1 जत्‌यार आपणु भुरसा सी वारलु बण्‌या, ती आपणा मालीक ईसु मसीन वजे सी भगवान साते आपणु सांती मां हय गुयला छे, 2 ईसु मसी आपणे वाटे तीनी गीण-दयान बारनो उघाड़ देदलु छे जी आपणुक जड़ गुयलो छे, आपणु ईनी वात पर मटाय करजे की आपणुक भगवानेन सेक-सींगारेन आस पर मटाय करजे। 3 अतरोत नी, आपणु दुख पर बी खुस हवजे, काहाकी आपणु जाणजे की दुखुत आपणुक गम खाण्‌या बणावे, 4 ने दम धरीन खरा नीकळनु, ने खरा नीकळने, सी आस उबजे। 5 ने आस सी लाज नी आवे, काहाकी भगवान आपणुक चुखली-आत्‌मा आपलु छे ने हेरेत वाटे भगवान परम आपणा मन मां भरलु छे।

6 काहाकी जत्‌यार आपणु लुला हतला, तत्‌यार तीनेत टेमे ईसु मसी आपणे वाटे मर गुयलु। 7 कुय वारलु माणुस वाटे जीव आपणे तीयार हय जाय, तेबी काय जाणु कुय वारलु माणुस वाटे मरने तीयार हय जाय ती हय जाय। 8 बाकुन जत्‌यार आपणु पापीत हतला तत्‌यार ईसु मसी आपणे वाटे मर्‌यु, असु करीन भगवान आपसान परम उजेंती कर्‌यु। 9 तत्‌यार आपणु ईसुन लुहीन वजे सी वारलु गीणाया; ती आपणु छाचलीन मसीन वजे सी भगवानेन रीस सी बची जासुन। 10 काहाकी जत्‌यार आपणु वेरी हतला तत्‌यार ईसु आपसान मुतेन साहरे भगवान साते आपणु मेळ कराड़ देदु, ती हय ते आपणु मेळ भगवान साते हय गुयु। ती तेरा पुर्‌यान जीवन वाटे आपणुक छुटकारु नी जड़े काय? छुटकारु जड़से ने जड़से।

11 अतरोत नी, बाकुन हय ते आपणा ईसु मसीन साहरे भगवान साते आपणु मेळ हय गुयलु छे, अतरा मां आपणु हेरे साहरे भगवान पर भुरसु राखीन खुस छे।

12 तेरेमां एकुत अदमीन वजे सी कळी*दुनिया कळी मां पाप आयु, ने पापेन वजे सी मुत आवी। ईनी वजे सी मुत आखा माणसे मां फेली गुय, काहाकी आखात पाप करला छे। 13 भगवान मुसा काजे कायदु नी आप्‌यु तेरेसी पेहेल सी पाप ईनी कळी मां हतलु बाकुन कायदु†व्यवस्था कायदु नी हतलु अतरे कायदान कसर मां पापेन हीसाब नी लेवायतेलु। 14 तेबी आदम सी मुसा लग मुत तीनु माणसे पर बी राज करती रय जे आदमेन तसा काहनाक हुकुम तुड़नेन साहरे पाप नी करला।

आदम आवणे वाळा छुटकारु आपण्‌या ईसुन सहलाणी‡चिन्ह हतलु। 15 बाकुन जसों गुनान नेम छे असीत गीण-दया वाटु नी हय काहाकी जत्‌यार एक माणुसेन गुना सी बेसका माणसे मरे ती भगवानेन गीण-दया ने तेरो ज्‌य दान एक माणसेन मतलब ईसु मसीन गीण-दया सी हयो बेसका माणसे पर हयो ने वारु हयो 16 ने जु फुटक्‌यु वाटु एकुत माणसेन पाप गुनान मुतेन फळेन तसु नी हय काहाकी एकुत जणु पाप कर्‌यु ने पापेन डंडेन दाहड़ु टाकाय गुयु बाकुन बेसका पाप करने सी असु फुटक्‌यु वाटु पयदा हयु की बेसका माणसे धरमी बण जासे। 17 काहाकी कदी एकुत माणसेन पापेन वजे सी मुत राज करने झुम गुय ती जे माणसे गीण-दया ने धरमेन फुटक्‌यु वाटु बेसकु हात करे चे एकुत माणसेन मतलब ईसु मसीन साहरे छाचलीन जलमेन जीवाय मां राज करसे।

18 तेरेमां जसों एकुत जणान पापेन वजे सी आखा गुनाळा गीणाया तसोत एकुत जणान धरमेन कामेन वजे सी आखा काजे अमरकाय जीवन आपण्‌यु धरमेन वाटु जड़ गुयु। 19 काहाकी जसु एक माणुस हुकुम नी पाळ्‌ने सी आखा पापी बण गुया तसात एक माणसेन हुकुम पाळने सी आखा धरमी बण जासे।

20 ने मुसा साहरे लिखलु कायदु ईचमां आय गुयु ने माणसेम पाप जादात हवणे बाजी गुयु। बाकुन चां गुनु जादा हयु ती गीण-दया बी जादात वदती गुयु। 21 जसु पाप मुत लावतु जाय्‌न राज कर्‌यु तसोत आपणा मालीक ईसु मसीन साहरे गीण-दया बी जलमेन जीवन वाटे माणसेक वारलु ठहरावीन राज करती जाय।