KHOLOSITHEK
Shii Phaul Re-è Jigigam
Yao phi
Phaul ro jigigam Kholosithek shii zey pha ji ne Iphisus pha bichiu Asia Minor pha du-ùa Kholosi charch shii zeyjong ro. Ji pha charch ne Phaul è rung pha asi ro, jishii ji pha sohthua ne Phaul è airo gaja rone than, ji è ai è Roman iliing pha soh Asia rajan pha Iphisus è bliapho thoh ge. Phaul è yoi shii Kholosi pha charch shii ne biidiie pha masdothek um hanyie è Hamangkhung-aphuii shii thieg pha nane ley giawo um pha khalo shii ne luruak khohphothek nane riichaithek jia shii sia bie chid phro ne yua ramuii. Ji pha rog shii, ji pha masdothek è yao. Migiangkheg ne michiethek chiang shii nane gai miyaothek shii ne wie è nuii ne gang è bokhoh chid.
Ji pha muyuathek shii suang rek pha Phaul è izai masiphothek mua ji è zey. Airo muchang ji è Isu Masi ne ley giawo phi mua chiih-è ji pha gai migithek nane dabthek ai è ruang noh muii phro. Masi chiang Hamangkhung-aphuii è sohjambling shii zen, ai chiang è ji shii iidoh yie din. Sohjambling giawo luthong ne Masi shii ò pha ji è ro. Chiihphado Phaul è migiphothek pha chaithek shii ji pha boh muyuathek shii lua ne zey phi.
Hì ne Thychikhus shii isiie rek chid, hanyie yi hì pha jigigam Phaul chiang shii Kholosi hà yie phi shii Onesimus de ò shii um, Philimon ro khiao chiang shii Phaul è philimon shii zey.
Iliing shii um pha ji
Yaophi (1:1-8)
Ziig nane Masi ro blia (1:9; 2:19)
Masi shii iwo chai (2:20; 4:6)
Jongsha (4:7-18)
1
1 Phaul re-è, hanyie yi Hamangkhung-aphuii miiyang ne Masi Isu ro guaphasamoy ji nane gethek ro khuiino Thimothi—
2 Hamangkhung-aphuii ro bran Kholosi pha, hanyie yi gathek ro migi ijakthek Masi rog shii:
Gathek ro Hamangkhung-aphuii è nathek shii bushun nane liijiing phi bo.
Laso pha misia
3 Gathek è nathek shii sia shii, gathek ne idang gethek ro Ithong Isu Masi Aphuii pha Hamangkhung-aphuii shii laso phi. 4 Chiih-è gathek ne nathek ro migi Masi Isu shii nane nathek ro miie ne zab Hamangkhung-aphuii bran shii um ro ji de yoi muii ro. 5 Zai mua nyie yi Mua Wie ji igobi nathek shii thog, ai è zid pha luthong chiang ne nathek è yoi. Ji è nathek ro migi nane miie yi hamangkhung hà ragia rek ne ruii phi pha luthong shii rai ro. 6 Chiih-è hìne nathek duchoi shii, nathek ne igobi pha inai è Hamangkhung-aphuii ro bushun chiang shii yoi chiih-è hìne nyie khi-èrek pha izai rone thieg pha duiine mua ne khirzey yie ne chiih-è zab pha sohjambling shii shiiy lumao muii ro. 7 Khol 4:12; Phlm 23Nathek ne Hamangkhung-aphuii ro bushun ne, hanyie yi gathek *gethek ro; giak jigi shuii ne um nathek.duchoi pha Masi ro isiie bliapho Ephaphras, gathek ro ijak khiao ji è thieg ro. 8 Ai è gathek shii Ragung è nathek shii phi pha miie ji yao phi ro.
9 Chiih-è ji pha chiang è gathek ne nathek chiang yoi pha ji è yie ne idang nathek shii sia phi, gathek ne Hamangkhung-aphuii shii sia, nathek shii de airo Ragung phi pha awailum pha khani, gao nane khani ji zan phi bo. 10 Chiihphado nathek ne Hamangkhung-aphuii è chid pha duiine rai mua, chiih-è nathek ne ai nyie sang pha wie blia ji idang rek mua. Nathek chai shii de zab pha wie blia è se ruii, chiih-è nathek ne Hamangkhung-aphuii ro khani è sieng ruii. 11-12 Nathek ne nyie airo biisiie boh blu è thog pha chuh pha rog shii gang ji rek phi, ji è nathek ne lubuphiang pha rog shii zab zud mua. Chiih-è lubo rog shii Aphuii shii laso†jum rog chiih-è lubo rog shii laso phi; dinne jum nane lubo rog shii chiih-è laso phi. phi mua ruii phro. Hanyie shii nawairo mathang mua spho rek phi pha ji shii ne Hamangkhung-aphuii è awai branthek ro nyie shii isang pha Sajathua hà ong ne ruii phi ro. 13 Ai è gethek shii riichai igiia è ragia rek phi srane Sajathua pha awairo bushun Dufuii hà noh ne ragia rek phi, 14 Iphi 1:7hanyie è gethek ro layogthek khung phi srane ichad rek phi.
Isu Masi nane airo blia
15 Masi ne adoh pha Hamangkhung-aphuii shii doh pha mia ro. Ai ne igobi giak pha Dufuii ro, chiih-è nyie manathek rab pha ji shii zab è bo ro. 16 Ai chiang è Hamangkhung-aphuii è hamangkhung nane sohnyiak shii zab rab. Chiih-è doh pha mana de rab chiih-è adoh pha manathek de rab, Chiih-è luruak pha blu è yi ne, ithongthek, khophothek chiih-è riichaithek de rab. Hamangkhung-aphuii è zab hamangnyiak shii rab chiih-è ai re-è ai pha rab phi. 17 Zab è ibi Masi ne um, chiih-è ai rog shii dog ne zab pha mana ne airo awai ithua shii um ro. 18 Iphi 1:22,23Ai ne siu pha khrug charch ro; Ai ne siu pha chai ithua ro. Ai ne igobi giak pha Dufuii ro, nyieliieshii ai ne zab pha manathek è de ibi rai mua pha ai ne iy bsa è de hòi din. 19 Chiih-è hì ne Hamangkhung-aphuii awai muphak pha ji è Dufuii ne awailum ne Hamankhung-aphuii duiine rey ro. 20 Iphi 2:16Dufuii chiang è, chiihphado Hamangkhung-aphuii è zab hamangnyiak shii awai hàne iidoh yie din pha phak. Hamangkhung-aphuii è bai pha awai dufuii ro ifai‡ai Dufuii ro ifai; dinne ai Dufuii ne iy bsa à zid muii ro. ji è zab shii liijiing rab phi, chiih-è zab pha manathek shii chiih-è nyie shii sohnyiak nane hamangkhung shii de ai chiang è iidoh awai hà yie din yi.
21 Luang jia shii nathek ne Hamangkhung-aphuii è ruang rey ne chiih-è nyieliieshii nathek è awie pha blia rek ne now pha chiang aishii suangthek rek. 22 Jishii thuh ne, airo dufuii iy pha chiang è Hamangkhung-aphuii è nathek shii airo ijak rab phi srane So igang, nane biidiie asi bsa è ai moe hà noh phi. 23 Na ne athothang pha gang shii isiie rek ne chiih-è chuh rek ne rai bo, chiih-è na mua yoi mage shii nawai è yang pha luthong pha ji è nawai shii asid yi rabo. Hì ne ji pha mua ro gu, Phaul, nyie yi zab sohjambling shii yua muii pha khiao ji ro.
Phaul ne charch shii khiao duiine blia rek
24 Chiih-è thuh nathek chiang è diig rek pha ji ne sang ro, gu siu è diigthek rek pha miyao ne airo siu charch pha chiang shii Masi ro diigthek nyie yi led bamuii pha diigthek jijong yi pha gu ne nong ramuii ro. 25 Chiih-è nathek shii wie rek yi pha hanyie è hì pha blia gu shii phi. Gu ne Hamangkhung-aphuii chiang Charch shii khiao rab ne rai. Hì pha blia ne awairo mua shii zab yao pha ro. 26 Nyie yi buyo è zab pha bran è ug ne ruii pha ji ne jishii thuh ne awai bran shii dong phi. 27 Hamangkhung-aphuii muphak ne rab pha ji ne airo ug pha ji awai bran shii thieg yi, nyie ai è awai bran shii bukho nane boh lubo ug pha ji ro, chiih-è ug pha ji ne hì ro Masi ne na shii um ro, nyie hì pha miyao ne nathek de Hamangkhung-aphuii ro biisiie ne thang ruii phro. 28 Ji-è gathek ne Masi ne zab shii yua. Zab pha khani rey mua pha ji è gathek ne phriie ne ithek shii yua nyieliieshii zab shii Hamangkhung-aphuii moe hà weg rey ne hanyie ne Masi rog ò rey mua. 29 Masi è phi pha riichaiboh chua nyie yi gu shii blia rek ramuii pha ji shii bokhoh ne hì pha blia shii jong yi pha gu è wiang nane diig rek.