याकूब की पत्री
याकुपेन चिट्ठी
याकुपेन बारामां
याकुपेन किताप काजे याकुप नावेन एक माणुस लिखलु छे। हय सके जुत ईसुन भाय हतलु, जु सुरवातीन मंडळी मां एक अगळवाण्यु हतलु ने यरुसलेमेन मट्ली गड़दीन हीस्सु हतलु। नेवताळा 15:13 नेवताळु पोलुस तीनाक गलाती 2:9 मां मंडळीन खास खांबु बी कह्यु। नीयम काजे जान्ने वाळान मान्नु छे की याकुपेन किताप ईसु मसीन पयदावारीन 50 सेक साल बात लिखायली। काहाकी याकुप यरुसलेमेन मंडळीन अगळवाण्यु हतलु, हय सके चां रय्न हयु ईनी किताप काजे लिखलु।
याकुप आपसान किताप मां नी-यहुदी वाळा माणसे फेलायला बारे कुळ्या माणसेन 1:1 बारामां बताड़े। याकुपेन सीकापण आखा मसी माणसे पर लागु हवे, बाकुन बारे कुल्यान बारामां बुले लिखला सी असो छाचलीन मालम पड़े की याकुप सुदु यहुदी माणसे काजे लिख रवलु। काहाकी जी किताप बन्ने वाळान एक बेसका टुळा लग जाय करीन लिखलु, हयु बेसकी वातेन बारामां बताड़्यु। याकुप भुरसा ने कामेन काजे साते लीन चालनेन बारामां अदु जुर देय। छाचलु भुरसु कामे सी देखाव पड़से। 2:17 हयु लकपती माणसेन 2:1-4 बारामां नानला मटान भेदभाव तीनुक वारु नी कहें ने हामुक बताड़े की जो आपणु करजे तेर बारामां चेतीन रहणे कहें। 3:1-12
बाहरती वात
1. याकुप मां आपसा भन्ने वाळाक वारु छे की करीन पुछे। 1:1
2. तेर बात हयु मसी वाळा काजे हवस देय की जत्यार तुहुं दुख झेलु ती काठा रहे। 1:2-27
3. अळतेन हयु कहें की कामे सी भुरसु देखायणु जरुड़ी छे। 2:1-26
4. तेर बात हयु कहें की मुंहडा सी नीकळने वाळा बुले कतरा ताकतवाळा हय सके। 3:1-12
5. तत्यार याकुप समजाड़े की कसी भगवानेन अक्कल माणसेन अक्कल सी अलग छे। 3:13—4:10
6. तेर बात हयु आपसा भन्ने वाळा काजे घमट वाळा वळु नी हवणु करीन कहें। 4:11—5:6
7. याकुप ईतरीक वातेन बारामां कय्न किताप काजे लिखणु बंद करे। 5:7-20
1
आव-भाव
1 भगवान ने मालीक ईसु मसीन पावर्यु याकुप भीणी सी तीनु बारे चेला काजे जी रावण्या-तीवण्या हय्न रवे:
तीनु काजे वारु छे की कह्वे।
भुरसु ने अक्कल
2 ए मारा भायस्यो ने बहणस्या, ईसु पर भुरसु करनेन साहरे, तुंद्रे, पर कदी भाती-भातीन वेला ने पारख आया करे; तत्यार ईनी वात काजे तुहुं खुसीन वात समजु। 3 काहाकी तुहुं जाणु की तुंद्रु भुरसु जत्यार ईनी पारख मां जीत जाय, तीत हामु काजे गम खाणेन ताकत जड़े। 4 असा करीन तुहुं गम खाणेन ताकत काजे तुंद्री जीवाय मां पुरो-पुरो वदणे देवु; तेरेसी तुहुं भुरसा मां पुरा-पुरा पाक्का हय जावु, ने तुंद्री जीवाय मां काहनी बी वारलु वातेन कसर नी रवणु चाहजे। 5 कदी तुंद्रे मायन काहनाक धड़े, भगवानेन मरजीन अनसारे जीवणे करीन कम अक्कल हय, ती भगवान धड़े दुवा करीन अक्कल मांगु। भगवान ते आखा काजे मटले मने आपण्यु छे; आपणु मांग्या करीन चु आपणुक नी लड़े। चु तुहुंक अक्कल आपसे ने आपसे। 6 बाकुन तुहुं संक्या करे पाखुर भुरसु करीन अक्कल मांगजु, काहाकी संक्या करतु जाय्न वीन्ती करन्यु ते दर्याम आवणी झलकेन तसु छे, जी वाहळाम अथीन-अथी उछळ्या करे। 7 असो माणसे काजे कदी बी जी आस नी करनु चाहजे की, भगवान मालीक भीणी सी मेसेक काहींग जड़से। 8 भगवान पर संक्या करन्यु माणुस ते दुय मन वाळु रवे, ने आपसान जीवाय मां आखी वातेम टेक्लु नी रवे।
पयस्या वाळु ने गरीब
9 जत्यार भगवान तीना भाय ने बहणस्या गरीबी मां सी उपर उठाड़े ती हीनुक खुसी हवणु चाहजे। 10 ने भगवान तीना काहालाक भाय ने बहणस्या काजे लकपती मां सी गरीबी मां लावे जत्यार बी हीनाक खुसी हवणु चाहजे काहाकी लकपती जंगली चारान फुलेन तसों सरी जासे। 11 दाहड़ु उगतेत बेसको सेक लागे, ने चारान फुल झड़ जाय, ने बेसको वारु देखाय असो रवे चो सर जाय; तसुत अमीर माणुस बी, आपसा वाटे कमायणेन हाय-हरबड़ करतु-करतु मरीन धुळा मां भेसकाय जासे।
पारख ने लालच
12 वारु छे चु माणुस जु पारख मां काठु रहे, काहाकी चु खरु बणीन जीवनेन पागड़ी जड़से जु वायदु मालीक आपसा सी परम करने वाळा सी करलु छे। 13 जत्यार बी काहनाक ने पारख आवे, ती चु असु कय्न भगवानेक वात नी काटणु चाहजे, काहाकी भगवान भुंडी वातेन नी ते पारख कर सके ने नी चु काहनान ने पारख खुद करे। 14 बाकुन काहना बी माणसे आपसीत हाय्न साहरे हापकाये ने फांदायन पारख मां पड़ जाय। 15 बाकुन जीत हाय माणसेन जीवाय मां बड़ जाय, ने माणसे पाप करने बाजी जाय। ने अळतेन पसतावु करे वीगुर चे असला पाप कर्या करे, ती आकरी टेमे, चे भगवानेन जीवाय सी छेटा हय्न जलमकात मर जासे।
16 ए मारा लाटेक्ला भायस्यो ने बहणस्या! आपसा काजे धुकु घुण देवु। 17 काहाकी उपर सीत, आपणुक वारलु चीज ने वारला वाटा आपे, तींद्रेम काय बी कसर नी रवे। ने आखो वीजाळान बास सीत जड़े, तेरेमां काय बी बदली नी हय सके, ने नी अदलु-बदलु करने सी तीना पर साहळु पाड़े। 18 हव, भगवान आपसीत मरजीन अनसारे, आपसान छाचाय्न छाचला बुल पर भुरसु कराड़ीन, आपणुक नवलो जीवाय आप्यु। भगवान एरेन करीन नवलो जीवाय आप्यु, की भगवानेन हाते बणावला आखा माणसे मायन, आपणु, भगवान वाटे पेहला फळ रवजे।
सामळनु ने करनु
19 ए मारा लाटेक्ला भायस्यो ने बहणस्या! जी वात हेर राखु! की, एकेक माणुस भगवानेन बुल मन लागाड़ीन सामळनु चाहजे, ने बुले ती वीच्यार करे पाखुर मामार नी बुलनु चाहजे, ने मामार नी रीसायणु चाहजे। 20 काहाकी काहना बी माणसेन रीस, भगवानेन धरमेन काम नी कर सके। 21 आखी भुंडी वेहवार ने कुहराय काजे छेटी कर देवु। ने तुहुं ज भगवानेन छाचला बुल सामळ्या, तीना बुले काजे आपसान जीवाय मां नीचळा हय्न आवरी लेवु; काहाकी ज छाचलो बुल तुंद्रा जीव-आत्मा काजे छुटकारु आप सके।
22 हेरेसी भगवानेन बुले, सामळने वाळा अतरात नी, बाकुन तीनु बुलेन अनसारे जीवण्या बी बणु। कदी तुहुं भगवानेन बुल सामळीन तेरेत अनसारे नी जीवे, ती तुहुं आपसात काजे धुकु दी र्या। 23 जु भगवानेन बुल ते सामळे, बाकुन भगवानेन बुलेन अनसारे नी जीवे; चु तीना माणसे साय छे, जु आपसो मुंहडो आरस्या मां देखे, 24 काहाकी चु आपसा काजे आरस्याम देखीन जाती रहे ने मामार ईसरी जाय की आपसु कसु हतलु। 25 बाकुन जु माणुस जसों छुड़ावन्या चुखला सास्तुर कहें तसु धीयान करतु रहे, तेरा काम मां संयबरकत आवसे काहाकी चु सामळीन ईसरे नी बाकुन तसुत काम बी करे।
26 कदी काहनुक माणुस आपसा काजे मे भगवानेन भक्ती करन्यु छे असु मान लेय, ने आपसान जीप काजे आपसा बस मां नी राखे, ती चु आपसात काजे धुकु देय, हेरेसी तेरी भक्ती करनु वारु नी हय। 27 भगवानेन छाचलु भगत, पुराह्यला ने रांडायलान दुखो मां, तींद्री मदत करसे। अतरोत नी बाकुन चु तींद्री मदत करनेन टेमे बी, आपसा काजे ईनी कळीन पाप-धंदा सी छेटु राख्से। आपणा भगवान बासेन नींगा मां चुखलो ने नी-गुनावाळी भक्ती जीत छे। ✡भजन सहीता 34:13; 141:3
✡1:27 भजन सहीता 34:13; 141:3