9
Iliitleemu hiileehha da Israeeli
1 Ana Pawlo, ti kaawa gimba gu lou ilagaasa dooii haa Kristu, kaawaaba gimba gu afaꞌafuuma. Ilahudaa gu muuna goy daroó giyaadiye ha Muuna gu Iliitleemu sini ilatlatlaatlayay ana gimbaki. 2 Ana ti kooma gaiidimoo gu didiri haa slahhaaꞌamee doóba hiifaakoo muuna gooaa. 3 Hanti aloo firima, ana see dinima ilawaasi ha Iliitleemu haa dinima tlintiꞌisi ha Kristu sa hhiee koi loi, hhakaꞌa gu afamaraa leẽ haa ana. 4 Hhakee na hida gu Israeeli*9:4 hida gu Israeeli: Hida gu laqwaloo da Aburahaamu, Isaaka haa Yakoobo digaati eteedi hari umaiĩ cada, Waisraeeli haa Wayahuudi. daa hiileehhi ha Iliitleemu, ma yaꞌay kosi tleehhidiri. Kara, ina yaa laqami sa inay wanqamee dosi, yaa qaasi ila⁄imbidu haa inay, sigaa hadisi sariyaa dosi, sigaa laqami idoo gi ilii firiirinee ina haa sigigi hadisi hiifadidu gosi. 5 Inay ti laqwaloo da okookoiĩ koti gu tlaatleesoo. Kara, Kristu yaati daqa afamaraa gooina dahhi, hiidawaraa dosi heedi pahha. Ina, Iliitleemu rawaa gu idadu gonge wana, doó daareesiye koraraa haa koraraa goóba hiifaakoo. Guti lou.†9:5 Hari ilakeesa waka, Kristu yaati daqa afamaraa gooina dahhi, hiidawaraa dosii heedi pahha. Iliitleemu dugu daareesiye, ina goó tawaalima idadu sliimaa koraraa haa koraraa goóba hiifaakoo. Guti lou.
6 Ana hati kakaakamaaba ambee, gimba gu Iliitleemu duguriĩ slanqadi hiigaasa hiifadidu gosi. Ti hida goõ gooba gwaa laqwaloo da Israeeli dahhee, na Waisraeeli da loi. 7 Kara, Waisraeeli goõ gooba daa laqwaloo da Aburahaamu dahha na yaꞌay kosi gu lou. Hiifadidu gu Iliitleemu daqa Aburahaamuge yaati kaay tuba, “Laqwaloo doogu dagari amoo da Isaaka faadi.”✡9:7 Yuꞌudii kitaabuu gu Tlaatleesoo 21:12. 8 Gimbaki ti kona maꞌaana tuba, yaꞌay goõ gooba daa laqwali ha Aburahaamu, ti yaꞌay gu Iliitleemu. Ti laqwalotaꞌa kilesi daa laqwali harii fadidu gu Iliitleemu, digina faadi tuba, laqwaloo dosi da loi. 9 Gimba gu hiifadidu gu Iliitleemu na nahiĩ tuba, “Gu lou, kwarakhaalee nama qatlaykii gooay ana hamaa khaw daqa dooguu. Qatlaykee Saara hadee doogu maa konta naw.”✡9:9 Yuꞌudii kitaabuu gu Tlaatleesoo 18:10, 14.
10 Kara, ti teesaaqay kilesiiba, slime Rabeeka yaa laqwalidi yaꞌay cada hari amoo da hhawata leẽ, Isaaka kookoo goori. 11-12 Inkoo, irangiyatee dagaa ilii kahhiye see laqwaloo, ma giyaa ilii kahhiyee see yondu gimba lensee gu hhou baku gu tlaku, Iliitleemu yaa kaay sa Rabeeka tuba, “Giyaaday yondiidi sa aluuday.”✡9:11-12 Yuꞌudii kitaabuu gu Tlaatleesoo 25:23. Gimbaki ti laqaaqana tuba, Iliitleemu yoótii leehhi heedi, idoo giyoó ilii ilakhuukhuꞌusiye ina, ti hari amoo da yondu gu heedikee gooba. 13 Idoo daa ilii handikimi gooay Handikaa da Iliitleemuge tuba, “Yakoobo hagwaa slai, teesaaqay see, Esaaw hagwaa waki.”✡9:13 Yuꞌudii kitaabuu gu Malaaki 1:2-3.
14 Inkoo, dandiray hati mala kaawana? Gu lou, Iliitleemu hinti dakusii haaki? Coko⁄o see! 15 Iliitleemu yaa kaay sa Musaa tuba,
“Ana hagumaa pihha haa sugumaa laqama ⁄awaariru sa heedi ga slae.”✡9:15 Yuꞌudii kitaabuu gu Hiica⁄araa 33:19.
16 Inkoo, gimbakee sliimaa yoóti iliipaꞌana ⁄awaariru gu Iliitleemu, ti maguuma gooba ma slaꞌamuu gu heedi. 17 Handikaa da Iliitleemu yaa kaadi sa Faraaw tuba, “Ana, Iliitleemu hagwaa hiitlaysi, sa gimbaki leẽ, ana hari amoo doogu, ma laqami ⁄uuru goy haa uma goy dugu kakaane khooroo sliimaa.”✡9:17 Yuꞌudii kitaabuu gu Hiica⁄araa 9:16. 18 Teesaaqay, Iliitleemu yoóti ⁄awaarina sa heedikaꞌa sa slaiye ⁄awaariru. Kara, bere slai muuna gu heedi ma karahhi, teesaaqay laqi.
Qupidaa haa ⁄awaariru gu Iliitleemu
19 Inkoo, angamalee heedi kaay tuba, “Bere ti teesaaqay, Iliitleemu soó soꞌoyi kahhi sitaakaa da dabimidu gu dakoo daqa hidage? Miyaa nii dahhasi kanisaraa idoo gi slaiye laqa Iliitleemu?” 20 Ye ugu heedi, ugu ti miyaa gu hiidahhasa maamisu Iliitleemu? Inkoo, ⁄alu hiidahhasiyaa maasaraa tlehhidiisay gu ⁄alalee tuba, “Hanaa soꞌoyi tleehhidi taqi?”✡9:20 Yuꞌudii kitaabuu gu Isaaya 29:16; 45:9. 21 Tlehhidiisay gu ⁄alalee kona haaki da tlehhinay khooslay daqa upa lengo gu tipa, khooslay waku sari yondu gu kooma muree haa khooslay waku sari yondu gu balalu sliimaa.
22 Dagani ilii wana daqa Iliitleemuge. Ina yaati slai laqaruu qupidaa kosi haa gii tlaaꞌasi ⁄uuru gosi. Inkoo, Iliitleemu yaa hiikaasi hari khisla sa hida hhakaꞌa guraa hiiboo⁄ee slawaraa qupidaa kosi, diĩ ilakhuukhuꞌusi hhamisaraa. 23 Iliitleemu yaa teesaaqay laqi, ma hiitlaaꞌasi hacimaa gu wanqamee dosi daqa hida hhakaꞌay saa ilakhuukhuꞌusi laqaru ⁄awaariru. Hida hhakee digaati ilakhuukhuꞌusi yadaa tlaatleesoogo, slime sigigi qay wanqamee dosi. 24 Dandiray see tla⁄aã gu hida hhakaꞌay wana daa eteedi ha ina. Ina yaati eteedi daqa Wayahuudigo, sliimaa haa daqa hida gu hhapapu wakinaygo see. 25 Slime, Iliitleemu idoo giyaa ilii kaay gooay tletiruu gu Hoseeyage tuba,
“Hida hhakira gwaa koiiba, inkoo hagiti eteedina ‘Hida koi.’
Kara, hida hhakaꞌa gaa slaiiba, hagiti eteeda ‘Hida koi ga slae.’ ”✡9:25 Yuꞌudii kitaabuu gu Hoseeya 2:23.
26 “Kara, daqateesii inay sigaa ilii kaay ha Iliitleemu tuba,
‘Unkuray ti hida koiiba,’ teꞌesii inay digiti eteedi tuba,
‘Yaꞌay gu Iliitleemu gu slafa.’ ”✡9:26 Yuꞌudii kitaabuu gu Hoseeya 1:10.
27 Tletimiisay Isaaya yaa maahhi hari afoo da didiri daqa Israeelige tuba,
“Waisraeeli gimati wa⁄a see da seehhinay gu tlawa da didiri gooay,
ti Waisraeeli coko⁄o kilesi digina ilabuꞌuna.
28 Taataa Iliitleemu cira hiigaasi sumuku
hukumuu gosi daqa hida sliimaa gu khoorotii.”✡9:28 Yuꞌudii kitaabuu gu Isaaya 10:22-23.
29 Kara, Isaaya gooay, idoo giyaa ilii tletimi wakaꞌalee tuba,
“Bere Taataa Iliitleemu gu kooma ⁄uuru goõ,
sindaa aloo mayaaba laqwaloo,
haati aloo hida gu yaamu gu Sodomaa haa Gomoora pahha tleehhidana.”✡9:29 Yuꞌudii kitaabuu gu Isaaya 1:9; Tlaatleesoo 19:1-29.
Waisraeeli konaaiiba ⁄imbaraa
30 Inkoo, hati mala kaawana? Hida gu hhapapu wakinay goóba dabiidu ibinaa daa tafaꞌadi pandaa da Iliitleemuge, yaa slayri ibinaa daa tafaꞌadi pandaa dosi Iliitleemu hari amoo da ⁄imbaraa. 31 Waisraeeli gwaa maguumidee slawaraa ibinaa daa tafaꞌadi pandaa da Iliitleemuge hari amoo da sariyaa, giyaa slayriiba. 32 Sa soꞌoyi? Sa gimba ibinatee daa tafaꞌadi giyaa dabiidiriiba hari amoo da ⁄imba Iliitleemu, giyaati dabiidiri hari amoo da yondu gooina gu hhou. Inay yaatii tatafimidiri tlaa⁄ukaꞌay, doó ilii tatafimidiye hida. 33 Idoo daa ilii handikimi gooay Handikaa da Iliitleemu tuba,
“Yuꞌudiyaa, taysi Sayuunige qaasa tlaa⁄u gu iliitatafimidu,
haa hhafida gu slaslakhuu hida,
heedi gu ⁄imba ina‡9:33 heedi gu ⁄imba ina: Tiꞌii ina ti laqaaqanta Kristu. dugu muriidisiyaaba.”✡9:33 Yuꞌudii kitaabuu gu Isaaya 28:16.
*9:4 9:4 hida gu Israeeli: Hida gu laqwaloo da Aburahaamu, Isaaka haa Yakoobo digaati eteedi hari umaiĩ cada, Waisraeeli haa Wayahuudi.
†9:5 9:5 Hari ilakeesa waka, Kristu yaati daqa afamaraa gooina dahhi, hiidawaraa dosii heedi pahha. Iliitleemu dugu daareesiye, ina goó tawaalima idadu sliimaa koraraa haa koraraa goóba hiifaakoo. Guti lou.
✡9:7 9:7 Yuꞌudii kitaabuu gu Tlaatleesoo 21:12.
✡9:9 9:9 Yuꞌudii kitaabuu gu Tlaatleesoo 18:10, 14.
✡9:11-12 9:11-12 Yuꞌudii kitaabuu gu Tlaatleesoo 25:23.
✡9:13 9:13 Yuꞌudii kitaabuu gu Malaaki 1:2-3.
✡9:15 9:15 Yuꞌudii kitaabuu gu Hiica⁄araa 33:19.
✡9:17 9:17 Yuꞌudii kitaabuu gu Hiica⁄araa 9:16.
✡9:20 9:20 Yuꞌudii kitaabuu gu Isaaya 29:16; 45:9.
✡9:25 9:25 Yuꞌudii kitaabuu gu Hoseeya 2:23.
✡9:26 9:26 Yuꞌudii kitaabuu gu Hoseeya 1:10.
✡9:28 9:28 Yuꞌudii kitaabuu gu Isaaya 10:22-23.
✡9:29 9:29 Yuꞌudii kitaabuu gu Isaaya 1:9; Tlaatleesoo 19:1-29.
‡9:33 9:33 heedi gu ⁄imba ina: Tiꞌii ina ti laqaaqanta Kristu.
✡9:33 9:33 Yuꞌudii kitaabuu gu Isaaya 28:16.