1 तेबी मटाय करनु मारे वाटे वारु नी, तेबी करनु पड़े; बाकुन मे मालीकेन आपला सपना ने वीजाळान*वीजाळान प्रकशनों वात वीच्‌यार करीस। 2 मे ईसु मसी मां एक माणुस काजे जाणो, चवदा साल हया की नी जाणे डील समोत नी जाणे डील पाखुर, भगवान जाणे, की असु माणुस तीसरा सरग लग उठाय गुयलु छे। 3 मे असा माणुस काजे जाणो जु नी जाणे डील समोत नी जाणे डील पाखुर, भगवानुत जाणे 4 की सरग लुक पर उठाय ली गुयु, ने असी वात सामळ्‌या जी कवणेन नी हय; ने जींद्‌रा मुंहडा पर लावणु माणुस काजे सय नी हय। 5 असा माणुस पर ते मे मटाय करीस, बाकुन आपणे पर आपणी लुल्‌गाय काजे छुड़ीन, आपणे बारामां मटाय नी करो। 6 काहाकी कदी मे मटाय करने चाहो बी ती डेड़ अकल्‌यु नी हवो, काहाकी छाचलीन कह्‌वो; ती बी हुबु हय जाम, असो नी हवे की असो नी हवे की असा कुय मेसे देखला छे, नीते मारे सी सामळे, मेसे हेरसी बड़ीन समजे।

7 हेरेसी की मे वीजाळान अदती सी फुगी नी जाम, मारा डील मां काटु भाक गुयु मतलब भुतड़ान एक काहवाळ्‌यु की मारे घुधावे काहाकी मे फुगी नी जाम। 8 हेरे बारामां मे मालीक सी तीन कावा लीलघायु, की मारे सी गुयो छेटो हय जाय। 9 ने चु मार सी कह्‌यु, “मारा गीण-दया तारे वाटे बेसकी छे।” काहाकी मारी ताकत लुल्‌गाय मां पुरी हवे। हेरेसी मे मटी खुसी सी आपणी लुल्‌गाय पर मटाय करीस, की मसीन ताकत मारे पर साहळु करती रवे। 10 हेरे वजे सी मे मसी वाटे, ने लुलाय, मां ने कुहराय मां, ने गरीबी†गरीबी दरिद्रता मां, ने झगड़ा मां, ने गरा मां, खुसी छे; काहाकी जत्‌यार मे लुलु हतलु, तेबी ताकत वाळु हवो।

11 मे डेड़ अकल्‌यु ते बण्‌यु, बाकुन तुहुंत मेसे गुयो करने वाटे लाचार कर्‌या। तुहुं ते मारी बड़ाय करनु चाहजे, काहाकी कदी मे काय बी नी, ती बी हींद्‌रे मां सी मटा सी मटा नेवताळा सी काहली बी वात मां कम नी हय। 12 नेवताळान आसार बी तुंद्‌रे ईचमां आखी भातीन सेण समोत सहलाणी, ने मटा-मटा काम असा कामेन ताकुतेन काम देखाड़ला छे। 13 तुहुं काहली वात मां दीसरी मंडळी मां सी थुड़ाक हतला, हींद्‌रे मां अतरोत की मे तुंद्‌रे पर आपणु भार नी नाखे जी मारे सी भुल हय गुय तीती कुहराय काजे मेसे माफ करु।

14 देखु, मे तीसरी कावा तुंद्‌रे धड़े आवणे तीयार छे, ने मे तुंद्‌रु पर भार नी राखो; काहाकी मे तुंद्‌रो धन नी, बाकुन तुहुंत काजे चाहो। काहाकी पुर्‌या काजे आयस्‌या बास्‌या वाटे धन भेळो नी करनु चाहजे, बाकुन आयस्‌या बास्‌या काजे पुर्‌या वाटे धन भेळो करनु चाहजे। 15 मे तुंद्‌री आत्‌मा वाटे बेसकी खुसी सी खरचु हय जायस, बाकुन आपसात बी खरचु हय जासे काय जतरा बड़ीन मे तुंद्‌रे सी परम राखो, अतरा कम हयन तुंद्‌रे सी परम राखसु? 16 असा हय सके, की मे तुंद्‌रे पर बुज नी नाखो, बाकुन चतराय सी तुहुंक धुकु दीन फसाड़ लेदु। 17 बाकुन, जीनुक मे तुंद्‌रे धड़े मकल्‌यु, काय हींद्‌रे मां सी काहालाकेन साहरे मे जुर करीन तुंद्‌रे सी काय ली देदा? 18 मे तीतुस काजे लीलघाय्‌न ने समजाड़ीन हेरे साते हीना भाय काजे मकल्‌या, ती काय तीतुस जुर करीन तुंद्‌रे सी काय लेदु? काय हामु एक आत्‌मान चाल मां नी चालजे? काय एकुत वाट पर नी चालजे? 19 तुहुं हय लग समजी र्‌या हसे की हामु तुंद्‌रे अगळ जपाप दी रया, हामु ते भगवान काजे आय रवलु जाणीन ईसु मसी मां बुलजे, ने ए लाटेक्‌ला, आखी वात तुंद्‌रे वाटे अदुस हवणे करीन कवजे। 20 काहाकी मेसे धाक छे, काय असो नी हवे, की मे आवीन जसु चाहो, असु तुहुंक नी जड़ो; ने मेसे बी जसा नी चाहजे असात जड़ो, ने तुहुं तुंद्‌रे मां झगड़ा हय र्‌या, जळन कर र्‌या, रीसवाय र्‌या, आपसान ने भलो हवणेन वीच्‌यार कर्‌या, दीसरान वाक नीकाळ र्‌या, चुगली कर र्‌या, मटाय कर र्‌या, ने बीरजु पाड़ी र्‌या। 21 ने कांखुर मायन असो नी हवे की जत्‌यार मे पछु आवीस, ने मारु भगवान मारी नाव-बद्‌दी करे ने मेसे बेसका वाटे अळी दुख करनु पड़े, जे पेहल पाप करला हतला, ने भुंड्‌ला काम, ने छीनाळो, ने लुच्‌चाय सी, जो चे कर्‌या, मन नी फीराया।