रोमियों की कलिसीया के लिए पौलुस की पत्री
रोमीन मंडळी वाटे पोलुसेन चिट्ठी
रोमीन बारामां
रोमेन किताप नेवताळु पोलुस धड़े-वड़े 54-58 सालेन ईचमां ईसु मसीन पयदा हवणेन पछे लिखली हतली पोलुस रोमनेन चाल सी पेहल हयु जी चिट्ठी रोम मां भुरसु करने वाळा साते समजाड़ने वाटे मकल्यु जे की दुयु यहुदी ने नी-यहुदी वाटे हयु कुरींथी सहर सी जी चिट्ठी लिखलु हतलु जां चु हीनी टेमे चां रय रवलु पोलुस जी चिट्ठी हेरे सी लिखलु काहाकी आखा देसेन माणसे ईसु मसी पर भुरसु करीन मान सके। 16:26
रोमेन किताप आखी जागा ने आखी टेम भुरसु करने वाळा माणसे वाटे जरुड़ी किताप छे काहाकी पोलुस साप-साप ने वारु तरह सी समजाड़्यु की आपणु ईसु मसीन साहरे छुटकारु हय सके पोलुस ईसु मसीन खुस-खबर काजे जुन्ला नीयम सी बी जड़्यु काय पुजारा बी वीच्यार करला छे की किताप मां आखी सी जरुड़ी बुल 1:16 छे जी कवे मेसे खुस-खबर सी कुय सरम नी हय काहाकी ज आखा वाटे भुरसु करे हींद्रे वाटे छुटकारु भगवानेन ताकत छे पेहल यहुदी वाटे अळतेन नी-यहुदी वाटे रोमेन पेहलु भाग 1:12 उंडाय सी धरम सास्तुर छे ने दीसरु भाग (13-15) मां सी मसी जीवन वाटे वेहवार सी समजाड़नु छे।
बाहरती वात
1. पोलुस आपणी चिट्ठी मामुली रुप सी खुदेन बारामां बताड़तु जाय्न सुरु करे की चु कुणीक लिख रयु। 1:1-15
2. हेरे पछेन चु ईसु मसी ईचमां सी माणुस जातीन दसा ने वीच्यारीन छुटकारान बारामां लिखलो छे। 1:16—11:36
3. हेरे पछेन पोलुस मसी जीवन जीवणे वाटे काय वेहवार सी समजाड़्यु। 12:1—15:13
4. चु रोमन मंडळी मां माणसे काजे काय वारु छे की कय्न रोमेन किताप लिखीन सार देदु। 16
1
आव-भाव करनु
1 पोलुस भीणी सी जु ईसु मसीन पावर्यु छे, ने नेवताळु हवणे करीन बुलावलु छे, ने भगवान तीना खुस-खबर वाटे नेवाड़लु छे।
2 तेरी चु पेहलुत सी आपणी भगवानेन अघी सी आवणे वाळी वात देखाड़न्यान साहरे चुखला*पवित्र चुखो सास्तुर मां, वायदु करलु हतलु। 3 गुयु हेरु पुर्या काजे आपणा मालीक ईसु मसीन बारामां आस लागाड़्यु; चु डीलेन भाव सी ते दावुदेन खानदानी†वंशखानदानी सी पयदा हयु 4 ने चुखली-आत्मान भाव सी ईसु मरलाम सी जीवतु हवणेन वजे सी ताकुतेन साते भगवानेन पुर्यु ठेहरलु छे। 5 हेरे साहरे आपणु काजे बेसकी वारु दया ने नेवताळा बननेन मुखु जड़्यु हेरा नावेन वजे सी आखा नी-यहुदी माणसे भुरसु करीन हेरी माने, 6 तेरेमां तुहुं बी ईसु मसीन हवणे वाटे बुलावला छे।
7 तीनु आखान नाव जे रोम मां भगवानेन लाटेक्ला छे ने चुखला हवणे वाटे बुलावला छे:
आपणु बास भगवान ने मालीक ईसु मसी भीणी सी तुहुं काजे गीण-दया ने सांती जड़ती रवे।
तु बेसकु वारु छे करीन दुवा
8 पेहेल मे तुहुं आखा वाटे ईसु मसीन साहरे आपणा भगवान काजे तु बेसकु वारु छे करीन कहुं, काहाकी तुंद्रा भुरसान वात आखा कळी मां हय रय 9 भगवान तेरी चाकरी मे आपणी आत्मा सी हेरा पुर्यान खुस-खबरेन बारामां करो, हयुत मारु गवा छे की मे तुहुं काजे काहनी रीत सी लगातार हेर करतु रव, 10 ने जलम असु वीन्ती करो की भगवानेन मरजी सी काहली-ने-काहली रीत सी मेसे आकरी मां तुंद्रे धड़े आवणे वारु मुखु जड़े। 11 काहाकी मे तुंद्रे सी भेळु हवणेन लालुच करो की मे तुहुं काजे कुय जीव-आत्मान वाटु आपो तेरे सी तुहुं काठा हय जावु; 12 अळतेन ज की जत्यार मे तुंद्रे ईचमां रवो, ती हामु तीना भुरसान साहरे ज हामरे मां, ने तुंद्रे मां छे एक दीसरा सी वात वीच्यार जड़े।
13 ए भायसे, मे नी चाहतु की तुहुं हेरे सी अणजाण्या रवु की मे काय कावा तुंद्रे धड़े आवणे चाह, की जसा मेसे नी-यहुदी नी जाणे तीनी जाती मां फळ जड़्यो, असात तुंद्रे मां बी जड़से, बाकुन हय लग रुकायलो छे। 14 मारे पर युनानी माणसेन ने नी-यहुदी, ने अक्कल वाळा ने डेड़-अकल्या माणसेन करजु छे। 15 अळतेन मे तुहुंक बी जे रोम मां रवु, खुस-खबर सामळवणे करीन काहाली बी टेम मां तीयार छे।
खुस-खबरेन ताकत
16 काहाकी मे खुस-खबर सी नी सरमांयो, हेरे सी की चु आखा जणा जे भुरसु करने वाळा वाटे, पेहेल ते यहुदी अळतेन नी-यहुदी वाटे, छुटकारान करीन भगवानेन ताकत छे। 17 काहाकी हेरे मां भगवानेन वारलु भुरसा सी ने भुरसा वाटे देखाये; जसों लिखलो छे, “भुरसा सी वारलु माणसे जीवता रवसे।”
माणुस जातीन पाप
18 भगवानेन रीस ते तीनु माणसे आखी नी भक्ती ने पाप पर चाले सरगे सी पड़से ज छाचाय्न वात काजे पाप करीन चीपदीन राखे। 19 हेरेसी की भगवानेन बारामां अक्कल हींद्रे मने मां देखायसे, काहाकी भगवान हींद्रे बारामां बताड़लु छे। 20 जत्यार सी कळी बणी हेरी नी-देखाय असली खास जलमेन ताकत ने भगवानेन गुण साप देखाये काहाकी हीनु चीजे सी पुरी रीती सी जाणी जाय सके जी भगवान बणावलु छे हेरेसी माणसे भीणी काय बाहनो नी हय। 21 हेरे वजे सी चे भगवान काजे जाणे तेबी चे भगवानेन जसी बड़ाय करनु चाहजे बाकुन तसी बड़ाय नी कर्या ने जसा भगवान काजे तु बेसकु वारु छे करीन कहंणु चाहजे तसा नी कह्या, बाकुन असलात वीच्यार करने बाजी गुया, जां लग की तींद्रा डेड़-अकल्या मन आंदारलो हय गुयो। 22 चे आपसा काजे अक्कल वाळा समजीन डेड़-अकल्या बण गुया, 23 ने जलम लग भगवानेन सेक-सींगार काजे माणसेन सीकु, ने चिरलान सीकु, ने चार पाया जनवार्यान सीकु, ने घीसड़ायन्या जनवार्यान सीकु समजीन तींद्री पुजा-पाट करने बाजी गुया।
24 हेरे वजे सी भगवान बी तीनुक हींद्रे मनेन हरेन अनसारे वीटळने करीन छुड़ देदु की चे एक दीसरान डीलेन अबरु नी करे। 25 काहाकी चे भगवानेन छाचाय काजे झुट साते भेसकी देदा, ने कळीन उपास ने चाकरी, ने पुजा-पाट सुरु कर देदा बाकुन कळ काजे घड़न्या भगवानेन भक्ती ने पुजा-पाट नी कर्या। भगवान जलम बेसका वारु छे! असोत हवतो रवे।
26 हेरेसी भगवान बी तीनु काजे गांडा हरेन हक मां रवणी देदु; जां लग की बायरा साते सवसार करने बाजी गुया। 27 ने अदमी बायरा साते सवसार करने रहणीदीन ने अदमी-अदमी साते सवसार करने ने कराड़ने ने चे चंगलाय ने सवसार करने हायाळ्ळा बण गुया। तीनुक बे सरम्या पापेन डंड, आपसा डील मां जीवतेला काजे भुकेतणु पड़्यो।
28 जत्यार चे भगवान काजे उळखणे नी हींडतेला, भगवान बी तीनु काजे हींद्रे भुंडले मनेन वजे सी रवणी देदु की चे जे कामे चे नी करनु चाहजे असला काम करने बाजी गुया। 29 चे आखी तरान वारलु काम नी करन्या ने पाप ने हाय-हाय ने कुहरायन वीच्यार सी भराय गुया, ने मनेन काट खुन ने झगड़ा, ने ठगणे वाळा भुंड्ला वीच्यार सी भराय गुया ने एक दीसरान चुगली करने बाजी गुया ने चे जलम दीसरान नुकसाण हवणु चाहजे करीन असात वीच्यार कर्या करे, 30 ने चे दीसरान असलात नाव-बद्दी करन्या, ने भगवान सी रीस करने वाळा, दीसरान अबरु लेण्या, ने मटाय कर्या, मट्ली-मट्ली आपरन्या, ने कुहरायन वात करने वाळा, आस्या-बास्यान हुकुम नी मान्या, 31 डेड़-अकल्या, धुकु देण्या, दया नी करन्या ने दया करने मां लुला बण गुया। 32 चे ते भगवानेन जी रीती जाणे की असला काम करने वाळा काजे मुतेन डंड जड़से, ने आपसात असलो काम करे ने ज असला कामे करे तीनु काजे तु बेसकु वारु करीन बी कह्या।