1 Awatedo na ao darari ge tuturobéda imonde pipitena. Iesu da embomai teyo gore, embomaida jipapa ro era awaembo, edo embomai awaembo, edo embomaida kondade ari awaembo benunu tara, edo embomai berari awaembo God da yai ategari piara. 2 Edo dá ango daotegeregari ae gisijijiegari neneide berari awaembo benunu tara, kaena gisi dave jiaro kaena bégade damodamoda isite iwata dave berari God da jisida edo tou ari berari ainda yai piorote. 3-4 God da jipapa awa, embomai berari ainda toregari bara edo ainda gebé awa dave gara. Awatedo benunu tari ango awa dave God Toregari Embo kaenatoda yai, edo ami gido dubodave aina. 5 God dakaima akuta isira, edo Toropu Embo da (1) akuta ami God de embomai deda toropuda isira. Edo embo awawa Keriso Iesu. 6 Imo ainda wasiri embomaida jimbo bebegaeda mina ango pisido besisina, embo berari udegari borote. Edo ijibé God mi matu sirigesisina awa biri embo awa besisina. Ango edo God embomai berari toregain jipapa eira ami arapa esisina. 7 Awaembo God mi na karigari embo edo aposil awa avigesisina. Na gebémi Keriso da daoda tena, edo na ge pitawa tae. God mi na avigesisina ainda gebé awa Gentile embomai*Gentile embomai awa Jew embomai ae. Awamane awa embomai nenei berari Jacob da veda gumbae. da yai atopatano ingido gebé orote.

8 Awatedo na jipapa ena, embo jijianda yai berarida ainkainmi embomaida jisida ipa jiaro erari benunu tedo ara, awamaneda iwata ari awa dave God da jisida, edo awamaneda sinigambari edo ge babaiya ari awa itae.

9 Edo daedo na jipapa ena awa, eutumai ombarijiari dave inono omundo iwata dambu darari akuta jigamo edo ore. Edo awamaneda kopuru tu giro daginegedo ainyae, edo giro rorae gold mi ari ko kujuju mi ari jiwaebé piedo ainyae, edo gongo mina bajinami piedo bari omundo ainyae. 10 Ata awamane iwata dá God tou ari eutumai ango eite embomai nenei kondade edo ore.

11 Iji nonde embobomi God da embomai atopasido era awa, eutumai berari ge tedo ainyae, ata tou ari berarimi atopatari awa budo ore. 12-14 God mi Adam gisi esisina edo ainda amboda Eve esisina, edo daedo Satan mi Adam udumbae, ata eutu Eve awa ami udumbesiri God da aodari desiri erigesisina. Awatedo na eutumaide awara ari piae edo ena, awamanemi embo jijianda atopatara ko gisijiara. Ata iji angode embo jijiandami atopatari pipiteiaro eutumai damodamoda edo isite ingido ore. 15 Awarata, edo eutumai†eutumai. Guriki ge einda awa eutu ata Ove Kotopuda atopapasigari jiwae kotembedo era ainda moka awa eutumai. iji matawa awamaneda gebé ari God da yai piedo ara, edo awamanemi nembu nei dubobudo ara, edo God da jipapa ambo ambo eite iwata dambu darari akuta jigamo edo ara awa gido, isimango mamai engedo awamaneda mamai sima dave eiaro God mi eutumai awa toregaina.‡toregaina. God mi embomai ainkain awamaneda gebé ari Keriso da yai piaro toregaina awa toregari da moka da (1). Ata Ove Kotopuda atopapasigari nenei kotembedo era, toregari da moka nei einda awa: Iji matu ounde Eve mi jimbo beyae esisina, eutumai berari mengari buritera. Awarata, edo eutumai iji einde isimango mamai engedo awamaneda mamai sima dave eiaro God mi eutumai mengarida udegaina.