प्रेरितों के काम
नेवताळान काम
नेवताळान कामेन बारामां
ईसुन नेवताळान कामेन कितापेन मंडळीन सुरुवातेन काहनी छे, ने जी यरुसलेम सी यहुदीया, सामरीया ने तेरे अघे लग कसी पुग गुय, जसु ईसु हेरा चेला काजे सरगे जाणे सी पेहेलुत बताड़लु 1:8 ईनी किताप काजे लुकु लिखलु, जु लुकान अनसारे खुस-खबर बी लिखलु। चु एक डाक्‌टर हतलु, ने जसों हयो तसीत वात काजे लिखणे करीन समळीन लिखतेलु, चु हेरा खुस-खबर ने ईसुन नेवताळान कामेन किताप तीना थीयोफीलुस काजे बताड़्‌यु, चु युनानी बुलीन हतलु, बाकुन कितापेन हय सके की भुरसु करने वाळा माणसे वाटे बी हतलो ने तेरे मां युनानी ने यहुदी दुयु माणसे भेळा हतला। 1:1
ईसुन नेवताळान काम हय सके मसीन पयदा हवणेन 60-64 सालेन ईचमां लिखाय गुयलो, काहाकी किताप जेल जाणे सी लागाड़ीन पोलुसेन जेल मां सी पछु छुटणेन पेहलुत खत्‌तम हवे। लुकु बी नेवताळा पोलुस साते जाणेन टेमे ने हय सके की अन्‌तकीयान सहर मां नेवताळान कामेन किताप लिखलु हसे। नेवताळा लुकान खुस-खबर काजे चालु राखला छे, ने ईसुन सरगे मां जाणेन साते सुरु हवे। ईनी किताप काजे लिखणेन मतलब लुकान पेहल लिखली खुस-खबरेन तसोत छे। लुकु थीयोफीलुस काजे चाहतेलु, ने हेर भेळु भुरसु करने वाळा मसी माणसेन गिन्‌ती बड़ने सी मालुम पड़े की तीनुक काय सीकाड़ी गुयला, तेरेमां ईसुन जीवाय ने भुरसु करने वाळा मसी माणसेन धरमेन परचारेन एक वारलु किताप लिख्‌यु।
नेवताळान कामेन किताप हामरे वाटे पेहेल वाळी मंडळीन दाखलु बताड़े, ने ईसु मां भुरसु करीन कसा जीवणु करीन देखाड़े। नेवताळान दाखलु हामु काजे देखाड़े की दीसरा काजे खुस-खबर परचार फेलावणे मां चुखली-आत्‌मान ताकत पर कसु भुरसु करनु चाहजे।
बाहरती वात
1. पेहेल चुखली-आत्‌मा चेला पर आवे ने मंडळी बेसकी हवती जाय। 1:1—8:1
2. पछेन मंडळी काजे एला पाड़े ने यरुसलेमेन बाहर फेलतो जाय। 8:2—12:23
3. ने पछेन पोलुस आपसान पेहेली सेवान चाल पर जाय। 12:24—14:28
4. अळी सभा यरुसलेम मां बठक करीन असा वीच्‌यार करे की नवला भुरसु करने वाळा माणसेन काय जरुवत छे। 15:1-35
5. अळतेन अळी पोलुस हेरी दीसरी सेवान चाल पर जाय। 15:36—18:22
6. पछेन अळी पोलुस हेरी तीसरी सेवान चाल पर जाय। 18:23—20:38
7. तत्‌यार यरुसलेम मां पोलुस काजे धराय जाय। 21—26
8. आकरी मां हीनाक रोम मां मकली देय। 27—28
1
लुकान साहरे लिखली दीसरी कितापेन बारामां
थीयुफीलुस मारु लाटेक्‌लु! मे मारी पेहली कितापेन तीनुक आखा कामेन बारामां लिखलु छे, च ईसु सुरु कर्‌यु ने आयन सीकाड़तु रयु। ने जीने दाहड़े लग सरग मां नी हाकलायु तेर सी पेहले दाहड़े लग ईसु चुखली-आत्‌मा सी आपसान नेवाड़ला नेवताळा काजे जी वात सीकाड़तु रयु। ने ईसु कुरुस पर दुख हाकलीन मर गुयु ने मर्‌या-सर्‌याम सी पछु जीवतु हय्‌न आपसा नेवताळाक बेसका पुरावा सी देखाव पड़्‌यु की चु जीवतेलु छे। असुत चु चाळीस दाहड़ा लग तीनुक देखाव पड़तु रयु, ने तींद्‌रे पुठ्‌ये भगवानेन राजेन बारामां वात करतु रयु। ने चु तीनुक भेळु हय्‌न तीनुक हुकुम आप्‌यु की, “बास जु वायदु करलु छे चु वायदु पुरु हवणे लग तुहुं यरुसलेम सहर सी घुण जावु, ने तुहुं चु वायदु पुरु हवणे लग वाट देखता रवजु। मे तुहुं काजे तीना वायदान बारामां देखाड़ देदलु छे। काहाकी युहन्‌‌‌नु ते पाणी सी बपतीस्‌मा देदु, बाकुन थुड़ाक दाहड़ान पछेन तुहुं चुखली-आत्‌मा मां बपतीस्‌मा लेसु।”
ईसुन सरगे हाकलायणु
चे नेवताळा बयड़े भेळा हय्‌न ईसु सी पुछ्‌या, “ए मालीक, काय तु ईनेत टेमे ईस्‌रायल देसेन राज काजे बदली देसी काय?” ईसु तीनुक कह्‌यु, “तीनी टेम काजे जाणनेन तुंद्‌रो काम नी हय तीनाक भगवान खुद आपसा हक सी ठहरावलु छे। बाकुन जत्‌यार चुखली-आत्‌मा तुंद्‌रे पर उतरसे, ती तुहुं ताकत हात करसु; ने तुहुं यरुसलेम सहर ने आखा यहुदीया जीलाम, ने सामर्‌या सहरेम ने धरतीन ईनी धड़े सी पली धड़े लग मारा गवा बणसु।” ज कय देदु ने अळी ईसु तींद्‌रे देखते-देखते उपर सरगे मां हाकलाय गुयु, ने वादळो तीनाक ढाक लेदो।
10 ईसुक जातलु देखीन चेला सरगे भीणी एक हेट्‌या देख रवला, तत्‌यार धवळा पुथल्‌या पेहरला दुय अदमी तींद्‌रे धड़े आवीन उबा हय गुया, 11 ने तीनुक कह्‌या, “ए गलील मां रहण्‌या माणसे, तुहुं काहा उबा हय्‌न सरगे भीणी देख रया? हीयुत ईसु, जु तुंद्‌रे ईचमां सी सरगे मां हाकलाय गुयलु छे, ईनेत रीते अळी पछु आवसे, जसा तुहुं हीनाक जातलु देखला छे।”
यहुदा ईसकारीयातीन जागे मत्‌‌तीयास काजे नेवाड़नु
12 तत्‌यार चेला जेतुन नावेन बयड़े सी यरुसलेम पछा आया, चु बयड़ु यरुसलेम सहर सी धड़ेत एक कीलुमीटर लांबे हतलु। 13 जत्‌यार चे पुगीन घरेन उपरी कमरा पर गुया, जाहां चे थुबी रवला, चे पतरस ने, युहन्‌‌‌नु ने, याकुप ने, अन्‌दीरीयास ने, फीलीप्‌पुस ने, थोमास ने, बरतुल्‌मे ने, मत्‌‌ती ने हलफाईन पुर्‌यु याकुप ने सीमोन ने, याकुपेन पुर्‌यु यहुदा चां हतला। 14 हींद्‌रे पुठ्‌ये थुड़ाक बायरा ने ईसुन माय मरीयम ने, ईसुन भाय बी हतलु। चे आखा एक मन हय्‌न दुवा करने बाजी रवला।
15 थुड़ाक दाहड़ा पछेन पतरस ने भुरसु करने वाळा भायसेन मतलब एक सोव वीसेक जणान टुळा मां पतरस उबु हय्‌न कवणे लाग्‌यु। 16 “ए भायस्‌यो,” चुखला सास्‌तुर मां चुखली-आत्‌मा दावुदेन मुंहडा सी ज काय यहुदान बारामां पेहेल सीत कवलु हतलु, ची वात पुरी हवणुत हतलो। चु यहुदा, ईसुक धरन्‌यान अगवाय करन्‌यु हतलु। 17 काहाकी यहुदा ते आपणात टुळा मायन हतलु ने हेरु आपणी सेवान काम मां हीस्‌सु बन्‌लु।
18 चु पापेन कमाय सी एक खेत मुल लेदु, ने चु तीना खेतेन झाड़के जाय्‌न टांगाय गुयु, ने मुंहडान भुरसे पड़्‌यु, तेरो पेट फाट गुयो, ने तेरा आखा आतड़ा बाहर नीकळी गुया। 19 जी वात यरुसलेम सहर मां आखा रवण्‌या काजे पतु हय गुयु, तीना खेतेन नाव हकळदमा मतलब लुहीन खेत पड़ गुयो।
20 भजनेन किताप मां बी लिखलो छे की,
तेरो घर उजड़ी जाणु चाहे ने;
तेरेमां रहण्‌या एक बी नी बचणु चाहजे। ने तीना माणसेन,
सेवा कामेन आवजी काहनु दीसरु ली लेय।
21-22 तेरेमां ज जरुड़ी छे की जत्‌यार मालीक ईसु हामरे ईचमां हतलु तत्‌यार जे माणसे जलम हामरा हतला, तींद्‌रेम सी काहनाक एक काजे नेवाड़े। मतलब तीनी टेम सी लागाड़ीन जत्‌यार सी युहन्‌‌‌नु माणसे काजे बपतीस्‌मा देणु चालु करलु ने जत्‌यार लग ईसु काजे हामरे ईचमां मां सी हाकलाय गुयलु। ईनु माणसे मां सी काहनाक एक काजे तीनाक मर्‌या-सर्‌याम सी जीवतु हवणेन हामरे साते गवा बणनु चाहजे।
23 तेरेसी चे दुय अदमी काजे सांबा लाया युसुफ काजे, जु बरसब्‌बास कवायतेलु ने तेरो नावठ्‌यो नाव युस्‌तुस हतलो, दीसरु मत्‌‌तीयास काजे, 24 ने जे भगवान धड़े असी दुवा कर्‌या, “ए मालीक! तु आखान मन काजे जाणे। हामुक ज देखाड़, की तु ईनु दुय मायन कुणी काजे नेवाड़्‌लु छे, 25 ने चु एक ईसुन नेवताळान रुप मां यहुदान आवजी पर ईनी सेवा-चाकरीन जागु हात करे तसा। तीना जागा काजे छुड़ीन यहुदा आपसे जागे जाती रयु।” 26 तत्‌यार चे तेरा बारामां चिट्‌ठी नाख्‌या ने चिट्‌ठी ईछा ती ची चिट्‌ठी मत्‌‌तीयासेन नावेन नीकळी। अळतेन चु मत्‌‌तीयास ईसुन ग्‌यारे नेवताळा मां भेसकाय गुयु।