1 जालू फेस्तुस राज्यपाले ऐ गल्ल पक्की किती कि असां जाजे पर इतालिया प्रदेशे जो जांणा है, तां उना पौलुसे कने कुछ होर केदियां जो भी युलियुस नाऐ दे महाराजा औगुस्तुसे दिया पलटना दे इक सरदारे दे हथे सौंपी दिता। 2 अद्रमुत्तियुम शेहरे दे इक जाजे पर जड़ा आसिया प्रदेशे दे कंढे दिया जगा जो जाणे तांई तैयार था, असां उस पर चढ़ी करी समुंद्री यात्रा शुरू किती, कने अरिस्तर्खुस नाऐ दा इक माणु जड़ा मकिदुनी प्रदेशे दे थिस्सलुनीके शेहरे दा बासी था, सै साड़े सोगी था।

3 दुऐ रोजे असां सैदा शेहरे च पुज्जी गे कने युलियुसे पौलुसे पर कृपा करिरी उसयो दोस्तां बाल जाणा दिता ताकि उना ला जरूरी चीजां लेई ओऐ। 4 ओथु ला असां दुबारा यात्रा शुरू किती कने होआ दा रुख उल्टा होणे दिया बजा ला असां साइप्रस टापू दिया आड़ा च होईकरी चले; 5 कने असां समुंद्री यात्रा करदे होए किलिकिया प्रदेश कने पंफूलिया शेहरे दे तट दे बखे ला होईकरी लूसिया प्रदेशे दे मुरा शेहरे च पुज्जे। 6 ओथु सुबेदारे जो सिकंदरिया शेहरे दा इक जाज इतालिया प्रदेशे जो जांदा होया मिल्ला, कने उनी सांझो उस जाजे पर चढ़ाई दिता।

7 असां बड़े रोजा दीकर बले-बले यात्रा किती। साड़ा कनिदुस शेहरे दीकर पुजणा मुशकिल होई गिया था क्योंकि होआ उल्टी दिशा च चलिया थी, इस तांई असां क्रेते टापू दिया आड़ा चे, सलमोने दे इक छोटे दे टापू दे बखे ला होईकरी अग्गे बदे। 8 कने मुशकिला ला उदे किनारे-किनारे चली करी शुभलंगरबारी नाऐ दिया इकी जगा च पुज्जे, जिथू ला लसया शेहर नेड़े था।

9 जालू मते रोज बिती गे थे, कने समुंद्री यात्रा हुण बड़ी खतरनाख होई गियो थी क्योंकि सर्दियां दे मौसमे च होंणे बाला पश्चाताप दी बलि दा त्योहारे होई गिया था, कने ऐ सेई मौसम था ऐसा मौसम शुरू होई गिया था जालू समुन्द्र च मौसम बड़ा तूफानी होई जांदा है, इस तांई पौलुसे उना जो चेताबनी देईकरी बोलया, 10 “हे सज्जनो, मिंजो ऐसा लग्गा दा है कि साड़ी ऐ यात्रा बड़ी नुकसानदायक है। ना सिर्फ जाजे कने समाने दा पर साड़े प्राणा दा भी नुकसान होणेबाला है।” 11 पर सूबेदारां जाजे दे कपताने कने जाजे दे मालिके दियां गल्लां जो पौलुसे दियां गल्लां ला बदीकरी मनया।

12 कने ऐ शुभलंगरबारी बन्दरगाह सर्दियां कटणे तांई खरी नी थी; इस तांई मतयां दा बिचार होया कि ओथु ला अग्गे चली करी कुसी तरिके ला होई सके तां फिनिक्स बन्दरगाह च पुज्जी करी सर्दियां कटन। ऐ तां क्रेते टापू दी इक बन्दरगाह है जिसा दा दरबाजा दक्षिण-पश्चिम कने उत्तर-पश्चिम दिशा च है।

13 जालू थोड़ी-थोड़ी दक्षिण होआ चलणा लग्गी, तां उना सोचया की उना दी योजना पूरी करणे तांई ठीक बकत है, इस तांई उना लंगर चुकया कने क्रेते टापू दे किनारे ला होंदे होऐ अग्गे बदणा लग्गे।

14 पर अचानक क्रेते टापू दिया जमिना ला इक बडा तूफान उठया, जिसयो उतरपुर्वी तूफान बोलदे न। 15 जालू तूफान जाजे ला टकराया, तां जाज तुफाने अग्गे नी टिकी सकया, इस तांई असां उसयो होआ दे साबे जाणा दिता, कने इयां ही होआ सोगी चलदे गे।

16 तालू असां कौदा नाऐ दे इक टापूऐ दिया आड़ा च अग्गे बदे कने बड़िया मुशकिला ला जाजे दी जीवनरक्षक किस्तिया जो बचाया। 17 फिरी जाजे च कम्म करणे बालयां जीवनरक्षक किस्तिया जो चुकी करी ठीक किता, कने उना मजबूती तांई पतवार जो चारो पासे ला रस्सियां ला बन्नी दिता, कने सुरतिस दिया खाड़िया दिया रेता च फसी जाणे दे डरे ला, उना लंगरे जो थोड़ा थले उतारी करी जाजे जो होआ दे बहाबे सोगी-सोगी रुड़ने तांई छडी दिता। 18 कने जालू दुज्जे रोजे सांझो तुफाने दिया बजा ला धक्के लगे लगणा, तां सै जाजे ला माल फेंकणा लग्गे;

19 कने तरिऐ रोजे उना अपणे हथा ला जाजे दा साजो समान भी फेंकी दिता। 20 कने जालू मतयां रोजां दीकर ना सूरज ना तारे मिल्ले, कने तूफान लगातार चलया था, तां आखरी च साड़े बचणे दी सारी आस खत्म होंदी गेई।*उस बकत सूरज कने तारयां दा इस्तेमाल दिशा दा पता लगाणे तांई करदे थे

21 जालू उना मते रोजां दीकर कुछ नी खादा, तां पौलुसे उना दे बिच खड़ोई करी बोलया, “हे लोको, तुहांजो मेरी सलाह मनणी चाईदी थी, क्रेते टापू ला अग्गे नी जांदे, तां ना ऐ मुसीबत ओंदी कने ना ऐ घाटा होंदा।

22 पर मैं हुण तुसां जो समझांदा है कि हिम्मत रखा, क्योंकि तुसां चे कुसी दे भी प्राण नी जाणे, पर सिर्फ जाजे दा नाश होणा। 23 क्योंकि परमेश्वर जिदा मैं है, कने जिदी सेबा मैं करदा है, उदे स्वर्गदूते पिछली राती मेरे बाल आई करी बोलया, 24 हे पौलुस, डर मत। तिजो महाराजा कैसरे दे सामणे खड़ा होणा जरूरी है। कने परमेश्वरे सबना जो बचाई लेंणा है जड़े तेरे सोगी यात्रा करा दे न। 25 इस तांई, हे भाईयो, हिम्मत रखा; क्योंकि मैं परमेश्वरे पर भरोसा करदा है, कि जियां मिंजो ला बोलया है, तियां ही होणा है। 26 पर साड़ा जाज कुसी टापूऐ पर टकराई टूटी जाणा।”

27 जालू चौदमी रात होई, कने असां अद्रिया समुद्रे च भटका दे थे, तां अधिया राती जाजे च कम्म करणे बालयां अणदाजा लाया कि असां कुसी देशे दे बखे पुजणे बाले न। 28 उना समुंद्रे दी गेहराई नापी तां सेंती मीटर निकली कने थोड़ा अग्गे जाई करी फिरी नापया तां सताईस मीटर निकलया। 29 तालू पथरीली जगा ला टकराणे दे डरे ला उना जाजे दे पिच्छे चार लंगर पाऐ, कने ब्याग होणे दी कामना करदे रे।

30 पर जाजे पर कम्म करणे बाले जाजे ला नठणा चांदे थे, कने उना जाजे दे सामणे लंगर पांणे दे बहाने जान बचाणे बाली किस्ती समुद्रे च उतारी दिती; 31 तां पौलुसे सिपाईयां कने सुबेदारां जो बोलया, “अगर ऐ जाजे पर नी रे, तां तुसां भी नी बची सकदे।” 32 तालू सिपाईयां रसियाँ बडी करी सै किस्ती फेंकी दिती।

33 जालू ब्याग होणे बाली थी, तां पौलुसे ऐ बोली करी, सबना जो रोटी खांणे तांई बिनती किती, “अज चौदा रोज होए कि तुसां चिंता करिरी भूखे रे, कने कुछ नी खादा। 34 इस तांई तुहांजो ला बिनती करदा है कि कुछ खाई लिया, जिसला तुसां बची सकन, क्योंकि तुसां चे कूसदा भी कोई बाल बांका नी होणा।” 35 कने ऐ बोली करी उनी रोटी लेईकरी सबना दे सामणे परमेश्वरे दा धन्याबाद किता कने तोड़ी करी खांणा लग्गा।

36 तालू उना सारयां जो हिम्मत मिल्ली कने रोटी खांणा लग्गे। 37 असां सारे मिली करी जाजे पर दो सो छिहतर जणे थे। 38 जालू सै रोटी खाई करी रजी गे, तां कणका जो समुद्रे च फेंकी करी जाजे जो हलका करणा लग्गे।

39 जालू दिन निकलया, तां उना उसी देशे जो नी पछेणया, पर इक खाड़ी दिखी जिसा दा चौरस किनारा था, कने बिचार किता कि होई सके तां जाजे जो ओथु लेईकरी चलन। 40 तालू उना लंगरा जो खोली करी समुद्रे च छडी दिता कने उसी बेले पाल दे रस्से खोली दिते, कने होआ दे सामणे अगला पाल चढ़ाई करी किनारे पासे चले। 41 पर जाज रेते दे डेरे ला टकराई गिया कने जाजे दा अगला हिस्सा रेते च फसी गिया, पर जाजे दा पिछला हिस्सा लेहरां दे जोरे ला टूटणा लगी पिया।

42 तालू सपाइयां दा ऐ बिचार होया कि केदियां जो मारी देंन, ऐसा ना होए कि कोई तेरी करी नठी जा। 43 पर सूबेदारां पौलुसे जो बचाणे तांई उना जो इस बिचार ला रोकया, कने ऐ बोलया, कि जड़े तेरी सकदे न, सै पेहले छाल देईकरी किनारे जो निकली जा। 44 कने बाकी कोई पटरां पर, कने कोई जाजे दियां होर चीजा दे सहारे निकली जा, कने इसा रीतिया ने सारे जमिना पर बची निकले।