146
Gaga:su Godema Nodosu
Hina Godema nodoma!
Na dawa:su amoga Hina Godema nodoma!
Na da esalobawane,
na esalebe we huluane Godema nodone gesami hea:su hamonanumu.
Osobo bagade ouligisu dunu ilima dafawaneyale mae dawa:ma!
Osobo bagade dunu, ilia di gaga:mu hamedei.
Ilia da bogosea, gulu dou amoma buhagisa.
Amo esoga, ilia hamomusa: ilegei da dagosa.
5-6  * Asunasi Dunu Ilia Hou 4:24, 14:15Nowa dunu da Ya:igobe ea Gode amoea fidima:ne dawa:sea da hahawane gala.
Hina Gode da mu amola osobo bagade amola hano wayabo bagade
amola amo ganodini liligi huluanedafa hahamoi dagoi.
Nowa da Ema dafawaneyale dawa:sea, da hahawane bagade gala.
E da Ea hamomusa: ilegele sia:i huluane didili hamosa.
E da banenesi dunu fidima:ne, moloidafa fofada:su hamosa.
E da ha:be dunuma ha:i manu iaha.
Hina Gode da se iasu diasua esalebe dunu fadegalesisa.
E da si dofoi dunu ilia si fadegalesisa.
E da dafai dunu bu wa:lesisa.
E da Ea moloidafa dunuma asigisa.
E da degabo misi dunu ninia soge ganodini esalebe, amo gaga:sa.
E da didalo amola guluba: mano fidisa.
Be E da wadela:i hou hamosu dunu ilia ilegesu gugunufinisisa.
10 Hina Gode da eso huluane Hinadafa esalalalumu.
Saione fi! Dilia Gode da eso huluane fifi ahoana, dili ouligilalumu.
Hina Godema nodoma!

*146:5-6: Asunasi Dunu Ilia Hou 4:24, 14:15