1-3 Beli, Abalam e Kenan aneng fian ka belei, king kel itol ase kate, em kalel Salai u kumun du kebomi, aul banim kesu kale. Kesu kasike, Salai u ukalem weng afak waneng Kagal ukalem imok Abalam elo duleweko, bokolewomelu: “Afam waneng kalu kula!”, dangsu kale. Nimtew angom? U Abalam elo bokolewomelu: “Yawe e nelo aul banim fium kenemse kasike, ku nem weng afak waneng kalu kuluko, aul duumew kano, ne beem deiw ete aul mak kuloki te!”, dangsu kasike. Kagal bu Isiw aneng fian beem waneng ke alenalu kale. Keko beli, Abalam e akalem kalel Salai um dangsu weng be kiliko, fein gelewse kale. 4 Gelewsomelei, Abalam e Kagal ulo fein aul duumse kale. Duumei, Kagal u Salai um wiin e kalak da koumsu kasike, 5 Salai u uneko, imok Abalam elo bokolewomelu: “Kukalem sen ete! Nakalem ete nem weng afak waneng kalu dukemsi kate kame, um aul kumun so kebu ding dim e, u nelo de mit da konembu kasike. Feinka! Yawe e kom tele nem tele num ilum be diw ateyemoke tako!”, dangsu kale. 6 Dangui, Abalam e ulo yan weng mak bokoumomele: “Kom weng afak waneng nelo dunemselew kate, ku ukalem watebin waneng kebelew kasike, kom ibolow fukunin kuw geleweko, ilo beemdiw keuma!”, wangse kale. Wangei, Salai u em wangse weng be kiliko, Kagal ulo ilum fian mak duumsu kasike, Kagal u bukibuki fon unsu kale.

7 Fon unsomelui, Kagal u Sul aneng unomin deiw gui uneko, aneng ais banim, kawtiw banim dim kel teleko, ka kel ok miktem mak beem mit talsu kale. Talsomelui, Yawe em Dabalakamin Finik e ulo watemeko, 8 bokoumomele: “Salai um weng afak waneng Kagal kutaka! Nal ete teleko, nal unbelew a?”, wangse kale. Wangei, u yan weng mak bokolewomelu: “Nelo netebu waneng Salai ulo koumeko, fon talbi te.”, dangsu kale. 9 Dangui, Yawe em Dabalakamin Finik be bokoumomele: “Ku iti Salai buum mit mewso uneko, menew kuw falit angeko, ukalem afak kuw bolewka!”, wangse kale. 10 Wangeko, Yawe em Dabalakamin Finik be iti weng makso bokoumomele: “Kom muluwel dow banso kelokoliw te. Ku ki keko, im fu e nam teing bokolew te. 11 Sukum ding mak kelei, kunum aul mak dukulokolew te. Aul beem wiin e Ismael*16:11 Suda im weng sin e “Ismael” e wiin mongom so. Em mongom e kanekote: “Sunbin-Got e Weng Kilile”. dangolewka! Be, nimtew angom? Yawe e kom amemin kiliko, kom ilum be atemeko, e kulo dokokeme kasike. 12 Aul be kut samal emdiw kesomi, akalem ibolow kuw gelewko, kakamoke te. Kakabomelei, em muluwel dow ikal amen, mali kawtiw ikal amen kebomeliwi, akalem nenggelel biim muluwel dow bikati maka kelew kelew kemokoliw te.”, wangse kale. 13 Wangei, Kagal u Yawe em wiin e bokolomelu: “Kom wiin e ‘Eloloi’†16:13 Suda im weng sin e “Eloloi” e wiin mongom so. Em mongom e kanekote: “Sunbin-Got nelo Netebe”. te. Nimtew angom, nelo neteme Kamok Fian atemsi kasike!”, dangsu kale.

14 Dangsu beem mongom ete kawtiw i miktem beem wiin e “Belokiloi!”‡16:14 Wiin beem mongom e kanekote: “Finik so Bin Sunbin-Got nelo Netebe em Ok Miktem”., dangsiliw kale. Ok miktem be Kades abiw mutuk fian tele, Belet abiw mutuk fian tele, abiw mutuk fian alew biim mutuk kel alenale kale.

15 Keko beli, afam waneng Kagal um kunum aul dukusu ding kabalak e, Abalam e aul beem wiin e “Ismael!”, dangse kale.*Galesia 4:22 16 Be em ding be, Abalam em itol e 86 kese kale.