Àŋwàꞌànə̀ Paul yi ntsyàmbìì a mbo
TIMOTI
ǸJIꞌÌNNǓ AŊWÀꞌÀNƏ̀ YÛ
A aŋwàꞌànə̀ yû aa a lɛ ŋŋwàꞌànə Paul a mbo Timoti. Timoti à lɛ mbə mûŋgwàꞌà yìi mə à lɛ mbə Krisə̀n nlo a Lystra. Ǹdè yì à lɛ mbə ŋù baYuda lâ taà yì a bâŋnə̀ m̀bə ŋû baGrikia (Ɨ̀fàꞌà 16.1-3). Timoti à lɛ mbii Nwì, ǹnaŋsə ntswe nɨ̂ àbìintɨɨ nlɔ̀gɨ̀nə̀ aa a mûŋkhə nloŋ mə maà yì bô ǹdè yì bo lɛ mbə bâŋgyɛ̀ bɨ abìintɨɨ̀ aà (2 Tim. 1.5). Paul à lɛ ntsyà ǹlɔgə yi a Lystra wa noò mə à lɛ ŋghɛ̀ɛ akòrə̀ nɨ̀təə nɨ afàꞌâ yi yi ntsyàmbìì, ŋ̀ŋetə yi bo yu tɨgə̀ m̀faꞌa ŋkarə (1.3) à lɔ̀gə̀ yi nɨ mû yì “yî ànnù nɨ̂ŋkoŋ a mùm àbìintɨɨ̀” (1.2).
Paul à lɛ màꞌàtə̀ Timoti a Efeso ŋka ŋghɛɛ a Macedonia aa nlə̀ə̀ Timoti mə tâ à tswe ghu ŋka nlentə ŋghotə̂ baEfeso yâ. Paul a tɨgə̀ ŋ̀ŋwaꞌanə ŋŋwàꞌànə ji baa ghu mbo ndɨꞌɨtə nɨ̂ yi ghu a nɨ̂ ɨfàꞌâ yi a ŋghotə̂. Bɨ twoŋ ŋŋwàꞌànə̀ ma jû ji baa mə à lɛ ŋŋwàꞌànə a mbo Timotì bo bɨ̀ yìi mə à lɛ ŋkɨ ŋwaꞌanə a mbo Titus aa nɨ “ŋŋwàꞌànə̀ bɨ̂pasto” ǹloŋ mə ɨ ghàà ǹloŋ aa atufàꞌà bɨ̂pasto, ǹnansə swoŋə nɨ̂ mbuu bə̂ bìi mbə bɨ ləə̀ waa nɨ bɨ̀pasto aà.
À ŋwàꞌànə̀ a ntsyàmbìì aa a ŋwàꞌàsə̀ yi nloŋ ŋgǎŋndɨꞌɨnnǔ mbweꞌesə̀, mə tâ à swoŋə bɨ̀ kɛntə (1.3). Bə̀ ma bû lɛ sɨ dɨ̀ꞌɨ̀ nɨ mə njoo jìi mə bɨ yə fàa a atu nsyɛ aa ɨ tswe nɨ̀ ɨ̀bɨ̂. M̀bə̂ ŋù a yweenə̀ aa tsiꞌǐ ajàŋ yìi mə mbə a tswê nɨ̀ mɨ̀tsyɛ̀ mìi mə mi lɛ nstswe alɔ̀ꞌɔ̀sə̀, bo bɨ̀ ajàŋə mə mbə a ka nyoŋ bɨ̂nɔ̀ŋsə̀ bî mɔꞌɔ, kaa waꞌa nɨ̀ mbuu mɨjɨ mi mɔꞌɔ jɨ̂, kaa ŋkɨꞌɨ̀ kɨ̀ ǹyɔꞌɔ (4.1-5).
Paul à lɛ ŋŋwàꞌànə ghu mbo a ajàŋ mə à ka kɨ tsɔꞌɔ bɨtsyàsə̀ aà (3.1-13) bo ajàŋ mə bɨ taŋtə ɨnnǔ ŋghotə mûm ŋ̀ghòtə aà. Ǹdɨꞌɨtə Timoti ŋ̀kɨɨ ndɨɨntə nii mə tâ à bə ŋgàŋàfàꞌa yî ǹsɨgɨ̀nə̀, ǹdɨꞌɨ nɨ̂ ànnù yìi a kuꞌunə aa, tâ àkòrə̀ nɨzî yi tâ à laa, tâ à bə fɨgə̀ a mbo bə̀ a nɨ̂ ɨ̀nnù tsɨ̀m (4.11-16).
Bɨ yatə̂ àŋwàꞌànə̀ yû aa laà:
1. Ǹjiꞌìnnǔ aŋwàꞌànə̀ yuà 1.1-2.
2. Àdɨꞌɨtə̀ ǹloŋ ŋghotə bo bɨ̀ bɨ̀tsyàsə̀ 1.3—3.16
3. Àdɨꞌɨtə̀ a mbo Timoti nloŋ àfàꞌâ yi 4.1-6.21
1
Àtsàꞌàtə̀ Paul a mbo Timoti
1 Àŋwàꞌànə̀ yû a lo aa a mbo mə̀ Paul yìi mə mə̀ nɨ ŋgàŋntoò Kristo Yesu ǹyoŋə nɨ̂ ǹdɨꞌɨ̀ Nwî ŋ̀gàŋywèènsə yìꞌinə̀ nɨ yì Kisto Yesu yìi mə bìꞌinə̀ bɛ aà. 2 Ŋ̀ghɛɛ nɨ a mbo Timoti, mû ghà yî ànnù nɨ̂ŋkoŋ a mûm àbìintɨɨ̀. Tâ Nwìŋgɔ̀ŋ Tà nɨ Kristo Yesu M̀màꞌàmbî yìꞌinə̀ fa ɨ̀bɔ̀ŋ Nwî, nɨ̂ ŋ̀ko mɨ̀lɨ̀ŋnə Nwì, nɨ̂ m̀bɔɔnə̂ Nwì a mbo wò.
Paul a waꞌasə̀ Timoti ǹloŋ bə̂ bìi mə bɨ dɨ̀ꞌɨ ɨnnǔ mbweꞌesə̀ aà
3 Àjàŋə mə mə̀ lɛ sɨ ghɛ̀ɛ a Macedonia aa mə̀ lɛ mbuꞌutə mbo a mbo wò mə tâ ò tswe a Efeso tǎ swoŋ a mbo bə̀ bî mɔꞌɔ mə tâ bɨ̀ tsuu annù Nwî yi dàŋ ɨ kɨ dɨ̀ꞌɨ̀. 4 Swoŋ a mbo bo mə tâ bo tsuu lɔ̀gə̀ noò wàà ɨ ghɛ̀nsə a nɨ ǹjyàlàꞌà bo bɨ̀ a ŋka nsəŋtə mɨ̀wàà mɨ ŋgwɛ̀ꞌɛ̀ bə̀ mìi kaa ndùû waa sɨ lwìꞌì aa, ǹloŋ mə ma jyaà ɨ̀nnù ɨ ghɨ̀rə̀ aa mə tâ bə̀ ka ŋwaꞌatə bə̂ ɨ̀nnù jìi ɨ zǐ a atu bo bo swûŋnə̀ ghu, mbaŋnə mmàꞌàtə annù yìi mə Nwìŋgɔ̀ŋ a mɨ̀rɨ̀sə̀ yiꞌinə̀ ghu, mə tâ bìꞌinə̀ aa nzi a mûm àbìintɨɨ̀ aà. 5 Ǹjiꞌì ànnù yìi mə mə swoŋ annù ma yû aa à nɨ mə tâ bìꞌinə̀ ka ŋkɔŋnə bìꞌinə̀ nɨ bìꞌinə̀ nɨ̂ àkɔ̀ŋnə̀ yìi mə a lò aa a mûm ǹtɨɨ yì làà bò ǹtɨɨ yìi mə ɨ saꞌa nɨ̂ bə̀ aa, yìi ɨ laa, nɨ̂ àbìintɨɨ annù nɨ̂ŋkoŋə̀. 6 Bə̀ bî mɔꞌɔ bɨ màꞌàtə̀ mə̂ ma juù ɨ̀nnù, ǹtɨgə njɨŋə, ŋghɛɛ ŋkuu nɨ mɨ̀ghàà mɨ swùŋnə̀ mɨ adàŋə̀ dàŋə̀, 7 ǹlɔɔ nɨ mə bo bə ŋgǎŋndɨ̀ꞌɨ nɔ̀ŋsə̀ tɨ ghə mə bo zî ànnù yìi mə bo swoŋ aa atû yaa a laa ghu, tɨ ghə̂ mə atû yaa a kɨ nlaa nɨ̂ ànnù ya yìi mə bo dɨ̀ꞌɨ̀ nɨ̂ tɨ̀ɨ̀ aà.
8 Bìꞌinə̀ zi mə nɔ̀ŋsə̀ à bɔ̀ŋ aa, mə mbə ŋù à ka mfaꞌa nɨ ghu a nɨ mânjì yìi à tswe nɨ̂ m̀fàꞌa nɨ̀ ghù aà. 9 Ǹloŋ mə bìꞌinə̀ zi ma yû à laà, mə kaa bɨ lɛ ŋkɨꞌɨ̀ nɔ̂ŋsə̀ ghɨ̀rə̀ aa a mbo bə̀ bìi mə ànnû yaa a tsinə, bɨ lɛ mbàŋnə̀ ŋ̀ghɨrə aa a mbo ŋ̀gǎŋwo nɔ̀ŋsə̀ bo bɨ̀ ŋ̀gàŋatɨ̀ɨ atu, bo bɨ̀ a mbo bɨ̀tɨ̀ bɔꞌɔ̀ Nwî, nɨ ŋgǎŋghɨ̀rə ɨnnù jì bɨ, nɨ a mbo bə̀ bìi mə kaa bɨ sɨ̀ laa, bə̀ bìi mə bɨ bə̀gɨ̀tə̀ Nwî aa, nɨ a mbo bə̀ bìi bɨ zwitə bɨ̂taà byaa aa, bo bɨ̀ bə̀ bìi mə bɨ zwitə bɨ̂maà byaa, nɨ bə̀ bìi mə bɨ kee bə̂, 10 bo bɨ̀ a mbo ŋ̀gàŋatsùùrə̀, bo bɨ̀ a mbo m̀bâŋnə nlɔ̀gə̂ m̀bâŋnə̀, nɨ ŋ̀gǎŋyə̀rə bə̀, nɨ̂ ŋ̀gǎŋntswɛɛ̀ ɨ̀bǎŋnənnù, nɨ ŋgǎŋkàâ àbǎŋnənnù, bo bɨ̀ a mbo bə̀ bìi mə bɨ ghɨ̀rə ɨnnù jî mɔꞌɔ jìi mə kaa ɨ̀ sɨ̌ kuꞌùnə̀ nɨ̂ ànnù Nwî yi annù nɨ̂ŋkoŋ aà, 11 kaa ŋkɨꞌɨ̀ yòŋə̀ nɨ nɨ̀ghaꞌa nɨ ntoo yì ǹsɨgɨ̀nə̀ ya nloŋ Nwî yìi mə bìꞌinə̀ ghaꞌasə aa, ǹtoo ya mə à nɨ̀ŋə a ntərɨ̀nə̌bo mə̀ aà.
Paul à fâ m̀bɨꞌɨkə nloŋ ŋko mɨ̀lɨ̀ŋnə̀ Nwì
12 Mə fa mbɨꞌɨkə a mbo Kristo Yesu M̀màꞌàmbî yìꞌinə̀ yìi a fa mɨdaꞌa a mbo mə̀ nloŋ mə à lɛ nyə gha mə̀ kuꞌùnə̀ mə mbə mə̀ faꞌà a mbo yu nɨ̂ ǹtɨɨ̀ ghâ tsɨ̀m, a tsɔꞌɔ̀ gha a mum àfàꞌa yu aà. 13 Ka mə à lɛ mbə a mbìì mə̀ bəgɨ̀tə̀ nɨ̂ Nwì, ǹtsɔꞌɔ nɨ̂ àkòrə Kristo ŋ̀kɨɨ mbəgɨtə nii aa, lâ à lɛ ŋko mɨlɨ̀ŋnə̀ ghà, ǹloŋ mə mə̀ lɛ sɨ ghɨ̀rə̀ aa nɨ bùꞌù, kaa mburə tɨ a Nwî biì. 14 Ɨ̀bɔ̌ŋ Mmàꞌàmbî yìꞌinə̀ ɨ lɛ naŋsə nswiꞌinə nloŋ ŋgaà yà, nɨ̂ àbìintɨɨ, nɨ̀ àkɔ̀ŋnə̀ yìi mə a tswe a nu Kristo Yesu aà.
15 Nɨ̀ghàà nûlà nɨ təə̀, ŋ̀kuꞌunə a mbii tsiꞌì nɨ̀tsɨ̀mə̀: Mə Kristo Yesu à lɛ mfɛ̀ꞌɛ̀ fàa mbi aa a nyweensə ŋgǎŋghɨ̀rə̂ ɨ̀nnù jî bɨ, mə̀ bə̂ ǹtsyàmbìì a tɨtɨ̀ɨ bo. 16 Lâ ǹjiꞌì ànnù yìi mə Kristo à lɛ ŋko mɨlɨ̀ŋnə̀ ghà ghu aa ɨ bə mə, tsiꞌì tsǒ ǹtsyàmbìì ŋ̀gàŋghɨ̀rə̂ ɨ̀nnù jì bɨ, tâ Yesu Kristo tâ à dɨꞌɨ annǔ ntswântɨɨ̀ yi ya mə a kɔꞌɔ ntsɨrə aa a nu mə̀ tâ à bə alènsə̀, a mbo bə̀ bya bìi mə bɨ ka nɨŋ mɨ̂ntɨɨ̀ myaa ghu nu ta tswe nɨ̂ ǹtswêntɨ̀ɨ̀ yìi ɨ̀ lwìꞌi nɨ̂ŋkoŋ aà. 17 Tâ nɨ̀ghaꞌa nɨ̂ àghuꞌusə̀, tâ tswe a mbo M̀fɔ̀ ŋ̀gùꞌu ŋguꞌu, tɨ kwô, yìi bɨ sɨ yə aa, mə à nɨ Nwîŋgɔ̀ŋ yû yɨgə̀ aa, nlwìꞌì nɨ̂ŋkoŋə̀. Àmen.
18 Timoti, mû ghà, mə̀ nɨ̌ŋ ǹdɨ̀ꞌɨ yulà a mûm ǹtərɨ̀nə̌bo wò, yìi mə ɨ̀ yòŋə nɨ nɨ̀ghàà nìi ŋ̀gàŋntoò Nwì à lɛ nswoŋ a mbìì aà, nya mə nɨ lɛ ntsɔꞌɔ gho aà, tâ nɨ̀ ghɨrə mə tâ ò ka naŋsə nto ntsò yî sɨgɨ̀nə̀ wa nɨ nu. 19 Naŋsə ntswa abìintɨɨ, nɨ̂ àlàa ntɨɨ̀; bə̀ bî mɔꞌɔ, ntsya a njɨ̌m ajàŋ mə bo tùù mə̂ àlaa ntɨɨ aa, bə̀ bî mɔꞌɔ bɨ mèꞌè mə̂ àbìintɨɨ̀ yaa a ghɛɛ̀ ŋ̀koŋə a ŋkì. 20 A tɨtɨ̀ɨ bə̀ ma bû Hymenaeus nɨ Alexander bo tswe ghu, bo bìi mə mə̀ fà mə a mbo Satan mə tâ bo yəgə nzi mə kaa a sɨ̀ kuꞌùnə̀ a mbə̀gɨ̀tə Nwì.