Keliso ma Tamada Yehoba ꞌidi helauwega tuwa wamiya daumwala.
4-5 Moisa, Yehoba ꞌihelauwegomiya ma ginaula mabwaiyana bwebweꞌana ꞌiꞌebwaegomiya, gidemusa ꞌimi gwae bwebweꞌadi ta ꞌimi sanapu bwebweꞌadi Yesu Keliso ꞌoinega. Eeta tuta mabwaiyana weyahimi yaloyauwedo Yehoba ꞌoina. 6 Ta wete yaloyauwedoweya weyahina Kelisoina waꞌahwa moiseya ma tetelina wahemisaeya. 7 Ta wete Yehoba ꞌina ꞌebwaya bwebweꞌadi mabwaiyadi ꞌoimiya simiyamiya, tuta bewa wayamwayamwana ꞌida Bada Yesu Keliso ꞌina latu hilama weyahina. 8 Ma tauna ꞌiꞌabiꞌabi hepaꞌaligomi, ta geya ꞌeta ꞌimi puimo, ma ꞌana siga sabweloina ꞌilohihilama.
9 Yehobaina maꞌana hemisa madouna eeta ꞌibwauwegomiya ma natunaina tauna ꞌida Bada Yesu Keliso baꞌidamiu waheꞌiyaꞌiyagu.
Sahena wataha silatulatu tohekalesiyao ꞌoidiya
10 Tasigwao, bewa ꞌigu lohatoto ꞌoimiya ꞌida Bada Yesu Keliso saninega ma ꞌabehega wanuwatuhu hegogona ma wagwae hegogona, ma hesi sahena waheheꞌoheꞌohe nuwana wawatawatahigomi. 11 Weyahina tupwadi Kiloe ꞌina bodao sihegwae pwaigauwa ꞌimi heꞌoheꞌohe weyahidi. 12 Eeta tupwami wagwae, “Tauma Paulo ꞌina boda.” Ma tupwami wagwae, “Tauma Apolosa ꞌina boda.” Ma tupwami wagwae, “Tauma Pita ꞌina boda.” Ma tupwami wagwae, “Tauma Keliso ꞌina boda.”
13 Sahena Keliso wahina tahwatahwatahidi, weyahina ꞌiboinamo weyahimi siꞌabi hekeloseya, geya taugu weyahimi. Wete Keliso tauna saninega wababitaisowa, ma geya saniguwega. 14 Cigu loyauwedo Yehoba ꞌoina bewa, weyahina geya mabwaiyami yaꞌabiꞌabihe babitaisogemi. Beno tuwa Kilisipo ma Geyo. 15 Sahena wanuwanuwatuhu ma wagwae, “Tauma Paulo ꞌina boda, weyahina Paulo ꞌiꞌabihe babitaisomaiya.” 16 Geya! Kilisipo ma Gayo, eema wete Sitipana ꞌina susu yaꞌabihe babitaisowediya, nuwana siboidimo. 17 Weyahina ꞌigu paihowa Keliso ꞌiꞌebwaegauwa tetela bwebweꞌana ꞌana lohatotomo weyahina, ta geya ꞌabihebabitaiso. Ma wete loguguyaina geya ꞌigu sinasinapuwega, tabu ma Keliso ꞌina ꞌamasa kelose ꞌoina tetelina yaꞌabiheweꞌa.
Yesu ꞌina ꞌamasa kelose ꞌoina
18 Kelose tetelinaina tomota tupwadi siꞌahwa ꞌaboꞌaboweya, taudi yaluyaluwadi ꞌamaꞌamasidi, ma hesi tauda tahemisaeya ꞌabehega Yehoba ꞌina waiwai tetelaina ꞌoina ꞌimiyamiya, ma ꞌoinega ꞌilemegita. 19 Yehobaina Buki Heꞌasisi ꞌoina ꞌihepwaileya ꞌigwae,
“Taudi tosanapuwao ma tosonogao ꞌidi nuwatuhu yalogwahatediya ma yaꞌabihe galediya.”
20 Coinega togidega taudi tosanapuwao bo nuwana toheꞌitao? bo nuwana taudi tologuguyao bewa tuwa baleꞌuwa simiyamiya? Moisa, Yehoba ꞌidi sanapuina ꞌiꞌahwa ginaula bwagabwagaediya. 21 Weyahina sanapu baleꞌuwa gesowana ꞌoinega Yehoba tasanapu, ma hesi Yehoba ꞌina nuwatuhu ta ꞌina tetela ꞌana lohatotomo ꞌoinega ꞌana tohemisao tauda ꞌilemegita. Tetelinaina mebaleꞌu siheginaula bwagabwagaeya. 22 Weyahina meYudiya nuwanuwadi ꞌilaꞌilalao sida ꞌitadi, ma taudi geya meYudiya, sanapu sibesebese. 23 Ma tauda hesiyage tetelinaina talohatotoweya, Keliso ꞌina ꞌamasa kelosemo ꞌoina weyahina, eema meYudiya silogwahateya ma wete tomiya ganamuli siꞌahwa ginaula bwagabwagaeya. 24 Ma hesi tauda Yehoba ꞌana tohemisao ꞌihesinuwanegita boda Yudiya ma hali bodao ꞌoidiyega, ma Keliso ꞌoinega Yehoba ꞌina waiwai ta ꞌina sanapu ꞌiꞌebwaegita. 25 Weyahina toꞌaha Yehoba ꞌina paihowa weꞌaweꞌana bo ꞌiꞌiuna, tomota tauda ꞌida waiwai madouna ꞌihewaiwai sineya.
26 Ma tasigwao, wanuwatuhuyahi ꞌabehega taudi Yehoba ꞌihesinuwanediya ꞌoimiyega, baibaiwadi geya baleꞌu ꞌana tosanapuwao, nuwana tohewaiwaiyao, nuwana ꞌana babadao. 27 Ma hesiyage baibaiwadi yauyauleidi ꞌihesinuwediya ma yauyauleidiyedi baleꞌu ꞌana tosanapuwao siꞌabihedeba mwadinidiya, ma wete baleꞌu ꞌana tobeluwao Yehoba ꞌihesinuwediya ma taudi wete tohewaiwaiyao sihewaiwai sinediya. 28 Ta wete gogo gabulena Yehoba ꞌina paihowa siꞌahwa ginaula bwagabwagaediya, ma hesi Yehoba ꞌina paihowao ꞌoidiyega ꞌidi ginaula mabwaiyana ꞌiꞌahu sepalediya. 29 Coinega geya ꞌeta wete loheya sowasowahina ma ꞌigwae hane Yehoba matana. 30 Weyahina Yehoba tauna ꞌina paihowega Yesu Keliso mahetedai taheꞌaigeda, ꞌoinega Yehoba ꞌina sanapu Yesuina ꞌilagu balaheya ꞌoida, weyahina Yesu tauna wahina ꞌipwaoliyeya weyahida, ta ꞌoinega ꞌiꞌabihe ꞌehaugita ma ꞌiꞌabihe dumwalugita.
31 Buki Heꞌasisi ꞌina hepwaila ginaula bewa weyahina ꞌigwaeya,
“Ceguma taiya nuwanuwana ma ꞌihepwatu, ꞌida Badamo ꞌida hepwatuwe.”