38
Hina Gode da Youbema adole i.
1 Amalalu, foga mulu bagade amodili, Hina Gode da Youbema amane sia:i,
2 “Di da abuliba:le Na bagade dawa:su hou da defele hame sia:sala:?
Dia sia: da gagaoui amola hamedei sia: fawane.
3 Wali, molole wa:legadole, Na dima adole ba:be amo nama
dabe adole ima.
4 Na da osobo bagade hahamonoba, di amogawi esalebe
ba:bela:?
Di da liligi huluane dawa:beba:le, Nama dabe adole ima.
5 Nowa da osobo bagade ea defei ilegebela:?
Nowa da amo defemusa:, defesu efe bobaila:?
Di da adole iasu huluane dawa:sala:?
6 Fedege agoane, dunu bugi amo da osobo bagade udidia gadosa, amo adiga
udidisala:?
Osobo bagade ea igi bai bagade, nowa da fa:bela:?
7 Osobo bagade hahamoi eso hehebolo amoga
gasumuni huluane da gilisili gesami hea:lalu.
Amola Hebene esalebe fi huluane da hahawaneba:le, wele sia:i.
8 * Yelemaia 5:22Hano wayabo bagade da musa: osobo bagade dogoa ganodini galu
amo fudagala:le, ga ahoanoba, osobo bi hamoi amo hasalasisa:besa:le,
nowa da ea logo hedofama:ne, logo ga:su ga:sibala:?
9 Na Nisu fawane da hano wayabo bagade mumobiga dedebolesi dagoi.
Na Nisu fawane da hano wayabo bagade gasiga lala:boloi.
10 Na da hano wayabo bagade alalo ilegei, amola ga mae masa:ne logo gaga:lesi.
11 Na da hano wayabo bagadema amane sia:i, ‘Dia alalo da goea!
Amo mae baligigama! Dia gasa bagade gafulubi amoga,
amo alalo mae baligiligama!’
12 Yoube! Di da dia esalusu ganodini huluane amo eso hehebolo misa:ne sia:bela:?
13 Di da hehebolo amoma amane hamoma:ne sia:bela:?
‘Osobo bagade gagulaligima!
Wadela:i hamosu dunu ilia wamoaligisu amoga uguguli gugudili fasima!’
Di da amo hamoma:ne sia:bela:?
14 Haiyoga, agolo amola fago ilia da abula miginisisi
amola laga osoboga dedei agoane, noga:i ba:sa.
15 Wadela:i hamosu dunu da esohaiyo si gagasenei agoai ba:sa.
Bai amo da ilia wadela:le hamomu logo hedofasa.
16 Di da hano wayabo bagade lugudu
amoga gudunini bubuga:ne gadobe amo ba:la asibala:?
Di hano wayabo bagade amo hano oso hagudu amo da:iya lalula:?
17 Dunu afae da dima logo ga:su, amo da bogoi gasi soge ga:sibi, amo dima olebela:?
18 Di da osobo bagade ea bagade defei amo dawa:bela:?
Dia da dawa:i galea, nama adoma!
19 Dia da hadigi ea mabe bai dawa:bela:?
Amola gasi ea banuguma dawa:bela:?
20 Dia da hadigi amola gasi amoma ela masa:ne olemu dawa:bela:?
Amola ela bu sinidigima:ne adomu dawa:sala:?
21 Dafawane! Di da amo hou huluane dawa:!
Di da da:i hamoi dagoi.
Amola Na da osobo bagade hahamoloba, di amo amogai esalula:?
22 Di da liligi legesu diasu amoga Na da mugene (snow)
amola mugene ga:nasi (hail) legesa, amoga ba:la asibala:?
23 Na da gegesu amola bidi hamosu eso amoga,
ha lai dunuma gegema:ne amo liligi ouligisa.
24 Di da eso ea mabe sogebi amo ba:la asibala:?
Di da gusudili fo ea mabe sogebi amo ba:la asibala:?
25 Gibu bagade dasea, hano sa:ima:ne, nowa ogabela:?
Isu gibula bobodole masa:ne, nowa da logo fodobela:?
26 Dunu hame esalebe soge amogai gibu sa:ima:ne, nowa da hamobela:?
27 Gisi noga:le heda:ma:ne, nowa da hafoga:i sogega gibu iabela:?
28 Gibu amola oubi baeya ela da eda ganabela:?
29 ‘Aisi’ amola mugene ela eme da nowala:?
30 Mugene da hano amo igi ga:nasi agoai hamosa,
amola hano wayabo bagade ea odagi ga:nasi hamosa.
31 † Yoube 9:9; A:imose 5:8Di da Balia:idese gasumuni ili dodobole la:la:gimusa: dawa:bela:?
Di da Olione gasumuni la:la:gi fadegamusa: dawa:bela:?
32 Di da eso huluane gasumuni ilima logo olelemusa: dawa:bela:?
Di da Bea Bagade amola Bea Fonobahadi gasumuni
ilima masunu logo olelemusa: dawa:bela:?
33 Di da malei amo da mu ouligibi, amo dawa:bela:?
Amola amo malei da osobo bagade ouligima:ne, afadenemusa: dawa:bela:?
34 Di da mumobima, ili hamoma:ne wele sia:mu dawa:bela:?
Amola ili dia gibuga nanegama:ne sia:musa: dawa:bela:?
35 Amola di da ha:ha:nama nene gala:ma:ne sia:sea, ha:ha:na da dima misini,
‘Na da dia hamoma:ne sia:i defele hamomu’, amane sia:ma:bela:?
36 Nowa da aowahea sio amoma Naile hano ea fili gala:be eso olelesala:?
Nowa da gagala gawalima gibu da sa:ima:ne sia:sala:?
37 - 38 Nowa ea bagade dawa:suga mumobi idima:bela:?
Amola nowa ea bagade dawa:suga
mumobi amo gibu sogadigima:ne, giwigilisimusa: dawa:sala:?
(Gibu da gulu ganumu ga ganumunisisa.)
39 - 40 Laione wa:me amola ha:aligi laione wa:me waha debe,
amo da magufu gelaba amola ilia diasu ganodini wamoaligisa,
di da iligili ha:i manu hogole iabela:?
41 Da: sio da ha:aligili udigili lalea,
amola ilia mano da Nama ha:i manusa: dini iasea,
nowa da ilima ha:i manu iahabela:?