JON
Ro Igobi Pha Jigigam
Yaophi
Jon ro igobi pha jigi shii nyi chiang um ro: hanyie hìpha jigi shii thamphothek ne Hamangkhung-aphuii nane ai dufuii, Isu Masi, rog òsia ne rai yi pha lububo rek ro chiih-è jine ithek hìpha òsia shii srobro rekpho nane biidiie yua pho shii phriie. Awie pha mana ne hìpha sohjambling rog ò rai pha chiang è rey ji è Isu hanyie yi Hamangkhung-aphuii ro Dufuii, ai ne khuchungde tharothamang asi rone biidiie pha masdothek è yua ro. Hanyie masdothek è ji yao jine ragia rey yi pha hìpha sohjambling pha chai lakhung shii anoh sha chid; chiih-è ithek ne hì de yua ji pha giawo nane isiie sieng pha nane chiih-è gai shii miie pha jine nyie de arek chid phro.
Hì pha khani suang ne, zey pho ne so è yao Isu Masi ne tharothamang sbhang ro, chiih-è hanyie è Isu shii migi rek chiih-è Hamangkhung-aphuii shii miie ithek ne awaithek chung miie chid.
Iliing shii um pha ji
Yaophi (1:1-4)
Muchuang nane igiiathek (1:5—2:29)
Hamangkhung-aphuii ro aniphiing nane Sakhathong aniphiing (3:1-24)
Zai nane asi pha (4:1-6)
Miie pha blia (4:7-21)
Yang pha migi (5:1-21)
1
Chai pha miyaogam
1 Jon 1:1Gathek ne nathek shii chai pha miyaogam chiang shii zey, nyie yi igobi è um. Nyie yi gethek è ji shii khoh è yoijong, chiih-è gethek ji shii mieg è riigjong; oh, gethek riigjong gethek wad è de khohjong. 2 Jon 1:14 Ji pha chai shii doh muii pha rey magey shii, gethek riigjong ro, ji è gethek yao ruii chiih-è nathek shii idang pha chai chiang ji yao ruii nyie ji yi Aphuii rog um chiih-è gethek ìd yi ro. 3 Gethek è nyie doh pha nane yoi pha ji shii gathek ne nathek shii de ìdyi pha yao, ji è jine gethek Aphuii rog chiih-è Dufuii Isu Masi rog shii na de gathek rog òsia shii si gieng pha rek ro. 4 Gathek è hì zey pha jine gethek ro*Gethek ro; giak jigizey um pha jine Nathek ro. lubo shii zab rey yi pha rek ro.
Hamangkhung-aphuii ne muchuang
5 Thuh ai Dufuii è gethek yoi pha mua ji chiih-è ìd pha yao pha jine hì ro: Hamangkhung-aphuii ne muchuang, chiih-è aishii ne nyie de giia oi. 6 Chiihphado, gethek ai rog shii òsia rone yao, thuh de gethek ne igiia hà rai pha ishak duiine ba arone, gethek miyaogam nane bliathek shii de khlam bamuii ro. 7 Jishii thuh ai muchuang shii duiine—Gethek de muchuang shii rai arone—Ji-anine gethek zab jia rog òsia shii ro, chiih-è gethek ro zab layog shii ne airo Dufuii, Isu ro ifai è sud phi phro.
8 Gethek è gethek shii layog oi rone yao arone, gethek ne gethek shii khlam ro, chiih-è gethek shii ne nyie zai oi ro. 9 Jishii Hamangkhung-aphuii shii gethek layogthek khung arone, ai ne awai sbang shii ruii chiih-è nyie zai lei ne ji rek: Ai ne gethek layogthek è khung phi chiih-è gethek ro zab awie pha rek pha ji è gethek shii sang phi phro. 10 Gethek ne layogthek arek rone yao arone, gethek ne Hamangkhung-aphuii shii khlam rone rab ro, chiih-è airo miyaogam ne gethek shii oi ro.