15
ईसु मसी मर्या-सर्याम सी पछु जीवतु हवे
1 ए भायसे ने भणस्या, हय मे तुहुंक पेहलुत खुस-खबर बताड़ो जे पेहल सी सामळी लेदला छे, तीनाक तुहुं हुकारी बी लेदला ने जेरे मां तुहुं काठा*काठा स्थिर बी छे। 2 हेरेत साहरे तुंद्रु छुटकारु बी हयु, कदी हीना खुस-खबर काजे जु मे सामळलु हेर राखु, नीते तुंद्रु भुरसु करनु फालतु हवसे।
3 हेरे वजे सी मे आखा सी पेहल तुहुंक चीत वात पुगाड़ देदु, जी मेसेक मालुम हतली की चुखला सास्तुरेन बुलेन अनसारे ईसु मसी आपणे पापे वाटे मर गुयु। 4 ने गाड़ाय गुयु, ने चुखला सास्तुरेन†चुखला सास्तुरेन पवित्रशास्त्र अनसारे तीन दाहड़ाम मरलाम सी जीवतु बी हय गुयु,✡होसे 6:2 5 ने केफा काजे तत्यार बारे काजे देखाव पड़्यु। 6 अळतेन चु पांच सोव सी अदुस भायसे काजे भेळा हतला देखाव पड़्यु, तींद्रे मां सी बेसका हय लग जीवतेला छे, बाकुन थुड़ाक सुय गुया। 7 अळतेन चु याकुप काजे देखाव पड़्यु तत्यार आखा नेवताळा काजे देखाव पड़्यु।
8 आखान पछे मेसे काजे बी देखाव पड़्यु, जे मानु अधेरला दाहड़ान पयदा हवलु। 9 काहाकी मे नेवताळा मां सी आखा सी नानलु छे, बाकुन नेवताळा कह्वायणेन लायक‡लायक योग्य बी नी हय, काहाकी मे भगवानेन मंडळी काजे बेसकु ठुक्यु मार्यु। 10 बाकुन मे जो काय बी छे, भगवानेन गीण-दया सी छे हेरु गीण-दया मार पर हयु चु फालतु नी जाय; बाकुन मे हीनु आखा सी बड़ीन मेहनत बी कर्यु, ती बी गुयो मारे भीणी सी नी हयो बाकुन भगवानेन गीण-दया सी गुयो मार पर हतलो। 11 हेरेसी चाहे मे छे, चाहे चे रवे हामु गुयो परचार करजे ने हेरे पर तुहुं भुरसु बी कर्या।
आपणु मर्या-सर्याम सी पछा जीवता हया
12 हेरेसी जत्यार की मसीन ज्य परचार करे की ईसु मरलाम सी जीवतु हय गुयु, ती तुंद्रे मायन बेसका माणसे काहा कहें, की मरलाम सी पछा जीवता हवे नी? 13 कदी मरलाम सी जीवता§मरलाम सी जीवता पुनरुत्थान नी हवे, ती मसी बी नी जीवतु हय सके; 14 ने कदी मसी मरलाम सी जीवतु नी हयु, ती हामरो परचार करनु बी फालतु छे, ने तुंद्रो ईसु पर भुरसु करनु बी फालतु छे। 15 बाकुन हामु भगवानेन बारामां लुच्चाय मेकण्या ठेर्या काहाकी हामु भगवानेन बारामां जी गवाय देदला; की हीयु मसी काजे जीवाड़ देदलु, अळतेन नी जीवतु हवतु कदी मरलाम सी जीवतु नी हवतु। 16 ने कदी मरलाम सी जीवता नी हवता, ती मसी बी नी जीवतु हवतु; 17 ने कदी मसी मरलाम सी जीवतु नी हवतु, ती तुंद्रो भुरसु करनु फालतु छे, ने तुहुं हय लग आपणा पाप मां भरायला छे। 18 बाकुन जे ईसु मसी मां सुय गुया, चे बी खत्तम हय गुया। 19 कदी हामु सीरप ईना जीवन मां ईसु मसी मां सी आस राखजे ती हामु आखा माणसे सी जादास दुख झेल्जे।
20 बाकुन छाचलीन मसी मरलाम सी जीवतु हय गुयु ने जे सुय गुया तींद्रे मां चु पेहलुत फळ हयु 21 काहाकी जत्यार माणसेण साहरे मरनु आयो, ती माणसेन साहरे मरलाम सी पछा जीवता हया 22 ने जसों आदम मां आखा मरे, ती असात मसी मां बी आखा जीवता हय गुया, 23 बाकुन एकेक जणु आपणी-आपणी वारी मां सी, पेहलु फळ मसी, पछेन मसीन आवणे पर हेरा माणसे जीवाड़ी जासे। 24 हेरे पछेन खत्तम हवसे। हीने टेमे चु आखी हकदारी, ने आखा हक, ताकत खत्तम करीन राज काजे भगवान बासेन हातेम सुप देसे।✡दानीयल 2:44 25 काहाकी जत्यार लग चु आपणा दुस्मन काजे आपणा पाय तळे नी लावे, तत्यार लग हेरो राज करनु जरुड़ी छे।✡भजन सहीता 110:1 26 आखा सी आकरीम दुस्मन चु खत्तम कर देसे, च मरलु छे। 27 काहाकी “भगवान हेरे पाय तळे कर लेदु” बाकुन जत्यार चु कवे की आखो काय हेरे हक मां कर लेदलो छे उजेंतो छे, ज आखो काय हेरा हक मां कर देदु, आपसुत आन्गे रयु।✡भजन सहीता 8:6 28 ने जत्यार आखो काय हेरा हक मां हय जासे ती आपसु बी हेरा हक मां हय जासे ज आखो काय हेरा हक मां कर देदु काहाकी आखा मां भगवानुत आखो काय छे।
29 नीते जे माणसे मरला वाटे बपतीस्मा लेय चे काय करसे? कदी मरलाम सी जीवता नी हय ती पछेन काहा हींद्रे वाटे बपतीस्मा लेदु? 30 ने हामु बी काहा आखी टेमे तकलीप मां पड़ता रवजे? 31 ए भायसे ने भणस्या, मेसे हीनी मटायन सगुन तसों जे हामरा ईसु मसी मां ने मालीक मे तुंद्रे बारामां कव की मे दाहड़ीन मरो। 32 कदी मे माणसेन रीत पर ईफीसुस मां झाड़का ढुरे सी लड़ाय करतु ती मेसेक काय फायदु हवतु? कदी मरलाम सी जीवता नी हवता, “ती आवु, खाजे ने पीजे काहाकी काल ते मरी जासुन।”✡यसाया 22:13
33 धुकु मां खावु, “भुंडीत संगात वारलु चाल-चलन काजे बीगाड़ देय।” 34 धरम वाटे जागी जावु ने पाप मां करु; काहाकी काय माणसे असात छे जे भगवान काजे नी जाणे। मे तुहुं काजे सरमाड़ने करीन ज कव।
पछु जीवतु हवणे डील
35 हय कुय ज कवसे, “मरलाम सी जीवता काहनी रीत सी हय जाय, ने काहला डील साते आवे?” 36 ए डेड़-अकल्या ज काय तु एरे, जत्यार लग च नी मरे जीवतो नी हवे 37 ने ज तु एरे, च डील नी हय ज पयदा हवणे वाळु छे, बाकुन सीरप वारलु दाणा छे, चाहे गहुंन रवे चाहे काहलाक अळी अनाजेन हवे 38 बाकुन भगवान आपणी मरजीन अनसारे हीनाक डील आपे, ने एकेक बीज काजे खास करीन डील आपे।
39 आखो डील एक तसों नी हय; माणसेन डील आन्गे छे, ने ढुरेन डील आन्गे छे; ने चिरलान डील आन्गे छे; ने माछान डील आन्गे छे।
40 सरगेन डील छे ने कळी सी पयदा हवणु वाळु डील बी छे। बाकुन सरगेन डीलेन सेक-सींगार आन्गे छे, ने कळी मां वाळु आन्गे छे। 41 दाहड़ान उजाळो आन्गे छे, चांदेन उजाळो आन्गे छे, तारान उजाळो आन्गे छे, काहाकी एक तारा सी दीसरा तारा मां वीजाळो फरक छे।
42 मरलाम सी जीवतो हवणेन बी असोत छे। डील खत्तम हवणेन रीत मां एराय जाय ने कदी खत्तम नी हवणे वाळा सीका मां जीवतो हय जाय। 43 चु आव-भाव नी हवे ने एराय जाय, ने तेरे साते जीवतु हय जाय; लुला साते एराय जाय, ताकत वाळा साते मरलाम सी जीवता हय जाय 44 माणसेन जीवणु मरनु धड़ काजे धरती मां एराय जाय, ने आत्मा मां भरायला डील मरलाम सी जीवतो हय जाय; असो की धरती पर वाळा डील छे ती आत्मा मां भरायला डील बी छे। 45 असोत लिखलो बी छे, की “पेहलो माणुस, मतलब आदम जीवतेलु जीव बण्यु” आकरी आदम, जीवेक आपण्यु आत्मा बण्यु। 46 बाकुन पेहेल आत्मा मां भरायला नी हतलु, बाकुन धरती पर वाळा डीलेन सीकु हतलु, हेरे पछेन आत्मा मां भरायला हया 47 पेहलो माणुस कळी सी मतलब धुळान हतलो; दीसरो माणुस सरगेन छे।✡युहन्ना 3:31 48 जसु चु धुळान हतलु, असात चे बी छे, जे धुळान छे; ने जसु चु सरगेन छे, असात चे बी छे जे सरगेन छे। 49 ने जसा हामु हेरे सीका काजे बदल्या जो धुळान हतलो असात हीना सरगेन सीका काजे बी बदलसुन।✡1 युहन्ना 3:2
50 ए भायसे ने भणस्या, मे गुयो कह्वो की सीकार ने लुही भगवानेन राजेन हकदारी नी हय सके, ने नीते धरती पर वाळा सरन्या डील, हकदार्यु हय सके। 51 सामळु, मे तुंद्रे सी सातायली वात कय सके, हामु आखा नी मरजे, बाकुन आखा बदली जासुन, 52 ने जे पापण्या पटकारता वार मां, आकरी फेप्यो फुक्से ती हवसे। काहाकी फेप्यो फुक्से ने मरलाम सी जीवता जलमेन तसा उठाय जासे, ने हामु बदली जासुन। 53 काहाकी जरुड़ी छे की ज्य खत्तमेन हवणेन डील कदी नी खत्तम हवणेन काजे पेहरी लेसे, ने ज्य मरलो डील जलमेन डील काजे पेहरी लेसे। 54 ने जत्यार ज्य खत्तम हवणेन कदी नी खत्तम हवणेन काजे पेहरी लेसे, ने ज्य मरलो जलम काजे पेहरी लेय, ने तत्यार चो बुल जो लिखलो छे पुरो हय जासे: “ज्य ने मरण काजे गीळ गुयो।”✡यसाया 25:8
55 “ए मरनु, तारी ज्य काहा रय?
ए मरनु, तारु टच काहा रयु?”✡यसाया 13:14
56 मरनेन घाव पाप छे, ने पापेन ताकत कायदु छे। 57 बाकुन भगवान काजे तु बेसकु वारु छे करीन कह्वो जो हामरे मालीक ईसु मसीन साहरे हामुक जीत जड़े।
58 हेरेसी ए मारा लाटेक्ला भायसे, काठा ने टणका रवु, ने मालीकेन काम मां जलम बड़ता जावु, काहाकी ज्य जाणु की तुंद्री महनोत मालीक मां फालतु नी हय।✡गलाती 6:9