Wáraga bɨ Páwulo eké zɨ́ ꞌyị ga bɨ sɨmɨ
Kolósayi
Ledre gɨ ro bụ́kụ bɨ Kolósayi ní
Kolósayi nɨ gara mɨꞌdí gólụ sɨmɨ káṇgá bɨ karaba ndịsịnɨ́ ndólo a Táki ní. ꞌYịmɨkása Páwulo nderéogụ aka ené íri wá, nɨ kɨ́ mongụ́ sómụ́ ledre gɨ zɨ́a uwú go kɨ́dí ꞌyị ṛanga e nɨyí dongará ꞌyị ꞌbɨ Kɨ́résịto ga bɨ íri ní. Ukunɨ́ ledre zɨ́ ꞌyị ga bɨ ꞌbɨ Kɨ́résịto íri ní kɨ́dí idínɨ́ lódụ́ kacɨ́ ondụ́ ꞌbɨ Yụ́da e bɨ káa zɨ́ útú ngbuṛu, óto úndru maláyika e ní gɨ ro zɨ́ Lomo ídíne kɨ́ rokinyi. Née ní zɨ́ Páwulo úku ándá ledre zɨ́ye sɨmɨ ledre bɨ eké ba kɨ́dí umbu bɨ Kɨ́résịto uyu ní omonɨ́ ba gɨ zɨ́a, nɨ cakaba komo ere ꞌdága Ngére do maláyika e kɨ́ lomo e kpá za kɨ́ éyị́ ga bɨ do sogo káṇgá ní mbá. Zɨ́a kpá úku ledre zɨ́ye kɨ́dí gɨ do kacɨ́ Kɨ́résịto ngíti éyị́ bɨ nɨyí óto úndrua ní ndaá. Idínɨ́ óto dụụ́ úndru Kɨ́résịto. Mɨméngị ledre eyé idí ídí mɨméngị ledre ꞌbɨ ꞌyị ga bɨ Lomo gelé yée go káa do ꞌyị ené e ní.
1
Máa Páwulo bɨ Lomo gelé máa káa do ꞌyịmɨkása zɨ́ Kɨ́résịto Yésụ ní, azé kɨ́ lúnduzé sɨmɨ Lomo Timatíyo.
Ekézé ledre ba zɨ́se ga bɨ ṇgúṇgusé ledre ꞌbɨ Kɨ́résịto go, zɨ́se ídíse go mbigí ꞌyị ené e sɨmɨ Kolósayi ní.
ꞌBụzé Lomo idí lúrú bi kacɨ́se gɨ do bɨ zɨ́se ndị́sịsé bɨlámáse.
Páwulo iꞌbí mbófo éyị́ zɨ́ Lomo
Kacɨ́ kadra e mbá ndịsịzé, íꞌbí mbófo éyị́ zɨ́ Lomo bɨ ꞌBụ Ngére ezé Kɨ́résịto Yésụ ní gɨ rosé sɨmɨ bɨ azé go ndị́sị íni ini zɨ́a ní. Gɨ zɨ́a uwúzé go kɨ́dí ṇgúṇgusé ledre Kɨ́résịto Yésụ go kɨ́ngaya, zɨ́se ndị́sịsé go óto ꞌbú lafúse e ga bɨ ꞌyị ené e ní dosé kɨ́ngaya. Ndị́sịsé méngị ledre née kenée, gɨ zɨ́a ndị́sịsé go óto komosé gɨ ro rokinyi bɨ Lomo ndịsị bándáóto a zɨ́se komo ere ní. Ówo yémesé ledre a sɨmɨ bɨ kóo úwúsé bɨlámá ledre ené ní. Bɨlámá ledre née nɨ go fú lá aṇga do sogo káṇgá. Tụ́ꞌdụ́ ꞌyị e nɨyí go ndị́sị óyólóꞌbó sómụ́ ledre eyé gɨ zɨ́a, cé káa zɨ́ bɨ kóo mengị roné zɨ́se sɨmɨ bɨ kóo úwúsé maꞌdíi ledre zɨ́se ówoyéme a kɨ́dí Lomo yomo sée gɨ zɨ́ bɨlámá mɨmbéꞌdea bɨ rosé ní. Úwúụ́tụsé kóo bɨlámá sanda née gɨ tara Epáfura, ngúru ezezé. Nɨ bɨlámá ꞌyị moko ꞌbɨ Kɨ́résịto, ndịsị sáká sée ne ngárá ndazé íri wá ní. Uku ledresé ne zɨ́ze kɨ́dí ndị́sịsé go óto ꞌbú lafúse sɨmɨ rokoꞌbụ ꞌbɨ ꞌDówụ́ Lomo.
Sɨmɨ bɨ uwúzé ledre née kenée ní, zɨ́ze ndị́sịzé íni ini zɨ́ Lomo gɨ rosé kacɨ́ kadra mbá. Idí ꞌdódo éyị́ bɨ ili ídísé méngị a ní zɨ́se gɨ ro zɨ́se ídíse kɨ́ komokenzị ꞌbɨ ꞌDówụ́ Lomo. 10 Ndịsịzé íni ini zɨ́ Ngére ezé Kɨ́résịto gɨ ro zɨ́ mɨméngị ledre esé óto wo zɨ́a ówo a kɨ́dí ndị́sịsé go óto úndruné zɨ́a ídíne kɨ́ rokinyi kɨ́ ledre esé e mbá. Zɨ́a ndị́sịné íꞌbí mɨkánda ówo ledre ꞌbɨ Lomo zɨ́se kacɨ́ kadra mbá, zɨ́se ndị́sịsé méngị dụụ́ bɨlámá ledre e. 11 Ndịsịzé kpá íni ini, idí íꞌbí rokoꞌbụ zɨ́se kɨ́ngaya gɨ ro togụ́ mɨndị́sịsé ndaá bɨlámáne wá yá, zɨ́se ndị́sịsé ụ́tụsɨmɨsé gɨ ro zɨ́se ídíse kpá fú kɨ́ rokinyi. 12 Ídísé mbófo ꞌBụzé Lomo gɨ zɨ́a oto sée go zɨ́se ídíse mbigí ꞌyị ené e gɨ ro ndị́sịsé sɨmɨ bɨlámá bi bɨ bandá oto go gɨ ro ꞌyị ené ga bɨ nɨyí go sɨmɨ bimɨóṇgó ené ní. 13 Lomo yomo zée go gɨ zɨ́ Satána kɨ́ ídíne ngére dozé. Zɨ́a nda óto Owụ́ ꞌbɨ ené bɨ ꞌbúa nɨ doa kɨ́ngaya ní, káa do Ngére ezé. 14 Ngére Yésụ maꞌdáa ugú gozé ne gɨ sɨmɨ umbu ꞌbɨ lúyú ledre, zɨ́ Lomo ótoómo ledre zɨ́ze gɨ zɨ́a.
Kɨ́résịto romo do eyị́ e mbá
15 Mɨméngị ledre ꞌbɨ Kɨ́résịto ndịsị ꞌdódo mɨméngị ledre ꞌbɨ Lomo bɨ lurúzé wo kɨ́ komozé wá ní. Romo do éyị́ ga bɨ Lomo otoogụ yée ní za mbá, zɨ́a kpá ídíne kɨ́ rokoꞌbụné doyé. 16 Sɨmɨ bɨ Lomo otoogụ do sogo káṇgá ba kɨ́ ere kɨ́ éyị́ ga bɨ sɨmɨné ní mbá, yée ga bɨ lurúzé bú kɨ́ yée ga bɨ lurúzé wá ní, otoogụnɨ́ kóo yée kɨ́ Owụ́ ꞌbɨ ené Kɨ́résịto Yésụ. Zɨ́ye kpá ótoógụ mɨngburoko ngére e kɨ́ tụ́ꞌdụ́ ngíti géyị mɨngburoko ꞌyị e, kɨ́ rokoꞌbụ ga bɨ zɨ́ye ní mbá, zɨ́a óto Kɨ́résịto káa do Ngére doyé. 17 ꞌDáꞌdá gɨ zɨ́ éyị́ ga gére née mbá, Kɨ́résịto nɨ yị́ ené goó bo. Ndị́sị bándá éyị́ ga gére née ne zɨ́ye ndị́sị ídíye. 18 Nɨ káa zɨ́ do ní zɨ́ ꞌyị ga bɨ ṇguṇgunɨ́ ledre ené go ní. Nɨ ne mɨzefị ꞌyị bɨ urúụtụ roné gɨ sɨmɨ umbu ní. Gɨ zɨ́ kéyị née zɨ́a ídíne kɨ́ ledrené owóowó rómo do ꞌyịmaꞌdí e kɨ́ éyị́ e mbá. 19 Lomo nɨ kɨ́ rokinyi gɨ zɨ́a Owụ́ ꞌbɨ ené née nɨ cé káa zɨ́ ne ní sɨmɨ ledre e za mbá. 20 Yeme ledre ba gɨ ro zɨ́ Kɨ́résịto iꞌbí roné úyuné do mɨngbúngbu kágá gɨ ro zɨ́ne ídíne kɨ́ rokinyi, zɨ́ne ꞌdíꞌbilúgu éyị́ ga bɨ komo ere kɨ́ yée ga bɨ do sogo káṇgá ní mbá sɨmɨ sụmụ.
21 Bɨsinyí mɨméngị ledre esé kɨ́ mɨsómụ́ ledre esé oto kóo sée go zɨ́se ídíse ezeokó Lomo. 22 Cakaba ní Lomo ꞌdiꞌbilugu sée go sɨmɨ sụmụ gɨ zɨ́ umbu bɨ Owụ́ ꞌbɨ ené Kɨ́résịto uyu wo gɨ rosé ní. Mengị ledre née kenée gɨ ro sɨmɨ bɨ karanée kadra ngbanga ásé ógụ tóro kóꞌdụ́ne ní, ásé go drá lúyú ledre bɨ do ꞌdécị ngbanga rosé gɨ zɨ́a ní ndaá lolụ wá. 23 Gɨ zɨ́ kéyị née, ídísé lányá ngbúó ro ledre ꞌbɨ Kɨ́résịto bɨ ṇgúṇgusé ní. Ndásé óyólóꞌbó sómụ́ ledre esé kpị́ kpá kɨ́ óto komosé bɨ ótosé gɨ ro bɨlámá sanda bɨ kóo ogụnɨ́ kɨ́e zɨ́se ní wá. Bɨlámá sanda née ukunɨ́ go zɨ́ tụ́ꞌdụ́ ꞌyị e do sogo káṇgá za mbá. Máa Páwulo Lomo gelé máa gɨ ro ndị́sị úku ledre bɨlámá sanda máa née zɨ́ ꞌyị e.
Kɨ́résịto nɨ gɨ ro ꞌyị e mbá
24 Mááyí kɨ́ rokinyi sɨmɨ bɨ mááyí ndị́sị ꞌdóꞌdó gɨ rosé ní. Rokinyi máa née nɨ gɨ zɨ́a ꞌdoꞌdó bɨ mándị́sị ꞌdóꞌdó a ba, máméngị íꞌdí ba ledre bɨ kóo Kɨ́résịto yemeoto ya máídí ꞌdóꞌdó gɨ rosé ꞌyị ené e ní. 25 Lomo iꞌbí moko née zɨ́ma gɨ ro ndị́sịmá gámáma kɨ́ úku bɨlámá sanda née mbá zɨ́se ꞌyị ga bɨ ndásé Yụ́da e wá ní. Mándị́sị méngị née moko bɨ Lomo ili zɨ́ma méngị a zɨ́ ꞌyị ené e ní. 26 Bɨlámá sanda née nɨ kóo mɨótoécịné gɨ zɨ́ ꞌyị e kɨ́ tụ́ꞌdụ́ sɨmɨbi e. Karaba ní Lomo ꞌdodo ogụ nda go gbuṛaṛa zɨ́ ꞌyị ené ga bɨ ṇguṇgunɨ́ ledrené go ní. 27 Lomo ili zɨ́ ꞌyị ené e mbá ówoyéme mongụ́ ledre bɨ née mengị zɨ́se ga bɨ ngárá ndásé Yụ́da e wá ní bɨlámáne. Ledre máa née, nɨ Kɨ́résịto ndịsị go ndị́sị sɨmɨsé kacɨ́ kadra mbá zɨ́se kpá go ówo a bɨlámáne kɨ́dí, karanée Lomo iꞌbí úndru zɨ́se.
28 Kacɨ́ kadra mbá komokenzị bɨ Lomo iꞌbí zɨ́ze ní, ndịsịzé ꞌdódo ledre gɨ ro Kɨ́résịto kɨ́e zɨ́ ꞌyị e mbá, gɨ ro zɨ́ ꞌyị máa yée bɨ ṇguṇgunɨ́ ledre ꞌbɨ Kɨ́résịto go ní, zɨ́ye ídíye kɨ́ rokoꞌbụ royé ndị́sị ngbóróye nda ꞌdáꞌdá za kɨ́ngaya. 29 Née sị́ ledre bɨ mándị́sị méngị moko née kɨ́ rokoꞌbụ ga bɨ mbá Lomo íꞌbí zɨ́ma ní.