1 कुरिन्थयों के लिए पौलुस की चिट्ठी
1 कुरिन्थियन के निता पोलुस कर चिट्ठी
परचा
1 कुरिन्थियों के चेला पोलुस मसीह के जनम के करीबन 55 साल बाद 1:1 लिखे रथै, हमर लिघ्घो जउन दुइठे चिट्ठी हबै ओहमा लग हइ पहिला चिट्ठी हबै जउन पोलुस कुरिन्थियों के मंडली के निता लिखे रथै, करीबन ऊ हइ चिट्ठी इफिसुस हे अपन यातरा के दोरान मकिदुनिया लग आमै अउ जाय के रास्ता हे कुरिन्थी के अपन इक्छा यातरा लग पहिले लिखे रथै। 16:5-9
हइ चिट्ठी उन वरनन के परति किरिया हबै जउन पोलुस के मंडली कुछ सदस्य लग मंडली हे कइमेर अस्वस्थ के बारे हे मिले रथै, जेहमा विभाजन अउ सरीरिक सबंध सामिल हबै। कुरिन्थी सहर अपन सरीरिक सबंध के निता अच्छी मेर लग जाने जात रहै, इहैनिता हइ चकित के बात नेहको हबै कि उहां के मंडली इन मुद्दा के सामना करत रहै। 1 कुरिन्थियों हे माया बोहत बडा 13 सामिल हबै।
रूप रेखा
1. पोलुस कुरिन्थियन के सोगत करथै अउ उनखर निता भगवान के धन्यबाद करथै। 1:1-9
2. फेर ऊ कुरिन्थियन के मंडली हे विभाजन के बारे हे मिले हर वरनन के संबोधित करथै। 1:10—4:21
3. एखर बाद ऊ सारीरिक सबंध के मुद्दा के संबोधित करथै अउ अक दूसर के अदालत हे लइ जथै। 5—6
4. ओखर बाद ऊ काज, मूरतिन के बलि, साधारन पूजा, आतमिक उपहार अउ फेरै लग जिन्दा के मामला हे निरदेस देथै। 7—15
5. आखरी हे ऊ कुछ बेउहारिक अउ बेक्तिगत मामला के संग समापत होथै। 16
1
1 हमर भाई सोस्थिनेस के संग पोलुस के पार लग जेही भगवान अपन इक्छा के जसना यीसु मसीह के चेला बनै के निता चुने के निता बुलाय गय हबै।
2 भगवान के ऊ मंडली के नाम जउन कुरिन्थियुस हे हबै, जेही यीसु मसीह हे उनखर नाम, जउन मसीह यीसु हे पवितर करै गइन, जेही भगवान पवितर मनसे बनै के निता उनखर संग चुने हबै। जउन हर जिघा हमर अउ उनखर परभु यीसु मसीह के नाम लेयत रथै।
3 हमर बाफ भगवान के तरफ लग अउ हमर परभु यीसु मसीह के तरफ लग तुम सबझन के ओखर अनुगरह अउ सान्ति पाउत रहा।
मसीह के दवारा आसिरबाद
4 तुमही यीसु मसीह के दवारा भगवान कर अनुगरह पाय हबा। एखर निता मै अपन भगवान के सबदिना धन्यबाद देथो। 5 मसीह के संदेस तुम्हर बीच हइ मेर के मजबूत हुइ गय हबै कि तुम मसीह हे सगलू बातन, सगलू बचन अउ सगलू ग्यान के सबैमेर के बरदानन लग भरपूर हुइ गय हबा। 6 मसीह के बारे हे हम जउन मेर संदेस दय हबन ऊ तुम्हर बीच गवाह हबै। 7 तुम्हर हे कउनो मेर के बरदान के कमी नेहको हबै, अउ तुम हमर परभु यीसु मसीह के परगट होय के निता ओरगथन। 8 भगवान तुमही आखरी तक बिस्वास हे मजबूत बनाय रखही, जेखर लग तुम हमर परभु यीसु मसीह के रोज तक बेकसूर पइहा। 9 भगवान बिस्वासओग हबै, उहै तुमही अपन टोरवा हमर परभु यीसु मसीह के संगति हे बुलाय हबै।
मंडली हे दरार
10 हे भाई अउ बेहन, मै तुम्हर लग हमर परभु यीसु मसीह के नाम लग बिनती करथो, कि तुम्हर हे कउनो लडाई झगडा झइ होय, तुम सबझन अक संग मिल के रहा, अक्ठी मन अउ अक्ठी उदेस्य हे रहा।✡बेवस्थाबिबरन 7:9 11 काखे हे मोर भाइयो खलोय के परवार के मनसेन लग खबर चले हबै कि तुम्हर बीच आपसी हे झगडा हबै। 12 हे मोर भाई अउ बेहन मोर कहे के मतलब हइ हबै कि तुम्हर मसे कउ कथै, “मै पोलुस के हबो” ता कउनो कथै, “मै अपुल्लोस के हबो” तीसर कथै, “मै कैफा के हबो” अउ कउ कथै, “मै तो मसीह के हबो।” 13 का मसीह बटर गय हबै? का पोलुस तुम्हर निता क्रूस हे टंगरे रहिस? का तुमही पोलुस के नाम लग पानी हे बतिस्मा पाय हबा? 14 भगवान के धन्यबाद करथो कि मै क्रिसपुस अउ गयुस के छांड के तुम्हर मसे कउनो के पानी हे बतिस्मा नेहको दयों। 15 इहैनिता कउ हइ नेहको कहि सकथै कि तुमही पोलुस के नाम हे पानी हे बतिस्मा पाय हबा। 16 मै स्तिफनास के परवार के पानी हे बतिस्मा दयों, जिहां तक मोके सुरता हबै, मै एखर अलाबा कउनोन के पानी हे बतिस्मा नेहको दय हबो। 17 काखे मसीह मोके बतिस्मा देय के निता नेहको, पय संदेस सुनामै के निता पठोय हबै, मै हइ काम के निता मनसे के ग्यान लग सगलू भासा के निस्तार नेहको करेव, जेखर लग मसीह के क्रूस के संदेस बेकार ठहरय।
मसीह भगवान कर सक्ति अउ ग्यान
18 जउन नास होय बाले रास्ता हे चलथै, उन क्रूस के ग्यान के मुरखता समझथै। पय हमर निता जउन मुकति के रास्ता हे चलथै, ऊ भगवान के सक्ति हबै। 19 काखे मूसा कर किताब हे लिखवरे हबै,
“मै ग्यानिन के ग्यान नास करिहों,
अउ समझदारन के समझ के बेकार के दइहों।”✡यसा 29:14
20 हइ दुनिया के ग्यानी मनसे, गुरू अउ मूसा कर किताब के जानकार कछो हबै? का भगवान हइ दुनिया के ग्यानिन के मूरुख नेहको ठहराइस?✡रोमियो 1:22
21 भगवान अपन दिमाक के जसना कबहुं हइ नेहको चाहिस कि हइ दुनिया अपन ग्यान के दवारा भगवान के झइ चीन सकै। इहैनिता भगवान संदेस के परचार मूरखन के दवारा बिस्वास करै बाले के मुकति दे। 22 यहूदी तो चिन्ह मांगथै अउ यूनानी ग्यान चाहथै। 23 पय हम तो ऊ क्रूस हे टंगाय गय मसीह के परचार करथन, जउन गैर यहूदिन के निता ठोकड के कारन हबै अउ आने यहूदी के निता मुरखता हबै। 24 पय भगवान के चुने हर मनसे के निता, चाहे उन यहूदी होय या यूनानी, इहै मसीह भगवान के सक्ति अउ भगवान के ग्यान हबै। 25 काखे भगवान के मुरखता मनसेन के ग्यान लग बोहत ग्यान मान, अउ भगवान के ढिलवा मनसेन के सक्ति लग बोहत सक्तिसाली हबै।
26 हे भाई अउ बेहन अपन बुलाय जाय के बारे हे सोचा कि दुनिया के नजर हे तुम्हर मसे बोहत कम मनसे ग्यानी, सक्तिसाली अउ होसियार रहिन। 27 ग्यानिन के बेज्जती करै के निता भगवान उन मनसेन के चुने हबै, जउन दुनिया के नजर हे मूरुख हबै। सक्तिसालिन के बेज्जती करै के निता भगवान उन मनसेन के चुने हबै, जउन दुनिया के नजर हे ढिलवा हबै। 28 भगवान दुनिया के उनही चुनिस जउन नीच हबै, बेकार हबै जिनखर लग घिनाथै, अउ जउन कुछु हइ नेहको हबै। भगवान इनही चुनिस ताकि दुनिया जेही कुछ समझथै, उके ऊ नास के सकै। 29 जेखर लग कउनो मनसे भगवान कर आगू घमंड झइ करै। 30 उहै भगवान के बरदान लग तुम यीसु मसीह के अंग बन गय हबै। भगवान मसीह के हमर ग्यान, धरमी काम, पवितर अउ पाप लग मुकति करै बाले बनाय दइस।✡इफिसियों 1:7; रोमियो 8:1 31 जसना कि मूसा कर किताब हे लिखवरे हबै, “अगर कउ के घमंड करैका हबै ता ऊ परभु हे घमंड करै।”✡2 कुरि 10:17