1 तेबे से दिरबे और लुस्त्रा नगरो रे बी गया, और देखो, तेती तीमुथियुस नाओं रा एक चेला था, जो केसी विश्वासी यहूदिणिया रा पाऊ था, पर तेसरा पिता यूनान देशो रा रणे वाल़ा था। 2 से लुस्त्रा और इकुनियुम नगरो रे विश्वासी पाईया बीचे जाणेया-मानेया रा था। 3 पौलुसो री इच्छा थी की ये बी मां साथे चलो और जो यहूदी लोक तिना जगा रे थे तिना री बजअ ते तेसरा खतना कित्तेया, कऊँकि सेयो सब जाणो थे कि एसरा पिता यूनान देशो रा रणे वाल़ा था। 4 तेबे पौलुस और तिना रे साथी नगरो-नगरो रे जांदे ऊए तिना बिधिया खे, जो यरूशलेमो रे प्रेरिते और बुजुर्गे ठराई राखी थी, मानणे खे तिना खे पऊँछांदे जाओ थे। 5 ईंयां मण्डल़ी विश्वासो रे मजबूत ऊँदी रई और गिणतिया रे हर रोज बड़दी गयी।

6 तेबे सेयो फूगिया और गलातिया रे प्रदेशो रिये ऊँदे ऊए गये और पवित्र आत्मे तिना खे आसिया प्रदेशो रे वचन सुनाणे खे ना कित्ती। 7 तेबे तिने मूसिया प्रदेशो रे नेड़े पऊँछी की बितूनिया नगरो खे जाणा चाया, पर प्रभु यीशुए रे पवित्र आत्मे सेयो जाणे नि दित्ते। 8 तेबे सेयो मूसिया प्रदेशो रे ऊई की त्रोआसो नगरो खे आए। 9 तेबे पौलुसे राथियो खे दर्शन देखेया कि एक मकदुनी मर्द खड़े रा, तेसते बिनती करी की बोलोआ, “पार उतरी की मकिदुनिया खे आओ और आसा री मताद कर।” 10 तेसरा ये दर्शन देखदे ई तिने फटाफट मकिदुनिया प्रदेशो खे जाणा चाया, ये समजी की कि परमेशरे सेयो सुसमाचार सुनाणे खे तेती बुलाई राखे।

11 तेबे त्रोआसो नगरो ते जाह्ज खोली की आसे सीदे सुमात्राके टापूए खे और दूजे दिने नियापुलिस नगरो खे आए। 12 तेथा ते आसे फिलिप्पिया रे पऊँछे, जो मकिदुनिया प्रान्तो रा खास नगर और रोमिया री बस्ती थी और आसे तेस नगरो रे कई दिन तक रये। 13 आरामो रे दिने आसे नगरो रे फाटको ते बारे नदिया रे कनारे ये समजी की गये कि तेती प्रार्थना करने खे जगा ऊणी और बैठी की तिना जवाणसा साथे, जो कट्ठिया ऊईया थिया, गल्ला करने लगे। 14 लुदिया नाओं री थुआतीरा नगरो री, बैंगणी टाले बेचणे वाल़ी परमेशरो री एक भक्त जवाणस सुणने लगी री थी और प्रभुए तेसा रा मन खोलेया, ताकि से पौलुसो री गल्ला खे त्यान करी की सुणो। 15 जेबे तेसे आपणे कराने समेत बपतिस्मा लया, तेबे तेसे बिनती कित्ती, “जे तुसे माखे प्रभुए री विश्वासणी समजोए तो चली की मेरे कअरे रओ।”

16 जेबे सेयो प्रार्थना करने री जगा रे जाणे लगी रे थे, तेबे आसा खे एक दासी मिली, जेसा रे आऊणे वाल़े बखतो रे बारे रे बताणे वाल़ी दुष्टात्मा थी और जो एड़ा करने ते से आपणे स्वामिया खे बऊत कुछ कमाई की ली आओ थी। 17 से पौलुस और आसा पीछे आयी की चींगणे लगी कि, “यो मांणू परमप्रदान परमेशरो रे दास ए, जो आसा खे उद्धारो री कथा सुणाओए।” 18 से बऊत दिन तक एड़ा ई करदी रई। पर पौलुस दु:खी ऊईगा और मूँ फेरी की तेसा दुष्टात्मा खे बोलेया, “आऊँ ताखे प्रभु यीशु मसीह रे नाओं ते आज्ञा देऊँआ कि एसा बीचा ते निकल़ी जा और से तेसी बखते ई निकल़ी गी।”

19 जेबे तेसा रे स्वामिए देखेया कि आसा री कमाईया री उम्मीद चली गी, तेबे सेयो पौलुस और सीलासो के पकड़ी की चौको रे प्रदाना गे खिंजी की लयी गे 20 और तिना खे यहूदिया रे हाकिमा गे लयी जाई की बोलेया, “यो लोक जो यहूदी ए, आसा रे नगरो रे बऊत जादा शोर-शराबा लगी रे करने। 21 और एड़िया रवाजा बताणे लगी रे जिना खे ग्रहण करना या मानणा आसा रोमिया खे ठीक निए।” 22 तेबे पीड़ा रे लोक पौलुस और सीलासो रे बिरोदो रे कट्ठे ऊई की चढ़ी गे और हाकिमे तिना रे टाले फाड़ी की खोली ते और तिना खे डण्डे बाणे री आज्ञा दित्ती। 23 तेबे तिना खे बऊत डण्डे बाई की सेयो जेला रे पाई ते और जेलरो खे आज्ञा दित्ती कि इना री चौकसी राखणी। 24 तिने एड़ी आज्ञा पाई की सेयो पीतरो री कोठरिया रे राखे और तिना रे पैर काठो रे ठोकी ते।

25 तकरीबन आदी राथियो तक पौलुस और सीलास प्रार्थना करदे ऊए परमेशरो रे पजन लगी रे थे गाणे और बन्दुए तिना खे सुणने लगी रे थे। 26 तदुओ की एकदम बऊत बड़ा इल्लण ऊआ, एथो तक कि जेला री निऊँआ तक इल्ली गिया और फटाफट सब द्वार खुली गे और सबी रे बन्दन खुली गे। 27 तेबे जेलर जागी गा और जेला रे द्वार खुले देखी की समजेया कि बन्दुए नठीगे रे, तेबे तिने तलवार खिंजी की आपू खेई बाणी चायी। 28 पर तदुओ कि पौलुसे जोरे की बोलेया, “आपणे आपू खे कुछ बी नुकशाण नि पऊँचा, कऊँकि आसे सब एथी ए।” 29 तेबे जेलरे दिऊआ मंगवाई की पीतरो खे लमखणे लगेया और थरथरांदा ऊआ पौलुस और सीलासो रे आगे रूड़ेया। 30 तेबे तिने तिना खे बारे ल्याई की बोलेया, “ओ सज्जनो! उद्धार पाणे खे आऊँ क्या करुँ?”

31 तिने बोलेया, “प्रभु यीशुए पाँदे विश्वास कर, तेबे ताखे और तेरे कराने खे उद्धार मिलणा।” 32 तेबे पौलुस और सिलासे तेसखे और तेसरे सारे कअरो रे लोका खे प्रभुए रा वचन सुणाया। 33 तेबे राथियो खे तेसी कअड़िया रे जेलरे पौलुस और सिलास निए और तिना रे जख्म तोए और तिने आपणे लोका समेत फटाफट बपतिस्मा लया। 34 तेबे तिने सेयो आपणे कअरे निए और तिना खे रोटी खुल़ाई और सारा कराना परमेशरो पाँदे विश्वास करी की खुश ऊआ।

35 जेबे दिन ऊआ, तेबे हाकिमे सिपाईया गे सन्देशा पेजेया, “तिना मांणूआ खे छाडी देओ।” 36 जेलरे यो गल्ला पौलुसो गे बोलिया, “हाकिमे तुसा खे छाडणे खे बोली ता रा, तो एबे निकल़ी की बेफिकर ऊई की चली जाओ।” 37 पर पौलुसे तेसखे बोलेया, “तिने आसे, हालाँकि रोमी मांणू ए, दोषो ते बिना, लोका सामणे कुटे और जेला रे पाईते। एबे क्या चोरिए-चोरिए निकयाल़ी देओए? एड़ा नि ऊणा, पर सेयो आपू आयी की आसा खे बारे निकयाल़ी की लयी जाओ।”

38 सिपाईए ये गल्ल हाकिमा खे बोली ती और सेयो ये सुणी की सेयो कि रोमी ए, डरी गे। 39 तेबे तिने आयी की तिना ते माफी मांगी और बारे लयी जाई की बिनती कित्ती कि नगरो ते बारे चली जाओ। 40 तेबे सेयो जेला ते निकल़ी की लुदिया रे कअरे गये और विश्वासी पाईया साथे मिली की तिना खे बोलेया तुसा खे शान्ति मिलो और चली गे।