2
Mary Yesu engisina.
(Matthew 1:18-25)
1 Edo iji ango de, Caesar* Caesar awa Rome da Gisijiari Bajinabé da dao nei. Augustus mi ge okain sisina, “Rome butu gano nondari ainda embo berari awa ajijigewo! Awamane tax pioré.” 2 Gisijiari Quirinius mi yai Siria awa sima eiri, ajijigari eiwa tuturoda idegesisina. 3 Edo embo berari dao piaintedo awamaneda nasi ikade ikadeda maunsitera.
4 Edo Joseph awa David da orobeda edo gumbari. Edo David da engari nasi awa Beteliem, yai Judea da. Awatedo, imo daedo nasi Nasaret, yai Galili da edo Beteliem da visido maunsisina. 5 Aindabé Mary awa ami jimbarate gerari,† jimbarate gerari. Judah embomainda tari awa ambo ambo edo esitera eiwa, edo avekavemi jimain jipapa era gido, gisibé awa awamaneda piari tembarida ge jirara. Edo gido gerari o jimbari ainda amboda evekara ain jipapa ara, ove gaiedo imo doturena ango taina. Ango tedo gerari o jimbari itae aina. embo awa Mary de daedo dao piain maunsitera. Edo eutu awa watoude mai engari tao. 6 Ango edo Joseph ae Mary de maundo Beteliem nasida torido itero eutu ainda mai bari iji gupusina. 7 Edo dederi oro berari awa ato ae, awatedo, eutu ainda mai buwo engedo gongomi doiedo wo undari betaiya doda pipisisina.
Anelamanemi wo sima ari emboboda yai God da bino dave karigesitera.
8 Edo iji angode wo sima ari embobo nasi ainda demonda awamaneda wo sipumane‡ wo sipu awa wo embomi iji matuda edo gundo boroko sima edo era. Embomai wo sipuda tu gongo edo era edo pisi injido era, awatedo, embo jiwae wo sipu jipapa edo era. Aindabé wo sipuda goroba awa bajinabé ae, edo awamaneda gitopo wo isima edo era awa, wo sima ari embo dave awa ainda sipumane iji berari sima davebé eite dedegedo eira. muyaende simageteite itero jijirisina. 9 Edo Badari da anela awamaneda yai idegesiri, Badari da parara yai ainda datembesisina. Ango esiri gido awamane adu bajinabé esitera. 10 Edo anelami awamanede sisina, “Adu eove! Na imondemane bino dave kundo gupena, ami embo berarida yai yawa ari bajinabé piaina, giwo! 11 Iji boroko einde David da nasida, Tonembari Embo itomane eutumi engesira. Amo Keriso,§ Keriso da moka awa ‘God da Avigari Embo’. awa Badari. 12 Edo kariwa engo gido nato bino gebé awa: Imomane maundo mai saka gongomi doiari wo undari betaiya doda durari isira awa tambawa.”
13 Edo boraebé anelamane jisi bajina da utuda edo anela neinda yai idegedo God dasiga eite sitera,
14 “God utu ikanebé ikaneda isima eira awa taogoré,
edo embomai butuda aimi God da kando
ategedo budo era béga awamaneda yai itare!”
15 Ango edo anelamane dodo egenembedo utuda mambero wo sima ari embobomi akuta mina tara esitera, “Ei pu! Kaende Beteliem da maundo buro eiwa ro idegesiri Badari mi tesiri awa jisimi goré!”
16 Ango tedo, awamane burigibé tumundo nasida torido Mary ae Joseph de kakowa ero jiriri taputera. Edo mai saka awa wo undari betaiya doda durari isiri gositera. 17 Edo mai awa gido awamanemi bino ro anelami awamanede tesiri gera awa kundo idegedo karigetero yai berarida arapu esisina. 18 Edo berari aimi bino awa wo sima ari embobomi karigetero ingido korebé esitera. 19 Ata Mary mi wasiri ro berari idegesira awa ruvegae ainda domi tema edo sirigeteite sima esisina. 20 Aindabé, bino ro berari anelami awamanede tesira, awa ingera edo jisimi gera, awatedo, wo sima ari embobo overegedo taogari awa tedo dareite God dasiga eite awamaneda yai maunsitera.
Yesu da dao pipisitera.
21 Ango edo deguta 8 biri ainda tamo jiugari iji gupusina. Edo ainda dao Yesu sitera. Iji ainde ainda ai Mary watou jirae isiri dao awa matu anelami pipisisina.
Mary ae Joseph de Yesu kundo Judah embomainda oro kotopu bajinada maunsitera.
22 Ango edo awamaneda dono teiarida iji Moses da Aodarida tari isira awa gumbiri Joseph ae Mary de Yesu kundo Badari da yai piain Jerusalem maunsitera.* Aindabé Mary awa mai jianda teka bari, Moses da Aodari da tari isira awa sima eiari deguta 40 itae ari amboda, oro kotopu bajinada aundo pirisida yai dono teiari rorou piari ainda dono God da jisida itae aina (Leviticus 12:1-8). Ove Kotopu da atopatari kotembetera awa, iji angode Mary awa donode God da jisida, Joseph Mary tujido ainda dono burisina. Awatedo, iji ainde awamane tote (2) dono teiari rorou piain maunsitera. Ata Ove Kotopu da atopatari nenei kotembetera, Joseph da dono itae, ami tepo kondade eite Mary da rorou kundo aundo daedo maunsisina. Awatedo, Luke ge awamaneda dono teiarida iji awa gagurisina. 23 (Edo Badari da Aodarida† Badari da Aodari awa Moses da Aodarida dao nei. gaiari ango isira awa, “Mai jianda buwo da da berari awa BADARI‡ BADARI da moka awa ‘Na awa Natopo Itari’ o Hiburu ge awa Jehovah. da yai piawo ainda buro ara.”) Exodus 13:2, 12, 15 24 Edo daedo awamane Badari da Aodarida tari isira awa ambo ambo edo “Ni ribo tote (2) o ni gumbara mamai tote (2)” kundo rorou piaintedo maunsitera. Leviticus 12:8
25 Ango edo embo dao Simeon awa Jerusalem ainda isinesina. Embo awa wasiri dambu darari edo God tou edo esisina. Ami Israel embomainda Kondade Ari Embo§ Kondade Ari Embo awa Keriso da dao nei. sima esisina. Edo Asisi Kotopu awa ainde daedo isite 26 ami ainda yai karigesisina, “Imo betae gisida Badari da Keriso awa jisimi gata.” 27 Edo Asisi Kotopu mi Simeon gisijido kundo Judah embomainda oro kotopu bajina doda totorisina. Edo aimamo mai Yesu awa kundo torido guputera, ainde buro ro orote Aodari da tari isira awa ain. 28 Ango etero Simeon mi mai awa gido tesiri, ai mi piesiri kundo osinembedo God ategedo sisina:
29 “Badari, ito tarigari siteta awa bé esira.
Awatedo, iji boroko ito buro embo awa doyo bégade mambare.
30 Nato jisimi tonembari ito gena,
31 awa inemi sirigedo pieteta embomai berarida jisida.
32 Embo inemi pieteto gumbira,
ami Judah embomai ae, awamaneda yai gundo,
atopatari ito gebé awa gara.
Aindabé, God da Avigari Embo awa Israel orobeda edo gumbira,
awatedo, embomaimi Judah embomainda dao awa daedo dasiga ara.”
33 Edo Joseph ae mainda ai de mi ge ro berari Simeon mi mai ainda daoda tesiri ingido korebé esitera. 34 Ango edo Simeon awamane embo God ategedo ainda ai, Mary de, sisina, “Imo giyo! Mai eiwa God mi matu siya esisina. Israel embomai jiwae tonemaina, edo nenei jiwae awa dedo sitaina. Edo mai eiwa God da kariwa. Embo jiwaebémi sinigambari edo awa ajiregara. 35 Awatedo, awamaneda kotembari onjigarida awa mai ami arapada piari idegaina. Edo daedo do itoda memesi awa kasiwo be tote (2) vegarimi imo gomoda gaiari ango aina.
36-37 Edo iji angode, peroveta eutu dao Anna awa Phanuel da gagara edo ewowo Asher da orobe. Eutu awa begogobé. Imo gagara teka iu jimundo duberi 7 itae esiri ainda iu betesiri rori isite duberi 84 doturisina.* duberi 84 doturisina. Ove Kotopu da atopatari nenei kotembedo era, Anna awa duberi 84 akuta. Ata atopatari neneinda awa imo duberi 105 ango isiri Mary ae Joseph de Yesu kundo torido eutu awa taputera. Edo eutu emi Judah embomainda oro kotopu bajina dowae sipode turode veta eite benunu site God tumondebain edo esisina. 38 Edo iji dá ainde, eutu awa gundo torido Badari da yai ategari pisido, edo embomai avekave berari Jerusalem da tonembari gain sima eite isiretera awa itero mai ainda ge awa karigesisina.
39 Ango edo Mary ae Joseph de buro ro berari Badari da Aodarida orote tari isira awa itae edo, tekago egenembedo awamaneda nasi topo Nasaret yai Galili doda maunsitera. 40 Edo mai awa bajido tamo de asisi de goroba burisina, edo dubogarimi beda esisina. Daedo God da ao ari awa mai ainda yai.
Mai Yesu Judah embomainda oro kotopu bajinada doda isira.
41 Edo duberi berari Yesu da aimamo Jerusalem maundo esitera, God da Darutegari Bondo da.† God da Darutegari Bondo da ge jirari Exodus 12—13 isira. 42 Edo iji angode Yesu duberi 12 esiri, awamane Jerusalem visido maunsitera, Judah embomainda bondo orote matu tari isira angoda. 43 Edo bondo itae esiri awamane nasida egenembetero mai Yesu awa Jerusalem isiri doturitera. Ata Joseph ae ainda ai demi mai nongo eiri awa gae maunsitera. 44 Ata awamanemi “Yesu awa embomai neneinde siro edo mambari” ango kotembesitera. Iji dá ainde mauntero turo jiriri mai awa kakowa esitera awamaneda matomono de otatawo deda yai. 45 Edo awamane mai tambae, awatedo, overegedo kakowa eite Jerusalem da tekago maunsitera. 46 Ango edo iji tamonde (3) itae esiri awamane Judah embomainda oro kotopu bajinada torido do arapada mai awa taputera. Atopapasigarida doregari doda anumbedo isite ge teoro mina tedo eite isiri jisimi gositera. 47 Edo embomai avekave berari ainda itera ami Yesu da jirogari edo mina tari dave awa gido korebakore esitera. 48 Ango edo, aimamo mai awa gido korebé esitera. Edo ai mi sisina, “Mai nato, wasiri engo awa nongaintedo natokare yai etesi? Giyo! Na ae mamo de do memeside imo kakowa ero jirira.”
49 Edo Yesu mi awamanede ge mina sisina, “Ro awa embo na kakowa ewo jiriri? Na Mamo natoda oro doda itena awa imomane gaera?” 50 Ata mai ami ge ro siri awa awamaneda yai bé arapa ae esisina.
51 Ango edo imo ae aimamo deda wotedo Nasaret maunsitera, ainda aimamo kera edo esisina. Awarata, ainda ai wasiri ro berari idegesira awa ruvegae ainda doda piedo sima esisina. 52 Edo Yesu dubogari de tamo de inono babojisina, edo ainda dave ari God ae embomai deda yai daedo.
*2:1 Caesar awa Rome da Gisijiari Bajinabé da dao nei.
†2:5 jimbarate gerari. Judah embomainda tari awa ambo ambo edo esitera eiwa, edo avekavemi jimain jipapa era gido, gisibé awa awamaneda piari tembarida ge jirara. Edo gido gerari o jimbari ainda amboda evekara ain jipapa ara, ove gaiedo imo doturena ango taina. Ango tedo gerari o jimbari itae aina.
‡2:8 wo sipu awa wo embomi iji matuda edo gundo boroko sima edo era. Embomai wo sipuda tu gongo edo era edo pisi injido era, awatedo, embo jiwae wo sipu jipapa edo era. Aindabé wo sipuda goroba awa bajinabé ae, edo awamaneda gitopo wo isima edo era awa, wo sima ari embo dave awa ainda sipumane iji berari sima davebé eite dedegedo eira.
§2:11 Keriso da moka awa ‘God da Avigari Embo’.
*2:22 Aindabé Mary awa mai jianda teka bari, Moses da Aodari da tari isira awa sima eiari deguta 40 itae ari amboda, oro kotopu bajinada aundo pirisida yai dono teiari rorou piari ainda dono God da jisida itae aina (Leviticus 12:1-8). Ove Kotopu da atopatari kotembetera awa, iji angode Mary awa donode God da jisida, Joseph Mary tujido ainda dono burisina. Awatedo, iji ainde awamane tote (2) dono teiari rorou piain maunsitera. Ata Ove Kotopu da atopatari nenei kotembetera, Joseph da dono itae, ami tepo kondade eite Mary da rorou kundo aundo daedo maunsisina. Awatedo, Luke ge awamaneda dono teiarida iji awa gagurisina.
†2:23 Badari da Aodari awa Moses da Aodarida dao nei.
‡2:23 BADARI da moka awa ‘Na awa Natopo Itari’ o Hiburu ge awa Jehovah.
2:23 Exodus 13:2, 12, 15
2:24 Leviticus 12:8
§2:25 Kondade Ari Embo awa Keriso da dao nei.
*2:36-37 duberi 84 doturisina. Ove Kotopu da atopatari nenei kotembedo era, Anna awa duberi 84 akuta. Ata atopatari neneinda awa imo duberi 105 ango isiri Mary ae Joseph de Yesu kundo torido eutu awa taputera.
†2:41 God da Darutegari Bondo da ge jirari Exodus 12—13 isira.