19
1 अळतेन पीलातुस ईसु काजे लीजाय्न सुटा देवाड़्यु। 2 ने सीपायड़ा काटाळ्या वेळान मुळ्यो गुथीन ईसुन मुणका*सिर पर मेक देदा ने जामण्यो झगल्यो पेहराया। 3 ने ईसु धड़े आवीन ईसुक हास्ता जाय्न कह्णे बाजी गुया, “ए यहुदी माणसेन राजा, वारु छे की!” ने चे तीनाक थापड़ाया।
4 पीलातुस अळी बाहर जाय्न माणसेक कह्यु, “देखु, मारी नींगा मां हेरेम काय बी खुड़ नी देखाव पड़तु, ज तुहुं बी जान्नु चाहजे, करीन मे तीनाक अळी बाहर लावलु।” 5 तीने टेमे ईसुन मुणका पर काटाळ्या वेळान मुळ्यो मेकलोत हतलो, ने तीनाक जामण्यो झगल्यो पेहरावलोन हतलो, तसुत चु बाहर आयु ने पीलातुस माणसेक कह्यु देख, “हयुत छे चु माणुस!”
6 मंदीरेन डाहला पुजारा ने मंदीरेन राखवाळ्या सीपायड़ा ईसु काजे देखीन, पीलातुस अगळ असा आयड़ी पड़्या की, “हीनाक कुरुस पर टांगीन खीळा ठुकीन मार देवु!”
हीनाक कुरुस पर टांगीन खीळा ठुकीन मार देवु! पीलातुस तीनुक कह्यु, “मारी नींगा मां हेरेम काय बी खुड़ नी देखाव पड़तु ने ईनाक तुहुंत ली जावु ने तुहुंत ईनाक कुरुस पर टांगीन खीळा ठुकीन मार देवु!”
7 यहुदी मुख्या कह्या, “हामरे धड़े मुसान लिखला नीयम छे, तेरे अनसारे ईनाक मुतेन डंड जड़नु चाहजे, काहाकी आपसुत भगवानेन पुर्यु हवणेन दावु करलु छे।”
8 पीलातुस तींद्री जी वात सामळीन अळी बी बीही गुयु। 9 चु अळी हवेलीन आंगणाम ली जाय्न तीनाक पुछ्यु, “तु कां सी आवलु छे?” बाकुन ईसु तीनाक काय जपाप नी आप्यु। 10 ने पीलातुस ईसुक कह्यु, “तु मेसेक जपाप काहनी आपतु तुसेक नी मालम हय काय, की मारे भीणी तुसेक छुड़नेन हक छे नीते, ईना कुरुस पर टांगीन खीळा ठुकीन मार देवु, असु हुकुम आपणेन बी हक छे।”
11 ईसु पीलातुस काजे जपाप आप्यु, “कदी तुसेक उपर सरगे सी हक नी जड़तु ती तारु मारे पर काहनु बी हक†अधिकार नी रवतु ने चु मेसेक धराड़ीन तारे सुपरुत करलु छे, माणुस बेसकु पापी छे।”
12 ईसुन जी वात सामळीन पीलातुस, “ईसु काजे छुड़नेन वीच्यार कर्यु, बाकुन यहुदी मुख्या आयड़ी आयड़ीन कह्या, जु आपसा काजे राजा कह्वे चु आपणा रोमी राजान वीरुद करे। ने तीनाक डंड जड़नु चाहजे कदी तु ईनाक छुड़ देसी ती तु आपणा रोमी राजान दुस्तीदार नी हय।”
13 जी वात सामळीन पीलातुस ईसु काजे बाहर गब्बता नावेन जागा पर बुलायन ईब्रानी बुली ईना नावेन मतलब, “दगड़ान पयड़ी” हतलो ने पीलातुस तीना जागा पर आपसी नीयावेन गादी पर बस गुयु। 14 जु दाहड़ु, फसह तीहवारेन हाप्ताम वाळा आरामेन दाहड़ान तीयारीन दाहड़ु हतलु। ने मांजणीक टेम हय रवली, तत्यार पीलातुस यहुदी माणसेक कह्यु, “देखु, हयुत छे तुंद्रु राजा!”
15 ती यहुदी मुख्या अळी आयड़ीन कह्या ईनाक जां सी लीजा!
ईनाक जां सी लीजा! “ने ईना कुरुस पर टांगीन खीळा ठुकीन मार देवु!” पीलातुस तीनु काजे पुछ्यु, “मे तुंद्रा राजा काजे कुरुस पर टांगीन खीळा ठुकाड़ो काय?”
मंदीरेन डाहला पुजारा कह्या, “रोमी राजा काजे छुड़ीन हामरु काहनु राजा नी हय।”
16 पीलातुस ईसु काजे तींद्रे हातेम आप देदु, हेरेन करीन की, चे तीनाक कुरुस पर मार देय।
सीपायड़ा ईसु काजे कुरुस पर चड़ावे
(मत्ती 27:32-44; मरकुस 15:21-32; लुका 23:26-43)
17 ने ईसु सीपायड़ान कह्णेन अनसारे कुरुस हाकलीन चालतु-चालतु ईब्रानी गुलगुता नावेन जागा पर गुयु। यहुदी माणसेन बुली मां ईना नावेन मतलब मुणको हतलो। 18 तीना जागा पर ईसु काजे ने तेरे भेळा दुय गुना वाळा माणसे काजे कुरुस पर टांगीन खीळा ठुक्या। ईचमां ईसु काजे ने एक काजे ईसुन डाखर्ये आंग्ये ने एक काजे जेवड़्ये आंग्ये कुरुस पर टांगीन खीळा ठुक्या। 19 पीलातुस एक लाकड़ान पट्टी पर ईसुन बारामां लिखाड़ीन तेरा मुणका सी उपर कुरुस पर ठुकाड़ देदु। तीनी पट्टी पर असो लिखलो हतलो, “ईसु नासरी यहुदी माणसेन राजा।” 20 ने जी वात ईब्रानी बुली मां, ने लातीनी बुली मां, ने युनानी बुली मां लिखली हतली। चां ईसु काजे कुरुस पर टांगीन खीळा ठुकला हतला, चु जागु सहरे धड़े हतलु ने बेसका यहुदी माणसे जी वात लिखली भण्या। 21 यहुदी मुख्या मायन डाहला पुजारा काजे जी लिखली वात नी जमी ने चे पीलातुस काजे कह्या, “यहुदी माणसेन राजा असा मां लिखु बाकुन असो लिखु की हयु कह्यु की मे यहुदी माणसेन राजा छे।”
22 पीलातुस तीनुक जपाप आप्यु, “मे ज लिखाड़ देदु चत रवसे।”
23 अळतेन सीपायड़ा ईसु काजे कुरुस पर टांगीन खीळा ठुकीन नवराय गुया, तत्यार चे ईसुन पुथल्यान चार वाटा पाड़्या एक-एक सीपायड़ा वाटे एकेक वाटु पाड़्या बाकुन ईसुन झगल्यो सीवीन बणावलो नी हतलो, बाकुन आखो की आखो गुथीन बणावलो हतलो। 24 ने चे वीच्यार करीन कह्या, आपणु हीना पुथल्याक नी फाड़ता, बाकुन चिट्ठी नाखीन देख लेता की ज कुणीक जड़से ज असो काहा कर्या की खरला सास्तुर मां लिखली वात ची पुरी हवे:
“चे वेरी माणसे मारा पुथल्याक वाट लेदा,
ने चे मारा पुथल्या वाटे चिट्ठी बी नाख्या।”
ने छाचलीन सीपायड़ा असा की असा कर्या।
25 ईसुन कुरुस धड़े ईसुन माय ने ईसुन मायन बहणीस ने काइफान घरवाळी मरीयम मगदलनी मरीयम उभी हय रवली। 26 जत्यार ईसु चां आपसी माय काजे देख्यु ने तीना चेलाक बी देख्यु, जु ईसुन लाटेक्लु चेलु कहवायतेलु, ती चु आपसी माय काजे कह्यु, “ओ माय! देख, हयु तारु बेटु छे।”
27 अळतेन तीना चेलाक कह्यु, हयी तारी माय छे ने तीने टेम सी चु चेलु ईसुन माय काजे आपसी माय मान लेदु। ने आपसे घर ली जाय्न तेरी सेवा चाकरी करने बाजी गुयु।
ईसुन कुरुस पर मरनु
(मत्ती 27:45-56; मरकुस 15:33-41; लुका 23:44-49)
28 अळतेन ईसु ज जाण गुयु की, हय आखो काय पुरो हय गुयलो छे ने खरला सास्तुर मां पेहलुत सी लिखलो हतलो, च पुरो करने करीन कह्यु, “मे तीसलु छे।”
29 चां एक ठाहरु हतलु तीना ठाहरा मां अंगुरेन कड़वलु रस भर रवला ने चे सीपायड़ा कड़वला रस मां एक पुतो डुबाड़ीन तीना पुताक जुफा नावेन झाड़कान एक सुट्ये झेलाड़ीन ईसुन मुंहडे टेकी देदा। 30 तत्यार ईसु अंगुरेन कड़वलु रस चाख्यु ती कह्यु, “पुरो हय गुयो।”
ने आपसो मुणको हेटु वाळ लेदु ने आपसु जीव-आत्मा भगवान काजे आप देदु।
ईसु काजे भाला सी गुपे
31 चु दाहड़ु फसह तीहवारेन हाप्तान वाळान खास आरामेन दाहड़ान तीयारीन दाहड़ु हतलु। आरामेन दाहड़े ईसुन ने दीसरा गुना वाळा धड़े कुरुस पर टांगलो नी रहणु चाहजे करीन यहुदी माणसे पीलातुस सी आवीन वीन्ती कर्या की कुरुस पर टांगीन खीळा ठुकला माणसेन पायेन हाटका तुड़ाय दे। ने तींद्रो धड़ कुरुस पर सी उतार मांग। 32 सीपायड़ा आवीन ईसुन आड़े-धड़े कुरुस पर टांगीन खीळा ठुकला माणसेन पायेन हाटका टुकड़ा-टुकड़ा कर देदा। 33 बाकुन अळतेन चे ईसु धड़े आवीन देख्या ती तीनुक मालम पड़्यो की चु मर गुयु ने चे तेरा पाय नी तुड़्या। 34 बाकुन तीना सीपायड़ा मायन एक सीपायड़ु ईसुन काखे भालु घुदल्यु ने कुखेम सी तत्यारुत लुही ने पाणी नीकळ्यो। 35 जतरा बी ज देख्या, चे गवाय देदा, ने तींद्री गवाय संय छे ने चु जाणे की चे संय कवे की तुहुं बी भुरसु करु। 36 जी वात तेरेमां हय की चुखला सास्तुर मां ज कहलो छे, च पुरो हवसे, “तेरा कुय हाटका बी नी तुड़े।” 37 पछेन एक अळी जागा पर ज लिखलो छे, “तीनाक चे गुपला छे, तीना पर चे नींगा करसे।”
नीकुदेमुस ने अरीमीतीया सहर वाळु युसुफ ईसुन धड़ काजे गाड़ने जाय
(मत्ती 27:57-61; मरकुस 15:42-47; लुका 23:50-56)
38 ज आखो हय गुयो ने अळतेन अरीमतीया सहर वाळु युसुफ चु ईसुन चेलु हतलु, बाकुन यहुदी माणसेन धाके काहनाक बी नी कह्तेलु की मे ईसुन चेलु छे, बाकुन हय चु चेलु पीलातुस वीन्ती कर्यु की मेसेक ईसुन धड़ काजे गाड़ने ली जान दे, ने पीलातुस तेरी सामळी लेदु। ने चु युसुफ आवीन ईसुन धड़‡शव ली जात र्यु। 39 नीकुदेमुस चु एक दाहड़ु राती वेळाय, ईसु काजे भेळु हवणे आवलु, चु बी चां एक सोव ने पंद्रे कीलु ईत्तर ने एलवो§एक भातीन झाड़कान पुपड़ो छे चो माणसेन धड़ काजे थुड़ाक दाहड़ा लग सड़ने नी देय। लीन आयु। 40 ने यहुदी माणसे जसा मरला माणसेन धड़ काजे गाड़ने ली गुया तसात चे ईसुन धड़ काजे वारु गंदायण्यु मसालु चुपड़्या ने धवळा पुथल्या मां गुचवी देदा। 41 तीना जागा मां ईसु काजे कुरुस पर टांगीन खीळा ठुकला तीनात जागा धड़े वाड़ी हतली, ने तीनी वाड़ीन खंगराम एक नवलो बीड़ो खुदलो हतलो, तीना बीड़ा मां हय लग कुय काजे गाड़्या नी। 42 हय यहुदी माणसेन आरामेन तीयारीन दाहड़ु खत्तम हवणे वाळु हतलु, ने आरामेन दाहड़ु सुरु हवणे वाळु हतलु। ने जो मसाण्या धड़ेत हतलो, करीन नीकुदेमुस ने युसुफ ईसुन धड़ काजे तीनात मसाण्या मां मेल देदा।