1 John
Eiwa ove tuturoda John mi gagurisina.
1
Nanekaremi Ge wasiri natopo itari awa gositera.
Utu de butu de ae gisibéda, Ge mi isinesina. Nanekare* Nanekare. Ove Kotopuda atopapasigarimi kotembedo era, ‘nanekare’ awa John (Zebedee da mai) ae aposil mane berari de. Edo iji angode John mi ove eiwa gagurisina, imo Iesu da aposil mane berarida awara tarimi ge eiwa gagurisina. imo embo averi awa imondemane karigetera. Edo nanekare embo eiwa ingitera, jisimi gositera, jijimbesitera edo ipami tujijitera. Edo Ge mi embomaida yai wasiri pisido eira. Edo God mi wasiri piari embo awa arapa esiri nakare gositera. Edo nanekare imondemane gebé site karigetera, embo nanekare gositera awa wasiri natopo itari. Imo ae Mamo de daedo isinesina, edo God mi natokare yai embo awa arapa esisina. Ro nanekare gositera edo ingitera awa imondemane karigetera, imomane ae namondekare daedo umojiawate. Edo gebé, kaenato umojiari awa Mamo ae ainda Mai Iesu Keriso de daedo. Edo nakare ove eiwa imondemane gagurera, kaenato yawa ari awa beda arate.
God da jipapa awa kaena umojiari mina piya edo ara edo ainde daedo umojiara.
Edo bino eiwa ami tesiri ingitera awa itomane yai karigetera. God awa parara edo ainda yai muyae itae. Edo kaenane God de daedo umojido era awa tara, ata muyaeda ainto edo era awa, kaen ge pitawa tedo era edo God da gebé awa ambo ambo ae. Ata kaenanemi edo gido pararada pepeta edo ara dá ango God pararada isima edo eira, kaende umojiari mina piya edo ara, edo ainda Mai Iesu Keriso da ororomi kaenato jimbo bebegae berari teiedo aina. Edo kaenane kaenato jimbo beyae itae awa tara, kaena akuta udumbedo era edo God da gebé kaenato yai awa itae. God awa wasiri dambu darari, edo ami tarigari ro sisina awa ambo ambo edo eira. Awatedo, edo kaenato jimbo bebegae ainda yai karigedo ena, God mi kaenato jimbo bebegae kotembedo dodo aina edo kaenato wasiri dambu darae berari awa teiedo aina. 10 Aindabé God mi embomai berarimi jimbo beyae etera awa sisina, edo kaenanemi jimbo beyae da ji ae tara, kaenato ge ami God mi ge pitawa tedo eira ango sira. Ata God mi ge pitawa tari tao ae, awatedo God da ge kaenato yai awa itae.

*1:1 Nanekare. Ove Kotopuda atopapasigarimi kotembedo era, ‘nanekare’ awa John (Zebedee da mai) ae aposil mane berari de. Edo iji angode John mi ove eiwa gagurisina, imo Iesu da aposil mane berarida awara tarimi ge eiwa gagurisina.