3 Keko beli, ketket teben kel kunum mak i yan yout nam kunum mak debele talsiliw kale. 4 Teleko, “Yesus em mit mewso debele unuma o!”, angsiliw kate, “Am be gekbiliw!”, angomi, i yout kunum beelo am gong elo debele uneko, Yesus em mobe dim em mewso dim kel am kon fat kelewsomi, yout nam kunum so, akalem akalkemin dim beso, alik alik be ma kuw sok giko, malak da kolewsiliw kale. 5 Kolewiwi, Yesus e ikalem fein ibolow be ateyemeko, yout kunum beelo bokolewomele: “Aul kutaka! Kom ibolow sili sili nam akal ne kuluko, kokemika!”, dangse kale. 6 Dangei, ka biliw Sunbin-Got em kukuyemin weng kalem aulewko, kukuyemkabiliw kunum i Yesus em dangse weng be kiliko, yol angeko, ikalem ibolow tem kel bokolew bokolew kelomeliw: 7 “Yakai! Nimtew angom ete kunum be weng be bokolewbe ye? E Sunbin-Got em abin kuluko, em wiin dawkatikabe te! Fein! Sunbin-Got ete kuw ki keko, mak kunum mak em ibolow sili sili nam kulu koloke te.”, ange ange kesiliw kale. 8 Angiwi, angbiliw beem ding dim bakate, Yesus e akalem ibolow tem kel biim ibolow tem bokolew bokolew keliw weng be kal keko, ilo yan weng mak bokoyemomele: “Yu nimtew angom ete weng banso banso kebomi, ibolow tem tem kebiliw a? 9 Ne yout nam kunum beelo bokolewomeli: ‘Kom ibolow sili nam be kulu kokemika!’, angi tewe, weng be fian weng kele sako? Angeko, elo bokolewomeli: ‘Ku teineko, kukalem akalkemin dim be kingtiko, kakama!’, angi tewe, dangoki weng be fong gel weng kele sako? Babo! 10 Kate, yom kilele kal keko, ‘Sunbin-Got e Kawtiw Aul nem dim elo kitil auk so be dunembe kasike, ne ki keko, kawin dim kaleem kunum waneng im ibolow sili sili nam sak misim kuw kulu koyemkabi te.’, nangbiliw beem mongom ete yu kame kilele kiliko, atemina!”, yangse kale. Yangeko, kunum yout nam kunum beelo bokolewomele: 11 “Kame kutaka! Ku teineko, kukalem abin kon be kulu auleko, kukalem am elo una!”, dangse kale. 12 Dangei, yout nam kunum be fongate akate baba teineko, akalem akalkemin abin kon be kulu auleko, kut unei, i atemsiliw kale. Keko beli, ka biliw kawtiw i kanele eisneng be atemeko, yol angeko, Sunbin-Got em wiin fian daoleweko, bokolomeliw: “Feinka! Sua e, kalakaneko eisneng mak nu ateminba kekabuluw te!”, ange ange kesiliw kale.

13 Beli, Yesus e iti am be koleweko, Galili okmun benggew kalo unomin kese kale. Kelei, kunum waneng alik alik bi eso makuw bonggusomeliwi, e ilo kukuyemkem diliko, unse kale. 14 Unbe ding dim be, e mak kunum mak atemse kale. Kunum be Alfius em min Elibai*2:14 Kal kunum i ibolow fukunomeliw: Elibai em wiin mak e Matyu ete kale. ete kale. Kunum be akalem kawtiw ilo maka keyemkabe Ulom abiw mutuk fian beem aluwkabe kunum kese kale. Kesomi, akalem tum win kulamin am tem teinse ding dim bakate, Yesus e elo atemeko, elo gaalewomele: “Ku nelo nenggelew tala o!”, dangse kale. Dangei, e em gaalewe weng be kiliko, moko, Yesus elo fein gelew unse kale.

15 Gelew unesomelei, Yesus e Elibai beem am kel wanin wanomin unse kale. Unse kate, on kisol fokoliwi, deimaliw kawtiw banban so, mali kawtiw Suda kawtiw im sawa weng afak keko, binba sakok kebiliw kawtiw iso, kawtiw banban bi Yesus elo gelewkakabiliw kasike, alik alik kawtiw bikati Elibai beem am kuw bonggusomi, wensan teineko, Yesus eso em gelewkabiliw kunum iso, wanin fian mak wansiliw kale. 16 Wanbomeliwi, mali Falisi kunum im Sunbin-Got em kukuyemin weng kalem aulewko, kukuyemkabiliw kunum i Yesus em kanebe be atemeko, “Ebe! On kisol fokoliwi, deimaliw kawtiw so, sawa weng afak keko, binba sakok kebiliw kawtiw iso wanin wanbe kae!”, angomi, atemeko, weng nutnut weng bokolew bokolew kesomi, Yesus em gelewkabiliw kunum biilo dakalalomeliw: “Nimtew angom ete kunum be kunum waneng sili sili nam so, kisol fokoliwi, deimeliw kunum kukuw wa kekabiliw kunum iso, bongguko, ok wane, wanin wane wanakabe a?”, yangsiliw kale.*Matyu 11:19 17 Yangeko, dakalakamiwi, Yesus e im weng bakabiliw weng be kiliko, ilo yan weng mak bokoyemomele: “Abung geyembin kunum e wakamin banim kawtiw ilo dokoyeminbakabe kate, wakamin so kebiliw kawtiw ilo kuw dokoyemkabe te. Feinka! Ne kiol kunum waneng kawtiw im dulum telinba te. Sili sili kunum waneng ilo gaayemomin beem mongom ete talsi te.”, yangse kale.

18 Beli, kawtiw ok da koyemin kunum Sion em gelewkabiliw kunum so, Falisi kunum im gelewkabiliw kunum iso, alik alik bi wanin tokomin kukuw gelewkabiliw kasike, mali kawtiw mak teleko, Yesus elo dakalalomeliw: “Sion so, Falisi kunum so biim gelewkabiliw kunum i deiw mak deiw mak ding e wanin tokokabiliw kate, nimtew angom ete kom gelewkabiliw kunum i wanin wanenkakabiliw a?”, dangsiliw kale. 19 Dangiwi, Yesus e ilo kal kikis kemin dawol em fakam weng mak bokoyemomele: “Kunum mak em waneng kulei, kikis yemkal biim wanin wanbomi, wensanbiliw kawtiw iso biliw ding dim bakate, mali yu ki keko, bokoyemomeliw: ‘Kame yu wanin wanomin be tokolina!’, angokoliw sako? Babo! Waneng kuluse kunum beem yuso be ding dim e, yu kanelom wanin tokolokoliw te! 20 Kate deiw mak ding mak em keloke ding dim kabalak e, waneng kuluse kunum be iso binba keloke kasike, i elo nam atemiw te. Beem ding dim kabalak be, akalem akunum kusel ikati fein wanin tokolokoliw te.”, yangse kale.

21 Yangesomi, iti fakam weng mak bokoyemomele: “Mali kawtiw mak i ilim anung kikis mak kuluko, ming em dim elo nam beneliw te. Nimtew angom? Kaneliw tewe, ilim beem gingiw ding dim e, ilim kikis be fong betel kebomi, kilelsiliw ilim be fufuw keko, iti atin kuw wa wa kelewoke kasike.

22 Yu kililina! Nem weng kikis e wain ok kikis em kiskiw atew te. Mali kawtiw mak i wain ok kikis be wain ok sen ming tem elo nam daliw te.†2:22 Suda kawtiw im kukuw e kanekote: Iémeme asomi, beem kal kulu beneko, ok sen kelewkabiliw te. Beli, wain ok kikis e ok sen beem tem dako, dukubiliw tewe, tiak ding keko, ding fenbiliwi, wain ok be fasusomelei, gekeko, ok sen be wenkabe te. Daliw tewe, wain ok kikis be wain ok sen ming tem daliw be dakaleko, wain ok beem kitil e ok sen be bikineko, kawtoloke te. Kawtolei, wain ok akal, ok sen akal atin kuw wa keloke kasike. Feinka! Wain ok kikis be wain ok sen kikis tem elo akalem tem dakamoliwka!”, yangse kale.

23 Beli, deiw mak ding mak, iti finengdakamin ding Sabat kele ding dim e, Yesus so, akalem gelewkabiliw kunum iso, i wit wanin bilal musun mak em mutuk fok unsiliw kale. Unbomeliwi, akalem gelewkabiliw kunum bi wit sen falit de mayak dako, dakaluko, wanen diliko, yak yak unsiliw kale. 24 Kem diliko, unbiliwi, mali Falisi kunum mak im kanesiliw be yetemeko, Yesus elo bokolewomeliw: “Wee kutaka! Nimtew angom ete kunum bi finengdakamin ding Sabat kaleem kukuw gelewinba kesomi, sak sakok kuw gelewkabiliw a?”, yangsiliw kale.*Sawa Weng 23:25 25 Yangiwi, Yesus e ilo yan weng mak bokoyemomele: “Yu kililina! Yu sua kel emisik kamok fian ke alenale Debit em kanese sang mak teing bokoko, ateminba kebiliw sako? Deiw mak ding mak, em emisik kamok fian kelinba kese ding kabalak e, eso akalem awkunum kusel iso, i wanin sukum kesomi, yemen tew teinsiliw kasike,*1 Samuel 21:1-6 26 i Sunbin-Got em yol am kawtem unsiliw kale. Beem ding dim bakate, Abiatal e kunum ayem sel kebise kale. Kebomelei, Debit e am yol beem dukusiliw belet wanin ayem be kuluko, waneko, akalem iso biliw kunum bikati yemense kale. Kate, Sunbin-Got em belet wanin ayem be Sunbin-Got em am yol em kunum ayem kunum bikalem kuw wanakabiliw wanin kate kale.”, yangse kale.*Kunum Ayem 24:5-9 27 Yangeko, iti weng makso ilo bokoyemomele: “Yu kilele ibolow fukunina! Sunbin-Got e finengdakamin ding Sabat dukuko, kawtiw biim dulum keyemale kale. Feinka! E kawtiw dukuko, finengdakamin ding Sabat beem dulum kelinba kese te.*Sawa Weng 5:14 28 Kate yu kililina! Nakalem ete Kawtiw Aul keko, Kamok Fian kebi kasike, ne finengdakamin ding Sabat beem sawa kale bakilewkabika.”, yangse kale.