18
Babylon chiihdun
1 Ji pha iidoh shii gu è gai hamangkhliie yi hamangkhung re-è wuii ruii pha doh. Aishii ne boh riichai um, chiih-è airo muchuang re-è zab sohnyiak ne sang rey dun ro. 2 Aij 21:9; Jeri 51:8; Dng 14:8; Aij 13:21; Jeri 50:39 Ai è gang goh re-è ziak mage: “Ai ne chiihdun! Boh Babylon ne chiih dun! Ibuiithek nane izia ragungthek ne aishii rai dun ro; zab ichuathek pha izia nane khiijai pha fuiithek ne aishii rai dun ro.” 3 Aij 23:17; Jeri 51:7 Zab pha sohthek ne airo phuii niing ne phuiithiig ne—Hò-amuii ro gang siulao pha phuii ji ro. Sohnyiak pha sajathek ne hò-amuii shii siulao rek ro, chiih-è sohkhung pha chongjaipho ne ai è bangchiie chid pha ji re-è ithek ne bukho rey dun ro.
4 Aij 48:20; Jeri 50:8; 51:6,45Chiihphado gai goh yi hamangkhung re-è yao pha gu è yoi,
“Fuang hà khia bo, gu branthek! hò-amuii ji re-è fuang khia bo!
Nathek ne hò-amuii layog shii ichua arek rabo;
Nathek ne hò-amuii ro lago shii athang rabo!
5 Igo 18:20,21; Jeri 51:9 Hò-amuii ro layogthek ne khudungkhudung ne hamangkhung hà thog sha dun ro,
chiih-è Hamangkhung-aphuii ne airo awie pha lumuiithek shii ne nowkhlei ro.
6 Chng 137:8; Jeri 50:29 Hò-amuii è nathek shii khui pha duiine aishii de khui bo;
Ho-amuii è rek pha zab shii nyirang è iidoh phi bo.
Ai è nathek shii phuiikho saro pha duiine.
Nathek ne ji è de weg phuiikho shii airo gog shii ley phi bo.
7 Aij 47:7-9 Ai awai shii biisiie nane ichad chai sieng pha duiine
hò-amuii ai ro khama um pha diig nane duhug phi bo.
Ho-amuii awai è yao pha:
‘Ichiih gu ne sajamuii ro!
Gu ne misiungmuii asi ro,
Gu ne duhug ne khuchungde athieg ro!’
8 Nyieliieshii ji ne, inai jia hò-amuii ne awie pha muathek rog shii è diig ruii phro
miiriiethek, duhug nane nokhonosiie. Rey ruii phro.
Chiih-è aishii ne bai re-è ziao ruii phro,
Nyieliieshii hò-amuii shii chua pha Ithong Hamangkhung-aphuii ne zabboh ro.”
9 Ezkh 26:16,17 Sohnyiak pha sajathek ne hanyie è ai rog shii siulao nane chid pha ji shii thang gieng pho ne ziak ruii phro chiih-è aishii ziao pha ji re-è mukham yi ithek è riig mage shii ji pha rajan lakhung shii choh ruii phro. 10 Nyieliieshii ithek ne airo diig shii thang pha ji rum ne, ithek ne ruang hà riu ro. Ithek è yao, “Khinyama buii ro! Khinyama buii ro! Hìpha riichaiboh nane bajoboh pha rajan Babylon! Nathek shii ne ishak jia shii Lago phijong ro!” 11 Ezkh 27:31,36Sohnyiak pha chongjaiphothek airo chiang cho ne zo ruii phro, nyieliieshii ithek ro manathek shii hanyie de apheg phro; 12 Ezkh 27:12,13,22 ithek ro manathek san, liiman, igong lubaothek, chiih-è mukhothek ne; ithek ro manathek pha igong yung imo, iphi yung, yungsiu nane, ishaig yung; zab ithua hà amua pha hingthek zab pha ichuathek nyathong shiinyin re-è rab pha chiih-è igong hing, dau, shiie, nane marble, 13 chiih-è dalchini, masala, bisi, siiriie, chiih-è rem no; phuii nane thiiliie, muhab nane phiug, shuwuii nane shiishai, sthuhthek chiih-è hanthek, khiaothek nane tharohthamang chaithek shii rang de hanyie apheg ro. 14 Chongjaiphothek è aishii yao, “Zab wie mana nawai chid pha jine san dun ro, chiih-è zab naro nuruii nane biisiie nyuii pha jine san dun ro, chiih-è nane jithek shii din ne amua sha ruii phro!” 15 Ezkh 27:31,36 Chongjaiphothek, hanyie yi ji pha rajan re-è chong rek ne bukho rey pha jine ruang riu dun phro, nyieliieshii ithek ne ai ro diig pha ji thang pha rum. Ithek ne choh ne zo ruii phro, 16 chiih-è yao, “Khinyama buii ro! Boh rajan shii ne khama buii ro! Ai ne awai shii igong pha yung, iphi, chiih-è yung shaig, chiih-è ai ne awai shii san mukhothek, igong lubaothek, chiih-è mukhothek re-è cheg ruii phro! 17 Aij 23:14; Ezkh 27:26-30 Ai ne ishak jia shii awairo nuruii ne zab mua dun ro!”
Zab pha runboh dumuii nane inphothek, khiyidpho chiih-è gai hanyie khamuii è wiang pho ne ruang hà riu dun ro, 18 Ezkh 27:32 Bai miriak pha mukham hò-amuii shii ziao pha ji riig ne gang ziak mage: “Hì è rek pha boh rajan duiine gai rajan oi ro!” 19 Ezkh 27:30-34 ithek è ai khrugthek shii nyiak hà fen muii ro, ithek ziak ne zo ne yao, “Khama buii ro! Rajan boh ne khama buii ro! Ai ne rajan ro zab hanyie yi khamuii hà runboh khiyidpho ne airo nuruii è bukho rey ro! Chiih-è ishak jia shii ai ne zab mua dun ro!”
20 Iphy 32:43; Jeri 51:48 Sang bo, hamangkhung, nyieliieshii ai ne mua dun ro! Sang bo, Hamangkhung-aphuii ro branthek nane guaphasamoythek chiih-è chaigthek! Hamangkhung-aphuii ne ai è nathek shii nyie rek pha ji shii the muii ro!
21 Jeri 51:63,64; Ezkh 26:21 Chiihphado riichaiboh pha hamangkhliie è rathak nyaboh lubao jia chiing ne khamuiiboh lakhung shii fen mage ne, yao, “Hì pha boh rajan Babylon ne khama awiedang pha fen muii ne chiih-è khuchungde adoh sha ruii phro. 22 Ezkh 26:13; Aij 24:8Jeri 7:34; 25:10Benthek pha thiibiingkhinkheb nane tharohthamang goh pha, flui boi pha ji nane thu-ung ne nathek ro iliing shii khuchungde din ne ayoi sha ruii phro; chiih-è chongjai rek pha ne nathek ro iliing shii adoh sha phro, chiih-è rathak pha roh ne oi sha ruii phro! 23 Din ne khuchungde muchuang pha ichuang ne nathek shii adoh sha ruii phro; phiyiybufuiithek nane phiyiybimithek ro goh roh pha ne nathek shii ayoi sha ruii phro. Nathek ro chongjai ne sohkhung shii bajo blu um, chiih-è nathek ro biidiie pha jadu è sohkhung pha zab branthek shii khinrin ro!”
24 Jeri 51:4 Babylon shii ne lago phi ro nyieliieshii chaigthek nane Hamangkhung-aphuii branthek ro ifai ne ji pha rajan hà doh ro; um, jithek pha ifai ne hanyie shii sohnyiak shii ua muii pha ji ro.
18:2 Aij 21:9; Jeri 51:8; Dng 14:8; Aij 13:21; Jeri 50:39
18:3 Aij 23:17; Jeri 51:7
18:4 Aij 48:20; Jeri 50:8; 51:6,45
18:5 Igo 18:20,21; Jeri 51:9
18:6 Chng 137:8; Jeri 50:29
18:7 Aij 47:7-9
18:9 Ezkh 26:16,17
18:11 Ezkh 27:31,36
18:12 Ezkh 27:12,13,22
18:15 Ezkh 27:31,36
18:17 Aij 23:14; Ezkh 27:26-30
18:18 Ezkh 27:32
18:19 Ezkh 27:30-34
18:20 Iphy 32:43; Jeri 51:48
18:21 Jeri 51:63,64; Ezkh 26:21
18:22 Ezkh 26:13; Aij 24:8
18:22 Jeri 7:34; 25:10
18:24 Jeri 51:4