मत्ती के द्वारा लिखा गया यीशु का सुसमाचार
मत्तीन साहरे लिखली ईसुन खुस-खबर
मत्तीन बारामां
मत्तीन कितापेन खुस-खबरेन जी हीनु किताप मां सी छे, ज्य ईसुन जीवनेन बारामां देखाड़े। हींद्रे मां सी आखा एक काजे खुस-खबर कहें। ईसुन मरनेन पछे मत्ती, मरकुस, लुकु, ने युहन्ना ईनु किताप काजे लिख्यु। मत्तीन कितापेन खुस-खबरेन जी किताप कत्यार लिखाय गुय हामुक पुरी रुप सी पतु नी हय। बाकुन धड़े-वड़े ईसुन पयदा हवणेन सांठ सालेन पछे लिखाय गुय हसे। हीनीत रीती सी जी किताप कत्यार लिखी गुई, ज्य हामुक मालम नी हय। तेबी बेसका माणसेन मान्नु छे, की चु ईस्रायल देस मां ने कांखुर मायन यरुसलेम सहर मात लिखाय गुई हसे।
ईनी किताप काजे लिखण्यु मत्ती छे, जु ईसुन चेलु बन्ने वाटे बुलावणेन पेहल एक फाळु लेण्यु हतलु। चु लेवीन नाव सी जाणाय जातलु। मत्ती बारे नेवताळा मां सी हतलु। जु यहुदी भंन्या वाटे जी लिखाय गुयली ईनी वातेन हामुक हेरेसी पतु चाले की धड़े-वड़े सांठ सी जादा नीरदेस, ईना किताप मां जड़े चे पेहला नेम मां सी छे। चु बताड़ने चाहे की ईसु भगवानेन नेवाड़्लु ताकत सी भरलु ने छुटकारु आपण्यु छे। तेरे बारामां पेहलुत सी भगवानेन अघी सी आवणे वाळी वात कहलो हतलो। मत्ती भगवानेन राजेन बारामां बेसकी आखी वात लिखली छे।
यहुदी माणसेन जी आस हतली की ताकत मां भरायलु एक राजनेतीकेन राजेन राजु हसे। बाकुन मत्ती ईना वीच्यारेन वीरुद करीन आपणा किताप मां भगवानेन आत्मान राज पर जुर देय। नवला नेमेन सुरुवात मत्तीन किताप सी हवे। ज्य हवे तसों छे की एरे मां पेहला नेमेन गवा बेसका कावा करलो छे जी किताप दुयु नेम काजे जुड़े। मुख्यान मान्नु छे की मत्ती पांच कितापेन मतलब मुसान पेहला पांच कितापेन रुप तेरेन तसा कर्या। ईसुन बयड़ा परुन बुले 5:7 भगवान सी मुसा काजे नेमेन किताप देणेन बराबर छे। वेवस्थावीवरन 19:3; 23:25
बाहरती वात
1. ईसु मसीन पयदा हवणेन ने हेरी चाकरीन सुरुवात काहाली भाती हयो, हेरु नेवाड़ु करे मत्ती आपणे खुस-खबरेन ईसारु करे। 1—4
2. हेरे पछेन मत्ती ईसुन चाकरी ने हेरी सीकाड़नेन बारामां कहें। 5—25
3. मत्तीन कितापेन खुस-खबरेन आकरी भाग चु छे तेरेमां ईसुन चाकरीन सीखर जु हेरी मुतेन ने मरलाम सी जीवता हवणेन बारामां कहें। 26—28
1
ईसुन खानदानी
(लुका 3:23-38)
1 अब्राहमेन अवल्यात*सन्तान दावुदेन अवल्यात, ने ईसु मसीन खानदानी असी छे।
2 अब्राहम सी इसाक पयदा†उत्पन्न हयु, इसाक सी याकुप पयदा हयु, याकुप सी यहुदा ने तेरा भायस पयदा हया। 3 अळतेन यहुदा ने तामार सी फीरीस ने जेरह पयदा हया, फीरीस सी हेसर्यान पयदा हयु, ने हेसर्यान सी एराम, 4 अळतेन एराम सी अम्मीनादाब पयदा हयु, अम्मीनादाब सी नहसोन, ने नहसोन सी सलमन पयदा हयु। 5 सलमन ने राहाब सी बोआज पयदा हयु। बोआज ने रुत सी ओबेद पयदा हयु, ने ओबेद सी यीसे पयदा हयु।
6 ने यीसे सी दावुद राजु पयदा हयु। दावुद सी सुलेमान पयदा हयु जी पेहेल उरीय्याहन घरवाळी हतली। 7 सुलेमान सी रहबाम पयदा हयु, ने रहबाम सी अबीय्याह पयदा हयु ने अळतेन अबीय्याह सी आसा पयदा हयु। 8 आसा सी यहोसाफात पयदा हयु, यहोसाफात सी योराम पयदा हयु, ने योराम सी उज्जीयाह पयदा हयु। 9 उज्जीयाह सी योताम पयदा हयु, योताम सी आहाज पयदा हयु, आहाज सी हीजकीय्याह पयदा हयु। 10 हीजकीय्याह सी मनस्सीह पयदा हयु, मनस्सीह सी आमन पयदा हयु, ने आमन सी योसीय्याह पयदा हयु, 11 ने ईस्रायली जातीन माणसे काजे धरीन बेबीलोन ईलाका मां जाणेन टेमे, योसीय्याह सी यकुन्याह ने तेरु सगु भायस पयदा हया।
12 ने ईस्रायली जातीन माणसे काजे धरीन बेबीलोन जाणेन पछेन यकुन्याह सी सालतीयेल पयदा हयु, ने सालतीयेल सी जरुबाबील पयदा हयु, 13 जरुबाबील सी अबीहुद पयदा हयु, अबीहुद सी ईल्याकीम पयदा हयु, ने ईल्याकीम सी अजोर पयदा हयु, 14 अजोर सी सदोक पयदा हयु, सदोक सी अखीम पयदा हयु, ने अखीम सी ईलीहुद पयदा हयु, 15 ईलीहुद सी ईलीयाजर पयदा हयु, ईलीयाजर सी मतान पयदा हयु, ने मतान सी याकुप पयदा हयु, 16 याकुप सी युसुफ पयदा हयु, चु मरीयमेन अदमी हतलु, ने मरीयम सी ईसु पयदा हयु चु मसी कहवाये।
17 एरेन तसी अब्राहम सी दावुद लग चवदा पीड़ी हवी, ने दावुद सी बेबीलोन ईलाका मां धराय जाणेन टेमे लग चवदा पीड़ी हवी, ने बेबीलोन ईलाका मां धरायन ली जाती रया तत्यार तीनी टेम सी लीन मसी लग चोवदा पीड़ी हवी।
ईसुन पयदा हवणेन
(लुका 2:1-7)
18 ईसु मसी असु पयदा हयु की तत्यार तेरी माय मरीयमेन मांगणी युसुफ साते हय गुयली, ने तींद्रे भेळा हवणेन सी पेहलुत चुखली-आत्मा सी भारीस‡गर्भवती हतली। 19 तत्यार तेरु अदमी युसुफ चु धरमी हतलु, ने तीनी काजे नाव-बद्दी करने नी चाहतेलु, तीनीक कळेत छुड़नेन वीच्यार करने बाजी गुयलु। 20 जत्यार चु हीनी वातेन वीच्यार मां पड़ रवलु ती मालीक भगवानेन सरग वाळु काहवाळ्यु तीना काजे सपनाम देखायन कह्वणे लाग्यु, “ए युसुफ! दावुदेन अवल्यात, तु बायर मरीयम काजे तारेन चां लावणे सी मां बीहे, काहाकी ज तेरा पेट मां छे, च चुखली-आत्मान भीणी सी छे। 21 तेरु एक पुर्यु हवसे ने तु हेरो नाव ईसु पाड़जी, काहाकी हयु आखा माणसेन तींद्रा पाप सी छुटकारु आपसे।”
22 ज आखो असो करीन हयो की ज बुल मालीक भगवानेन अघी सी आवणे वाळी वात देखान्यान साहरे कह्लो, च पुरो हवे, 23 “देखु, एक कुवारली पुरे भारीस हवसे, ने तेरु एक पुर्यु पयदा हवसे, ने हेरो नाव ईम्मानुएल पाड़जी,” तेरो मतलब छे “भगवानुत हामरे पुठ्ये छे।”
24 तत्यार युसुफ नीद मां सी जागीन मालीक§प्रभु सरग वाळा काहवाळ्यान हुकुम सामळीन तेरी बायर काजे ली आयु, 25 ने जत्यार लग पुर्यु पयदा नी हयु तत्यार लग युसुफ तेरे धड़े नी गुयु, ने चु तेरो नाव ईसु पाड़्यु।