103
Gode Ea Asigidafa Hou
1 Hina Godema nodoma!
Na asigi dawa:su amola na esalusu huluane
amoga Hina Gode Ea Hadigi Dio amoma nodomu da defea.
2 Na asigi dawa:suga na da Hina Gode Ea Dio nodone gaguia gadosa.
Na da Ea asaboi asigi hou, amo hame gogolemu.
3 E da na wadela:i hou huluane gogolema:ne olofosa.
Amola na olo huluane uhinisisa.
4 E da na bogosa:besa:le gaga:sa.
E da nama asigiba:le amola nama gogolema:ne olofosu iabeba:le,
na da hahawane bagade.
5 E da liligi noga:idafa nama baligili iaha.
Amaiba:le, na da buhiba agoai gasa bagade ayeligiwane esalumu.
6 Hina Gode da enoga banenesi dunu ilima asigiba:le,
ilima moloidafa fofada:su hamosa,
amola ilima ilia hamobe defele bidi iaha.
7 E da Ea hamomusa: ilegei amo Mousesema olelei.
Amola Ea gasa bagade hamobe hou amo Isala:ili fi dunuma olelei.
8 * Ya:mese 5:11Hina Gode da bagadewane asigisa,
amola gogolema:ne olofosu hou dawa:.
E da hedolo hame ougisa.
Be E da mae fisili, asigilala.
9 E da gagabole sia:sa, be gebewane hame sia:nana.
E da wadela:i hou amoma ougili higasa.
Be gebewane ougi hame diala.
10 E da ninia wadela:i hou hamobe amo defele,
ninima se dabe hame iaha.
11 Mu amo da osobo bagade badilia gadodafa agoane diala.
Amola nowa dunu da Hina Godema nodone dawa:sa,
Hina Gode da amo sedade defei defele ilima asigisa.
12 Eso mabe gusudili amola eso dabe guma:dini defei,
amo defei defele Gode da ninia wadela:i hou hamoi
amo ninima fadegale fasisa.
13 Osobo bagade ada da ea manoma asigibi defele,
Gode da Ema nodone dawa:be dunu ilima asigisa.
14 E da nini hahamoiba:le, ninia da:i hodo huluane dawa:.
Nini da osoboga hamoi, amo Hi dawa:.
15 Be ninia esalusu da gisi agoai.
Ninia da hame nasu sogea agoai heda:le, falegasa.
16 Amasea, fo da fulabosea, sogea da mini asi dagoi ba:sa.
Amola bu hame ba:mu.
17-18 Be dunu amo da Hina Godema nodone dawa:be,
ilia da Ea asigidafa hou eso huluane ba:lalumu.
Amola fa:no fifi manebe dunu huluane, amo da Ea Gousa:su hamoi,
amola Ea hamoma:ne sia:i, amoma mae fisili fa:no bobogelalebe,
ilia da Ea noga:idafa hou ba:lalumu.
19 Hina Gode da Ea Fisu Hebene ganodini ligisi.
E liligi huluanedafa amoma Hina Bagadedafa.
20 Dilia gasa bagade a:igele dunu, amo da Ea hamoma:ne sia:be nabawane
hamosa! Hina Godema nodoma!
21 Dilia Hebene ganodini esalebe hawa: hamosu dunu,
amo da Hina Gode Ea hanai defele hamosa! Hina Godema nodoma!
22 Hina Gode Ea hahamoi esalebe liligi huluane,
amo da Ea ouligibi soge huluane amo ganodini esalebe!
Dilia Hina Godema nodoma! Na asigi dawa:su! Hina Godema nodoma!