1 जी वात संय छे की जु बी नी पुडारी बणन्‌ने हेर करे ती चु भलो काम करनेन हेर करे। 2 डाहलु असली जीवाय जीवण्‌यु हवणु चाहजे तेरी जीवाय मां काय बी वाक नी हय पुडारी एकुत लाडीवाळु हवणु चाहजे ने तेरी लाडी तेरे पर नी अदराय करे असी जीवाय जीवण्‌यु हवणु चाहजे; दसो पेट असो करन्‌यु नी बाकुन आपसान जीव काजे कब्‌जाम राखीन दीसरा साते वारु वेहवार राखण्‌यु हवणु चाहजे चु असु माणुस हवणु चाहजे तेरी दीसरा ईज्‌जत करता हय ने चु आपसान घर आवण्‌यान आव-भाव करीन तींद्‌री खातरी करने वाळु हवणु चाहजे, ने वाळाक खरली वात हुनर सी सीकाड़ने वाळु हवणु चाहजे। 3 नी पुडारी दारु पीणेवाळु ते नी लड़ाय करने वाळु नी हवणु बाकुन चु भुळु रहणु चाहजे, ने नी लड़ाय ने नी धनेन लालच्‌यु हवणु चाहजे। 4 चु आपसान घरनाक अतरुत वारु अगवाय करन्‌यु, ने तेरा पुर्‌या-पारी जलम तेरु अबरु राखता हय, ने आखी वातेम तेरु हुकुम मानीन तेरा कब्‌जाम रहता हय। 5 कदी तीनाक आपसा घरन्‌यान वारु अगवाय ने राखवाळी करता नी आवड़े, ती चु भगवानेन मंडळीन आखा माणसेन राखवाळी कसु करसे? 6 पछेन ज की ईसु पर भुरसु करला नवला चेलाक, नी ते चु असु कय्‌न मटाय करने बाजी जासे की, मे मामार पुडारी बण गुयु; ने असु करीन चु भुतड़ान तसु मटाय करीन नीयावेन डंड हात कर लेसे। असो नी हवणु चाहजे। 7 ने बाहार वाळा माणसे बी तेरी वाक नी-नीकाळनु चाहजे, असो नी हवे की भुतड़ु तीनाक तेरा गुनान फांदेम फांद लेसे।

8 असात पावर्‌या बी वीनगुनाळी जीवाय जीवीन नावसाद्‌या हवणु चाहजे। चे दारुड़्‌या नी हवणु चाहजे, ने काहने बी भात्‌ये हायाळ्‌ळा नी हवणु चाहजे। 9 बाकुन भुरसु करीन सातायली वात काजे चु चुखा मन करीन राखणु। 10 खास पावर्‌यु बणावणे सी पेहेल पारखीन देखणु चाहजे तत्‌यार कदी नी-गुनावाळा नीकळे ती पावर्‌यान काम करनु चाहजे। 11 असात बायरा बी चुरी-चुगली करने वाळा नी हवणु चाहजे, बाकुन आखी वात सामळीन, ने वात मां भुरसु करे असा हवणु चाहजे। 12 पावर्‌यु एकुत लाडी वाळु हवणु चाहजे ने आपसान पुर्‌या-पारीन ने आपसान आखा घरन्‌यान वारु रीते अगवाय करन्‌या ने राखवाळी करन्‌या हवणु चाहजे। 13 काहाकी जु पावर्‌यान काम वारु रीते सी कर सके, चु तेरे वाटे वारलु नाव वाळा ने तीना भुरसा मां जु मसी ईसु पर जु तींद्‌रु भुरसु छे, तीना भुरसान बारामां दीसराक कह्‌णे मां बी तीनुक अळी जादा हिम्‌मत जड़ जासे।

14 मे तारे धड़े छाटुस आवणेन आस राख रयु। पर बी जी वात तुसेक तेरेमां लिखो की 15 कदी मेसेक आवणे मां वार लाग जाय, ती तु जाण ले की भगवानेन घरना मां जु जीवतेलु भगवानेन मंडळी छे, ने चु छाचीन *सत्य कां खंबाखुटु ने नेवु छे कसों वेहवार करनु चाहजे। 16 तीनी छाचाय पर टेकीन आपणु भगवानेन भक्‌ती कर रया ची छाचाय पेहेल सातायली हतली बाकुन भगवान हय तीनी छाचाय काजे उजेंतु करलु छे हेरेम काय बी सक नी हय जी छाचाय बेसकी उंडी छे ने असी छे: