9
भगवान ने हेरा नेवाड़ला माणसे
1 मे ईसु मसी मां छाचलीन कह्वो, मे झुट नी मेल्तु ने मारो मन बी चुखली-आत्मा मां गवा देय 2 की मे बेसकु दुखी छे, ने मारो मन जलम दुखतोत रवे, 3 काहाकी मारी जां लग हर हतली की आपणा भायसे वाटे जे डीलेन अनसारे मारा भाय-बेटा छे, मे खुद मसी सी सराप *श्रापितवाळु हय जातु। 4 चे ईस्रायली छे, ने खुळे लेवायणेन हक ने सेक-सींगार ने वायदु ने कायदु ने बड़ाय ने आसेन वाट देखणु हींद्रोत छे। 5 डाहा-डाहा बी हींद्रात छे, ने मसी बी डीलेन भावना सी हींद्रेत मां सी पयदा हयु। चु आखान भगवान छे ने जलम बेसकु वारु छे, असोत हवे।
6 बाकुन ज नी की भगवानेन बुल टळ गुयो, हेरेसी ईस्रायली अवल्यात छे, चे आखा ईस्रायली नी हय; 7 ने नी अब्राहमेन कुळी मां पयदा हवणेन वजे सी आखा हेरी अवल्यात ठेहरे, बाकुन लिखलो छे “इसाक सीत तारी अवल्यात कहंवायसे।” 8 मतलब डीलेन अवल्यात भगवानेन अवल्यात नी, बाकुन वायदान अवल्यातेन खानदानी गीणाय जाय। 9 काहाकी वायदान बुल जत छे: “मे टाकली टेमेन अनसारे आवीस, ने तीनी टेमे सारान एक पुर्यु हवसे।”
10 ते अतरोत नी, बाकुन जत्यार रीबका एक सी मतलब आपणा बास इसाक सी भारीस†भारीस गर्भवती हतली, 11 ते हय लग नीते ते पुर्या पयदा हतला, नीते चे काय भलो ने भुंडो कर्या हेरेसी की भगवानेन मरजी जी छे की हेरे नेवाड़ला अनसारे छे, वारु कामेन वजे सी नी बाकुन बुलावणेन वजे सी, बणी रवे। 12 चु कह्यु, “मट्लु पुर्यु‡मट्लु पुर्यु जेठा नानला पुर्यान चाकरी करसे।” 13 जसों लिखलो छे, “मे याकुप सी परम कर्यु, बाकुन एसाव सी खुसी नी हयु।”
14 हेरेसी हामु काय कहंजे, काय भगवानेन चां भुंडो छे काय? नीयाव नी हवे काय? कदी नी सय मां नीयाव हवे। 15 काहाकी चु मुसा सी कहें, “मे तीना काहना पर बी दया करने लागो ती तेरे पर दया करीस, ने तीना काहना उपर वारु दया करने लागे ती तीना पर वारु दया करीस।” 16 अळतेन जी वात नी हर करने वाळान, नी दवड़ने वाळान बाकुन दया करने वाळा भगवानेन वात छे। 17 काहाकी चुखला सास्तुर मां लिखलो छे फीरोन सी कहंलो हतलो, “मे तुसे हेरे वाटे उबु करलु छे की तुसे मे मारी ताकत देखाड़ो, ने मारे नाव सी परचार आखी कळी पर हवे।” 18 हेरेसी भगवान तीना काजे हर करे हेरेत पर दया करे, ने तीना काजे चाहत करे तीनात काजे कयड़ावाळु कर देय।
भगवानेन रीस ने हेरी दया
19 तुहुं मारे सी कहंवसु, ती भगवान माणसे पर काहा गुनु लागाड़े? भगवान मरजीन वीरुद कुण कर सके? 20 ए माणुस, तु कुण छे जे भगवान काजे उल्टु फीरीन जपाप देय? घड़ायली चीज घड़न्या काजे ज कय सके काय, “तु मेसे काजे असु काहा घड़्यु?” 21 काय कुमाहरटा काजे धुळा पर हक नी हय एक धुळान गुळा मां सी एक ठाहरु ईज्जत करे असु बणावे, ने दीसरा धुळान गुळा सी ईज्जत नी करे असु बणावे?
22 की भगवान आपसुत रीस देखाड़े ने आपणी ताकत आवणेन मरजी सी रीसेन ठाहरा, ज खत्तम करने वाटे तीयार करलो हतलो, बेसकु दम धरीन सेण कर्यु; 23 ने दयान ठाहरा पर तीनु काजे भगवान सेक-सींगार वाटे भगवान पेहलुत सी तीयार कर्यु आपसान सेक-सींगारेन धन देखाड़नेन मरजी पुरी कर्यु? 24 मतलब हामु जीनुक भगवान नी सीरप यहुदी माणसे मां सी नी, बाकुन नी-यहुदी मां सी बी बुलायु। 25 जसों भगवान होसेन किताप मां सी कहें,
“जे मारा माणसे नी हतला तीनु काजे,
मे मारा माणसे कहीन ने जे लाटेक्ला।
नी हतला तीनु काजे लाटेक्ला
मां छे कहीन।
26 ने असो हवसे की तीना जागा मां तीनु काजे कहंलो हतलो की तुहुं मारा माणसे नी हय,
तीनीत जागा पर चे जीवता भगवानेन अवल्यात कह्वायसे।”
27 यसायु ईस्रायली माणसेन बारामां आयड़ीन कहें, “चाहजे ईस्रायलेन अवल्यातेन गिन्ती समुदरेन रेतळा बराबर हवणु चाहजे, तेबी हींद्रे मां सी थुड़ाक बची जासे।” 28 काहाकी मालीक हेरो बुल कळी पर पुरो करसे धरमी सी छाटात चुखु करसे। 29 जसों यसायु पेहलुत सी कहंलु हतलु, “कदी टुळान मालीक आपणे वाटे काय खानदानी नी छुड़तु, ती आपणु सदोमेन तसा हय जाता, ने अमोरान सहलाणी रवता।”
ईस्रायल भुरसु नी करे
30 ती आपणु काय कहंजे, ज की नी-यहुदी धरमेन हेर नी करतेला, तीना काजे धरम जड़ी गुयलो मतलब ईनी धरम काजे ज भुरसा सी छे; 31 बाकुन ईस्रायली, ज्य धरमेन मुसान साहरे लिखला कायदा काजे हेर तेला तीना कायदा लग नी पुग्या। 32 काय वाटे? हेरेसी चे भुरसा सी नी, बाकुन वारलु काम करने सी हेरी हेर करतेला। चे तीनाक ठुकरायला दगड़ा पर ठुकर खादा, 33 जसों लिखलो छे:
“देखु, मे सीयोन मां एक दगड़ु,
मेक र्यु ने जु ठुकर देवाड़े ने एक चापर्यु जु गुनु कराड़े,
बाकुन चु जु हीना मां भुरसु करे।
तीनाक कदी बी लाजवायणु नी पड़े।”