Wáraga zɨ́ ꞌyị ga bɨ
Ébere
ní
Ledre gɨ ro bụ́kụ bɨ Ébere ní
ꞌYị bɨ eké bụ́kụ bɨ Ébere ba ꞌyị ówo a ndaá. Tɨ́ lá nɨ mɨówoné bɨlámáne ngíti manda ꞌbɨ ꞌyị ga bɨ ꞌbɨ Kɨ́résịto ní, sɨmɨ sịndị́ kadra máa née nɨ kɨ́ rokoꞌbụ zɨ́ne sɨmɨ kanị́sa eké ledre née ne zɨ́ ꞌyị ga bɨ sɨmɨ kanị́sa ní. Née sịndị́ kadra bɨ kóo Páwulo ndịsị éké ledre e kɨ́ kása yée sɨmɨ kanị́sa e ní. ꞌYị née eké bụ́kụ ba zɨ́ ngíti géyị Yụ́da ga bɨ ṇguṇgunɨ́ ledre Kɨ́résịto go, ngíti géyị ꞌyị e nɨyí go ndị́sị lóndo yée gɨ ro zɨ́ye ótoómo ledre Yésụ bɨ ṇguṇgunɨ́ ní.
Bụ́kụ ba uku ledre kɨ́ngaya zɨ́ ꞌyị ga bɨ ṇguṇgunɨ́ ledre Yésụ go ní kɨ́dí Yésụ nɨ ꞌyị bɨ kɨ́ ledrené owóowó zɨ́ ꞌyị ga bɨ ṇguṇgunɨ́ ledre ené go ní. Uku kpá kɨ́dí Yésụ nɨ Owụ́ ꞌbɨ Lomo, rokoꞌbụ ené romo do rokoꞌbụ maláyika ga bɨ Yụ́da e ndịsịnɨ́ ṇgúṇgu ledreyé ní. Rokoꞌbụ Yésụ romo do rokoꞌbụ nébị ga kóo ꞌdesị́ ní, romo kpá do rokoꞌbụ Mụ́sa bɨ iꞌbíogụ lorụ ga bɨ ꞌbɨ Lomo zɨ́ Yụ́da e ní. Uku kpá kɨ́dí ledre Yésụ owó romo do ꞌyị ꞌdáná éyị́ ga bɨ ꞌbɨ Yụ́da e ní mbá gɨ zɨ́a luyú ené ledre kú wá, zɨ́a íꞌbí roné káa do mbigí éyị́ ꞌdáná gɨ ro lúyú ledre ꞌbɨ ꞌyịmaꞌdí e za mbá kɨ́ꞌdí kéṛị́ za fí.
Bụ́kụ ba uku odụ ledre kɨ́dí mɨngburoko bulúndu Yụ́da ga kóo ꞌdesị́ bɨ ledre gɨ royé nɨ mɨékéne sɨmɨ kuṛú lorụ ꞌbɨ Lomo ní, ótonɨ́ kóo Lomo zɨ́a ídíne kɨ́ rokinyi gɨ zɨ́a bɨ ṇguṇgunɨ́ ledre ené ní. Kɨ́dí ꞌyị ga bɨ ꞌbɨ Kɨ́résịto ní idínɨ́ kpá fú ndị́sị ṇgúṇgu ledre ꞌbɨ Lomo ndanɨ́ ótoómo lị́gị ledre ga bɨ Yésụ mengị yée ní kɨ́ yée ga bɨ ndịsị ꞌdódo a ní wá.
1
Owụ́ ꞌbɨ Lomo ogụ ódro zɨ́ze
1 Sɨmɨ sịndị́ kadra ga kóo ꞌdesị́ ní, ꞌBụzé Lomo ndịsị kóo úkuíꞌbí ledre ené zɨ́ ꞌyị kasa ené ga bɨ nébị e ní, zɨ́ye ndị́sịyé úkutátá a zɨ́ bulúnduzé e do ṛị́kị́ tụ́ꞌdụ́ mɨsiꞌdi e mɨngúngúcua. 2 Bɨ nda sɨmɨ sịndị́ kadra máa ꞌbɨ ezé ba ní, kasaogụ nda go za cụ́ mbigí Owụ́ ꞌbɨ ené ꞌdódoyéme née zɨ́ze. Otoogụnɨ́ kóo ere kɨ́ do sogo káṇgá kɨ́ éyị́ e za mbá kéne. Gɨ zɨ́ kéyị née, zɨ́a iꞌbí rokoꞌbụ ledre e za mbá zɨ́ Owụ́ ꞌbɨ ené máa née. 3 Owụ́ máa née nɨ za nyé káa zɨ́ ꞌBụné Lomo ní. ꞌDodo mongụ́ rokoꞌbụ ꞌBụné go kɨ́ mɨméngị ledre ené e za mbá. Éyị́ e za mbá nɨyí sị́ rokoꞌbụ ené. Sɨmɨ bɨ uyu, zɨ́a ꞌdíꞌbióyó lúyú ledre ezé ꞌbɨ ꞌyịmaꞌdí e ní, zɨ́ ꞌBụ a ꞌdíꞌbilúgu wo komo ere zɨ́ye ndị́sịyé kéne do bi kị́éꞌdo gɨ zɨ́a mengịonzó moko ené go. 4 Owụ́ máa née nɨ go kɨ́ ledrené owóowó rómo do ꞌbɨ maláyika e, gɨ zɨ́a Lomo iꞌbí rokoꞌbụ ledre e go za mbá zɨ́a. Gɨ zɨ́ kéyị née zɨ́ ịrịa ówụ́ rómoné gɨ do ꞌbɨ maláyika e za mbá.
Owụ́ ꞌbɨ Lomo romo do maláyika e
5 Maláyika be ꞌdi Lomo uku ledre go zɨ́a kɨ́dí,
“Áyí Owụ́ ꞌbɨ amá,
karaba mááyí go ꞌBụyị́” 1:5 Keꞌbị ꞌbɨ Dawídi e 2:7?
Togụ́ mbú maláyika máa wo be ꞌdi bɨ uku ledre zɨ́a kɨ́dí,
“Mááyí ꞌBụyị́,
áyí Owụ́ ꞌbɨ amá” 1:5 2 Sámele 7:14, 1 Ledre ga kóo ꞌdesị́ ní 17:13?
6 Sɨmɨ bɨ kóo Lomo kasaogụ owụ́ ꞌbɨ ené née do sogo káṇgá ní, zɨ́ Lomo maꞌdáa kóo úku ledre kɨ́dí,
“Máíli maláyika e mbá idínɨ́ óto úndru owụ́ ꞌbɨ amá née káa zɨ́ bɨ ndịsịnɨ́ óto úndrumá ní.” 1:6 Gbre lorụ 32:43
7 Zɨ́ Lomo kpá úku ngíti ledre kɨ́dí,
“Mááyí kɨ́ rokoꞌbụ zɨ́ma óyólóꞌbó maláyika e kɨ́e, zɨ́ye ndị́sị ílíye káa zɨ́ síli ilí ne ní.
Togụ́ kenée wá, zɨ́ma óyólóꞌbó yée, zɨ́ye ndị́sị ndícíye káa zɨ́ phoꞌdụ ndicí ne ní.” 1:7 Keꞌbị ꞌbɨ Dawídi e 104:4
8 Zɨ́a kpá úku ledre zɨ́ Owụ́ ꞌbɨ ené née kɨ́dí,
“Áyí Lomo, áyí ídí Ngére za fí.
Úndru ꞌbɨ rokoꞌbụ bɨ máíꞌbí zɨ́yị née, áyí ndị́sị méngị kɨ́e tɨ́ fú ledre ga bɨ mɨútúásáye ní.
9 Gɨ zɨ́a bɨ íli bɨsinyí ledre wá, íli ndị́sị méngị dụụ́ ledre ga bɨ ndịsịnɨ́ óto máa zɨ́ma ídíma kɨ́ rokinyi ní,
máa ꞌBụyị́ bɨ Lomo ní, máóto yị́ị go zɨ́ ledreyị́ ídíne owóowó rómo do ꞌbɨ ꞌyị e mbá
gɨ ro zɨ́yị ídíyị kɨ́ rokinyi.” 1:9 Keꞌbị ꞌbɨ Dawídi e 45:6-7
10 Lomo uku kóo ledre gɨ ro Owụ́ ꞌbɨ ené sɨmɨ mɨéké kúrú Lomo kɨ́dí,
“Éyị́ ga bɨ za mbá ba, Ngére, ótoógụ yée yị́ị.
Ere kɨ́ do sogo káṇgá nɨyí kacɨ́ sị́lị́yị.
11 Sịndị́ kadra nɨ ógụ zɨ́ éyị́ ga gére née ụ́kụ́ye mbá,
gɨ zɨ́a nɨyí káa zɨ́ bongó e ní, zɨ́yị ídíákáyị dụụ́ yị́ị gɨ zɨ́a áyí yị́ eyị́ trịdrị za fí.
12 Maꞌdíi, éyị́ ga gére née nɨyí lélị́
káa zɨ́ nzenze bongó ga bɨ ụcụoyónɨ́ yée ꞌdáꞌba ní,
áyí ídíáká dụụ́ yị́ị
gɨ zɨ́a áyí yị́ eyị́ trịdrịyị́ za fí.” 1:12 Keꞌbị ꞌbɨ Dawídi e 102:25-27
13 Lomo uku ledre zɨ́ maláyika be ꞌdi kɨ́dí,
“Ndị́sị do sị́lị́ma ꞌbɨ anú ona,
gị sɨmɨ sịndị́ kadra bɨ Mááyí óto ezeokóyị e mbá
sị́ sịndị́yị káa zɨ́ owụ́ gbáꞌdá bɨ ndị́sị óto sịndị́yị doa ní.” 1:13 Keꞌbị ꞌbɨ Dawídi e 110:1
14 Maláyika nɨyí ꞌbɨ eyé ꞌyị kasa ꞌbɨ Lomo. Lomo ndịsị kása yée zɨ́ye ndéréye kɨ́ sáká ꞌyị ga bɨ ṇguṇgunɨ́ Kɨ́résịto go nɨyí go nzíyiyé gɨ ro trịdrị bɨ za fí ní.