1  Кіраўніку хору. Сьпеў. Псальм. Радасна гукай для Бога, уся зямля!

2  Выслаўляйце славу імя Ягонага, узносьце славу і хвалу Яму!

3  Кажыце да Бога: “Які Ты страшны ў дзеяньнях Тваіх! Дзеля вялікасьці моцы Тваёй падпарадкоўваюцца Табе ворагі Твае.

4  Уся зямля паклоніцца Табе і будзе выслаўляць Цябе, будзе выслаўляць імя Тваё. (Сэлях)

5  Хадзеце і паглядзіце на дзеі Бога, страшнага ў дзеях [Сваіх] адносна сыноў чалавечых.

6  Ён перамяніў мора ў сухазем’е, праз раку перайшлі пехатою; там радаваліся мы ў Ім!

7  Ён пануе ў магутнасьці Сваёй на вякі; вочы Ягоныя сочаць за народамі, каб бунтаўнікі не вывышаліся перад Ім. (Сэлях)

8  Дабраслаўляйце, народы, Бога нашага, і няхай будзе чутны голас хвалы Ягонай.

9  Ён дараваў жыцьцё душы нашай і ня даў пахіснуцца назе нашай.

10  Бо Ты выспрабаваў нас, Божа! Ачысьціў нас, як ачышчаецца срэбра.

11  Ты ўвёў нас у пастку, сьціснуў цяжкімі путамі сьцёгны нашыя.

12  Ты пасадзіў чалавека на галовы нашыя; мы прайшлі праз агонь і ваду, і Ты вывеў нас на прастор.

13  Увайду ў дом Твой з цэласпаленьнямі, споўню Табе абяцаньні мае,

14  якія прамовілі губы мае, і сказаў я вуснамі маімі ў бядзе маёй.

15  Цэласпаленьні з тлустых [авечак] прынясу Табе з дымам баранаў; дам [Табе] валоў і казлоў. (Сэлях)

16  Хадзеце, паслухайце, і я раскажу ўсім, хто Бога баіцца, што Ён учыніў для душы маёй.

17  Да Яго я клікаў вуснамі маімі, і ўзьвялічваньне было на языку маім.

18  Калі б я глядзеў на нягоднае ў сэрцы маім, Госпад мяне б не пачуў!

19  Але Бог пачуў і зьвярнуў увагу [Сваю] на голас малітвы маёй.

20  Дабраслаўлёны Бог, Які не адкінуў малітвы маёй і міласэрнасьці Сваёй [не пазбавіў мяне]!