39
Se Nabalebe Dunu ea Sisane Fofada:su
Na da amane sia:i, “Na da dawa:iwane hamomu.
Na da na gona:su amoga mae wadela:le hamoma:mu.
Wadela:i hamosu dunu da na gadenene aligisia, na da sia: hamedafa sia:mu.”
Na da ouiya:le esalu.
Noga:i hou amolawane, na da hamedafa sia:i.
Be na da bu baligiliwane se nabi.
Amalalu, beda:su hou da na hasali dagoi.
Na da bu dawa:lalu amola bu baligili beda:i galu.
Na da adole ba:su ouiya:mu da hamedei.
Na da Hina Godema amane adole ba:i,
“Hina Gode! Na da habowali seda esaloma:bela:?
Na da habogala bogoma:bela:?
Nama adoma! Na esalusu da habogala dagoma:bela:?”
Di da nama esalusu dunumuni fawane i dagoi.
Na esalusu da Dia siga hamedei agoane ba:sa.
Dafawane! Esalebe dunu huluane afae afae ea esalusu
da foga afae fulabole fasibi defele gala.
Ea esalusu da baba ba:be defele amola seda hame gala.
Ea hamobe huluane da udigili fawane hamosa.
E da muni amola liligi gagadosa.
Be amo fa:no lamu dunu e da hame dawa:.
Hina Gode! Amai galea, na da adi dafawane hamoma:beyale dawa:ma:bela:?
Na dafawane hamoma:beyale dawa:su da Dima dawa:lumu.
Na wadela:i hou hamoi huluane, amoga Dia na gaga:ma.
Amola gagaoui dunu ilia naba:le mae oufesega:ma:ma.
Na da ouiya:i dialumu, na da sia: afae hame sia:mu.
Bai na agoane se nabima:ne, Difawane agoane hahamonesi.
10 Di da nama dawa:ma:ne olelesu se iasu bu mae ima!
Na da Dia fane sali amoga bogomu agoai galebe.
11 Dunu ilia da wadela:i hou galea fawane, Di da ilima se bidi iaha.
Amola Di da aowaba agoane, ilia liligi amoga ilia da asigi amo wadela:lesisa.
Dafawane! Osobo bagade dunu da foga afae fulabolesibi amo defele gala.
12 Hina Gode! Na Dima sia:ne gadobe nabima!
amola na Dima dini iabe nabima!
Na da dinanea, nama fidila misa!
Na da na aowalali defele, wahamusu dima sofe misi esala.
13 Na da hedolowane asili, bu hame ba:muba:le,
Dia na fonobahadi hahawane hamoma:ne, na yolesima.