Na Rorongo ke Toke eigna a Jisas Krais
Matiu ke Risoa
Na Titiono Eigna Na Buka Iaani
A Matiu sikei itadia e salaghe rua na mane vaovarongo nigna Jisas. Gi imanea na mane vaovarongo, imanea sina mane bali oho takis tadia mara Jiu me hera mara Rom. Kori vido a Mak ma Luk koro titiono eigna imanea kori rodia na rioriso, romara koro kiloagna Livai. Reghia Mak 2:14; Luk 5:27.
Matiu ke risoa na buka iaani eidia nigna na komi tinoni, mara Jiu. Sethe na vinogha gi e mai a Jisas, na komi profet kena risoa tadia na komi Rioriso ke Tabu a God keda vetula maia sina mane kena kiloagna “Mesaea” ba “Vahavi” bali hathera na komi tinoni Jiu. Keana kori vido a Jisas ke mai, na komi tinoni Jiu kena ghaghana ruarua eigna imanea. Mara na Farise mi mara na Sadiusi mi mara puhidia mara Jiu kena siriuhaghinia a Jisas. Mara Jiu kena toatogha a Vahavi keda mai duagna na mana ke hutu me rihura nidia na komi thevuioka me vunaghi pungusira thovohaliu. Imarea kena toatogha e boi jino gi a Vahavi keda thehe kori ghaibabala eigna iangeni keda tateli aua e teo sa nigna na mana.
Matiu ke risoa na buka iaani eigna na komi tinoni Jiu kedana reghivaughithatha a Jisas a pukuni Vahavi, mi imanea nidia na king. Matiu ke titiono eigna sethe na rioriso eigna a Vahavi ke mono tadia na komi Rioriso ke Tabu. Imanea ke tateli aua na komi rioriso irangeni ke tate mai tutuni kori vido a Jisas ke mai me mono kori maramagna.
Na komi fata ke nagho kori buka iaani:
Jisas Krais ke havi mai (1:1-2:23)
Na titiono nigna a Jon Siuvitabu (3:1-12)
Nigna na siuvitabu ma na auaugna a Jisas (3:13-4:11)
Nigna na agutu a Jisas i Galili (4:12-18:35)
A Jisas ke taveti au i Galili me vano i Jerusalem (19:1-20:34)
Na vagougovui wik a Jisas ke mono i Jerusalem (21:1-25:64)
A Jisas ke thehe me ghoi havi tabiru (26:1-28:20)
1
Ara Hutugna A Jisas Krais
(Luk 3:23-38)
1 Iaani na titionodia ara hutugna a Jisas Krais. Imanea na vinahuhugna a King Deved, ma na vinahuhugna a Ebraham. 2 Na titiono iaani ke turughu mai tagna Ebraham me jufu tagna a Deved:
Ebraham ke tamagna a Aisak.
Aisak ke tamagna a Jekob.
Jekob ke tamadia Jiuda mara tahigna.
3 Jiuda ke tamadia a Peres ma Jera (a idodia romara, a Tama).
Peres ke tamagna a Hesron.
Hesron ke tamagna a Ram.
4 A Ram ke tamagna a Aminadab.
Aminadab ke tamagna a Nason.
Nason ke tamagna a Salmon.
5 Salmon ke tamagna a Boas (a idogna a Boas, a Rehab).
Boas ke tamagna a Obed (a idogna a Obed, a Rut).
Obed ke tamagna a Jesi.
6 Jesi ke tamagna a king Deved.
Deved ke tamagna a Solomon (a idogna Solomon a Batsiba, na vaivine thehe sasani ke kidi taulaghi tagna a Uria).
7 A Solomon ke tamagna Rehoboam.
Rehoboam ke tamagna Abia
Abia ke tamagna a Asa.
8 Asa ke tamagna a Jehosafat.
Jehosafat ke tamagna a Joram.
Joram ke tamagna Usia.
9 Usia ke tamagna a Jotam.
Jotam ke tamagna a Ahas.
Ahas ke tamagna a Hesekia.
10 Hesekia ke tamagna a Manase.
Manase ke tamagna a Amon.
Amon ke tamagna a Josaia.
11 Josaia ke tamadia a Jehoiakin mara tahigna
(Mara iraani ena havi ghohi gi ena mai mara nidia na thevuioka mara Israel mena sekara mena hatira vano i Babilon).
12 Leghudia mara Israel kena mono seka i Babilon,
Jehoiakin ke tamagna a Sealtiel.
Sealtiel ke tamagna a Jerubabel.
13 Jerubabel ke tamagna a Abiud.
Abiud ke tamagna a Eliakim.
Eliakim ke tamagna a Aso.
14 Aso ke tamagna a Jadok.
Jadok ke tamagna a Akim.
Akim ke tamagna a Eliud.
15 Eliud ke tamagna a Eleasa.
Eleasa ke tamagna a Matan.
Matan ke tamagna a Jekob.
16 Jekob ke tamagna a Josep, imanea hiri a taugna a Meri. Meri a idogna a Jisas kena kiloagna a Vahavi.
17 Turughu tagna Ebraham me jufu tagna a King Deved, e salaghe vati na pagusu. Turughu tagna a Deved me jufu kori vido mara nidia na thevuioka mara Israel kena hatira vano i Babilon, e salaghe vati na pagusu. Turughu kori vido mara Israel kena mono i Babilon me jufu kori havigna mai a Vahavi, e salaghe vati na pagusu.
Jisas Krais Ke Havi Mai
(Luk 2:1-7)
18 Iaani na titiono eigna na havigna mai a Jisas Krais. A Meri, a idogna a Jisas, kena parua ghohi bali taulaghi tagna a Josep. Roira koro boi mono haidu mua, kari a Meri ke boebote kori mana nigna na Tarunga ke Tabu. 19 A Josep na mane jino me bosi magnahaghinia keda vamamoa a Meri naghodia na mavitu. Na vunegna iangeni, imanea ke haga agutu poloa na vateoagna rodia na paru.
20 Kori vido a Josep ke talu toatogha na eiagna na puhi iangeni, sina enjel nigna a God ke tate vania kori maumaturungita me veleagna, “Josep, vinahuhugna a King Deved, o saghoi mataghu na taulaghi tagna a Meri, eigna iia ke boebote ghohi kori mana nigna na Tarunga ke Tabu. 21 Iia keda vahua a dathegna mane, mokoda tughuniagna a Jisas,*Na ghaghanagna koragna na ahagna Jisas, “a Vahavi.” eigna imanea keda vahavira nigna na mavitu eigna na komi paluhadia.”
22 Na komi fata iraani e mono mai eigna keda tutuni na hava a God ke vele aua i hau ma na nigna na profet Aisaia ke risoa. A God ke velea, 23 “Na vaivine ke boi nere duagna sa mane keda boebote mekeda vahua a dathegna mane, ma na komi tinoni kedana kiloagna Emanuel.” Na ghaghana koragna na aha iangeni, “A God ke mono duada.”
24 Kori vido ke rarai, a Josep ke leghua na haghoregna na enjel nigna a Lod. Imanea ke taulaghi tagna a Meri, 25 keana e boi nere haidu duagna me ghieghilei havi mai na gari. Ma a Josep ke tughuniagna na ahagna a Jisas.