1 उदे बाद यीशु शेहरे-शेहरे च कने ग्रांऐ-ग्रांऐ च जाई करी प्रचार करदे होऐ कने परमेश्वरे दे राज्य दा शुभसमाचार सुणाणे लग्गा कने सै बाहरा चेले भी उदे सोगी थे। 2 कने कुछ जनानिया भी जिना जो बुरियां आत्मा कने बिमारियाँ ला ठीक कितया था, कने उना दे ना ऐ न: मरियम जड़ी मगदल ग्रां ला थी, जिसा ला सत बुरियां आत्मा निकलियाँ थियां। 3 कने राजा हेरोदेस दे भण्डारी खोजा दी घरेबाला योअन्ना कने सूसन्नाह कने मतियां जनानिया अपणिया कमाईया ने यीशु कने उदे चेलयां दी सेबा करदियां थियां।

4 जालू मती भरी भीड़ गिठी होई, कने शेहरे-शेहरे दे लोक उदे बाल चली ओंदे थे, तां उनी इक कहाणी उना जो सुणाई: 5 इक किसान अपणे खेतरे च बी रांणे तांई निकलया: रांदे बेले थोड़े बी रस्ते दे बखे पेयी गे कने सै तां पंछियां आई करी चुगी ले। 6 कने थोड़े बी पथरलिया जमिना पर पे जिथू उसयो जादा मिटी नी मिली, कने जादा मिटी नी होणे दिया बजा ने तौली लूंगी पै, कने जालू खड़ी धुप पेई, तां सै फकुई गे, क्योंकि उना दियां जड़ा डुगियां नी थियां तां सै सुकी गियां। 7 कने थोड़े बी झिल्लां च पै, कने जालू झिल्ल बदे तां उना से बी डकी ले, कने उना फल नी दिता। 8 पर थोड़े बी खरिया जमिना पर पे, कने सै बी लुंगे, कने मते सारे फल देणेबाले होए; केईयां ती गुणा, केईयां सठ गुणा, केईयां सौ गुणा फल दिता। “ऐ बोलिकरी उनी जोरे ने बोलया, जिस बाल सुणने तांई कन्न न सै ध्यान लाईकरी गल्ला जो सुणे, कने इसा गल्ला जो समझी ले।”

9 उदे चेलयाँ उसयो पुछया, “की इसा कहाणिया दा क्या मतलव है?” 10 उनी बोलया, तुहांजो परमेश्वरे दे राज्य दे भेदां जो समझणे दी समझ दितियो है, पर ऐ कहाणियां बाकियां तांई सुणादा है, इस तांई की “सै दिखदे होऐ भी ना दीखन, कने सुणदे होऐ भी ना समझन।”

11 इसा कहाणिया दा मतलब ऐ की: बी तां परमेश्वरे दा बचन है। 12 रस्ते बखे बाले सै न, जिना सुणाया; पर शैतान झट पट जादां कने उना दे मने ला बचन कडी दिन्दा है, ताकि कुथी इयां ना होये की सै भरोसा करी लेन कने उना दा उद्धार होई जा। 13 कने जड़ा पथरिलिया जमिना च राया था, ऐ सै माणु न, जड़े बचना जो सुणीकरी उना जो झट खुशिया ने ग्रहण करी लेंदे न। पर परमेश्वर दे बचना जो मने दिया गहराईया च बदणा नी दिन्दे, उदे बाद जालू बचने दिया बजा ने उना पर कला क्लेश या परेशानी होंदी है, तां सै बचना ला पिच्छे हट्टी जांदे न। 14 जड़े बी झिल्लां च पियो न, ऐ सै माणु न जिना बचन सुणया, पर सै संसारे दियां चिंता जो लेईकरी दुखी, कने संसारिक चिंजा दा लालच उना दे मने च रेंदा है, ऐ सब परमेश्वरे दे बचना च रुकावट पांदा है। कने सै बचन उना तांई फायदेमंद नी होंदा। 15 कने खरियाँ जमिना बाले बी सै न, जड़े बचन सुणीकरी भले कने खरे मने ने सम्भाली करी रखदे न, सै सबर ने फल दिन्दे न।

16 कोई दिय्या बाली करी भांडे ने नी ढकदा है, कने ना मंझे हेठ रखदा है, पर धारिया पर रखदे न, ताकि अंदर ओणे बालयां जो लौ होऐ। 17 “क्योंकि जड़ा कुछ भी लुकया है, सै सामणे करणा है; कने हर इक गुप्त गल्ल सामणे आई जाणी है। 18 जिना बाल समझणे दी इच्छा है जड़ा परमेश्वर सिखांदा है, उसयो परमेश्वरे होर समझ देणी, पर जड़ा समझणे दी इच्छा नी रखदा, की मैं क्या सिखादां, तां सै जड़ा समझया है, परमेश्वरे सै भी उसला लेई लेणा।”

19 उदी माता कने उदे भाई उस बाल आऐ, पर भीड़ा दिया बजा ने मिली नी सके। 20 कने उसयो बोलया, “तेरी माता कने तेरे भाई बाहर खड़ोतयो न कने तिजो ने मिलणा चांदे न।” 21 उनी उदे जबाब च बोलया, “मेरी माता कने मेरे भाई ऐ ही न, जड़े परमेश्वरे दे बचना जो सुणदे कने मंदे न।”

22 फिरी इक रोज सै कने उदे चेले किस्तिया पर चढ़े, कने उनी उना ने बोलया, “ओआ, गलील झीला दे पार चलदे न।” कने उना किस्ति खोली दिती। 23 जालू किस्ति चलियो थी तां सै सोई गिया: कने झीला च तूफान आई गिया, कने किस्ति पाणिऐ ने भरूणा लगी पेई कने सै खतरे च थे। 24 तालू उना यीशुऐ बखे आई करी उसयो जगाया, कने बोलया, “हे स्वामी। हे स्वामी। असां डूबणा लगी पियो न।” तालू उनी उठी करी पाणिऐ कने तुफाने जो डांटया कने सै रुकी गे, कने सै शान्त होई गिया। 25 यीशुऐ उना ने बोलया, तुहाड़ा भरोसा कुथु था? पर सै डरी गे, कने हेरान होईकरी अपु चे बोलणा लग्गे, “ऐ कदिया माणु है? ऐथू दीकर की तूफान कने लैहरां भी इदा हुकम मंदे न।”

26 फिरी सै गिरासे दे लोकां दे देशे च पुज्जे, जड़ा उसी पार गलील प्रदेशे दे सामणे है। 27 जालू सै किनारे पर उतरया, तां उस ग्रांऐ दा इक माणु उसयो मिल्ला, जिदे च बुरी आत्मा थी। कने सै कपड़े नी पांदा था, कने ना घरे रेंदा था, सै कब्रिस्तान च रेंदा था। 28 सै यीशुऐ जो दुरे ला ही दिखीकरी दोड़या, कने यीशुऐ जो इज्जत देणे तांई उदे पैरां अग्गे डेई पिया। उनी जोरे ने चिलाई करी बोलया, “हे यीशु, परमपिता परमेश्वरे दे पुत्र। मिंजो तिजो ने क्या कम्म? मैं तिजो ने बिनती करदा है, मिंजो दुख ना दे।” 29 क्योंकि सै उसा बुरिया आत्मा जो उस माणुऐ ला निकलने दा हुकम दे दा था, क्योंकि सै उदे च बार-बार प्रबल होंदी थी। लोक उसयो रसियाँ कने सुंगला ने बनदे थे, तमी सै सब केसी जो तोड़ी दिन्दा था, कने बुरी आत्मा उसयो सुनसान जगा जो नठाई लेई जांदी थी।

30 यीशुऐ उसयो पुछया, “तेरा क्या ना है?” उनी बोलया, “मेरा ना सेना है, क्योंकि मतियां बुरियां आत्मा उदे च समाई गियां थियां।” 31 कने उना उसला बिनती किती की, “सांझो अथाह कुंडे च जाणे दा हुकम मत दींदा।”

32 ओथु पाहड़े पर इक बड़ा बडा सूअरां दा झुण्ड चुग्गा दा था, उना उसला बिनती किती, “सांझो उना च समाणा दे।” कने यीशुऐ उना जो जाणा दिता। 33 तालू सै बुरियां आत्मा उस माणुऐ ला निकली करी सूअरां दे झुण्डे च समाई गियां कने सै झुण्ड पहाड़े ला रिड़की करी दरियाये च पेई गिया कने सारे सूअर डूबी करी मरी गे।

34 उना दे पुहालां नठी करी शेहर कने ग्रांऐ च ऐ खबर सुणाई। 35 कने जड़ा होया था लोक उसयो दिखणा आये कने जिस माणुऐ ला बुरियां आत्मा निकलियाँ थियां, उसयो यीशुऐ बखे कपड़े पाइकरी कने ठीक -ठाक बैठया दिखीकरी सै डरी गे। 36 कने दिखणे बालयां उना जो दसया, की सै बुरियां आत्मा ने सताया होया माणु कियां ठीक होया। 37 तालू गिरासे दे लोकां दे देशे अखे-बखे दे लोकां यीशुऐ ने बिनती किती, की साड़े ऐथू ला चली जा: क्योंकि सै बड़े डरी गियो थे। कने सै किस्तिया पर चढ़ी करी चली गिया।

38 जिस माणुऐ चे बुरियां आत्मा निकलियाँ थियां, सै यीशुऐ ने बिनती करणा लग्गा, की मिंजो अपणे सोगी रेंणा दे, पर यीशुऐ उसयो भेजी करी बोलया। 39 “की अपणे घरयो बापस चली जा कने लोकां ने बोली दे, की परमेश्वरे तेरे तांई कदे बड्डे-बड्डे कम्म किते न।” कने सै जाई करी सारे शेहरे च प्रचार करणा लग्गा, की यीशुऐ मेरे तांई कदे बड्डे-बड्डे कम्म किते न।

40 जालू यीशु बापस ओआ दा था, तां लोक उसला खुशिया ने मिल्ले; क्योंकि सै यीशुऐ जो निय्याला दे थे। 41 यहूदी जंज घर दे सरदारां चे इक याईर नाये दा सरदार आया, सै यीशुऐ दी इज्जत मान तांई यीशुऐ दे पैरां अग्गे डेई पिया, कने उनी ऐ बोली करी बड़ी बिनती किती, “मेरे घरे जो चल।”

42 क्योंकि उदी बाहरां सालां दी इक ही कुड़ी थी, कने सै मरणे बाली थी। जालू सै चलदा था, तां लोक यीशुऐ पर डेई पोंदे थे। 43 कने इक जनानी जिसा जो बाहरां सालां ला खून चलणे दी बिमारी थी, कने उना अपणी सारी कमाई वेद्यां पिच्छे खर्ची बैठियो थी कने तमी कूदे भी हथे ला ठीक नी होइयो थी, 44 उना पिच्छे ला आई करी उदे कपड़े दे कुंणे जो छुता, झट उसा दा खून निकलन बंद होई गिया। 45 इस पर यीशुऐ बोलया, मिंजो कुनी छूता? जालू सारे मुकरणा लग्गे, तां पतरस कने उदे साथियां बोलया, “हे स्वामी, तू दिखा दा हे की तेरे अखे बखे इतणी भरी भीड़ है, कने तिजो पर ढेई पोंदे न।” 46 पर यीशुऐ बोलया, “कुनकी मिंजो छुता है मिंजो पता लगी गिया है की मिंजो ला शक्ति निकली है।” 47 जालू जनानिया दिखया, की मैं लुकी नी सकदी, तालू कमदी होई आई, कने उदे पैरां पर पेईकरी सारे लोकां सामणे दसया, की मैं तिजो कजो छुता है, कने कियां मैं झट ठीक होई गेई। 48 उनी उसा जो बोलया, “बेटी तेरा भरोसा जड़ा मिजों पर था उनी भरोसे तिजो ठीक कितया है, शांतिया ला चलिया।”

49 यीशु हले उसा ने गल्ल करा दा ही था, यहूदी जंज घरे दे सरदारे दे घरे ला कुछ लोकां आई करी बोलया, “की तेरी कुड़ी तां मरी गेई है” हुण गुरुऐ जो कजो तकलीफ दे दा है? 50 जड़ी गल्ल सै बोला दे थे, उसा गल्लां जो यीशुऐ अंणसुणी करिके यहूदी जंज घर दे सरदारे जो बोलया, “डर मत, सिर्फ मिजों पर भरोसा रख, तां उना ठीक होई जाणा।”

51 घरे आई करी उनी पतरस, कने यूहन्ना, कने याकूब कने कुड़िया दे माता-पिता जो छडी करी होर कुसयो भी अंदर नी ओणा दिता। 52 कने सारे उसा तांई रोआ दे थे, पर उनी बोलया, “रोआ मत; सै मरियो नी है पर सुतियो है।” 53 सै ऐ जाणी करी, की मरी गियो है उदा मजाक उड़ाणा लग्गे।

54 पर उनी उसा कुड़िया दा हथ पकड़या कने पुकारिकरी बोलया, “हे कुड़ी उठ।” 55 तालू उदे प्राण बापस आई गे कने सै झट उठी बैठी; फिर उनी हुकम दिता की, इसा जो कुछ खाणे जो दीया। 56 उसा दे माता-पिता हेरान होऐ, पर उनी उना जो चेतावनी दिती, की ऐ जड़ा होया है, सै कुसी ने मत बोलदे।