64
Gaga:ma:ne Sia:ne Gadosu
1 Gode! Bidi hamosu da nama doaga:i dagoi.
Na sia:ne gadosu nabima!
Na da nama ha lai dunu amoba:le beda:i galebe.
Amaiba:le Dia na esalusu amo gaga:ma!
2 Wadela:i hamosu dunu ilia da na fane legemusa: ilegesa.
Dia na gaga:ma!
Amola ilia da na wadela:lesimusa: gegedobeba:le, na gaga:ma.
3 Ilia fedege agoane, ilia gona:su amo gegesu gobihei debebe agoane debele,
amola dodona:gi sia: bagohame dadi agoane gala:musa: disa.
4 Ilia hedolowane mae gogosiane, ogogosu sia: sisia: laha.
Ilia baligidu sia: amoga da dunu moloidafa wadela:lesisa.
5 Ilia da ilia wadela:i ilegele sia: fasu ganodini,
dabele dogo denesima:ne ilia sia: daha.
Ilia da sanenesimu sogebi ilegesa.
Ilia da amane sia:sa, “Dunu afaega da ninia sanenesibi hame ba:sa.”
6 Ilia da wadela:ma:ne ilegele, amane sia:sa,
“Ninia da wadela:i hou noga:idafa hamomusa: ilegei dagoi.”
Osobo bagade dunu ea dogoga asigi dawa:su
da hame dawa:mu liligi agoai galebe.
7 Be Gode da Ea dadiga ilima gala:le,
amola ilia da hedolowane fofa:gi ba:sa.
8 Ilia sia: amoea baiga, Gode da ili gugunufinisimu.
Ilima ba:be dunu da ilia dialuma fofoga:mu.
9 Ba:be dunu ilia da huluane beda:igia:mu.
Ilia da Gode Ea hamoi amo dawa:mu
amola Ea hamoi amo adodomu.
10 Moloidafa dunu huluane ilia da nodogia:mu.
Bai Hina Gode Ea hamoi ba:beba:le.
Ilia da Ema gaga:su ba:mu.
Amola noga:i dunu huluane ilia da Ema nodone sia:mu.