1 Inau ku vere nigua puala eigna inau ku rongovia sina mane itamiu ke eia na puhi ke dika duagna na vaivine. Na puhi ke dika ke eia imanea, mara bongihehe teo kedana eia! Imanea ke nere duagna na vaivine ke taulaghi tagna a tamagna. 2 Toke sina mane itamiu ke eia iangeni, ighamu koti tautalunagho eigna na monomiu duagna a Krais! E naba kotida dikahehe hutu puala eigna na fata iangeni, moti boa aua i kosi.

3-4 Toke inau ku boi mono duamiu, kori ghaghanagu inau ku mono duamiu. Na vunegna iangeni, kori mana a Lod Jisas ke heu, inau ku fatea ghohi na mane iangeni eigna na puhi ke dika ke eia. Inau ku magnahaghinighamu eigna kotida eia na haidu, mi inau kuda mono duamiu kori ghaghanagu. Ma nigna na mana nida a Lod Jisas keda mono mua duamiu. 5 Kori haidu iangeni inau ku magnahaghinighamu gi kotida boa aua i kosi na mane iangeni moti lubati vanoa tagna a Satan eigna keda vapara kori havigna. Oti boa aua eigna keda tughuhehe ma a Lod keda vahavia kori maghavu keda tabiru mai bali fatera na komi tinoni.

6 Boi toke ighamu koti titiono tautalunagho kori vido koti lubatia na mane iangeni eigna keda mono haidu duamiu. Ighamu oti adoa ghohi na titiono iaani, “Sina ghathi vidoi isi vamua ke vapotea na falaoa doudolu.” 7 Oti soni aua itamiu na isi eigna kotida pukuni jino. Me tutuni ighamu koti jino, eigna a Krais ke thehe bali vamamaluhaghita kori koakoa. Imanea ke vaghagna na komi dathei sip mara Jiu kena vathehera kori Laulahugna na Thovoliungi.*Kori Ol Testamen a God ke velera mara Jiu kena mono i Ijip eigna kedana vathehea na komi dathei sip me havula na ghaughabuadia kori hagetha eigna nigna na enjel keda boi vathehera ara dathedia mane kena havi nagho kori vido ke thovoliungia a Ijip. Krais ke vaghagna na komi dathei sip irangeni eigna imanea ke thehe eigna a God keda boi vaparara arahai kena vaututunia eigna na komi paluhadia. Me vaghagna a God ke vamamaluhara mara Jiu kori dani kena vathehea na komi dathei sip, a Jisas ke thehe eigna keda vamamaluhaghita kori koakoa. 8 Na vunegna a Krais ke thehe bali vamamaluhaghita, ighita katida mono hahali kori puhi ke jino. E boi toke katida leghua mua na komi puhi kati eia i hau, vaghagna na diadikalaragna arahai tavogha, ma na eiagna na komi puhi koakoa. E toke gi keda teo sa fata ke dika kori havida.

9 Kori nigua na letasi ku risoa atua itamiu sina maghavu, inau ku veleghamu eigna kotida saghoi mono haidu duadia na komi tinoni kena nere duadia arahai kena boi ara taudia. 10 Keana inau ku boi veleghamu eigna kotida saghoi mono haidu duadia mara bongihehe kena nere duadia arahai kena boi ara taudia, ba kena mamagna, ba kena bilau, ba kena maimanihihia na komi ngunguju. Na vunegna na komi tinoni bongihehe kena mono ivei mi vei kori maramagna, e vahotha puala kotida taveti sanira bali boi mono duadia. 11 Kori vido ku risoa na letasi iangeni i hau, inau ku magnahaghinighamu eigna kotida saghoi mono haidu duadia arahai kena velea kena vaututuni, kari ena nere duadia arahai kena boi ara taudia, ba ena mamagna, ba ena maimanihihia na komi ngunguju, ba ena haghore diadikalara arahai tavogha, ba ena kou memee, ba ena bilau. Oti saghoi mono haidu moti saghoi vanga duadia arahai kena velea kena vaututuni kari ena eia na komi thagi puhi ke dika irangeni.

12-13 Boi nida na agutu ighita kati mono kori kiloau na fateragna na komi tinoni bongihehe, eigna a God vamua keda fatera. Keana ighamu kotida fatera arahai kena mono kori kiloau duamiu kena eia na hahi. Na komi Rioriso ke Tabu kena velea, “Oti vetula au itamiu ahai ke leghua na komi puhi ke dika.”