7
Iesu da nanonamejibé awamaneda gebé ari ainda yai piae.
1 Edo einda amboda Iesu yai Galili ainda pepeta edo esisina. Aindabé Jew embobo* Jew embobo da moka einda awa Jew embomaida gisijijiegari. mi imo daro betarate siya edo era awa gido gido, imo yai Judea doda pepeta edo mambari jipapa ae edo esisina. 2 Edo Jew embomaida Dogara Arida Bondo† Dogara Arida Bondo. Jew embomaida bondo iji awawa, awamanemi dogara siya edo isima edo esitera dá ango awamaneda ewowo gawowomi iji matuda abu damodamoda Moses de daedo isima edo esitera. Awamaneda bondo awa deguta 7 sima edo esitera, edo awamaneda dongo gurepi ae ni olive deda be tari eiuri gido dubodave edo esitera. (Ni olive da ge nei John 8:1da tuda giwo.) Edo awamanemi duberi da da kariga September ko October ainde bondo awa sima edo esitera (Leviticus 23:33-43). iji atutumbesisina. 3 Ango edo Iesu da nanonamejimi ainde sitera, “Imo einda edo dodo Judea mambuyo, ito ambodanimi buro babain edo eta awa daedo gore. 4 Embo da ainmi ainda buro dave embo berarida yai arapa ain jipapa edo eira gido, ainda buro onjigainyae. Edo imo buro eiwa edo eta gido, imo akuta embomai berarida jisida eyo gore.” 5 Ainda nanonamejibémi awamaneda gebé ari ainda yai piae edo esitera, awatedo ge ango sitera.
6 Ango edo Iesu mi awamanede sisina, “Iji nato awa boroko gumbae. Ata itomane yai iji berari awa dave. 7 Butu embomai‡ Butu embomai awa embomai ainkain God dubobae edo awamaneda tamopisida jipapa bebegae ambo ambo edo era. awa sinigambari imondemane ari tao ae. Ata nane awamaneda jimbo bebegae karigedo ena, awatedo awamane namonde sinigambari edo era. 8 Imomane awa bondo einda visido mambuwo. Iji nato awa bé gumbae, awatedo na awa bondo einda boroko visido mamainyae.” 9 Edo amboda Iesu ge eiwa awamanede sisina, imo yai Galili ainda iji tupo isiri jijirisina.
Iesu Dogara Arida Bondoda maundo embomai atopaposisina.
10 Edo amboda, ainda nanonameji dodo bondoda visido maunsitera, imo daedo bondoda maunsisina. Awarata, imo awa arapada mambae, ata onjigedo maunsisina. 11 Edo bondo einda Jew embobomi imo awa gain kakowa eite tedogido esitera, “Embo eiwa nonda isiri?”
12 Edo embo jisijisi awamaneda doda ami Iesu da daoda ge pisipasi jiwae tedo esitera. Neneimi tedo esitera, “Embo awa dave.”
Edo embo neneimi mina awamanede tedo esitera, “Ango ae, embo ami embomai dubo butedo eira.” 13 Awarata awamane Jew embobo awa adu esitera, awatedo embo da ainmi ainda daoda ge arapada tae.
14 Edo iji ainde bondoda pura kupo da (1) awa itae eiri Iesu maundo visido oro kotopu bajinada yai torido embomai tuturo edo atopaposisina. 15 Edo Jew embomaimi korebé eite sitera, “Embo eiwa God da Ove Gaiarida gari eiwa nongo edo burisini? Imo atopatari bae!”
16 Awatedo Iesu mi awamanede mina sisina, “Atopatari nato awa nato topo ae, ata awa imo ainmi na pipisisina, ainda edo gundo eira. 17 Edo embo da ainmi God da jipapa ain jipapa aina gido, atopatari nato awa God da yai edo gundo eirita o awara tari nato akutada awa ge tedo enita awa gaina. 18 Embo ainmi awara tari ainda akutada ge site awa, tou ari ainda akuta bain jipapa edo eira. Ata embo ainmi embomi imo piesiri gupusina tou ain jipapa edo eira, imo awa gebé, edo ainda yai jimbo beyae itae. 19 Moses imondemane aodari awa pipisisinita? Awara, ata imomane da ainmi kera ae. Imomane ro awaembo na dawo betanate jipapa evi?”
20 Edo embomaimi mina sitera, “Imo awa bineimi gisijido eira. Embo ainmi imo dari betatate jipapa eiri?”
21 Iesu mi awamanede mina sisina, “Nane buro bajina da (1) eteno imomane berari korebé ewa. 22 Imomane tamo jiugari§ tamo jiugari awa mai jianda ko embobéda tamo kotopuda ainto kapari. God mi Abraham de ango arate atopaposisina (Genesis 17:9-14). Tamo jiugarida kariwa ami Abraham da orobe kondade ari awamane awa God da embomai kotembu kotembu orote (Genesis 12:1-3; 15:1-6). da ge okain Moses mi pipisisina awa kera edo ewa. (Awarata Moses mi awa tuturoda piae, ata apiye ewowomi tuturoda pipisitera.) Edo iji nenei Oena Apari Degutade mai jianda tamo jiugedo ewa. 23 Edo mai jianda Oena Apari Degutade tamo jiugedo ewa, Moses da aodari dawo erigainyae awate, edo Oena Apari Degutade nane embo gao eteno ainda tamoda kaviegari berari burara amo, ro awaembo imomane namonde sinigambari evi? 24 Imomane na jisimi gari akuta awa goteite katainyae, ata katari wasiri dambu dararimi na goteite katewo.”
Embomaimi tedogido esitera, “Iesu awa Keriso ta?”
25 Edo Jerusalem embomai neneimi tuturo edo tedogositera, “Embo daro betarate darera awa evirita? 26 Ata giwo! Embo awa eire ge arapada sira, edo awamanemi ainde ge da ro tae. Gisijijiegarimi garibé bera awa, embo eiwa Keriso bé tarora? 27 Awarata kaen awa gari embo eiwa yai nonda edo gupusini awa. Ata iji nonde Keriso gumaina awa, da ainmi embo awa yai nonda edo gumaini awa gae.”
28 Ango edo Iesu oro kotopu bajina arapada atopaposiri jiriri aorogatedo sisina, “Imomane na awa gari edo daedo na nonda edo gumbari awa gari. Awarata na awara tari nato akutada einda gumbae, ata embo ami na piesiri guputena awa gebé, edo inemane embo awa gae. 29 Ata na embo ainda yai edo gumbari, edo embo ami na piesiri guputena, awatedo na embo awa gari.”
30 Edo ainda iji* iji. Guriki ge einda awa ora. awa gumbae isira, awatedo awamanemi Iesu kumain esitera, ata embo da ainmi ainda tamoda ipa piae. 31 Edo embomai jiwae embo jisi da (1) doda awamaneda gebé ari ainda yai pipisitera, edo awamanemi tedo esitera, “Iji nonde Keriso gumaina awa inemi kariwa jiwae embo emi edo eutara amo daginegainita?”
Oro kotopu bajinada sima ari embobo Iesu jido kumain maunsitera.
32 Edo Parasi manemi embomai jisi da (1) doda ami Iesu da daoda ge awawa pisipasi tero ingitera. Ango edo Parasi mane ae pirisi babain demi oro kotopu bajinada sima ari embobo pietero imo jido kumain maunsitera.
33 Edo Iesu mi sisina, “Na imondemane iji tupo akuta sima ana, edo imo ainmi na piesiri guputena ainda yai mamana. 34 Edo imomane na gain kakowa awa, ata imomane na tambae awa. Edo na yai nonda itana awa, imomane gumbari tao ae.”
35 Awatedo Jew embomaimi ge mina tara esitera, “Embo yai nonda mambari kaenane kakowa edo tambae ri? Guriki embomaida yai ounda kaenato orobe nenei ainda isima edo era awa isira. Embo ami yai ounda maundo Guriki embomai atopatainita? 36 Ami tesira, ‘Imomane na gain kakowa awa, ata imomane na tambae awa.’ Edo ami tesira, ‘Na yai nonda itani awa, imomane gumbari tao ae.’ Ge einda moka awa rori?”
Iesu mi Asisi Kotopu da gumbari ge karigesisina.
37 Edo bondoda deguta beaoda, deguta bajina ainde, Iesu mi erido petedo ge aorogateite sisina, “Embo da ainmi un udo eira gido, embo awa nato yaida gundo indarate.† Aindabé Jew embomaida tari petari awamaneda bondoda edo esitera, ge awa Iesu mi sisina awa tepobé ae. Oro kotopu bajina arapada pirisi maneda gisijiari bajinami un dodegedo esisina Jew embomaida jisida, awamane kotembu kotembu orote iji matuda God mi awamaneda ewowo gawowo abu damodamoda kondade esiri un ganumada edo idegesisina. Awarata Iesu mi sisina awa, imo akuta ami inono ari embo un udo tekago tamainyae (Exodus 17:1-7 giwo.). 38 Embo ainmi ainda gebé ari nato yaida pipisite awa dá God da Ove Gaiarida ge sisina ango, un wasiride ainda doda edo visido beda edo dodedo wotaina.” Isaiah 12:3; 55:1; 58:11 39 (Ata ge eiwa awa God da Asisi da ge Iesu mi sisina. Edo embo ainkainmi awamaneda gebé ari Iesu da yai pipitero awa, God mi ainda Asisi Kotopu awamaneda yai piain esisina. Awarata iji ainde Iesu mi ainda taogari utuda visido bae. Awatedo iji ainde God mi ainda Asisi awamaneda yai piae.)
Embomaimi Iesu da daoda ge mina tara edo evekara esitera.
40 Awatedo iji angode embo jiwae jisi da (1) doda ge eiwa ingido, awamanemi tedo esitera, “Gebé, embo eiwa awa Peroveta.” Deuteronomy 18:15-19
41 Embo neneimi tedo esitera, “Embo eiwa awa Keriso.”
Ata neneimi tedo esitera, “Nongo edo Keriso yai Galili da edo gumaini? 42 God da Ove Gaiari sisina awa, Keriso, David da orobe‡ orobe. Guriki ge einda awa David da ve. da edo gumaina, edo imo Beteliem nasida edo gumaina. Nasi ainda David isima edo esisina.” 43 Edo embomaimi Iesu da daoda ge mina tara edo avigekavige esitera. 44 Edo nenei imo kumain jipapa edo esitera, ata embo da ainmi ainda yai ipa piae.
Jew embomaida gisijijiegarimi awamaneda gebé ari Iesu da yai piae esitera.
45 Ango edo oro kotopu bajina sima ari embobo egenembedo pirisi babain ae Parasi mane deda yai maunsitera. Edo awamanemi sima ari embobode sitera, “Ro awatedo embo awa kundo gumbae etevi?”
46 Edo sima ari embobomi mina sitera, “Embo da ainmi ge embo emi tesira ango awa gisi tae nakare gae!”
47 Edo Parasi manemi awamanede mina sitera, “Imomane daedo udumbesirita? 48 Gisijijiegari ko Parasi mane da ainmi ainda gebé ari ainda yai piesirita? Ango ae! 49 Ata embo jisi da (1) emi aodari awa gae. Awatedo God da begá awamaneda yai isira.”
50 (Nicodemus awa embo ainmi muyaede Iesu da yai gupusina. John 3:1-2 Imo daedo awa Parasi maneda da (1) awamane doregari doda.) Edo embo ami awamanede sisina, 51 “Kaenato aodarida isira awa emboda ge awa gisi ingae edo ainda buro rori awa gae isite embo awa katainyae.” Deuteronomy 1:16-17; 19:15
52 Edo awamanemi mina ainde sitera, “Imo daedo Galili embo ta? God da Ove Gaiari awa ajijigedo giyo. Peroveta da ji awa yai Galili da edo gumbae.”
53 Ango edo embo da da dodo ainda mando topoda maunsisina.§ John da ge 7:53 maundo 8:11 eiwa Guriki ove gaiari neneida itae.
*7:1 Jew embobo da moka einda awa Jew embomaida gisijijiegari.
†7:2 Dogara Arida Bondo. Jew embomaida bondo iji awawa, awamanemi dogara siya edo isima edo esitera dá ango awamaneda ewowo gawowomi iji matuda abu damodamoda Moses de daedo isima edo esitera. Awamaneda bondo awa deguta 7 sima edo esitera, edo awamaneda dongo gurepi ae ni olive deda be tari eiuri gido dubodave edo esitera. (Ni olive da ge nei John 8:1da tuda giwo.) Edo awamanemi duberi da da kariga September ko October ainde bondo awa sima edo esitera (Leviticus 23:33-43).
‡7:7 Butu embomai awa embomai ainkain God dubobae edo awamaneda tamopisida jipapa bebegae ambo ambo edo era.
§7:22 tamo jiugari awa mai jianda ko embobéda tamo kotopuda ainto kapari. God mi Abraham de ango arate atopaposisina (Genesis 17:9-14). Tamo jiugarida kariwa ami Abraham da orobe kondade ari awamane awa God da embomai kotembu kotembu orote (Genesis 12:1-3; 15:1-6).
*7:30 iji. Guriki ge einda awa ora.
†7:37 Aindabé Jew embomaida tari petari awamaneda bondoda edo esitera, ge awa Iesu mi sisina awa tepobé ae. Oro kotopu bajina arapada pirisi maneda gisijiari bajinami un dodegedo esisina Jew embomaida jisida, awamane kotembu kotembu orote iji matuda God mi awamaneda ewowo gawowo abu damodamoda kondade esiri un ganumada edo idegesisina. Awarata Iesu mi sisina awa, imo akuta ami inono ari embo un udo tekago tamainyae (Exodus 17:1-7 giwo.).
7:38 Isaiah 12:3; 55:1; 58:11
7:40 Deuteronomy 18:15-19
‡7:42 orobe. Guriki ge einda awa David da ve.
7:51 Deuteronomy 1:16-17; 19:15
§7:53 John da ge 7:53 maundo 8:11 eiwa Guriki ove gaiari neneida itae.