Mɨzefị wáraga bɨ
Yiwáni
eké ní
Ledre gɨ ro mɨzefị bụ́kụ bɨ Yiwáni ní
Yiwáni ꞌyịmɨkása eké ledre ba ne zɨ́ ngíti géyị ꞌyị ga bɨ ꞌbɨ Kɨ́résịto bɨ oto ꞌbúye nɨyí zɨ́a káa zɨ́ owụ́ ꞌbɨ ené e ní. Uku zɨ́ye kɨ́dí idínɨ́ fú ndị́sị méngị ledre ga bɨ Lomo kɨ́ Kɨ́résịto ilinɨ́ yée ní. Zɨ́a ésị sị́lị́ne komoyé gɨ ro ꞌyị ṛanga ga bɨ nɨyí go sɨmɨ kanị́sa ní, káa bɨ nɨyí lóndo yée ke. Uku zɨ́ye kɨ́dí née owoyeme ledre gɨ ro Kɨ́résịto bú, yée ndịsịnɨ́ go kéne, nɨ Owụ́ ꞌbɨ Lomo, zɨ́a ídíne kpá ꞌyịmaꞌdí. Zɨ́a úku ledre zɨ́ye kɨ́dí togụ́ ṇguṇgunɨ́ tɨ́ fú ledre Kɨ́résịto yá, nɨyí ídí kɨ́ trịdrị bɨ za fí ní. Zɨ́a nda úku odụ ledre zɨ́ye kɨ́dí idínɨ́ lányá ro óto ꞌbú Lomo bɨ ṇguṇgunɨ́ ledrea ní, zɨ́ye kpá fú ndị́sịyé óto ꞌbú lafúye.
1
Ledre gɨ ro trịdrị bɨ za fí ní
1 Máa Yiwáni, mááyí kɨ́ rokinyi kɨ́ éké ledre ba zɨ́se. Nɨ ledre gɨ ro ꞌyị bɨ ogụ kɨ́ trịdrị bɨ za fí ní. ꞌYị máa née nɨ kóo kú go bo ꞌdesị́. Zée ꞌyị kasa ené e, lurúzé wo go cụ́ kɨ́ komozé, zɨ́ze óto sị́lị́ze kpá za cụ́ ro kụṛụꞌbụa, zɨ́ze úwú ledre ga bɨ ndịsị úku yée ní za cụ́ kɨ́ mbílíze. 2 Nɨ dụụ́ ne ꞌyị íꞌbí trịdrị bɨ za fí ní zɨ́ ꞌyị e. Zée ꞌyị ené e, ndịsịzé ba úku maꞌdíi ledre bɨ gɨ do bi a ní zɨ́se. Gɨ zɨ́a kacɨ́ kadra za mbá nɨ kóo kɨ́ ꞌBụzé do bi kị́éꞌdo. ꞌBụzé Lomo ꞌdodoyeme wo go zɨ́ze. 3 Ukuzé zɨ́se ba ledre bɨ lurúzé go cụ́ kɨ́ komozé, zɨ́ze úwú a kpá za cụ́ kɨ́ mbílíze ní, gɨ ro zɨ́ mɨmbéꞌdezé ídíne kése kị́éꞌdo, kɨ́ ꞌbɨ ꞌBụzé Lomo kpá kɨ́ ꞌbɨ owụ́ ꞌbɨ ené Kɨ́résịto Yésụ. 4 Née sị́ ledre bɨ ekézé ledre ba zɨ́se gɨ roa ní, gɨ ro zɨ́ze ídíze kése ndro mbá kɨ́ rokinyi gɨ ro ledre máa née.
Idízé lányá dụụ́ ro ledre ꞌbɨ Lomo
5 Ledre bɨ ukuzé zɨ́se ba ní, nɨ ledre bɨ kóo uwúzé gɨ zɨ́ Yésụ maꞌdáa ní kɨ́dí, Lomo nɨ bimɨóṇgó, ledre ené e za mbá, mɨtụlụrụ ndaá sɨmɨ a wá. 6 Togụ́ ukuzé go kɨ́dí mɨmbéꞌdezé nɨ kɨ́ Lomo go kị́éꞌdo, zɨ́ze ndáꞌbazé ndị́sị méngị ledre ga bɨ ꞌbɨ mɨtụlụrụ ní, ṛangazé ṛanga go, mengịzé ezé née mbigí ledre bɨ ꞌbɨ Lomo ní wá. 7 Tɨ́ lá togụ́ ndịsịzé méngị ledre ga bɨ ꞌbɨ bimɨóṇgó, gɨ zɨ́a bɨ Lomo nɨ yị́ ené bimɨóṇgó ní yá, maꞌdíi, mɨmbéꞌdezé nɨ ídí kɨ́ lafúze kị́éꞌdo. Lomo nɨ lúguráyi zée drá gɨ sɨmɨ lúyú ledre ezé e kɨ́ sáma owụ́ ꞌbɨ ené Yésụ.
8 Togụ́ itízé kangú kɨ́dí, ndazé ꞌyị lúyú ledre e wá, ṛangazé ṛanga go. Mengịzé aka ezé mbigí ledre ꞌbɨ Lomo wá. 9 Idízé úkuógụ lúyú ledre ezé e za mbá zɨ́ Lomo, nɨ yị́ ené bɨlámá ꞌyị, ledre ga bɨ uku yée ní, nɨ méngị yée za mbá zɨ́ze, zɨ́a lúguráyi zée drá gɨ sɨmɨ lúyú ledre ezé e. 10 Togụ́ itízé kangú kɨ́dí ndazé ezé ꞌyị lúyú ledre e wá yá, ṛangazé ṛanga go roa, otozé wo go káa do ꞌyị ṛanga, ṇguṇguzé aka ezé ledre ené kɨ́ mɨmbéꞌdezé kị́éꞌdo wá.