पतरस की दूसरी पत्री
पतरसेन दुसरी चिट्ठी
2 पतरसेन बारामां
2 पतरसेन चिट्ठी कह्वे की ज्य नेवताळा पतरसेन साहरे लिखी गुयलो, आज बेसका सास्तुर लिखण्या ईनाक छाचो नी माने। असा मानु कुय दीसरु ईनाक पतरस भीणी सी लिखलु हय। लिखणे वाळु कह्वे की चु ईसुन जीवनेन ने खास रुप सी चेहरु बदलनेन 1:17-18 हतलु। कदी पतरस चिट्ठी लिखलु, ती मान लेवु की हीयु रोम मां मसीन पयदा हवणेन सांठ ने पांच-सांठ ने नव सालेन ईचमां मरने सी पेहल लिखलु हय। पतरस ईनाक आपणी दीसरी चिट्ठी बी कह्वे 3:1 ज्य 1 पतरसेन चिट्ठीन पछे लिखणेन तारीक राखे। चे आखा ईसु पर भुरसु करन्या काजे देखाड़े।
पतरस जी चिट्ठी ईसु पर भुरसु करन्या काजे वारलु जीवन जीवणे वाटे हिम्मत बांदाड़ने करीन ने झुठी वात सीकाड़न्यान घुणी मानु चेतावणी देणे वाटे लिखलु। 2 हीयु हीनुक हीनु माणसेन नीरास करने वाटे हिम्मत बांदाड़्यु जे कय र्या की ईसु काजे पछु आवणे मां बेसकी टेम लाग रय। हेरे बजाय हीयु बताड़्यु की भगवान ढील्लु नी हय बाकुन चाहे की हर एक बचाड़ी जाय। 2 पतरस 3:8-9; ज्य एक वारलु जीवन जीवणेन एक मतलब छे। 3:14
बाहरती वात
1. पतरस हेरु उळखाण देय ने आपणा भन्ने वाळा काजे देखाड़्यु। 1:1-2
2. अळतेन चु हीनुक वारलु जीवन जीवणे हेर देवाड़े काहाकी भगवान हामुक सफल कर्यु। 1:3-21
3. हेरे पछेन चु झुठ सीकाड़न्यान वीरुद चेतावणी देय ने कह्वे की आकरी मां झुट सीकाड़न्यान काय हसे। 2:1-22
4. हेरे पछेन पतरस ईसु पर भुरसु करन्या काजे ईसुन दीसरी कावा आवणेन तीयारी वाटे वारु जीवन जीवणे वाटे हिम्मत बांदाड़ने करतु जाय पुरो करे। 3:1-17
1
ईसु आपणु काजे ज चाहजे च आपलु छे
1 सीमोन पतरस भीणी सी, जु ईसु मसीन पावर्यु ने नेवताळु छे, मे जी चिट्ठी तुहुं आखा काजे लिख रयु,
तीनुक हामु नेवताळान तसुत ईसु पर भुरसु करने सी महंग्लु वाटु जड़लु छे। आपणु भगवान ने ईसु मसी जु बचाड़न्यु छे, चु आपसा धरमेन अनसारे चु वाटु आपणुक आपलु छे।
2 तुहुंक आपणा भगवान ने मालीक ईसु मसीन उवखाणेन साहरे गीण-दया ने सुक-सांती तुंद्रे मां बेसकी जादा जड़ती रवे।
बुलावु ने नेवाड़नेन
3 काहाकी सरगेन ताकत ने आखो काय जो जीवन ने भक्ती सी लागाव राखे, हामुक हेरीत उवखाणेन साहरे आपला छे, भगवान हेरीत सेक-सींगार ने वारलु कामेन अनसारे बुलाय गुयला छे। 4 तींद्रे साहरे हयु हामुक बेसको जरुड़ी ने बेसकु मटु वायदु आपलु छे। काहाकी हींद्रे साहरे तुहुं हीनी सड़नु सी छुटीन जे कळी मां भुंडी लालुच सी हवे, सरगेन साजल्या बणी जावु। 5 हेरे वजे सी तुहुं आखी भातीन कुसीस करीन, आपणा भुरसा पर वारलु कामे, ने वारलु काम पर समज, 6 ने समज पर खुद पर भुरसु, भुरसा पर दमधरीन, ने दमधरीन पर भक्ती। 7 ने खरली भक्ती भेळा भाय-बहण्स्यान, नातो अदाड़ु ने तेरे भेळा भाय-बहण्यान मां परम अदाड़ता जावु।
8 काहाकी कदी जी वात तुंद्रे मां हीनी टेम मां रवे, ने अदतीत जाय, ती तुहुं हामरा मालीक ईसु मसीन उळखाण मां बेकार ने रवलो नी हवणी देय। 9 काहाकी जेरेमां जी वात नी, हय चु आंधळु छे, ने धुंधळो देखे, ने आपणा पछला पाप सी चुखो हवणे भुली गुयु।
10 हीनी वजे सी ए भायसे आपणे बुलाय जाणेन, ने नेवाड़ लेदा जाणेन पुरावु करनेन भली भाती कुसीस करता जावु, काहाकी कदी असा करसु, ती कदी बी वाटे सी नी भुलवायु। 11 बाकुन हीनी रीत सी तुहुं हामरा मालीक ने छुटकारु आपण्या ईसु मसीन जलमेन राज मां वारु ईज्जतेन साते जाती रवसु।
पतरसेन आकरी घड़ी
12 हेरेसी कदी तुहुं जी वात जाणु काय, ने जो छाचलो बुल तुहुंक जड़लो छे, हेरेमां बणी रवसु, तेबी मे तुहुंक ईनी वातेन हेर देवाड़ने करीन जलम तीयार रवीस। 13 मे जो आपणे वाटे सय समजो, की जत्यार लग मे ईना पड़ावा मां छे, तत्यार लग तुहुंक हेर देवाड़ी-देवाड़ीन अगा बड़ावतु रवीस। 14 काहाकी मे गुयो जाणु, की मारा पड़ावा काजे उदारनेन टेम छाटात आवणे वाळा छे, जसा की हामरा मालीक ईसु मसी, मेसे काजे उजेंतु कर्यु। 15 हेरेसी मे असा तावणी करीस, की दुनीयाक छुड़ीन जाणेन पछे बी तुहुं ईनु आखा वात काजे जलम हेर करसे।
मसीन सेक-सींगारेन डुळा अगळ
16 काहाकी जत्यार हामु तुहुंक आपणे मालीक ईसु मसीन ताकत काजे, ने आवणे वाळा दाहड़ान खबर आपलु, ती चु चालाकी सी बणावली दाखलान साहरु नी लेदा बाकुन हामु आपसात हेरे सेक काजे देखला हतला। 17 काहाकी हीयु भगवान बास सी ईज्जत, ने सेक-सींगार हात करे ने हीना सरगेन सेक-सींगार सी जी अवाज आवी, “जु मारु लाटेक्लु पुर्यु छे, जेरेसी मे खुस छे।”✡भजन सहीता 2:7; यसाया 42:1 18 तत्यार हामु हेरे साते चुखला बयड़ा पर हतला ने सरग सी जी अवाज आवतेली सामळाय।
19 हामरे धड़े जे भगवानेन अघी सी आवणे वाळी वात देखान्यान बुल छे, चु ईनु हालोत सी काठा ठेहर्या तुहुं जो वारु करु जे ज्य सामळीन हीना पर हेर करु, की चु एक दिवु छे जे आंदारलान जागा मां हीनी टेम लग उजाळो देतो रवसे जत्यार लग की दाहड़ान वीजाळो नी छुड़े ने वीजाळ्यु तारु तुंद्रे मन मां नी चमकी पड़े। 20 बाकुन आखा सी पेहल गुयो जाणी लेवु की चुखला सास्तुरेन कुय बी आवणे वाळी वात भगवानेन अघी सी आवणे वाळी वात देखान्या बी खुद आपणे वीच्यार सी नी कह्वे। 21 काहाकी कुय बी भगवानेन अघी सी आवणे वाळी वात देखाड़ने वाळा बी आपणी मरजी सी कदी नी कह्वे बाकुन भक्त जणा चुखली-आत्मान साहरे उभरीन जाय्न भगवानेन भीणी सी बुल तेला।
✡1:17 भजन सहीता 2:7; यसाया 42:1