1 Beli, afam waneng Elesel u kumun du kesomi, aul mak dukulinba kesu kasike, u ukalem en sun waneng Elea ulo ibolow mesem keumeko, Sekow elo sakalale dangeko, bokolewomelu: “Aul mak dunema! Duneminba kelew tewe, ne fein kuanoki te.”, dangsu kale. 2 Dangui, Sekow e kaisuw fian mak keumeko, afam waneng buulo kitil weng mak bokoumomele: “Yawe ete kuw kukalem kumun net kekembe kae! Nete Yawe ba kasike, ne ki keko, kulo aul mak nam dukemi te.”, wangse kale. 3 Wangei, u yan weng mak bokolewomelu: “Ku Bilka, nem sak weng afak waneng buulo wamduko, aul mak duuma! Duumewi, u nem dulum elo aul mali mak kailuka!”, dangsu kale. 4 Dangeko, fein, ukalem sak weng afak waneng Bilka ukalem imok Sekow elo dulewui, e um weng kili geleweko, Elesel um sak weng afak waneng Bilka buulo fein wamduse kale. 5 Wamdusomelei, Bilka u fein aul kumun keumeko, kunum aul mak dukusu kale. 6 Dukusomelui, Elesel u bokolomelu: “Sunbin-Got e nelo diw netemsomi, nem dakalakamin akal wosuko, kunum aul mak dunemse kae!”, angsu kale. Angesomi, aul beem wiin e “Dan”*30:6 Suda im weng sin e “Dan” e wiin mongom so. Em mongom e kanekote: “Diwyemin”. dangsu kale.

7 Dangesomelui, Bilka u iti aul kumun keumeko, kunum aul makso dukusu kale. 8 Dukului, Elesel u bokolomelu: “Nakalem en so bonge bonge kesomi, bakiumomin kitil kebi te.”, angsu kasike, aul beem wiin e Nafatali†30:8 Suda im weng sin e “Nafatali” e wiin mongom so. Em mongom e kanekote: “Bonge Bonge”. dangsu kale.

9 Beli, sun waneng Elea u atemute: Ukalem akati aul makso kailomin em deiw e banimumse kasike, u ukalem sak weng afak waneng Silfa ukati kuluko, imok Sekow em mit elo dulewui, e ulo wamduko, 10 aul duumse kale. Duumei, u fein seiw kunum aul mak dukusu kale. 11 Dukului, Elea u bokolomelu: “Nete ken kelika!”, angeko, aul beem wiin e “Gat”‡30:11 Suda im weng sin e “Gat” e wiin mongom so. Em mongom e kanekote: “Ken Kelika”., dangsu kale.

12 Dangui, Silfa iti aul kumun keko, iti kunum aul mak dukusu kale. 13 Dukului, Elea u bokolomelu: “Yakai! Ne kalfong kalfong fian ati mak kuli te! Waneng angom alik alik i nelo netemeko, ‘Kalfong kalfong so waneng kuta!’, nangbokoliw te!”, angeko, aul beem wiin e “Asel”§30:13 Suda im weng sin e “Asel” e wiin mongom so. Em mongom e kanekote: “Kalfongemin”. dangsu kale.

14 Beli, deiw mak ding mak kabalak e, wit dem em kulomin ding dim kelei, Uluben e uneko, akalem musun beem dim e ais meliw dem ban mak atemeko, kuluko, akalem auk Elea ulo deum talse kale. Deum telei, auk buum neng Elesel u meliw kemin ais dem beelo atemeko, en Elea ulo geenin fian mak geumeko, bokoumomelu: “Meliw dem mak nakal nemena! Nemena!”, wangsu kale. 15 Wangui, Elea u neng ulo kaisuw yan weng bokoumomelu: “Wee kutaka! Ku nolomin kebelew a? Emisik ding dim bakate, ku nakalem imok elo kuluselew te. Kameem emteben em ding dim bakate, ku iti beemdiw keko, nem min em meliw dem akati kulomin ibolow kemew kae?”, wangsu kale. Wangbui, Elesel u iti weng mak bokoumomelu: “Ku kilila! Kom min em meliw kemin dem anung mak dunemokolew beem yan e kameem kutiliw kabalak e, imok Sekow e kom am telei, kuso eso yemkal keko, kal bonggu akalokoliw te!”, wangsu kale.

16 Wangui, kuinse ding kabalak e, Sekow e akalem musun koleweko, telei, sun waneng Elea u em fukun uneko, bokolewomelu: “Nem min em meliw kemin dem so kuso akalomin em yan wenkembi kasike, ku kame nem am matem tololewka!”, dangsu kale. Dangui, e fein um weng kiliko, gelewsomelei, fein beem kutiliw ding be, yemkal bi kal bonggu akalsiliw kale. 17 Akalsomeliwi, Sunbin-Got e Elea um gaanin be kiliko, dokoumse kasike, u iti aul kumun kesomelui, fe e, u ketket kel em kunum aul mak dukusu kale. 18 Dukusomelui, u bokolomelu: “Nem sak weng afak waneng buulo nakalem imok dulewsi te. Dulewii, Sunbin-Got e kanelewsi beem yan kame ken kuw dunemse kae.”, angeko, dukusu aul beem wiin e “Isakal”**30:18 Suda im weng sin e “Isakal” e wiin mongom so. Em mongom e kanekote: “Yan Ken”. dangsu kale.

19 Dangesomelui, Elea u iti aul kumuneko, gung kel em kunum aul mak dukusu kale. 20 Dukuko, bokolomelu: “Sunbin-Got e nelo ibolow folok kenemeko, on kisol emdiw mak sak dunemse te! Gung kel kunum minggil mak kail koyemsomi, nem imok em dulum elo dukulewsi te. Kame, e nelo wangweng kenemoke te!”, angeko, min beem wiin e “Sebulun”,††30:20 Suda im Weng sin e “Sebulon” e wiin mongom so. Em mongom ete “Namsule”. dangsu kale.

21 Keko beli, u iti aul kumuneko, waneng aul mak dukuko, um wiin e “Daina” wangsu kale.

22-23 Keko beli, Sunbin-Got e Elesel um kal ilum watemeko, ukalem gaanin kilisomi, ulo dokoumei, fe e, ukati aul kumun keumeko, kunum aul mak dukusu kale. Dukuko, bokolomelu: “Kame, Sunbin-Got e nem kal anggil ilum be banim kenemse te.”, angeko, 24 min em wiin e “Yosew”‡‡30:24 Suda im weng sin e “Yosew” e wiin mongom alew so te. Mak em mongom ete “Anggil Ilum Banime”, kelei, mak em mongom ete “Makso Duneme”., dangeko, weng makso bokolomelu: “Yawe e min makso duneme kae!”, angsu kale.

25-26 Beli, Elesel um Yosew elo dukusu ding kabalak e, Sekow e akalem okis Alaban elo bokolewomele: “Mam kutaka! Ku nem aulkembisi aluwbamin beelo kilele ibolow fukuneko, neso, nakalem aul waneng iso, alik alik nulo ‘Ki ka!’, yangesomelewi, koyemew kano, nu iti nakalem am dim elo unokoluw te.”, dangse kale. 27-28 Dangei, Alaban e alol elo bokolewomele: “Yemol kutaka! Ne selew selew kunum imdiw kesomi, atemite: Yawe e kulo bamki so kekemkabe kasike, kom neso alakabelew ding dim kabalak, e nakati bamki so kenemei, kilele atemsi te. Kasike kame, ku nam unew te! Kate, ku ‘Kom aluwbamin beem yan kale kulo yo!’, nangew tewe, ne kom weng kiliko, bokonemew yan be fein dukemoki.”, dangse kale. 29 Dangei, Sekow e alol elo yan weng bokolewomele: “Kom aluwbamin kilele aluwkembisi kasike, siwsiw so meme so alik alik samal bi bamki so keyemii, bamda nengso nengso kesiliw te. 30 Nem talsi ding dim kabalak e, i angin fong kuw kebisiliw kate kame, Yawe e nem aluwbamin beelo bamki so kenemei, i demdem kesiliw bakate. Kate, nal em tit ete, ne nakalem aul waneng biim ibolow akati fukunsomi, biim dulum on kisol mak kuluyemoki a?”, dangse kale. 31 Dangei, Alaban e elo dakalako, bokolewomele: “Kasike, kom aluwkembamin beem dulum elote nimtew ete dukemoki a?”, dangei, Sekow e yan weng bokolewomele: “Mesesem eisneng mak nelo nam dunemew te. Kate, ku nem weng kale kiliko, fukunsomi, ‘Ken kai!’, nangew tewe, ne kom siwsiw so meme so bi iti fein yeteboki te. 32 Kame kuw, ne uneko, kom siwsiw so meme so samal angom alik alik biilo diw yetebam uneko, ilo amen amen kada kada keyemoki te. Siwsiw men atin kuw mikil nam kebiliw so, alik alik tikili tukalat aliw so, boketket so, samaliw so, siwsiw so meme so bi ne nakalem aluwbamin beem yan beem dulum kuloki te. 33 Nal em tit ete ku nem fukun teleko, nem yan kulukabi siwsiw so meme so alik alik ilo diw yetemewete: Samal tikili tukalat so, boketket aliw so, samaliw so, siwsiw atin kuw mikil nam kelinba samal makmak kuw alik alik biim mutuk belei, atemew tewe, ‘Yakut kese kai!’, nangeko, kal kelolewka!”, dangse kale. 34 Dangei, Alaban e bokolewomele: “Kenka! Kom bokonemew weng beelo gelewuma!”, dangse kale.

35 Dangeko, beem ding bete, Alaban e uneko, siwsiw so meme so samal tikili tukalat so, boketket so, samaliw so, samal men atin kuw mikil nam so bi alik alik ilo kuluko, akalem muluwel ilo amen amen kuw keyemeko, “Ilo yetebina!”, yangse kale. 36 Yangeko, akalem samal bi so, Sekow em yetemalakabe samal bi so singam ka da ka da keyembelei, yemamas kel ding kese kale. Kelei, Sekow e Alaban em siwsiw so meme so ilo yetemalenale kale.

37 Yetebomelei, Sekow e ais alemsal biim teing mali mak kuluko, fut bolin atew keleweko, biim kal anung anung bisbos din yak kuw kelewsomi, anung anung yemen din atew yak kelewse kale. 38-39 Kelewei, siwsiw so meme so biim teleko, ok waneko, fakalaliw em ding dim e, e ais teing fut bose emdiw be kuluko, biim ok wanenaliw mit kel doung kolew yak yak kelewse kale. Keko beli, samal biim men duku kemiw ding dim bakate, i men tikili tukalat so, boketket so, samaliw so kuw dukusiliw kale.

40-41 Keko beli, kitil so yanggus samal biim fakalaliw ding dim bakate, Sekow e imok tikili tukalat so, boketket so, samaliw so, yanggus biim dim kel moko, ais teing fut bose emdiw biim mimyak kel mo koyemei, i kal kel asolsiliw kale. Kanelewsomi, samal biim tikili tukalat so, boketket so, samaliw so, atin kuw mikil nam so men kitil kuw dukuliw biilo takala amen amen kuw keyemsomi, akalem dulum elo kuw dukuse kale. 42 Kate, falut kitil banim kebiliw samal yanggus biim asoliw ding dim bakate, Sekow e ais teing fut bomin emdiw be biim mit mewso molinba kese kale. Kanese kasike, akalem siwsiw so meme so bi kitil nam kitil nam kuw kesiliw kate, Alaban em samal i sak falut nam kesiliw kale. 43 Kenese kasike, Sekow e kunum kisol so wiin fian so kunum kamok kesomelei, siwsiw so, meme so, kamel so, donki so, yamgel kesomi, akalem sak weng afak kunum waneng ikati demdem banso kelewsiliw kale.