4
Kitiĩ gu tawaaloo gu yade waara rawge
1 Gimbakee giyaa ilii cati, yuꞌudi hagi arimi pandaa dooii, afamaraa duguũ afiiooyimi rawaa gu rawge. Da hheꞌesi, afotira da pandaa gaa akhasi daa gimbuusidi haa ana paranda pahha, gi kaadi kara tuba, “Khoca tay rawaage, ana sugu laqama ugu, gimba gu slaꞌa hiica⁄a, aluũ gu hinkaa gaã arintigo.” 2 Cirakiray dinaagi ilii khay ha Muuna gu Iliitleemu. Yuꞌudiyaa hagi arimi kitiĩ gu tawaaloo yade rawaa gu rawge. Rawaa gu kitikeesii yaa wana leẽ gwaa ibiidu. 3 Hikee gwaa ibiidu kitikeesii, yaati wanqaaqadi hari khisla, tle⁄eẽ gu qancanari pahha haa gu da⁄adani gu kaari.*4:3 tle⁄eẽ gu qancanari pahha haa gu da⁄adani gu kaari: Tle⁄eẽ hhanki gu qancanari haa gu da⁄adani, umaiĩ koina na yasipi haa akiiki. Kitikee dugwaa iliikhangai ha likweekwiya, daa wanqaaqada ubee sumariidi.†4:3 sumariidi: Ti tle⁄eẽ gu qancanari goó wanqee, kara guti kaari hari khisla.
4 Slime, kitikee gu tawaaloo dugwaa niini⁄idi ha kiteeri wakinay gu tawaaloo mibeeri cada haa cigahha. Rawaa gu kiteeri hhakeesii, yaa ibiidiri gaduũ mibeeri cada haa cigahha, hiĩ daamisiri qayroo gu ⁄abakwi, haa hhamaai gu sahaabu sagaiĩ koinay. 5 Kitikeesaa gu tawaaloogo, daa hiicacaaca⁄i cencee da mankaraaiya, afoo da gwaasla⁄aa haa tiiriꞌisinoo. Kara, pandaa da kitikeesii gu tawaalooge daa wana caaꞌasoo fanqu da aslaa daa ooyiiyima. Caaꞌasotee ti muunaiĩ fanqu, gu yondimaamidee sa Iliitleemu. 6 Slime, teꞌesii pandaa da kitikeesii gu tawaalooge, daa wana idoo da bakaꞌasa tlawa pahha, daa wanqaaqada kiyoo pahha. Kara tlaa⁄ataꞌa pahha da ⁄abaakwi doó wanqa hari khisla.
Kara, tla⁄antla⁄a gu kitiĩ gu tawaalooge, haa hiikhangaꞌasa dosi bareemoo goõ, yaa wanay gu slafee cigahha gu bakaꞌasa,‡4:6 wanay gu slafee cigahha gu bakaꞌasa: Hhakira cigahha gu slafee daa arimi ha Yohaana tletaage, yaa hhakira slaqamisiyay gu cigahha daa uꞌumi kitaabuu gu Esekeeli 1:5-14; 10:14. gwaa koomee ilaa bareemoo goõ, pandaage haa aluũ naqatloo. 7 Hikee gu bakaꞌasa gu slafa gu pandaa, yaa diidaw pahha, gu caduu aw pahha, gu tamii pandaa dosi yaa heedi pahha, gu cigahha yaa tambayciraꞌa pahha daa tlaydi rawaage loii. 8 Hhaã cigahha gu slafee, gonkoinaa yaa konay hhababeeraa lahhoꞌo lahhoꞌo. Hhababeerii hhakee yaa konay ilaa bareemoo goõ, haã hari waꞌay gu hhababeeraa see. Tleemaa haa amasi yoó mayaaiiba raaꞌamee, raaꞌamu gu daareesa Iliitleemu kakaanay tuba,
“Gooba dakoo, Gooba dakoo, Gooba dakoo,
ti Looimoo Iliitleemu gu kooma ⁄uuru,
gwaa waara, gu waara haa gwaa khawa.”
9 Hhakee cigahha gu slafee yaa daareeremisiyay, yaa laqaaqanay muree haa yaa kakaakanay ⁄iisoo, sa ina guũ ibiidu kitiĩ gu tawaalooge haa goó ibiida koraraa haa koraraa goóba hiifaakoo. 10 Teꞌesii gaduũ hhakira gu mibeeri cada haa cigahha, gi huhuiyay hhapeege pandaa dosii ina guũ ibiidu kitiĩ gu tawaalooge, haa gugi hhaꞌaleesiyay, ina gu ibiida koraraa haa koraraa goóba hiifaakoo. Inay gi qamidiyay hhamaai koina pandaa da kitikeesii gu tawaalooge, tay kakaanay tuba,
11 “Looimoo goori haa Iliitleemu goori, Ugu haraa hiiboo⁄odi,
oowaraa daareesa, muree haa ⁄uuru gu tawaaloo.
Sa gimba ugu naa tleehhedi idadu goõ,
idadu goõ giyaati tleehhedi haa ti wanay idoo ga iliislaꞌade gooay ugu.”
*4:3 4:3 tle⁄eẽ gu qancanari pahha haa gu da⁄adani gu kaari: Tle⁄eẽ hhanki gu qancanari haa gu da⁄adani, umaiĩ koina na yasipi haa akiiki.
†4:3 4:3 sumariidi: Ti tle⁄eẽ gu qancanari goó wanqee, kara guti kaari hari khisla.
‡4:6 4:6 wanay gu slafee cigahha gu bakaꞌasa: Hhakira cigahha gu slafee daa arimi ha Yohaana tletaage, yaa hhakira slaqamisiyay gu cigahha daa uꞌumi kitaabuu gu Esekeeli 1:5-14; 10:14.